[1] Daawti Makaateti Liikhasine daawti Baasakka layadeeh a soodowwaatte.
[2] Kuhaaniyyohi wewween ichoow tagaammeti amurre jitoo iche Yeesso katagiise yowatta, a mehe enenyete karooraan.
[3] Seytaan la Yuudahi Iskaariyoot layadeehe abatti Yeessoti tomon ichoow lammee kichekoowe gele.
[4] Yuuda la kuhaaniyyohi wewween ichoow 'doo'di iskarti minki Waakhe buure yaakhisso itoollo iirte, saggi us Yeesso 'dub igoocho kaleehawwooche.
[5] Icho la weyti hamaadeene chilimmeti icho siichaan goocheen.
[6] Yuuda la ayye yidahye, inti leemujjumenye us Yeesso inti urur ikajirin ka dahanohicho kagesso yowte.
[7] Ibeenki Daawti Makaateti Liikhasine heleenki daawti Baasakka lasoorriyoocho yitah.
[8] Yeesso Beetero ichoow Yoohana ergate wihi us iyidah, “Nyaama inti inno gololi daawti Baasakka kanaham inno ihaaggicha.”
[9] Icho la wihi icho worsateen, “Intoh 'doonta, katannabanna?”
[10] Wihi us ilaabe, “Chirra atin ilkerengeet gessaan, etoo 'dirihi biccheet si'do afiin a kayamiit. Raaha minki us gelo leegela.
[11] Wihi atin ooyohi min leh itadeehiin, ‘Eti Ween mehe kiyidah ya, min goyaka meessi marti ani ichoow abattiteey gololi daawti Baasakka kanaham meeke?’
[12] Meessoo buurenye minkiis sartiisenye meeh tuumman khabto iche atin tusa. Intaas ka golol haaggicha.”
[13] Abatti bahte, walah dakkhan ba i'di kootte us iyidah on i'heleen. 'Deerka gololi daawti Baasakka haaggisse.
[14] Chirri saha'de titah ka, Yeesso ichoow ergaanotiis komborti ballaaddane lakagolossati garabiche ka dikkille kareeyeen.
[15] Ulla wihi us iyidah, “Ani weyti anihi golola Baasakka geeddi sina liikawaarin atin leeaham imoone.
[16] I'di tahe wihi an atin isoocheeko, toro ma atin leeahame ichoowka wihi goorat liidah goobi Waakh ka labuuhicha.”
[17] Chirraakka kokkooboo farsoti sabiib kajirto okkhiche Waakh kala'd ilaabe wihi us abatti iyidah, “Waha khaata ebba a anguunti.
[19] Makaate khaate Waakh kala'd ilaabe, jejjebche abatti ididdiibe wihi us yidah, “Waha a sarteeyti atin liisoobahche, amha 'dee ikasoo'hela.”
[20] Saggaas on u, inkoo icho gololi gelebeet yumheen ka, kokkoob khaate wihi us yidah, “Kooba a ayyinti husube Waakh enenyet diiggeey ka igoocho, a diiggi iroonotiin liikhubo.
[21] I'daasenyi dahanti eti 'dub isoogoocho dahantaaya komborta ballaaddan kaleejirta.
[22] Ínam Aadam i'di goorat Chiirnaanneti Waakh lakachiiruu, a yamuute, i'daasenyi eti usu 'dub goocho sinati sugto eenna a buure.”
[23] Abatti eti waha sooyeelo isworsatte.
[24] Iche la toro eti goycho ka eti weyti ween liiekkaacho isleeiriirte.
[25] Yeesso la wihi us icho iyidah, “Karnatohi 'doo'di Waakh igaran saggi suujenye 'doo'd idakhtaane, icho la 'doo'd, ‘Nah a aalassiinna,’ idowaan.
[26] I'daasenyi atin i'daas iitaahana. Eti goytiin ka weyti ween, i'di eti weyti rucchul a yitaahe, eti enenyet dakhti la i'di falfa a yitaahe.
[27] A mehe, ayyo maanta ween, eti orronti golol karam liikachibo yaham a, bal eti karantaas golol kasoochibo? Rumanka eti ween a ki golol karam liikasoochibo yaham on menya? I'daasenyi an goytiin ka a i'di eti golol karam atin ikachibo.
[28] Atin a ki maanti an sinayyohi ikajo 'hele ileejire.
[29] Saggi Aabbaheey dakh dahanteey isoogessuu, ani laka dakhaas dahantiinna gessa.
[30] Atin la 'dee goobeey ka ileegolossattaane, komborohi antoot koorromattaane, yaafoheenki Issiraayele tomon ichoow lammee anattaan.”
[31] Yeesso toro wihi us yidah, “Siimon, Siimon, daganso! Seytaan saggi enenyet 'dargaayye ichoow chaafo seley ibahchuu, antohi us atin kakajo a daahe.
[32] I'daasenyi Siimon, an a kisooweesde 'dee mujjum orey isohatta ani ikakhuufta. Chirri at isoonokhatte la 'doo'di irummeeste uure miigoossa.”
[33] I'daasenyi wihi us ilaabe, “Kamur, an a geeddi an jeela kileegelo, toro kileeamuut laka.”
[34] Yeesso wihi us ilaabe, “Beetero wihi an kisoocheeko, ibeenka goya geeddi lukki iriirin, at kol seyyahe 'dii'dda, ma igaratti tadeeh.”
