[1] Yeesso wihi us abattitiis iyidah, “Wahanyeyyohi enenyet uskeel kalug'do a yamiitiine, i'daasenyi eti icho leeyamiitiin sinati sugto eenna a buure!
[2] Wihi deefo a usuhi daddaabti buurenye gurnaan lakatumo lukhum lakahido beyti buure goya lakalug'do usuhi 'doo'daar tarraantarricho ka.
[3] Taba gi'de isyaakhicha! “Chirri walaalaah uskeeloo kajiro, leejaakh. Chirri us uskeel kasoonokhte la ikakut.
[4] Chirri us orrahtoo goyaka laka kol teeba uskeel kiyeele, kolal teebaccho ba la uskeelaas kisoocheekte, ‘Uskeeleey a kasoonokhda, iileeraahin,’ kiyidah, uskeelaas ikakut.”
[5] Maantoo ergaano wihi iche Kamur itidah, “Kamur, nah gargaare 'dee weyti Waakh a kakhuufno.”
[6] Wihi us ilaabe, “Chi' kakhuufnaanki atin Waakh kakhuuftaan rucchuleel ka geeddi ilinti geeyi dahar yahe, a geeddi atin geeya inta katoollo, ‘Hiiyyay khabtaayi inta kabukkhe beyti buure goya kasoobah,’ itadeehiine, geey la wihi atin itidaaheen yeelo.”
[7] “Ayyo goytiin ka ilbooy khaba, chirra ilbooy gos khunnaan kayimiyye ommos adi goya kayimiy, ‘Kaale orrommo golosso’ iyadeeh?
[8] Wihi us ilbooyaas iyadeeh, ‘Gololeeyki gelebeet kariche, gaaddi hil gesso, igoolli. Inkoo an golossade golosso.’
[9] Ilbooyaas wihi us yeele ka kala'd liilaabo mele, i'di tahe us hiliissa on buuhiche.
[10] I'daasu atin laka chirra atin wihi yeela atin liidah yeesseen, wihi atin tadeehiin, ‘Nah a ilbooyyeti wihi iche yeesse ka kala'd isugin. A mehe nah hilaanya on buuhinne.’ ”
[11] Yeesso anki ilkerengeetti weene Yeerusaleem fool siiche, sohtaayi boroofenhi Saamariya ichoow boroofenhi Gaalilaaya dahcho eleele.
[12] Chu'us gooboo hagga eleele ka, reeroo tomonenye bu'datoo sar kasoobahte or kasoodowe. 'Doo'da la foga tolossate,
[13] riire, “Yeesso! Eti ween! Uur nah isoonugleyso!” yidaaheen.
[14] Inkoo us icho arge ka, wihi us iyidah, “Nyaama kuhaaniyyo iirda istusa.” Sohtaani icho dakkhamba samaateen.
[15] Kichokoo chu'us saggi us isamaate arge ka, usuhi hooyi buure ka Waakh saa'do soonokhte.
[16] Yeesso hagga ka jilbo il kagu'dde kala'd ilaabe. Eta la ili Saamariya kayimiy.
[17] Yeesso wihi us worsate, “'Doo'di kootte an samaache et tomon menya? Et saagaassi addan meete?
[18] Eta yeelan kalday on menye et addane soonokhte Waakh kooliche mele?”
[19] Yeesso la wihi us etaas iyidah, “Kah iro, kakhuufnaanki at ikakhuufte a kiribee.”
[20] Maantoo Farissaayo maanti dakhi Waakh yamiite Yeesso worsatte. Yeesso wihi us ilaabe, “Emeetti dakhi Waakh ti indo lakaargo mee.
[21] Et keley argo, ‘Yeya kalla soosohta,’ ommos, ‘Kuulla soosohta’ yadeeh mele. I'di tahe dakhi Waakh goytiinna kajira.”
[22] Wihi us abattitiis iyidah, “Ibeen a yamiit ki atin Ínam Aadamhi soonokhti harra dakhti imoontaan argin 'doontaan, i'daasenyi argin ma tabuu'diin.
[23] 'Doo'd mehe atin iyadeeh ya, ‘Ínam Aadam kuulla,’ ommos ‘Ínam Aadam kalla.’ Icho akaalloo'dina.
[24] I'di tahe Ínam Aadam maanti us soonokhti i'di ankhadhi ankhado sereyta daayan gu'ddo ichoowka anki 'diri ikabaho yateeh.
[25] I'daasenyi koloo Ínam Aadam sinati buurenye kawaarta, 'doo'di wey'da la usu 'dii'da.
[26] “I'di goorat ibeenne Noowa eheet, iche ibeenki Ínam Aadam yamiit laka yateeh.
[27] Maantaas la 'doo'd saggi orrankateet on sukuuku igele, minan laka laaddiste ichoowka Noowa koobanhi buure goya gele. Chirraas on 'duley ichohi addan tuumman baabiiche.
[28] “Harra toro i'di maanti goorat Loot jire tateeh. 'Doo'd saggi orrankateet on sukuuku igele, walah ororsata, walah gatta, gaasoo ilmo il kachiba, gaasoo laka minassicho dista.
[29] I'daasenyi maanti Loot ilkerengeetti Soodom kabahe Waakh serey ka 'dab ichoow dagahti bolokhto serey kakeene 'doo'd tuumman bakkiche.
[30] “Maanti Ínam Aadam enenyet liisoobabbakkaahicho laka i'da on tateeh.
[31] Maantaas et min sartiis fuulo, meehiis la min goya kijiro yego meehiis soobahsati mele. Saggaas on u, et gos goya kijiro nokhti wohoo sookhaatti mele.
[32] Bal wihi makhaabál Loot kayitah kasoo'hela!
[33] Eti tuummane jirotiis khucchin 'doono, jirotiisti rummaat a waaya, eti tuummane jirotiis waayo la jirotiisti rummaat a riba.
[34] Wihi an atin icheeko, ibeenkaas et lamma siriirtoo kalday iskaleeu'durta, koo lakhaata, ki addan la lakataba.
[35] Deyyehotoo lammee la inchaba isleetunta, too lakhaata ti addan la lakataba.”
[37] Abatti la wihi iche worsatte, “Kamur waha intoh kayateehiin?” Wihi us ilaabe, “Inti wohoo kayumaateen, intaase ra'd kawara.”