[1] Waha 'dubicho ka, Yeesso goobab ichoow ilkerengeeto dah kagooche, Wori Haaggane dakhi Waakh miinsan icheeke. Abattitiisti tomon ichoow lammee laka usu a leejirte.
[2] Deyyehotoo goorat ginnayyo ichoow sugeerretoo addan ka lasamaache Yeesso a leejirte. Deyyehota, too a Maariyati ilkerengeetti Magdaala goorat Yeesso ginna teeba kabahche.
[3] Too la a Yoowana makhaabál Chuusa. Chuusa la min 'Herood ka ilbooyye iweenyahe. Too la a Sussanna ichoow deyyehotoo addane ittaawe. Deyyehota hoolahichooda Yeesso ichoow abattitiis ba kagargaarte.
[4] Geedda ururi buure kuymo 'doo'd la goobassi ittaawe kayamiite usu dagansati, Yeesso mammahtane ibahche.
[5] “Etoo gos khabo a irte, ilmo harra kachibaa. Ilmoha us taa'hicho, gaasoo jit goya kadiheene, layabte, chimbirohi saraat la yumheen.
[6] Gaasoo harrati daddaab fuusso kadiheene, chi'icho soobaheen ka orrahe geeyohaas soobahe gubte, khuyyaame laayahiinee.
[7] Gaasoo laka inti geeyohi rurrucchule kudah khabo kadiheen. Isleesoobaheene geeyohi soobahe afcheen.
[8] Gaasoo la inti harrati haaggan khabto kadiheen. Soobaheene gurnaan deleen. Geey ba kol kudoo geeddi il lakachibe 'dirihiis dele.” Chirri us yeediis massiche ka, riire wihi us yidah, “Eti dogo khabo, a daago gi'de!”
[9] Abattitiis wihi mammahta tahe usu worsatte.
[10] Wihi us iyidah, “Waakh garanti wihi dagsane dakhi Waakh miinsan lagarti a atin siiche. I'daasenyi 'doo'di addan a imammahda, “ ‘'dee walah yeyaane, eheet a ma argaan, wihi an eldi daagaane, eheet a ma abtaan.’
[11] “Wihi mammahe miinsantahe kallaayo. Ilmo a Yeedi Waakh.
[12] Ilmohi jit lakachibe a 'doo'di Yeedi Waakh daago, Seytaan la yamiite yeedaas uuricho kabahcho, saggoo 'dee icho yeedaas irummeysanne, Waakh iribin yeelo.
[13] Ilmohi daddaab sarche kadihe a 'doo'di chu'us Yeedi Waakh daage hamaadi buure ka khaatti. I'daasenyi hiiyyay icho khabaan mele. Geeddoo rucchul on yeeda rummeestaane i'daasenyi chirri kajmeti uskeel kalugu'ddo timiy dowwa on soodihaan.
[14] Ilmohi inti geeyohi kudah khabto goya kadihe mehe itoollaan ya, 'doo'di Yeedi Waakh daago. I'daasenyi geedda icho orey isohtaan, wa'dwaa'd ichoow kamurroon ichoow haaggi wihi harrata afchaane ma weynaataan.
[15] I'daasenyi ilmohi harrati haaggan lakachibe a 'doo'di hahhaaggane, uuri haaggan khabo Yeedi Waakh daago uuricho gessati, jeenteti us igarrahsatuu gurnaan delo.
[16] “Et taa bolkhicho baakhuul kaankubo ommos siriir iliche gesso mele. Taa a labolkhicha kombor lakorcha, 'dee 'doo'di min soogelo il kaarga.
[17] A mehe walah dagsane liisoobihin mala, ommos walah oboobsane enenyet liiabinne ommos 'dow liikasoobihin mala.
