[1] Maantoo geeddi Yeesso uranti minki Waakhe buure ka 'doo'd ayti Waakh abcho, Wori Haaggan la cheeko, kuhaaniyyohi wewween ichoow tagaammeti amurre ichoow ewweenki Ya'huud ba Yeesso iyimaateen.
[2] Wihi icho iyidaaheen, “Bal nah isoocheek, antohi at wahanyeyyoha kahaaggisso a weheeyya? Antoha ayyo kisiiche?”
[3] Wihi us ilaabe, “An laka wohoo atin worsada, bal isoolaaba.
[4] Yoohanahi Enenyet Baattissiyo, antohi us enenyet kabaattissiyo, Waakhe kayimaateen, bal enenyet?”
[5] Iskaleehawwoocheene wihi icho isiyidaaheen, “Chi'inno, ‘Waakhe kayimaateen,’ nadeeh, mehe inno iyadeeh ya, ‘A i'doh irummeysanna?’
[6] I'daasenyi chi'inno, ‘Enenyete kayimaateen,’ nadeeh, 'doo'd tuumman dagahe inno kachiba, i'di tahe icho tuumman Yoohana eti Waákh íyeyyeedo iche ikhaataan.”
[7] 'Deerka wihi icho ilaabeen, “Inti icho kayimaateen ma garanni.”
[8] Yeesso la iiyeyye, “Ani laka antohi an wahanyeyyoha kahaaggicho ma atin isoocheeko gon.”
[9] Yeesso toro mammahta 'doo'd ibahche wihi us iyidah, “Etoo geeyohi sabiibe gosiis goyaka il gesse, gosiis lakireeste, ulla geeddi deer sulhaassoo irte.
[10] Maanti gurnaan lagurti ka, eti gos leh ilbooyiiskoo 'doo'di gos kireeste iergate, 'dee gisi gurnaankiiski sabiib wohoo a siicheen. I'daasenyi 'doo'di gos kireeste ilbooy jahe dahano marah soo'diiche.
[11] Ilbooyoo addan ergate, i'daasenyi kaas laka jaheene, lakhaanyo kadoweene, dahano marah soo'diicheen.
[12] Ki seyyahnaatteet toro ergate, kaas la gaameereene, gos khariis isayeen.
[13] “Eti gosi sabiib leh 'deerka wihi us yidah, ‘Mehe yeelo? Inankaaya erga, ki an weyti 'doono. Kolossoo usu a inkaanyitta.’
[14] “I'daasenyi chirri 'doo'di gos kireeste usu arge ka, ayta iskaleehawwooche, mehe isiyidaaheen ya, ‘Ki dahal leh kalla. Nigaase 'dee dahalhiis weheen a yitaaheen.’
[15] 'Deerka gosi sabiib khariis ijiiteene, yigaaseen. “Kamalda bal, eti gosi sabiib leh 'deerka icho mehe yeela?
[16] A yamiite, 'doo'daas gos kireeste bakkicha 'dee gos 'doo'doo addan gessa.” Chirri 'doo'd ayta daage ka wihi us yidah, “Waakh meesseen bujiiy!”
[17] Yeesso 'doo'd indo katoolliche, wihi us worsate, “Cha'atin i'daas elattaan, Chiirnaanka bal kamalda. “‘Daakki 'doo'di minan diso 'dii'de, iche tirrinki dagaheete min tiiro yitah.’
[18] Eti tuummane daakkaas sartiis kakufe a jejjeba, i'daasenyi chirri daakkaas etoo kasoodihe etaas a urkaha.”
[19] Tagaammeti amurre ichoow kuhaaniyyohi wewween la jiti iche Yeesso chirraas on kakhabatti yowteen. A mehe saggi us mammahtaas ka woricho ikaayyeedo iche garteen. I'daasenyi 'doo'de karooraan.
[20] Weynaanti Ya'huud weyti Yeesso fiirisse. 'Doo'doo 'degeyenye 'doo'di fiffissan iskaayyeelo ergateen, ichohi Yeesso yeediis ka angey gessaane 'doonaane, 'dee miig ichoow antohi gaafana idiibaan.
[21] 'Doo'da 'degeye wihi us Yeesso worsate, “Eti ween! Saggi at wihi rummaat ikaayyeeddo toro enenyet iabisso a garanna. Toro la enenyet seley ma sassaahto, i'daasenyi jiti Waakhe at enenyet abisso ichoow runti Waakh a israahaan.
