[1] Yeesso maantoo beyti Gennaasarete toolla, enenyet la usu kuurure Yeedi Waakhe dagansataa.
[2] Ulla koobanhoo lammeenye beytaas afiche lakatabe arge. 'Doo'di kooban leh la oroohti bahag lakakhabti iche dikha.
[3] Yeesso koobanhoo kore. Koobanha la eti leh a etoo Siimon layadeeh. Yeesso la leeyeede 'dee kooban a leetakho bey afiche i'daaru a kaseehicho. Yeesso 'deerka kooban goya orronte, Yeedi Waakh 'doo'd abche.
[4] Inkoo us yeediis massiche ka, wihi us Siimon iyidah, “Bal kooban inti bicche kahogyahiin iwoye, 'dee oroohtiin bicche goya iseya, bahag khabda.”
[5] Siimon wihi us Yeesso ilaabe “Eti ween, nah ibeenki noole hol downe, bahag nah khabanne la mele. I'daasenyi jeenteti at i'daas itidah u, oroohti bahag lakakhabti bey goya a kalug'da on gon.”
[6] Orooh bicche goya kalug'deene, bahaggi weyti ittaawe khabteene ichoowka oroohe soogoote.
[7] 'Deerka wahalhichoki koobanhi addan fuulo dahan ka waheene, 'dee a gargaareen. Icho la yimaateene, kooban lammacho bahag labuuhiche ichoowka kooban bicche goya kabaabiin leheet.
[8] Chirri Siimonhi Beetero layadeeh wihi yitah arge ka, inkaanyit ka Yeesso ortiis ka jilbo il kagu'dde wihi us iyidah, “Kamur an a eti uskeel leh, nyaam ikatab.”
[9] A mehe Siimon ichoow wahalhiis tuumman ba bahaggi ittaawenye icho khabteen ka weyti girmeesteen.
[10] Yeele Sebedaayoti iche laka Siimon walhisse, Yaakoobo ichoow Yoohana leh laka weyti girmeysatte. Yeesso la wihi us Siimon iyidah, “Roorro akhabin. Uus toolla kakhabatti, enenyete Waakh ikeenta.”
[11] 'Deerka koobanohicho jiiteene bey afiche geesse, walah tuumman katabte, Yeesso raahte.
[12] Yeesso ilkerengeettoo kajiraayi, etoo bu'datoo uskul sar tuumman kasoofoofte yimiy. Chirri us Yeesso arge ka fool il kakhabte hawwaaste wihi us iyidah, “Kamur, chirri at 'doonto at bi'dir ibihin a tabuu'd.”
[13] Yeesso dahan ooge, et 'daare, wihi us iyidah, “A 'doona, bi'dir bah!” Chirraas on et bu'da kabahte.
[14] Yeesso la amur ibahche wihi us iyidah, “Etoo kalday laka jit ka aleeyeedine, i'daasenyi kuhaani iiro saggi at isamaatte istus. Sadakhati amurre Muusa kachiirane eti bu'da lakabahche bahcho bihiche, 'dee garti saggi lakisamaache a titaahe.”
[15] I'daasenyi wori Yeesso miinsan weyti ilaas tuumman kataa'he, 'deerka 'doo'di buure yimiyye wihi us 'doo'd abcho dagansate, 'doo'di khakkhannan laka yimiyye lasamaache.
[16] I'daasenyi Yeesso kolassi ittaawe intoo us keley kayahe irte Waakh wahte.
[17] Maantooka Yeesso Yeedi Waakhe 'doo'd abcha, Farissaayotoo ichoow tagaammeti amurre la intaase fiddiyaan. 'Doo'da la goobassi Gaalilaaya ichoow Ya'huudiya ichoow ilkerengeetti weene Yeerusaleeme kayimaateen. Kamur la Yeesso miigti us 'doo'di khakkhannan kasamaacho a siiche.
[18] 'Doo'doo la etoo sar tuumman hanjaawte ilaal kasoosi'de, ichehi min goyaka Yeesso ortiis tassille 'doontaa.
