[1] Yeesso toro abattitiis mammahtoo saggi icho kol dakkhan iweestaane toro icho weysi ka igarrahsataan tusso ibahche,
[2] wihi us iyidah, “Goorat ilkerengeettoo ka, etoo 'doo'd hukkumo Waakh ikaroorine toro etoo kalday laka ikabaalin a jire.
[3] Ilkerengeettaas ka la makhaabassoo muunkhee a jirte. Iche la kol dakkhan eta a itamiite hawwaassatta, ‘Igargaare ayta chiiytankeey miinsan jiti fissan ka ani igooy,’ idowta.
[4] “Geeddoo dakkhan lee'dii'de. I'daasenyi saahka wihi us uuriis goyaka yidah, ‘Chirri an Waakh ikaroorine an weeli enenyet ikabaalin laka,
[5] jeenteti makhaabassa geeddi deer sina ikawaarissuu, aytiche jiti fissane igoocha uus iche kol dakkhan isoononnokhanne sina ikawaarinne kansi itiranne!’ ”
[6] Kamur toro wihi us yidah, “Bal etaas khollokkhane 'doo'd hukkumo wohoo kaabda.
[7] Maantaka Waakh 'doo'diiski us soobahsate ibeen ichoow maalim ba usu iooyo wihi fissan ma igoocho? Wihi icho 'doonaan dowwa ma iyeelo?
[8] Wihi an atin icheeko, Waakh 'doo'diis wihi fissane igoocha, toro la ma malmalo. I'daasenyi maanti Ínam Aadam soonokhti 'doo'di harrata usuhi usu kakhuufo a sooeleela?”
[9] Yeesso toro 'doo'doo saggi us ififfissanyahe iskakhuufo wihi us yeelo ka 'doo'di addan 'darraawo mammahta ibahche wihi us yidah,
[10] “'Doo'doo lammee minki Waakhe buurenye weysi kiirte. Koo a Farissaayo, ki addan la a etoo kooddi goocho.
[11] Ki Farissaayee tolossate, awtiissa on Waakh wahte wihi us yidah, ‘Okkhoow weyti kala'd kisoolaaba ani i'di 'doo'di addane hatto lehe ommos i'di 'doo'di uskeel kajiro ommos eti makhaabassi tiis ieheynan leeur'do ommos laka i'di eta kooddi goocho menye.
[12] Ani teebatoo goyaka maan lamma af hiida toro la wihi an 'helo tuumman goyaka miili Kamur kisoobahcha.’
[13] “I'daasenyi eti kooddi goocho foga tolossate. Ulla serey laka ma yeyine, i'daasenyi kach isgu'dde, 'dee saggi us uskeeliis ka suujoon iargo tuse, wihi us yidah, ‘Okkhoow aniha uskeel leh uur isoonugleyso.’
[14] “Wihi an atin icheeko, inkoo icho goob inokhteen, eti addan menye, etane Waakh ortiis ka eti fissan liiekkaache. A mehe eti tuummane isweynaacho a lanuglaacha, eti isnuglaacho la a laweynaacha.”
[15] 'Doo'd la nyaakhuti nahaso nuugo laka a sookhaata, Yeesso ikeena 'dee ulla dahano korcha iweesta. Chirri abatti waha agarte ka 'doo'daas leejaakhte.
[16] I'daasenyi Yeesso nyaakhut isiwahe wihi us yidah, “Nyaakhuti rurrucchul ajeyinna 'diicha ani a iyimaatee, a mehe dakhi Waakh a ki 'doo'di i'dee.
[17] Rume atin icheeka, eti dakhi Waakh saggi weeli rucchul ikakhaatan, koloo kalday laka goobi Waakh ma gelo.”
[18] Etoo Ya'huude ween wihi us Yeesso worsate, “Eti weene haaggan, mehe yeelo 'dee jiroti jirtuu imassan 'helo?”
[19] Yeesso wihi us ilaabe, “At a i'doh ani, ‘Eti haaggan,’ ikawahta? Etoo kaldaye haaggan laka ma jiro Waakh on menye.