[22] Kaaysarhi weene inno kooddi igunno a mujjum a bal mujjum mee?”
[23] Yeesso la dowwa on luhticho kase wihi us iyidah,
[24] “Bal chilinkoo Rooma itusa. Foola ichoow magaha kachiiran a keyya?”
[25] Wihi icho ilaabeen “A koo Kaaysar.” Wihi us iyidah, “'Deerka Kaaysar wihi wihiise iguta, Waakh la wihi wihiise iguta.”
[26] Saggi icho 'doo'd ortiis ka wihi us yidah ka angey igessaan waayeen. Wihi us soolaabe kagirmeesteene, gammadicheen.
[27] 'Doo'doo Sadukaayo Yeesso iyimiyye wohoo worsate. 'Doo'da la 'doo'di tuume berri ma sookaho iche essa.
[28] “Eti ween, Muusa goorat mehe inno ichiire ya, ‘Chi' etoo walaaliis yumuyye, makhaabál katabe i'daasenyi nyaakhut ikhabin, etaas makhaabassaas a disti, walaaliis nyaakhut a idelo.’
[29] Reeroo teebeenye isleedesse a jire. Ki ween min diste, nyaakhut laan buje.
[30] Ki lammaatteet ichoow,
[31] ki seyyahnaatteet makhaabassaas disteene, saggaas on u teebaccho ba disteene, yumaateen, nyaakhut icho katabeen mele.
[32] 'Da'ddaboka makhaabale laka bujje.
[33] 'Deerka maanti 'doo'di tuume lasookahcho, etichekoh makhaabassiis tateeh teebaccho la a disteenee?”
[34] Yeesso wihi us ilaabe, “'Doo'di harrata min a dista toro mindischo ka laka ladiiba.
[35] I'daasenyi 'doo'di Waakh 'doo'di fiffissan iekkaacho omoot lakasookahcho goobi Waakh furti, min ma disti ommos mindischo ka ma ladiibo.
[36] 'Doo'da omootti us yamuut ma yabuu'd, a mehe icho a i'di herti Waakh. Omoote lakasookahche gone, icho a nyaakhuti Waakh.
[37] I'daasenyi chiirnaanki geeyi hidaad kagubti ka, Muusa laka saggi 'doo'di tuume omoot ikasookaho a tuse. A mehe us Kamur mehe kawahe ya, ‘Waakh Aburaaham, Waakh Isakh, Waakh Yaakoobo.’
[38] Usu Waakkhi 'doo'di tuume mee, i'daasenyi a Waakkhi 'doo'di jiro. A mehe usu ka enenyet tuumman a noolyahe.”
[39] Tagaammetoo amurre wihi icho yidaaheen, “Eti ween rumanka wahaas a ayti haaggan.”
[40] Et usu wohoo addan worsan iggo la mele.
[41] Yeesso 'deerka wihi us icho iyidah, “A i'doh tagaammeti amurre Ki Lasubhe a hiiy Dawuud ielatta?
[42] Dawuud rubeytiis Buuggi Sabuur ka mehe cheeka ya, “ ‘Waakkhi Kamure wihi us Kamureey iyidah, “Dabankeeyki miigeete antoot orrommo,
[43] ichoowka chiiytaah tuum dahanohaah a soogesso.” ’
[44] Dawuud rubeytiis usu Kamure kawaha, saggoh 'deerka Ki Lasubhe hiiy Dawuud iyahe?”
[45] Geeddi urur dagansati Yeesso wihi us abattitiis iyidah,
[46] “Tagaammeti amurre yuubsada! Wihi icho weyti 'doonaan a ichohi darfohi hahhaaggane derdeer leesohti, toro la sokkoyyo ka weyti inkaanyit ka labariiticho. Toro la chi' minki weysiite Ya'huud ommos sukuukuyyo lagele, wihi icho weyti 'doonaan a ichohi meessi weyti lakiinkaanyito orronti.
[47] 'Doo'da muunkhoyyo ekkeesta, hoolahicho kakhaataan. Chi'iche weysatti la, enenyeti haaggane iskaayyeessa, weysi derdeeraassa. 'Doo'da Waakh sinati weyti kutto igoocha.”