[19] Chi'iche jeenteti urur buur iyahuu, inti iche gatto waayte ka, min sartiis korte. 'Dohtoo yeesse, et ilaaliis khabaayi 'dohtaas ka il isoowoyte ichoowka urur ukkuriis ka Yeesso ortiis tissil.
[20] Chirri Yeesso saggi 'doo'daas ikakhuufo arge ka, wihi us etaas iyidah, “Aalaaw, uskeelaah a liikaakute.”
[21] Farissaayo ichoow tagaammeti amurre wihi icho uurassicho goyaka esseen, “Eta gafo a ayyo? Ayyo enenyet uskeeliis ikakuta, Waakh on menye?”
[22] Yeesso la wihi icho kamassaan garte, wihi us worsate, “Mehede malassi i'daase uurassiin ka idowattaan?
[23] Mehe maanta ki addan ka'dabakhe, chirri an, ‘Uskeelaah a liikaakute,’ iadeeh a ommos an, ‘Kahe soho’ iadeeh?
[24] I'daasenyi saggi Ínam Aadam antohi us harrata ka enenyet uskeel ikakuto ikhabo a abattaan.” Wihi us eti sare hanjaawte iyidah, “Wihi an kisoocheeko, tolosso ilaalaah okkhiche, goob iro!”
[25] Et chirraas on 'doo'd tuumman ortiis ka tolossate, wihi us kajiife okhsate, usuhi Waakh saa'do goob irte.
[26] 'Doo'd tuumman girmeeste, Waakh saa'de. Icho tuumman roorro gesse, wihi icho yidaaheen, “Maalinka girmo a agarre!”
[27] Waha 'dubicho ka Yeesso bahe, sohtaayi etoo kooddi goocho magahiis Laawi layadeeh, usuhi meessi kooddi lakagoocho goya fiddiyo wihi us iyidah, “Isooraahe, abattiteey ateeh!”
[28] Laawi la kahe, walah tuumman katabe usu raahe.
[29] Laawi saahka goobiis ka sukuukuhi buure Yeesso ibahche, ururi buurenye 'doo'doo kooddi goocho illeh kijiraan ichoow 'doo'doo addan icho a leegolossata.
[30] I'daasenyi Farissaayo ichoow tagaammeti amurre iche laka Farissaayee nyunnyuute wihi iche abatti Yeesso itidah, “Atin a i'doh 'doo'di kooddi goocho ichoow ki uskeel leh ileegolossattaan?”
[31] Yeesso wihi us ilaabe, “'Doo'di ilkitárri yowti ki feffeyyan menye, i'daasenyi a ki khakkhannan.
[32] 'Doo'di an iimiyye an waho, ki 'doo'di fiffissan isiekkaacho menye, i'daasenyi a ki uskeel lehe, 'dee uskeelicho a kasoonokhti.”
[33] Icho la wihi icho Yeesso iyidaaheen, “Abatti Yoohana ichoow too Farissaayo kolassi ittaawe af a hidatta, weysatta, i'daasenyi taah a golossatta one walah danta.”
[34] Yeesso wihi us ilaabe, “'Doo'di mindischo yimiy geeddi us eti min disti leejiro af a hiita?
[35] I'daasenyi maane a tamiit, ti 'doo'd eti min disti lakakhaato. Maanassaase 'dee 'doo'd af hiita.”
[36] Yeesso 'doo'd imammahte wihi us iyidah, “Et goonankoo dafareete husub soogoocho, too raagan kadaddabo mele. Chirri us i'da yeele, dafarti husub a khakkharradiche, goonanki dafarti husub ichoow dafarti raagan la ma isgelaan.
[37] Ommolla et farsoti sabiibe husub urgohi uktoote raagan kachibo mele. Chirri i'da layeele, farsoti husub urgo a fuurissa doossa, farsotaas khubatta, urgo laka lawaaya.
[38] Farsoti sabiibe husub, urgohi uktoote husub on lakachiba.
[39] Et inkoo us farsoti raagan dame toro farsoti husub 'doono mele. I'di tahe mehe yadeeh ya ‘Farsoti raagane deefta.’ ”