[1] Saahka toro Kamur reeroo addane tomon teeba ichoow lammee soobahche, et lallamma ka iska'dare, ilkerengeeto ichoow meessi tuummane us dowwanoha ka sooirti iergate.
[2] Wihi us iyidah, “Gurnaan a buure, i'daasenyi 'doo'di hil haaggicho a koo rucchul. Maantaka Kamuri gurnaan leh daaha, 'dee 'doo'di ittaawenye gurnaan soogoocho a sooergo.
[3] Nyaama! An saggi makhassi iiyyaate yaay goya liifahe, iche atin ierga.
[4] Chilimme ommos urgo ommos kobohoo addan akhaatanna. Eti atin jit ka'hesseen tuumman la abariitinna.
[5] “Chirra atin minkoo gessaan, koloo weesda, wihi atin tadeehiin, ‘Waakh ba minka nebey kakaala.’
[6] Chirri etoo nebey 'doono intaas kajiro, Waakh minkaas a imaala. Chirri iche i'daas ieheynan la, Waakh minkaas nebey ma kakaalo.
[7] Minkaas on fiddiya, walahbaaw icho atin siichaan amha toro dama. I'di tahe eti hil haaggicho hili us haaggicho ka a laguta. Kolba la minkoo akabahina koo agelina.
[8] “Chirri atin ilkerengeettoo gesseene 'doo'di ilkerengeettaas atin martiiste la, wihi atin lasiiche on amha.
[9] 'Doo'di khakkhannane ilkerengeettaas kajiro samaacha, wihi atin itadeehiin, ‘Dakhi Waakh kola a atin isoodowwaate.’
[10] I'daasenyi chirra atin ilkerengeettoo gesseene atin liimartiisan, jitassi ilkerengeeteet ibaha, wihi atin tadeehiin,
[11] ‘Ebeeri ilkerengeettiinna luhlo nah kaangago laka atin on atin isahna, waha la saggi Waakh sina atin ituso iche tusaan. I'daasenyi waha abda, dakhi Waakh a soodowwaate.’
[12] Wihi an atin icheeko, ibeenki Waakh 'doo'd hukkumo, sinati Waakh 'doo'di ilkerengeetti Soodom yiil tuse deefta sinati Waakh ilkerengeettaas tuso ka.
[13] “Atinhi ilkerengeetti Choorasin taalliin sinati atin sugto eenna a buure! Atinhi ilkerengeetti Bessaayda taalliin sinati atin sugto eenna a buure! I'di tahe chirri wihi ittaawenye weeli enenyet yeelin iubaa'dane goytiin ka layeele goorat ilkerengeetti Tiiro ichoow ti Siidon ka layeele, 'doo'daas uskeelicho a kasoonokhte, 'deerka inga'daa'diyyo gessate, bombey koorronte.
[14] I'daasenyi ibeenki Waakh 'doo'd hukkumo, sinati Waakh 'doo'di ilkerengeetti Tiiro yiil ichoow 'doo'di ilkerengeetti Siidon yiil tuse iche deefta sinati Waakh atin tuso ka.
[15] Atinhi ilkerengeetti Kafarnaa'hum taalliin la, kol serey atin liiokkhicho koogtahiin? Mele, meessi 'doo'di tuume kijiro iche ikhubattaan!”
[16] “Eti nabah atin isudo, ani nabah isuda. Eti atin 'dii'do la ani i'dii'da. I'daasenyi eti ani i'dii'do, eti isooergate 'dii'da.”
[17] Reeri tomon teeba ichoow et lammee usuhi hamaado soonokhte, wihi us yidah, “Kamur, ginnayyo laka chirri nah magahaah on wahne, yeedeenyo a raahaan!”
[18] Yeesso wihi us ilaabe, “Aa, a rum! Ani Seytaanki i'di bakkaal u serey kasoodihe a arge.
[19] An antohi atin toofaf ichoow arraaro kayabattaan a atin siiche, toro la miigti atin miigti chiiytan kasoorissaan a atin siiche. Walah atin gaameero mele.
[20] I'daasenyi ginnayyohi afiin ikutin iihamaadina, i'daasenyi jeenteti magahenyetiin buuggi goobi Waakh goya liikachiire ihamaada.”
[21] Yeesso chirraakka usuhi Rubeyti Munyee hamaadi buure ka rubeytiis buuhisse, wihi us yidah, “Aabbahaaw, Kamuri serey ichoow harra ba iween, a kikoolicha. I'di tahe at wahanyeyyoha 'doo'di kharayyeenye toro la weyti soome a kadagisse, 'doo'di i'di nyaakhutenye wohoo igaran la tusse. Aa! Aabbahaaw, wihi kaahamaadicho gon wahaase.