[18] Maantaka wihi atin liidowo mujjum daaga gi'de. Eti tuummane wihi dahan lagesse mujjum woywoye a liikakhaya. I'daasenyi eti wihi dahan lagesse mujjum iwoywoyin, wihi us kol us khabo koogyahe laka a lakakhaata.”
[19] Maantoo abar Yeesso ichoow walaalinyetiis ba Yeesso argin yimaateen. I'daasenyi jeenteti urur buur iyahuu, saggi icho ileeyeedaan waayeen.
[20] Etoo wihi us Yeesso iyidah, “Abartaah ichoow walaalinyetaah ba khare toollaane, ichohi kaargo 'doonaan.”
[21] Wihi us ilaabe, “Abarteey ichoow walaalinyeteey a 'doo'di Yeedi Waakh kayimiy daago toro la raaho.”
[22] Maantoo Yeesso abattitiis wihi us iyidah, “Beyta Gaalilaaya maahno aficheki 'diri a iranni.” 'Deerka koobanhoo koreene irteen.
[23] Kooban sohtaani Yeesso ur'dumme khaatte. Hafaroo buure la yimiyye bey gu'dde, ichoowka bicche kooban goya isootabeene buuhin leheet.
[24] Abatti Yeesso iiratte, kihisse, wihi iche itidah, “Eti ween, eti ween, bicche a inno khaataan!” Ulla sookahe, hafar ichoow bicchehaas uskul ba leejaakhe, ire tolossatte, bicche laka haagsateen.
[25] Yeesso la wihi us abattitiis worsate, “Atin uliba ma ikakhuuftaan a?” Abatti roorro gesse toro girmeysatte, wihi iche isworsatte, “Eta a ayyo? Hafar ichoow bicche laka amur on ibahcha, icho la yeediis daagaan.”
[26] Yeesso ichoow abattitiis ba kooban orey iwoyeen beyti Gaalilaaya aficheki 'diri imaahaanee. Ilkerengeetti Geraasa isoodowwaateen.
[27] Chirri Yeesso kooban kasooyage ka, etoo ilkerengeettaase ginnayyo dakhtaan usu 'hele. Eta la geeddi deer gaad laan on sossohta, goob goya la ma fiddiyo, i'daasenyi go'ddassi enenyet lakahawwaalo fiddiya.
[28] Eta uus Yeesso arge ka uuwwiche, Yeesso ortiis ka il iskagu'dde, weyti riire wihi us yidah, “Yeesso, weeli Waakkhi weynaan tuumman tiis tahe, at mehe ika'doonta? A kihawwaasde, bolokh iitusin!”
[29] A mehe Yeesso ginna amuri iche etaas kabahto ibahche. Geeddi buure la ginna et a khabatte. Chirri dahano ichoow luhlo lahide, layaakhiche laka, us biingoyyohi lakahide a jejjebche, ginna la khaatta hidaad geessa.
[30] Yeesso la, “Magahaah a ayyo?” worsate. Wihi us ilaabe, “Magaheey a Ururi Iskareet.” Waha a jeenteti ginnayyohi ittaawe goytiis igeleen.
[31] Ginnayyo la inonnokhteene Yeesso hawwaasteen, uus ankhari dahane ieleelin iergine.
[32] Woyhoo buurenye golcha la intaas ka burroo tahariissa yaakha. Ginnayyo la Yeesso hawwaasteene, ichohi golchataas goya gelo daaheen. Yeesso la, amur siiche.
[33] Chi' ginnayyo et kabaheen ka, golcha goya itabeene, woy tuumman bur kakhubte bey goya itabe, bicche khaateen.
[34] Chirri 'doo'di golcha yaakhicho wihi yitah arge ka, orye woraas ilkerengeet ichoow ilaas dakkhan kataa'hiche.
[35] 'Doo'd la bahe wihi yitahye sooyeyaa. Chirri icho Yeesso iyamiitiin, eti ginna goytiis kabahte usuhi sammacchaar Yeesso ortiis fiddiyo darfo mujjum gessate matah la haagsate 'heleen. Enenyet roorro gesse.
