[1] 'Deyoofiloow, 'doo'di buure a tirriinsate, wihi goyteen ka yitah chiire.
[2] Wihi icho chiireen a wihi 'doo'di uu' maanti kolooraate waha yitaaheen arge nah isoocheeke. Icho la hili Waakhe icho haaggicheen, a ki wori Waakh 'doo'd liicheeko.
[3] Toollaka ani rubeyteey walah tuumman uu' maanti waha yitaaheen mujjum goya a yeye, ichoowka mali an waha saggi icho iyitaaheen ikaasoochiiro gooche.
[4] An i'da a yeele 'dee runti wihi liiabche ubta.
[5] Maanti 'Herood karnati ili Ya'huudiya eheet, etoo kuhaaneenye Sakkariiya layadeeh a jire. Sakkariiya la a ki rabittoo kuhaaniyyoote Abiija layadeeh. Arantiis la Eliissabeet iche layadeehe, iche laka a ti gooboo ullaka kuhaaneenye Haruun layadeeh.
[6] Lammacho ba la 'doo'di Waakh ortiis ka fiffissane eheete, raahnaanki amurreti Kamur ichoow wihi Kamur enenyet ka'doono laraaho ka wohoo rucchul laka ma lakacheekan.
[7] I'daasenyi nyaakhut icho khabeen mele, i'di tahe Eliissabeet a mahane, lammacho la toro a araarroween.
[8] Maantoo Sakkariiya hiliiski kuhaani iche minki Waakhe buure ka haaggicha, a mehe koli rabitti kuhaaniyyohichooda.
[9] Kura gu'ddeene, hugunki kuhaaniyyoot ka Sakkariiya lasoobahche, eti minki Waakhe buure gelo Kamur uyuugge igubo yitah.
[10] Chirri saha'ddi uyuugge lagubo titah ka, 'doo'di Waakh wahti tuumman khar ka kulme Waakhe wahtaa.
[11] Hertoo Kamur Sakkariiya isoobahte, ga'daari uyuugge lakagubo miigtiis tolossatte.
[12] Sakkariiya uus arge ka nahe, weyti roorro gesse.
[13] I'daasenyi herta Waakh wihi iche itidah, “Sakkariiya roorro akhabin. Waakh weysihaah a daage, makhaabassaah la inankoo dessa. Maanti us desse la magahiis Yoohana daha.
[14] Maanti us desse la, ati weyti hamaadda 'doo'di buure la delmaattiis ka a kileehamaada!
[15] I'di tahe us Waakh ortiis ka eti weene yateeh. Ulla uus farsotoo rucchule sabiib laka af ka'daarin. U' dessi la Rubeyti Munyee usu a buuhissa.
[16] Ulla 'doo'di buurenye Issiraayele anki Kamuri Waakkhichee isoolaaba.
[17] Ulla miig ichoow rubeyti eti goorat Waákh íyeyyeedo Eliiya layadeeh khabe iche khaba, Kamúr ortiis sohta. Ulla ooyenye ichoow nyaakhutichooda isineybicha, 'doo'di yeed idaagin kharati 'doo'di fiffissan ilaaba, 'dee 'doo'd emeetti Kamur itannabicha.”
[18] Sakkariiya wihi us herti Waakh worsate, “Ani ichoow makhaabasseey ba a araarrowne, mehe tusa 'dee waha runticho igardi?”
[19] Herti Waakh wihi iche ilaabte, “Ani a Gaabiriyel. An Waakh ortiissa toolla, Waakkhane isooergate 'dee wora haaggane an kikeene kicheeka.
[20] Jeenteti at yeedeey irummeysan u, at a gammadissa toro yeyyeed ma tabuu'de ichoowka maanti mujjumenye yeedeey larummaacho.”
[21] Geeddaaas tuumman la 'doo'd Sakkariiya khar ka a suga. Icho la Sakkariiyahi geeddi deer minki Waakhe buure goya kamalmale kamasseen.
[22] Chirri us minki Waakhe buure goya kasoobaho, icho leeyyeedin ma yabuu'd. 'Doo'd saggi us minki Waakhe buure goyaka fooltabcho iarge kase. A mehe enenyet dahano kaleeyyeede, i'daasenyi yeedin ma yabuu'd.