[20] Amurre Muusa a garatta, ‘Makhaabali kaah ieheynan ommos makhaabassi taah ieheynan aleeur'din, weeli enenyet dubunuunu iigaasan, walah ahatin, garti beenaat ayeedin, aabbahaah ichoow abartaah inkaanyit.’ ”
[21] Et la wihi us yidah, “Wahaas tuumman koo an iraahin mala uu' goorat an weel eheet.”
[22] Chirri Yeesso waha daage ka wihi us et iyidah, “At uliba wohoo kaldaye kaankhan. Nyaame wihi at khabto tuumman ororiche, chilimme la miskiin siiche, kamurroonki goobi Waakh 'hele, 'dee kaale isooraah.”
[23] Chu'us waha daage ka, weyti fool ribowe, a mehe eti hoolahi buure khabe eheet.
[24] Yeesso la et yeye wihi us yidah, “A 'hoossoo geeddohe chi' kamurre dakhi Waakh gesso!
[25] Rumanka naffi gaale issi irbi kakhaduutti weyti 'hooltahe. Eheet a, 'hoossi eti kamurenye dakhi Waakh gelo iche weyti kutta.”
[26] 'Doo'di waha daage la wihi us worsate, “Ayyo 'deerka lariba?”
[27] Yeesso wihi us ilaabe, “Wihi weeli enenyet ka koloo kalday laka iitaahan, Waakh ka a geeddi icho yateehiin.”
[28] Beetero wihi us yidah, “Nah wihi nah khabne tuumman a kasootabne, 'dee ati kiraahna.”
[29] Yeesso la wihi us iyidah, “Rume atin icheeka, eti tuummane jeenteti dakhi Waakh u goobiis ichoow makhaabassiis ichoow walaalinyetiis ichoow aabbahiis ichoow abartiis ichoow nyaakhutiis ba kasootabe,
[30] jiroti toolla us jiro ka wihi ittaawenye wihi us kasootabe kussane 'hela, toro la jiroti yomboot ka, jiroti jirtuu imassanne 'hela.”
[31] Yeesso abattitiisti tomon ichoow lammee 'dol iwahe wihi us iyidah, “Ilkerengeetti weene Yeerusaleeme ikorra 'dee wihi goorat 'doo'di Waákh íyeyyeedo chiire Ínam Aadam miinsan tuumman labuuhicha.
[32] Usu dahanohi 'doo'di Waakh igaranne lagessa. Icho la usu a kachaartaane, leeabaarramaane, hanjuf laka katufaane,
[33] laajja ka doochaane, 'da'ddaboka yagiisiin. Ibeenki seyyahnaatteet ka toro omoot kasookaha.”
[34] Abatti la waha dakkhan kichokoo kalday laka ma garan. I'di tahe wihi yeeda miinsanyahe icho a lakadagche, icho la wihi us kaayyeedo tuumman foolicho ma khabaan.
[35] Chirra Yeesso ilkerengeetti Yeeriko isoodowwaate ka, etoo indo laa jit afiissa fiddiya walah daddaaha.
[36] Chirri us kowdoti ururi 'dulo daage ka wihi yitah enenyet worsate.
[37] Wihi icho usu iyidaaheen, “Yeessohi ilkerengeetti Naasarete kuta.”
[38] Et la riire, “Yeesso, Inam Dawuud, uur isoonugleyso,” yidah.
[39] 'Doo'di orey raaho usu leejaakhe gammadi iyidah. I'daasenyi geeddi kootteet laka 'dirihiis riire, “Ínam Dawuud, uur isoonugleyso” yidah.
[40] Yeesso la tolossate, amur bahche et a liikeeno. Chirri us soodowwaate ka Yeesso wihi us worsate,
[41] “Mehe kiyeelo 'doonta?” Wihi us ilaabe, “Kamur anihi toro il argo 'doona.”
[42] Yeesso la wihi us iyidah, “Indo bihi. Kakhuufnaanki at ikakhuufte a kisamaachee.”