[1] Yeesso abattitiis imammahte wihi us iyidah, “Etoo kamurenye saggi ilbooyiiski ween hoolahiis ikagir'daamo liicheeke a jira.
[2] Ulla 'deerka ilbooyaas wahe wihi us worsate, ‘Waha an daddaago lakaacheekti a mehe? Saggi orran at hoolaheey idakhatti khadaaboo ka isoochiire isii. I'di tahe at kola ilbooyeeyki ween mee.’
[3] “Ilbooyi ween la wihi us uuriis goyaka yidah, ‘Kamureey kola hili an kijiro a ikabahcha. Mehe yeelo? Ani la miigti gosas lakakhuto ma khabo, daah la a kuuryaawa.
[4] Wihi an yeelo 'dee chirri hil liikabahche laka an aalassi ittaawenye igargaaro khabo a garda.’
[5] “Ulla 'deerka kahe, 'doo'di mogti kamuriis khabo tuumman wahe. Eti oraat wihi us worsate, ‘At kamureey mogti at kakhabto a geeddoh?’
[6] “Wihi us ilaabe, ‘A ga'daar kudoo subakki geeyi oolif.’ “Ilbooyi ween la wihi us iyidah, ‘Dowwa orrommo buuggaahki mogeet ka tomon chan on chiire 'dee geeddaas on soogut.’
[7] “Ki lammaatteet toro worsate wihi us worsate, ‘At la mogti at khabto a geeddoh?’ “Et la wihi us ilaabe, ‘A ugar kudoo 'dargaayye.’ “Wihi us iyidah, ‘Buuggaahki mogeet ka tomon siyyeet on kayeel.’
[8] “Eta kamure ilbooyiiska weene khollokkhan jeenteti ekkeysihiis u kooliche. A mehe 'doo'di harrata wihi icho isiyeelaan ka, 'doo'di banayhi Waakh kijiro khara ka a kussanyahiin.
[9] Wihi an atin isoocheeko, hoolahiinki harrata aalal kabahsada 'dee maanti kamurroonkiin massate ka goobi Waakhe jirtuu imassan ka a atin lamartiisti.
[10] “Eti tuummane wihi rucchul ka lakakhuufo, wihi buure ka laka a lakakhuufa, eti tuummane wihi rucchul ka liikakhuufin la, wihi buure ka laka ma lakakhuufo.
[11] Chirri 'deerka goorat kamurroonki harrata ka atin liikaakhuufin, ayyo kamurroonki rummaat ka atin kakhuufa?
[12] Chirri goorat hoolahi etoo ka atin liikakhuufin la, ayyo hoolahi wihiine atin siicha?
[13] “Falfa kamur lamma ifasso mele. Koo a 'dii'dda ki addan la 'doonta, ommos koo inkaanyitta ki addan la 'darraawta. Waakh ichoow chilimme ba koloo kalday ma ifasso.”
[14] Farissaayo chi'iche ayta daagte ka tekkele ka Yeesso kareyatte. A mehe icho a 'doo'di weyti chilimme 'doono.
[15] Yeesso la wihi us icho iyidah, “Atin 'doo'd ortiis ka a ismujjummoossaane, i'daasenyi Waakh uuriin a garta. Wihi weeli enenyet ortiis ka weyti khumman, Waakh weyti 'dii'ddanyahe.
[16] “Chiirnaanneti Amurre ichoow ti 'doo'di Waákh íyeyyeedo tuumman 'doo'd a liicheeke ichoowka Yoohanahi Enenyet Baattissiyo yimiy. Uus maantaas, Wori Haaggane dakhi Waakh miinsan enenyet a liicheeka. Ebba la usuhi miigtiis ka dakhaas gelo marma.
[17] Chirri sereyta daayan ichoow harra massataan laka, aytoo kaldaye amurre Muusa goya kajirto labahcho ma jirto.
[18] “Eti tuummane makhaabassiis tuum rihe makhaabassoo addan diste, uskeeli us makhaabassi tiis ieheynan leeur'do iche gele, toro la makhaabali makhaabassi tuum larihe diste, ullaka uskeeli us makhaabassi tiis ieheynan leeur'do iche gele.
[19] “Etoo kamurenye gaaddi weyti gato miige khabo toro la kol dakkhan gololi haaggan yahame jire.
[20] Arittiis la etoo miskiinenye Laassaro layadeehe jiissoo suuje sar tuumman kasoobahte lakeene,
[21] ulla weyti gololi eta kamure kombortiisti ballaaddan kasoodihe yaham imoone. Kararre laka a tamiite jiissiis laajja.
[22] “Saahka eti miskiine yumuyye, herti Waakh la khaatte inti 'doo'di fiffissane tuume lagesso ka, Aburaaham garabiis orrommisse. Eti kamure laka yumuyye lahawwaale.
[23] Ulla meessi 'doo'di tuume kijiro goya kijire, bolokkhi uskul latuse. Chirraakka serey yeye fogaka Aburaahamhi Laassaro garabiis fiddiyo arge.
[24] 'Deerka kariire wihi us yidah, ‘Aabba Aburaaham, uur isoonugleyso. Laassaro ergo farriiskoo bicche a kalug'do a sookhaato harrab a ikhoboocho. I'di tahe 'daba goyaka bolokkhi uskule khaba.’
[25] “I'daasenyi Aburaaham wihi us ilaabe, ‘Inankaaaw saggi goorat at jirotaah ka wahaahki haaggan i'hesse Laassaro la wihi sussuuje i'hele kasoo'hel. I'daasenyi us toolla inta ka uure lakhoboocha, ati la bolokkhi uskule khabta.
[26] Wihi addan la Waakh ankharoo buurenye dahteen gesse, 'dee et inta kabaho atin iyamiit mele, toro la et intaas kasoomaaho nah iyamiit mele.’
[27] “Wihi us ilaabe, ‘Aabbahaaw Aburaaham an 'deerka a kihawwaasdee, Laassaro goob aabbaheey iergo.
[28] A mehe an walaal chane khaba. Icho a tootoocho uus 'dee icho laka maanti icho tuumeen inta bolokkhi uskul 'doo'd kayaham imaatane.’
[29] “Aburaaham wihi us ilaabe, ‘'Doo'diin, a geeddi us amurre Muusa ichoow wihi 'doo'di Waákh íyeyyeedo chiire soomo, icho la wihi liidowo on a daageen.’
[30] “Eti kamure la wihi us yidah, ‘Aabba Aburaaham geeddaas kalday ma yaakhto! I'daasenyi chirri etoo omoot kasookahe icho iirte uskeelicho a kasoonokhtaan.’
[31] “Aburaaham la wihi us ilaabe, ‘Chirri icho amurre Muusa ichoow wihi 'doo'di Waákh íyeyyeedo chiire daagiwwaayeen, chirri etoo omoot kasookahe laka uskeelicho ma 'diichaan.’ ”