[22] “Aabbaheey walah dakkhan dahantaaya soogesse. Aabbahaaya on menye et rumanka eti Weeliis yahe garti mele. Toro la Weeliis ichoow 'doo'di Weeliis ibabbakkaahin 'doono on menye, et rumanka eti Aabbaheey yahe garti mele.”
[23] 'Deerka abattitiis iurgiye, dagsi ka wihi us iyidah, “Waakh indohi waha atin agartaan argo a imaale.
[24] A mehe wihi an atin isoocheeko, 'doo'di ittaawenye Waákh íyeyyeedo ichoow karnato ba ichohi waha toolla atin agartaan argo a 'dooneene i'daasenyi ma argin. Wihi atin toolla daagtaan daagin a 'dooneene, i'daasenyi ma daagin.”
[25] Maantoo etoo tagaanki amurree, usuhi Yeesso kajo 'doona, tolossate, wihi us worsate, “Eti ween, mehe yeelo 'dee jiroti jirtuu imassan 'helo?”
[26] Yeesso wihi us ilaabe, “Amurre Muusa mehe kachiiran? At saggoh yeedaas ikhaatta?”
[27] Wihi us ilaabe, “ ‘Kamuri Waakkhaahe uuraah tuumman ka ichoow rubeytaah tuumman ka ichoow miigtaah tuumman ka ichoow malaah tuumman ka 'doon.’ Ichoow, ‘Ollokkaah geeddi at is'doonto 'doon.’ ”
[28] Yeesso wihi us ilaabe, “At a eysiisse, tab gi'de wahaas yeele, 'dee jiroti imassan 'hel.”
[29] I'daasenyi et saggi wihi us kootte worsate mujjum iyahiine tusa, wihi us Yeesso worsate, “Ollokkeey la a ayyo?”
[30] Yeesso la wihi us ilaabe, “Etoo ilkerengeetti weene Yeerusaleeme kabahe, ilkerengeetti Yeeriko ikhubte. Ildah raahaayi, chiftatoo isoobahte, jahte gaad kabihisse, usuhi rubeytoo rucchul khabo katabte.
[31] Yomboka etoo kuhaanee baabul on jitaas leeyimiyye, chirri us eti lajahe arge ka, jit 'dossiis tabe, eti lajahé kakute.
[32] I'daasu laka etoo goob Laaweenye kuhaaniyyo gargaaro chirri us meel yimiyye us et arge ka jit 'dossiis tabe kute.
[33] I'daasenyi etoo ili Saamariyeenye yeelan sulhaal kijiraayi, inti et kijiro yimiy. Chu'us eti lajahe arge ka, uur isoonugleeste.
[34] Et idowwaate, subakki geeyi oolif ichoow farsoti sabiib kadeye, toro jiissiis darfo kayuube, et eheliis korche, looj geeche, intaas ka gargaare.
[35] Ibeenki kaas sooraaho ka chilimmeti eti orrah lamma hil haaggiche laguto soobahche, eti looj iween idiibe toro wihi us iyidah, ‘Eta mujjum yaakhiche, maanti an soonokhde wihi us kagolossate ichoow wihiiski addan tuumman ani a kisooguto.’
[36] “Ati ka 'doo'da seyyahe goyaka, koh eti chifta jahte i'di ollokkiiski sam iyitah?”
[37] Eta tagaanki amurree la wihi us ilaabe, “A eti eta uur isoonugleeste on gon.” Yeesso la wihi us iyidah, “Tab gi'de, at laka i'daas yeel.”
[38] Yeesso ichoow abattitiis la 'dulaani gooboo makhaabassoo Maarta layadeeh kajirto yimaateene, iche la martiisatte.
[39] Maarta la walaassichetoo Maariya layadeeh a jirta. Maariya la luhlo Kamur hagga fiddiita, yeed Yeesso dagansatta.
[40] I'daasenyi Maarta hili iche haaggisso weyti leebuuraate, wa'dwaa'd gele, timiyye wihi iche Yeesso worsatte, “Kamur, ati ka maanta a haaggantahe chirri walaasseey hil tuumman ani on ilee'diisso? Kaale igargaar idah!”
[41] Kamur wihi us ilaabe, “Maarta, Maarta! At wa'dwaa'di holi at dowto matah kiyaham.
[42] I'daasenyi wohoo kalday on la'doona. Maariya la a eysiisse, wihi haaggane etoo kalday laka ikakhaatin yeesse.”