[23] Chirri koliiski hili minki Waakh massate ka goobiis irte.
[24] Saahka makhaabassiisti Eliissabeet layadeeh uurowte, hay chan la min goya ma kabihin.
[25] Iche la wihi iche tidah, “Kamure ani waha iyeele. Ibeenneta a igargaare, heebti an ba'h goya kakhabo a ikabahche.”
[26] Inkoo Eliissabeet uuriche hay lih eleele ka, Waakh hertoo Waakhe Gaabiriyel layadeeh ilkerengeettoo Naasaret layadeehe boroofenhi Gaalilaaya kajirto iergate.
[27] Herta Waakh la farniinki weeloo Maariya layadeehe etoo Yuussuf layadeeh alkume iche khabta. Yuussuf la hiiy karnati Dawuud layadeehe kayimiy.
[28] Herta Waakh Maariya isoobahte wihi iche itidah, “Nebeytaah ma furatti, atihi Kamur weyti kijilhaate. Kamur a kileejira!”
[29] Yeedassa herta Waakh elatti weyti Maariya malalicheene, wihi liidowo aficho waayte.
[30] I'daasenyi herti Waakh wihi iche itidah, “Maariya roorro akhabin i'di tahe Waakh a kijilhaatee.
[31] At a uurowta, inankoo dessa, magahi at ibihisso la a Yeesso.
[32] Ulla eti weene yateehe, toro la Weeli Waakkhi Weyti Ween iche layadeeh. Kamuri Waakhe komborti antoote too aacchihiiski Dawuud layadeehe siicha.
[33] Ulla nyaakhut nyaakhut Yaakoobo jirtuu tuummamba dakhta, dakhiis la yombuu ma massati!”
[34] Maariya la wihi iche herti Waakh worsatte, “An mejel ma gardi gone, waha saggoh iyateehiin?”
[35] Herti Waakh wihi iche ilaabte, “Rubeyti Munyee a kisooyagta, miigti Waakkhi Weyti Ween i'di oosimeet u koogoogta. 'Deerka weela munyeenye dessi Weeli Waakhe layadeeh.
[36] Eliissabeetti uuraahe laka araarri goyaka weel a 'hessa. Ichehi goorat a mahan liidah toolla uuri hay lihe khabta.
[37] I'di tahe wohoo rucchule Waakh kamiigenye us iubaa'dan ma jiraan.”
[38] Maariya la wihi iche ilaabte, “An a falfati Kamure, wihi at tidah a yitaaheen gi'de.” Herti Waakh Maariya katabte.
[39] Saahka Maariya tannabatte dowwa ilkerengeettoo ili Yuuda kuro sarche kajirto iratte.
[40] Min Sakkariiya gesse Eliissabeet bariitisse.
[41] Chirri iche bariito Maariya daagte ka, weeli Eliissabeet uur kakhabto yuutte, Rubeyti Munyee Eliissabeet buuhisse.
[42] Eliissabeet riirte wihi iche tidah, “At rumanka deyyeho tuumman goycheka a lakimaale, toro la weeli at soodesso laka a liimaale!
[43] An a ayyo waha liiyeela ichoowka abar Kamureey laka ani itamiit?
[44] Uus an bariitotaah daage, weeli uureey goya kajiro laka weyti hamaade, birgi'de.
[45] Waakh ba atihi wihi Kamur kiyidahye sooyateeh rummeysatte kimaala!”
[46] Maariya la wihi iche tidah, “An weyti Kamur saa'da
[47] Rubeyteey la weyti Waakkheeyki 'Doorribee kahamaadda.
[48] I'di tahe anihi falfatiisenye nugul a ikasoo'hele! Uu' maalinka kholoyyo tuumman ani eti Waakh imaale iyadeehiin.
[49] I'di tahe Waakkhi Miig Leh wihi buurenye iyeele, magahiis la a munya.
[50] Kamur la kholoyyohi soomaro tuumman ka, 'doo'di usu karooro uure inugleesta.
