[1] Yeesso usuhi Rubeyti Munyee buuhisse hawti Yoordane 'dusso kasoonokhte, Rubeyti Munyee la woyte hidaad geesse.
[2] Seytaan la hidaad ka ibeen tomon affar Yeesso kajmeti uskeel kalugu'ddo ikeene, ulla ibeennetaas tuumman ma golossanne, 'da'ddaboka ankaye.
[3] Seytaan la wihi us Yeesso iyidah, “Chirri at Weeli Waakh tahe, daakka leeyeede makaate a yitaahe.”
[4] Yeesso wihi us ilaabe, “Chiirnaanneti Waakh wihi kachiiran, ‘Weeli enenyet golol kalday mee kanoolyahe!’ ”
[5] Seytaan toro Yeesso intoo deer iwoye, koloo kalday on yaafohi harra tuumman tuse.
[6] Seytaan la wihi us Yeesso iyidah, “Anto ichoow kamurroonki yaafoha tuumman a kisiicha. I'di tahe ani liisiiche, eti an siin 'doono la ani on siicha.
[7] 'Deerka chirri at iwahatte waha tuumman wahaahha yateehiin.”
[8] Yeesso wihi us ilaabe “Wihi chiiran, ‘Kamuri Waakkhaahe waho, toro la usu kalday on ihil!’ ”
[9] Seytaan toro Yeesso ilkerengeetti weene Yeerusaleem iwoye, minki Waakhe buure guutiis korche, wihi us iyidah, “Chirri at Weeli Waakh tahe, inta kanyaam.
[10] I'di tahe Chiirnaanneti Waakh wihi kachiiran, “ ‘Waakh hertiis amure ibahcha, iche la mujjum kiyaakhissa.
[11] Iche la dahanohiche ka serey kiokkhissa, uus 'dee luhtaah dagah gu'ddine.’ ”
[12] Yeesso wihi us ilaabe, “Chiirnaanneti Waakh mehe tadeeh ya, ‘Kamuri Waakkhaahe kajme agelin.’ ”
[13] Inkoo Seytaan Yeesso kajmeta uskeel kalugu'ddo tuumman kakaje ka, katabe ibeenki leemujjume leesuge.
[14] Yeesso miigti Rubeyti Munyee siisse khabaayi, boroofenhi Gaalilaaya inokhte. Wor Yeesso la harrataas tuumman kataa'he.
[15] Ulla minassi weysiite Ya'huud ka 'doo'd wori Waakh abche, 'doo'di daage tuumman la Yeesso saa'de.
[16] Yeesso ilkerengeetti Naasarete lakasooweynaache inokhte. Seeri Lanaso ka i'di orrangateet u minki weysiite Ya'huud irte. Ulla tolossate Yeedi Waakhe 'doo'd isoomaa.
[17] Khadaaboo yuubane etoo Waákh íyeyyeedo Isaaya layadeeh chiire liidiibe. Ulla khadaab furfure, inti waha kachiiranyahiin 'hele.
[18] “Rubeyti Kamur a ileejirta, i'di tahe usu a isubhe 'dee Wori Haaggan miskiino icheeka. Kamur a isooergate, 'dee 'doo'di uskeel hide saggi Kamur isoofuro icheeka, 'doo'di indo laa la Kamur indo a fura, 'doo'di sina lakawaaricho la Kamur sina a kabahcha.
[19] A isooergate 'dee gu'hi Kamur haaggiis 'doo'd tuso icheeka.”
[20] Yeesso 'deerka inkoo us waha soome ka, khadaab yuube, ilbooyi minki weysiit idiibe, orronte. 'Doo'di minki weysiit goya kajire tuumman la Yeesso indo katoolliche.
[21] Yeesso la wihi us 'doo'd iyidah, “Chiirnaanneta Waakhe toolla an soome atin daagteen maalinka a labuuhiche.”
[22] 'Doo'd tuumman haaggiis kaayyeede toro yeeda haaggane afiis kasoobahe kagirmeeste, wihi icho isworsateen, “Waha inam Yuussuf menya?”