[36] 'Doo'di kootte wihi yitah arge la, saggi eti ginnayyo dakhteen liisamaache 'doo'di addan icheeke.
[37] 'Doo'di ilkerengeetti Geraasa isoodow tuumman Yeesso daahe, icho a katabo, a mehe weyti roorro gesse. Ulla 'deerka kooban kore irte.
[38] Eti kootte ginnayyo lakabahche Yeesso hawwaaste, usuhi raaho daahe, i'daasenyi Yeesso et laabe wihi us iyidah,
[39] “Goob inokho geeddi Waakh kiyeele cheek.” Et 'deerka irte ilkerengeet tuumman dah kagooche, geeddi Yeesso iyeele cheeke.
[40] Inkoo Yeesso nokhte ka, ururoo usu martiiste. I'di tahe 'doo'd kootte usu a suga.
[41] Chirraakka etoo Yaayiro layadeehe ilkerengeettaas ka minki weysiite Ya'huud iween yimiyye, Yeesso luhlohiis kakufe hawwaaste, usuhi Yeesso goobiis yamiite 'doonaa.
[42] I'di tahe inanti kaldaye us khabo, gu'h tomon ichoow lamma khabto, iche omoottan. Geeddi Yeesso sohti la 'doo'd 'dollohiis tuumman ka a ishude.
[43] Ururaas goyaka la makhaabassoo gu'h tomon ichoow lamma hugunkiche tolossawwaaye diig on 'dulo la a jirta. I'daasenyi et samaan yabuu'd mele.
[44] Yeesso 'dubiis leetimiyye, laddi kabuu'diis 'daarte, chirraas on diiggi 'dulo tolossate.
[45] Yeesso wihi us worsate, “Ayyo i'daare?” Chi'icho tuumman 'dii'deen ka, Beetero wihi us yidah, “Eti ween, 'doo'd 'dollohaah tuumman ka a issootakha, ishude.”
[46] I'daasenyi Yeesso wihi us iyidah, “Etoo a i'daare, saggi miige ani ikabahte a garda.”
[47] Makhaabale 'deerka saggi liikase agarte, ichehi hamarto timiyye, Yeesso ortiis ka il gu'dubte. 'Doo'd ortiis ka jeenteti iche Yeesso i'daarte ichoow saggi iche chirraas on isamaatte cheekte.
[48] Yeesso la wihi us iyidah, “Inantaay, kakhuufnaanki at ikakhuufte a kisamaache gone, tab gi'de nebey leeiro.”
[49] Yeesso yeedaas af kakhabaayi, etoo goob Yaayirohi minki weysiite Ya'huud itoollo kayimiyye wihi us yidah, “Weel a massate, eti ween immarah sina akawaarin.”
[50] Yeesso la chirri us waha daage ka, wihi us Yaayiro iyidah, “Roorro akhabine, ani on irummeyso, iche la a samaattaa.”
[51] Chirri us min Yaayiro sooeleele ka Beetero ichoow Yaakoobo ichoow Yoohana ichoow aabbahi weel leh ichoow abarti weel leh kalday on menye, eti tuummane min leegelo tirte.
[52] Geeddaas la enenyet tuumman jeentetichuu a uuwwicha ooya. Yeesso la wihi us yidah, “Uuwwinna! Weel ma umaatane i'daasenyi a ur'da!”
[53] Icho la saggi weel iyumuyye gartaan gone, usu kareyteen.
[54] I'daasenyi inám dahan sookhabte, “Inantaay sookah” iyidah.
[55] Weel rubeye isoonokhatte, chirraas on sootolossatte. Yeesso 'deerka weel wohoo us yaham a lasiicho yidah.
[56] 'Doo'di weel dele girmeeste, i'daasenyi Yeesso amur ibahche, iicho wihi yitah etoo kalday laka icheekine.