[1] Chirra Yeesso minki Waakhe buure ka serey yeyo, 'doo'di kamurreenye sadakhaticho saanduukhi chilimme lakalug'do kichibo arge.
[2] Toro la makhaabassoo muunkheenye miskiinenye chilim lamma meel kalugu'dde arge.
[3] Ulla wihi us yidah, “Rume atin icheeka, muunkhota miskiine iche 'doo'di addan 'dirihiis wihi buure meel kalugu'dde.
[4] 'Doo'da tuumman kamurroonkicho ka sadakhatoore bahche, i'daasenyi iche, miskiinkiche ka wihi iche kanoossahe tuummane bihisse.”
[5] Abattitiis gaasoo minki Waakhe buurenye woriis kahawwoossa. Daddaabohi hahhaaggane lakadise ichoow wihi noole 'doo'd Waakh ibahche minkaas lakeeykode woricho kaayyeedeen. I'daasenyi Yeesso wihi us yidah,
[6] “Waha atin inta ka agartaan la, berri daddaabtoo kaldaye ti addan fuusso lakatabo ma jirto, icho tuumman a lasookhuba.”
[7] Icho la wihi icho worsateen, “Eti ween, wahanyeyyoha maantoh yateehiin? Mehe yateehe 'dee saggi waha dowwanoha ka isooyateehiin tusa?”
[8] Wihi us ilaabe, “Yuubsada, uus atin leekkeysan. A mehe 'doo'di ittaawenye ani iskaayyeelo yamiite, ‘Ani a Ki Lasubhe,’ essi toro ‘Ibeen a soodowwaate,’ essi a agartaan. Icho araahina.
[9] Maanti atin yaafohi isdiho ichoow 'doo'di il baabiicho daagteen anahina. Wahanyeyyohane koloo yateehe, i'daasenyi ibeenki yomboot chirraas on ma yateeh.”
[10] Yeesso toro wihi us icho iyidah, “Sirgaalle a isdihta, karnato laka isdihaan.
[11] Ilassoo ka harra weyti sesseehta, ilassoo ka laka nabhayye ichoow sugeerreti ittaawe tamiit. Wahanyeyyohi buurenye enenyet kanahcho ichoow wahanyeyyohi miigti Waakh tuso serey ka a soobahaan.
[12] “I'daasenyi geeddi waha tuumman iitaahan a atin khabtaane, sina atin omhichaan. Minassi weysiite Ya'huud ka atin lahukkuma toro jeelayyo atin lageecha. Karnatte ichoow gaafanayyo atin liigeecha, waha tuumman la a jeenteti atin abattiteey itahiin.
[13] Waha ka la garti Wori Haaggan iche tateehiin.
[14] I'daasenyi uurassiin goyaka goocha, orey on saggi atin isikaayyeeddaan ka awa'dwaa'dina.
[15] A mehe an yeedi atin tadeehiin ichoow khara a atin siicha, 'dee chiiytiin tuumman goyaka koo atin tirrimin yabuu'd mele ommos et runti atin cheekteen 'dii'do mele.
[16] 'Doo'di atin dele ichoow walaalinyetiin ichoow goobiin ichoow aalassiin laka 'dube atin goochaane, gaasiinkoo laka yagiisiin.
[17] Enenyet tuumman a atin 'dii'da jeenteti atin abattiteey itahiin u.
[18] I'daasenyi tintiintoo kaldaye matahe baabaato laka ma jirto.
[19] Inkoo atin garrahsatteen ka jiroti rummaat 'hessaan.”
[20] “Chirri atin ilkerengeetti weene Yeerusaleeme iskare marisse agarteen la, saggi ilkerengeettaas inkoo dow liibaabiicho a abattaan.
[21] 'Deerka 'doo'di ili Ya'huudiya fiddiyo tuumman halal a ifirdo, 'doo'di ilkerengeetti ween goya kajiro a baho, 'doo'di ilkerengeetti ween khariche kajiro la uus ilkerengeet goya gelin.
[22] I'di tahe wahaas a ibeenneti Waakh enenyet jeenteti uskeeli us yeeluu sina tuso, wihi goorat Chiirnaanneti Waakh kachiiran labuuhicho.
[23] Ibeennetaas sinati deyyehoti nuugsatti ichoow ti huleesenye nyaamitto iubaa'dan sugto enenna a buure. Wihi sussuujenye buurenye soobaha, holi Waakh la 'doo'da isoobaha.
[24] 'Doo'd gaasoo birlabbe lakabakkicha, gaasoo laka lakhabta harra tuumman liibooliya. Ilkerengeetti weene Yeerusaleem la 'doo'di Waakh igaran yabta, uskulaacha ichoowka ibeenneti 'doo'di Waakh igaran labuuhicha.
[25] “Orrah ichoow yeyyah ichoow yiyyihimo ba wihi ittaawenye saggi ibeenki 'da'ddaboot iyitah tuso kasoobahaan. Harra ka, 'doo'di harra tuumman bicchehi yeedo ichoow irti biccheete kanaha.
[26] 'Doo'd la wihi harrata isoosohti icho roorro ka sugaan ka a suuha. A mehe miigti saraat a lakorkokicha.
[27] Geeddaakka Ínam Aadam usuhi miris goyaka yamiite, miig ichoow antohi buure khabo argaan.
[28] Maanti wahanyeyyoha yateehiin tolossada, matahenyetiin kahcha, i'di tahe ibeenki Waakh ribnaanki 'da'ddaboot atin ribo a soodowwaatee.”
[29] 'Doo'd mammahta ibahche, “Bal geeyi fiig ichoow geeyohi addan yeya.
[30] Maanti icho seeb bahcheen, a isiagartaane, saggi 'daato isoodowwaatte a garattaan.
[31] Saggaas on u maanti atin wahanyeyyoha ibeenki 'da'ddaboot tuso agarteen, saggi dakhi Waakh isoodowwaate a garattaan.
[32] “Rume atin icheeka, 'doo'di i'dee ma tuumo ichoowka wahanyeyyoha tuumman yateehiin.
[33] Sereyta daayan ichoow harra a kutaane, i'daasenyi yeedasseey jirtuu tuumman ma kutaan.
[34] “Weyti isyuubsada uus meleefu ichoow wahanyeyyohi sussuujenye 'doo'di meleefee yeelo ichoow wa'dwaa'di jirota uurassiin miigoonne 'dee ibeenkaas i'di angey u doglaan atin geline.
[35] I'di tahe ibeenkaas 'doo'di harra tuumman maalinkoo kalday on isleearga.
[36] Kol dakkhan isyaakhicha. Weesda la 'dee Waakh waha tuummane dowwanoha ka sooyateeh a atin kakhaduudicho, miigti atin Ínam Aadam ortiis katolossattaan a atin siicho.”
[37] Yeesso maalim dakkhan minki Waakhe buure ka 'doo'd wori Waakh abche, geleb dakkhan la irte Hali Geeyohi Oolif barye.
[38] Chirdeer tuumman la 'doo'd minki Waakhe buurenye irta, wihi Yeesso essi dagansata.