[23] Yeesso la wihi us 'doo'd ilaabe, “Rumanka mammahta a isoocheektaan, ‘Ilkitarri issamaay! Wihi weeli enenyet yeelin iubaa'dane nah daagne at ilkerengeetti Kafarnaa'hum ka yeesse, ilkerengeettiin ka yeel.’ ”
[24] Wihi addane us yidah “Rume atin icheeka, et Waákh íyeyyeedo goobicho ka lakhaatti mele.
[25] Rumanka maanti eti Waakh íyeyyeedo Eliiya layadeeh jire, muunkhoyyohi ittaawe ili Issiraayel a kijireen. Maanassaas gu'h seyyah ichoow nyuus tuumman hir ili Issiraayel ma 'deyine, abaarti uskul harra tuumman gesse.
[26] Waakh Eliiya icho ma iergine, i'daasenyi makhaabassoo muunkheenye ilkerengeetti Sarefaate boroofenhi Siidon kijirto taal iche ierge.
[27] Maanti goorat eti Waákh íyeyyeedo Eliicha layadeeh jire laka, 'doo'di ittaawenye ili Issiraayel ka bu'dá sar kakhabo a jire. I'daasenyi Waakh kichekoo kaldach laka ma samaanne, eti kaldache us samaache, a etoo ili Siiriya kayimiyye magahiis Naaman layadeeh.”
[28] 'Doo'di kootte minki weysiit goya kajiro tuumman chirri us waha daage ka, weyti hollowe.
[29] Kaheene, Yeesso jiiteene, hali ilkerengeete kadisantahe tahariis geecheen, usu ankhar gaataanee.
[30] I'daasenyi urur goya iskagu'dde katabe.
[31] Yeesso 'deerka ilkerengeetti Kafarnaa'hume boroofenhi Gaalilaaya kajirto ikhubte, Seeri Lanaso ka enenyet Yeedi Waakh abin sookhabte.
[32] Icho la saggi us 'doo'd walah iabcho kagirmeesteen. A mehe woriis anto khaba.
[33] Etoo ginnatoo uskul dakhatti la chirraas minki weysiite Ya'huude goya kijira. Ulla weyti riire,
[34] “Wooy! Yeessohi Naasaret, nah katab!” yidah. “Nahe nah massin timiy? Ani alah eti at tahe a garda, at a Ki Munyeenye Waakh kayimiy,” yidah.
[35] Yeesso ginna leejaakhe, “Gammadiche etaas goya kasoobah!” iyidah. Ginna 'deerka 'doo'd tuumman ortiis ka et laga'dde, i'd addane iche tidah mele, et kasoobahte.
[36] 'Doo'd tuumman girmeeste wihi us isiyidah, “Ayta weyti a girma. A yeedi anto ichoow miig khabo, a mehe ginnayyo amur on ibahcha, icho la soobahaan.”
[37] Wori usu miinsan la ilassaas soodow tuumman kataa'he.
[38] Yeesso minki weysiit kabahe min Siimon irte. Seyyoh Siimon la sare weyti kululaatta, Yeesso gargaar daaheen.
[39] Ulla kagulguubsate, sarti kululaatti leejaakhe lakabukkhe. Chirraas on sookahte, icho goollin sookhabatte.
[40] Chirra orrahe dihto, 'doo'di khakkhannane sugeerreti yeerare khabo tuumman Yeesso liikeene. Yeesso la kooba dahano korche samaache.
[41] Ginnayyo 'doo'di ittaawe goya kabaheen ichohi riiro, “Ati Weeli Waakhe” essi. I'daasenyi Yeesso ginnayyo leejaakhe, amuri icho kaayyeedaan la tirte. I'di tahe saggi us Ki Lasubhe iyahe a gartaan.
[42] Baryo ka Yeesso inti enenyet ikajirin irte. 'Doo'd la usu yowta, chirri icho inti us kijiro yimaateen ka, usuhi icho katabo tirteen.
[43] I'daasenyi wihi us 'doo'd iyidah, “Wihi Waakh gooche, an a irda ilkerengeetohi addan ka laka Wori Haaggane dakhi Waakh miinsan 'doo'd icheeka. I'di tahe wahaase ani liisooergate.”
[44] Ulla ili Ya'huud ka minassi weysiite Ya'huud ka Yeedi Waakh cheeke.