[1] Maantoo Yeesso a irte Seeri Lanaso ka minki etoo weene Farissaayee kagolossate, mujjume lafiiriche.
[2] Etoo luhlo ichoow dahano dakkhan yombobeen laka intaas a kijire.
[3] Yeesso la wihi us Farissaayo ichoow tagaammeti amurre worsate, “Amurre ichoow eti Seeri Lanaso ka lasamaacho a israahaan bal ma israahaan?”
[4] I'daasenyi gammadicheen. Ulla chirraakka et khabte, samaache, laabe.
[5] Ulla 'deerka wihi us icho worsate, “Etiinkoh maanta chirri inankiis ommos heeriiskoo Seeri Lanaso ka wor kadihe, chirraas on isobihin?”
[6] Icho la toro walah icho soolaabeen mele gammadicheen.
[7] Chirri us 'doo'di marteenye min goyaka inti 'doo'di weyti liinkaanyito orronti yowti arge ka, mammahta toro ibahche wihi us 'doo'd iyidah,
[8] “Chirri sukuukuhoo ka lakiwahe inti 'doo'di weyti liinkaanyito orronti a isikhaban, i'di tahe kolossoo etoo ati kaaween laka sukuukuhaas ka a lawahe.
[9] Chirri i'daas tahe la, eti sukuuku lehe lammatiin atin wahe wihi us kiyadeeh, ‘Eta kombortaah sii.’ At la 'deerka lakhaanyo kikhaatatta harra koorromatta.
[10] I'daasenyi chirra lakiwahe, harra koorrommo, 'dee eti sukuuku leh la a yamiite wihi us kiyadeeh, ‘Aalaaw, kaale inta deefto orrommo.’ At la 'dee 'doo'di addan goyaka a lakiinkaanyita.
[11] I'di tahe eti tuummane isweynaacho a lanuglaacha, eti isnuglaacho la a laweynaacha.”
[12] Yeesso la wihi us eti min leh iyidah, “Chirri at sukuukuhoo bihisso, aalassaah ichoow walaalinyetaah ichoow 'doo'diin ichoow ollokkaahki kamure awahin, chirri ati icho wahte, icho laka maantoo a kiwahaane wihi goorat at iyeesse ka kigutaan.
[13] I'daasenyi chirri at sukuuku bihisso, 'doo'di miskiine ichoow ki ma'dee, i'di maanta ki luhlo laa ichoow ki indo laa wah.
[14] At la 'dee Waakh a kimaala. 'Doo'da walah us khabo us kisoolaabo mele. Eheetteey laka maanti 'doo'di fiffissan omoot lakasookahcho, Waakh kala'de kisoolaaba wihi at yeesse ka.”
[15] Chirri etoo kootte Yeesso leefiddiyo waha daage ka wihi us Yeesso iyidah, “'Doo'di berri sukuukuhi goobi Waakh kagolossati hamaadoo geeddohenye khaba!”
[16] Yeesso wihi us ilaabe, “Etoo sukuukuhoo buurenye bahche, 'doo'di buure wahe.
[17] Chirri saha'ddi lagolossati titah ka, ilbooyiis ergate 'doo'di lawahe mehe iyadeeh ya, ‘Kaaleya, a mehe walah dakkhan kola a latannabichee.’
[18] “I'daasenyi icho tuumman geeyo dowteene, ki oraat wihi us yidah, ‘Ibeennetane gosoo soogadde, gosaase irda sooyeya. I'diicha on.’
[19] “Koo la wihi us yidah, ‘Heerassoo tomonenye soogadde, heerassane kaja il kakhuta, sukuuku emeet ma 'helo i'diicha on.’
[20] “Koo addan la wihi us yidah, ‘Ibeennetane min disde, sag an iamiit mele.’
[21] “Ilbooy soonokhte kamuriis wihi liiyidah icheeke. Eti min leh hollowe ilbooyiis amur ibahche wihi us iyidah, ‘Nyaam dowwa, jitassi juukhe ichoow wihi babballaaddane ilkerengeeteet kasossoho, miskiino ichoow 'doo'di luhlo laa ichoow ki indo laa ichoow ki sohot iubaa'dan soowah.’
[22] “Ilbooy wihi us ilaabe, ‘Eti ween wihi at tidah a yeele, i'daasenyi min uliba ma buuhsamin.’
[23] “Eti kamure wihi us ilbooyiis iyidah, ‘Nyaam jitassi babballaaddan ichoow jitassi juukhe iro, 'doo'd hawwaasso 'dee minkeey a buuhsamo.
[24] Wihi an atin iadeeh, eti dakkhane goorat lawahe emeet 'dii'de golola af ma ka'daaro!’ ”
[25] Maantoo ururoo buure Yeesso sooraahe ulla urur iurgiye wihi us iyidah,
[26] “Chirri etoo isooraaho ulla toro aabbahiis ichoow abartiis ichoow makhaabassiis ichoow nyaakhutiis ichoow walaalinyetiis ichoow albehi leedesse i'dii'dine, jirotiis laka i'dii'din, etaas abattiteey itaahan ma yabuu'd.
[27] Eti tuummane massalaabatiis isi'dine, sina iumhane ani isooraahin, abattiteey itaahan ma yabuu'd.
[28] “Eemba etiinkoo minkoo buurenye disin 'doona. Etaas koloo a orronta, chilimmeti minkaas tuumman disso rerreega, usu khabo ichoow usuhuus yeya menya?
[29] I'di tahe chirri us daddaabohi ilaat dise, us minkaas massin waaye, 'doo'di argo la weyti usu kachaarta.
[30] Wihi icho yadeehiin, ‘Eta goorat minka a dise toro massin agaafte.’
[31] “Ommos eemba karnatoo koo addane dowwanoha ka diho kiirta. Koloo ma orronti iskarti eluf tomone ka usú karnati isoosohti iskarti eluf tomon lammee khabo dihin yabuu'd ma yeyo?
[32] Chirri us ituddubin, geeddi ki addan foga jiro iche saamo ergata karnati addan iirta nebey daaha.
[33] Saggaas on u etiinki tuummane wihi us khabo tuumman i'diin, abattiteey itaahan ma yabuu'd.
[34] “Magaa'de a haaggantahe. I'daasenyi chi'iche gimbatiche waayte, saggoh toro liigimbaacha?
[35] Harra ommos laag laka ma iroon gone, a lakhuba on. “Eti dogo khabo, a daago gi'de.”