[1] Yeesso ilkerengeetti Yeeriko eleele, dah kagooche.
[2] Etoo Sakkaayo layadeeh laka intaas a kijira. Ulla 'doo'di kooddi goocho iweenyahe, toro la kamure eheet.
[3] Ulla usuhi Yeesso argo 'doona. I'daasenyi sag us Yeesso iargo mele i'di tahe us weyti konkoommanyahe, urur la weyti buur eheneet.
[4] 'Deerka 'doo'd ortiis nyaame, geeyoo deer kore, Yeesso argin 'doonaa. Yeesso la intaase leeyamiit.
[5] Chirri Yeesso geey isoodowwaate ka, serey yeye wihi us yidah, “Sakkaayo, toolla kofche sooyeg. I'di tahe wihi massan, an maalinka minkaahha fiddiya.”
[6] Sakkaayo la chirraakka dowwa geey kasooyage, Yeesso hamaad ka khaate goobiis ka martiiste.
[7] 'Doo'd dakkhan la chirri us waha arge ka, nyunnyuwe wihi us yidah, “Eta goobi eti uskeel lehe irta.”
[8] I'daasenyi Sakkaayo tolossate wihi us Kamur iyidah, “Kamur, yey! Wihi an khabo tuumman seleye goocha nyuusicho miskiin siicha. Chirri goorat an etoo ekkeesde wohoo kakhaate la, wihi goorat an kakhaate kol affartichooda ilaaba.”
[9] Yeesso la wihi us Sakkaayo ilaabe, “Gooba maalinka Waakh a ribe. I'di tahe eta laka rumanka a hiiy Aburaaham.
[10] A mehe Ínam Aadam a yimiyye 'doo'di baabe yowta, riba.”
[11] Geeddi 'doo'd waha dagansati, Yeesso toro orey isohte, mammahtoo 'doo'd icheeke. A mehe us kola ilkerengeetti weene Yeerusaleem a isoodowwaate. 'Doo'd la kol dakhi Waakh dowwanoha ka yamiite koogyahe.
[12] Wihi us yidah, “Etoo gooboo magah khabo iloo fogaate irte, 'dee antohi us ilaas kadakhti 'hela toro soonokhta.
[13] 'Deerka bow'dayyohiiskoo tomone wahe, hiinaan tomon chilimme dahan gesse. Hiinaan ba chilim kudoo 'dahabe kijira. Wihi us iyidah, ‘Ebba hiinaankiis a kabacchaarti ichoowka a soonokhdi.’
[14] “I'daasenyi 'doo'di ilaas weyti eta 'dii'de. Inkoo us irte ka 'doo'doo ergeene, ‘Eta usuhi karnateenyo lakayeelo ma 'doonno’ yidaaheen.
[15] “I'daasenyi karnat lakayeele, saahka soonokhte. Maanti us yimiy ka bow'dayyohiis wahe. Ulla wihi icho hiinaanneti us idiibe ka'heleen, iche aban 'doona.
[16] “Ki oraat yimiyye wihi us yidah, ‘Eti ween, hiinaanki at isiisse, hiinaan tomon addane dele.’
[17] “Kamuriis la wihi us ilaabe, ‘At weyti haaggisse! At rumanka a bow'dati haaggan! At wihi rucchule dahan lakigesse ka laka a lakakhuufa gone, ilkerengeet tomone anatta.’
[18] “Ki lammaatteet laka yimiyye wihi us yidah, ‘Eti ween hiinaanki at isiisse, hiinaan chan addane dele.’
[19] “Kamuriis wihi us ilaabe, ‘At a haaggisse gone ilkerengeet chane anatta.’
[20] “Bow'datoo addan la timiyye wihi iche tidah, ‘Eti ween hiinaanki at isoodiibte kalla. An a khaate dafartoo kahide dagche.
[21] An weyti kaaroora, a mehe at a eti weyti uur daayan. Ati wihi wahaah ieheynane khaatatta, gosi at ikhutin ka la golol yowatta.’
[22] “Kamuriche wihi us ilaabe, ‘At a bow'dati suuje, an yeedaahha on kaahukkuma! At saggi an uur idaayanahe an wihi weheey ieheynan ikhaaddi toro gosi an ikhutin ka gurnaan iyowdi a garatta menya?
[23] A i'doh 'deerka hiinaankeey baangi igelinne 'dee maanti an soonokhde ichehi desse isookhaatin?’