[51] Dahantiisti miig leh ka wihi noole yeele. 'Doo'di uuricho goyaka eylajo seleye fide.
[52] Kamur karnatohi wewween komborohichoki antoot a kasookhube, i'daasenyi 'doo'di isnuglaacho a okkhiche.
[53] 'Doo'di raarahte wihi hahhaaggan ka dargiche, i'daasenyi kamurre dahano marah rihe.
[54] Waakh Falfatiisti yaafohi Issiraayel a gargaare, uur inugleeste.
[55] Aburaaham ichoow nyaakhut nyaakhutiis i'di us aacchinyeteen iyidah u ma kadabine, uur isoonugleeste.”
[56] Maariya geeddi hay seyyah Eliissabeet leefiddiite, saahka goob inokhatte.
[57] Maanti Eliissabeet hayohiche massateen ka, inankoo desse.
[58] Ollokkiche ichoow 'doo'di uurichee saggi Kamur weyti uur ikasoonugleeste daage, leehamaade.
[59] Inkoo weel teebatoo barye ka, 'doo'd khandihi weel yimiy. Icho la goorat magah aabbahiiski Sakkariiya layadeehe ibihin 'doonaane,
[60] i'daasenyi abartiis, “Mele, magahiis Yoohana layadeeh” tidah.
[61] Icho la wihi icho Eliissabeet iyidaaheen, “Etoo kaldaye kiinenye magahaas khabo mele!”
[62] 'Deerka aabbahiis dahano ka leeyyeedeene, magahi us weel ibahcho worsateen.
[63] Sakkariiya la reenkoo lakachiirti daahe, wihi us chiire, “Magahiis a Yoohana.” 'Doo'd tuumman la girmeeste!
[64] Chirraas on Sakkariiya toro afi goorat us waaye bahche, yeyyeede Waakh saa'de.
[65] 'Doo'di intaas kijiro tuumman roorro gesse, ili Ya'huudiya kuro khabo tuumman ka, enenyet wahanyeyyohane kaayyeeda.
[66] Eti tuummane yeeda daage la mal gele, wihi islaworsate, “Weela 'deerka berri mehe yateeh?” Wihi tahe, saggi miigti Kamur weela ileejirto iche laarga.
[67] Sakkariiyahi aabba Yoohanee Rubeyti Munyee buuhisse wori Waakh kaayyeede wihi us yidah,
[68] “Kamuri Waakkhi Issiraayele a lasaa'do! I'di tahe us 'doo'diis a soofure.
[69] Kamur 'Doorribehi miig khabo a inno siiche, ulla hiiy falfatiisti Dawuud layadeeh kayimiy.
[70] I'di goorat us 'doo'diiski munyayyeenye Waákh íyeyyeedo ka cheekuu,
[71] us chiiyteen a inno kajeycha, 'doo'di inno 'dii'do tuumman la ma inno kamiigowo.
[72] Toro Kamur ayyintiisti munyeenye us gooche, us aacchinyeteen uur isoonugleesti ma kadabo.
[73] Ayyintaas la a ayyinti Kamur aacchiheenki Aburaaham layadeeh igooche,
[74] saggi us chiiyteen inno ikaribo icheeke. Toro la a inno gargaara roorro laan hiliis haagginna,
[75] 'dee geeddi inno jirro tuumman 'doo'di munyeenye toro fiffissan ortiis ka nateeh.
[76] Inankaaw, at la eti Waákkhi Weyti Ween íyeyyeedo lakiyadeeh. At la Kamur ortiissa sohatta jit iharta,
[77] uskeelichoki liikakuto ka, 'doo'diis saggi Waakh iribo abissa.
[78] A mehe, Waakkheen uure nugulyahe toro a haagganyahe. Kamureen 'doo'diis a riba, banayhiis la i'di orrahti baryo sookortuu inno siicha,
[79] 'dee 'doo'di mug'dihi omooteet goya kajiro serey ka banay sootusa, inno yaakhicha, jiti nebeyeet inno gata.”
[80] Yoohana la weynaate, Rubeyti Munyee ka miigowe. Ulla hidaad on fiddiye ichoowka ibeenki us 'doo'di Issiraayel isoobaho yitah.