[24] “'Doo'di intaas toollo wihi us iyidah, ‘Hiinaankiis kakhaata, ilbooyi hiinaan tomon khabo siicha.’
[25] “'Doo'd la wihi us yidah, ‘Eti ween, us hiinaan tomone orey laka khaba!’
[26] “Ulla wihi us ilaabe, ‘Wihi an atin icheeko, eti tuummane wihi dahan lagesse mujjum woywoye a liikakhaya, i'daasenyi eti wihi dahan lagesse mujjum iwoywoyin, wihi us khabo laka a lakakhaata.
[27] I'daasenyi chiiyteeyti goorat anihi karnat liikayeelo 'dii'ddo tuumman sookhaata orteey ka bakkicha.’ ”
[28] Inkoo Yeesso waha yidah ka orey isohte ilkerengeetti weene Yeerusaleem ikore.
[29] Chirra us ilkerengeetti Be'difaage ichoow ti Be'daaniya Hali Geeyohi Oolif haggee sooeleele ka, Yeesso abattitiistoo lammee orey ierge, wihi us iyidah,
[30] “Ilkerengeetti ortiin kijirto irda, uus atin gessaan la inkuraarruhoo injire liirarine hidan a 'hessaan. Soofura inta keena.
[31] Chirri etoo ‘A i'doh inkuraarru ifurtaan,’ atin worsate la, ‘Kamure 'doona,’ idaha.”
[32] Abattiti kootte leergate iratte, saggi kootte us iidah on i'hesse.
[33] Geedda icho inkuraarru furaan, 'doo'di inkuraarru leh, “Inkuraarruhaas atin furtaan a i'doh?” worsate.
[34] Wihi icho ilaabeen, “Kamure 'doona.”
[35] Inkuraarru Yeesso ikeeneene, kabuu'ddeticho kagaadeene Yeesso korcheen.
[36] Geedda us sohti, kabuu'ddeticho jit kagolgeen.
[37] Chirri us inti jit Hali Geeyohi Oolif kakhubti sooeleele ka, ururi buurenye abattitiis kajirto hooyi buure ka ichoow hamaadi buure ka Waakh saa'de. Wihi ittaawenye weeli enenyet yeelin iubaa'dane icho argeen ka Waakh saa'deen.
[38] “Waakh karnati magahi Kamur kayamiit a imaale! Goobi Waakh nebey a lakakaala, Waakkheenki inti weyti saraat kijiro a lakoolicho.”
[39] Farissaayotoo urur goya kajirte wihi iche Yeesso itidah, “Eti ween, abattitaah leejaakh!”
[40] Wihi us ilaabe, “Wihi an atin icheeko, chirri icho gammadicheen, dagahe a riirta.”
[41] Chirri us ilkerengeetti weene Yeerusaleem isoodowwaate ilkerengeet arge ka, kooye,
[42] wihi us yidah, “'Doo'di ilkerengeetti weene Yeerusaleem, incheenka kootte maalinka jiti nebey laka'helo a abattaan. I'daasenyi toolla a atin lakadagche!
[43] Ibeenne a tamiit ti chiiytiin ilkerengeettiin khaarisso. Chiiytiin harra chalagta 'dee saggoo iche atin idihto 'hossa. Iche la 'dollo tuummane atin kayaakhissa.
[44] Chiiye la atin ichoow nyaakhutiin dakkhamba a atin bakkissa, toro la dagahti ilkerengeet kamarsan tuumman jejjebissa. Daakkoo kaldaye meessiis fuulo laka ma katabto. I'di tahe atin maanti Waakh ribnaan atin yimiy ma kasin!”
[45] Yeesso 'deerka uranti minki Waakhe buure gele, 'doo'di walah ororicho rihnaan sookhabte.
[46] Wihi us icho iyidah, “Wihi chiiran, ‘Minkeey minki weysiite yateeh,’ i'daasenyi, ‘inti 'doo'di hatto leh kadagti,’ iche kayeesseen.”
[47] Yeesso kol dakkhan minki Waakhe buure ka 'doo'de ayti Waakh abcha. I'daasenyi kuhaaniyyohi wewween ichoow tagaammeti amurre ichoow weynaane ba usu ogoos 'doonta.
[48] I'daasenyi sag icho iyagiisin mele. I'di tahe 'doo'd tuumman weyti yeed Yeesso nabah isude. Et usuhi aytoo kaldaye Yeesso yidah laka kanyaanto 'doono mele.