[35] Yeesso 'deerka wihi us abattitiis worsate, “Maanti goorat chilimme ichoow ugar ichoow kobo laan an atin ergade atin wohoo a waayteen?” Wihi iche ilaabte, “Walahba.”
[36] Yeesso la wihi us toro iyidah, “Maantaka, eti chilimme khabo a khaatti, ki ugar khabo ugar a khaatti, ki birlab ikhabin la kabuu'diis a ororicho birlab a gatti.
[37] A mehe wihi chiiran, ‘Usu 'doo'di Waakh daagiwwaaye goya lagate.’ Wihi an atin iadeeh la, waha ani liikabuuhicha. Aa, wihi ani imiinsane chiiran inti lakabuuhicho a eleelaan.”
[38] Abatti la wihi iche tidah, “Kamur inta yey, birlab lamma a khabna!” Wihi us ilaabe, “Geeddaas a atin yaakhta.”
[39] Yeesso bahe, i'di orrankateet u Hali Geeyohi Oolif irte, abattitiis la raahte.
[40] Chirri icho meel eleeleen ka, Yeesso wihi us abatti iyidah, “Waakh wahda 'dee kajmeti uskeel atin kalugu'ddo akidihina.”
[41] Abattitiis kelee kaseehe, geeddoor daakki laseyo eleelo ileeirte, jilbo il kagu'dde Waakh wahte, wihi us yidah,
[42] “Aabbahaaw, cha'at 'doonto kokkooba sinayyoot ikakhaat. I'daasenyi in an 'doono menye, in at 'doonto a titaahe.”
[43] Hertoo Waakh la goobi Waakh ka timiyye, isoobahte, miig siisse.
[44] Bolokkhi buure goyaka geeddi kootteet laka 'dirihiis Waakh wahte, i'di'di us 'hooricho harra kaaddibho la i'di diiggi diddibho yitah.
[45] Chirri us weysi kasookahe us abatti inokhte ka, ichehi bolokh kurmiche u'durto 'hele.
[46] Wihi us icho worsate, “A i'doh iu'durtaan? Kaha Waakh wahda 'dee kajmeti uskeel atin kalugu'ddo akidihina.”
[47] Yeesso yeyyeedaayi, ururoo yimiy. Eti Yuuda layadeehe abattiti tomon ichoow lammee kichekoowe iche soowoya. Ulla Yeesso iyimiy a dongataa.
[48] I'daasenyi Yeesso wihi us worsate, “Yuuda, at Ínam Aadame dongo ka 'dub goossa?”
[49] Chirri abattiti addane kootte Yeesso leejirte wihi sooyateeh kasse ka wihi iche tidah, “Kamur birlabbeteen ka icho ma dihno?”
[50] Kichokoo la falfati kuhaanihi weyti ween gu'dde, nabahti miigeet ng'ure.
[51] I'daasenyi Yeesso wihi us ilaabe, “'Dii a geeddaas one.” Yeesso la et nabah 'daare, samaache.
[52] Yeesso kuhaaniyyohi wewween ichoow 'doo'di 'doo'di minki Waakhe buure yaakhicho itoollo ichoow ewweenki Ya'huude usu iyimiy wihi us iyidah, “Cha'atin khokkhoomme ichoow birlabbe leetimaateene, ikhabattaan, an a etoo enenyet walah saro?
[53] Maan tuumman ani uranti minki Waakhe buure ka a atin leejire, atin la ma ikhaban. I'daasenyi waha a saha'ddiinna, a saha'ddi Seytaanki karnati mug'dee atin anti.”
[54] Icho la 'deerka Yeesso khabteene, khaateene minki kuhaanihi weyti ween geecheen. Beetero fogaka 'doo'd 'dubiis sooraahe.
[55] I'daasenyi inkoo icho uram dahche ka 'daboo bolkhicheene icho isleeorronteen ka, Beetero laka leeorronte.
[56] Inantoo falfee, banayhi 'dab ka usuhi intaas fiddiyo agarte, fiirisse wihi iche tidah, “Eta usu a leejire.”
[57] I'daasenyi lee'dii'de wihi us iyidah, “Irta an usu ma gardi.”
[58] Inkoo geeddoo lafiddiye ka etoo addan usú arge, wihi us iyidah, “At laka a kichekoo.” Beetero wihi us ilaabe, “Eta, ani kichokoo mee!”
[59] Inkoo geeddi saha'ddoo lafiddiye ka etoo addan Beetero arge toro wihi us yidah, “Rumanka reenka laka usú a leejire a mehe ullaka a 'doo'di Gaalilaaya.”
[60] Beetero wihi us ilaabe, “Eta, an wihi at kaayyeeddo ma gardi!” Beetero yeyyeedaayi lukki riire.
[61] Kamur la urgiye Beetero indo kakhabte. Beetero 'deerka yeedi Kamur iyidah kasoo'hele, “Maalinka geeddi lukki iriirin, at kol seyyah, ‘Ma kigardi!’ tadeeh.”
[62] Ulla khar ibahe, bolokh ka ooye.
[63] Reeri kootte Yeesso yuubicho Yeesso kachaarnaan ichoow jahnaan sookhabte.
[64] Indo hideene, “Eti Waákh íyeyyeedoow, eti kigu'dde nah isoocheek,” idoween.
[65] Usu leeabaarrameene, wahanyeyyohoo addane ittaawenye sussuuje laka idoween.
[66] Uun il barye ka, Jaldaabti Weene Ya'huude kuhaaniyyohi wewween ichoow tagaammeti amurre kijiraan ba kulmeene, Yeesso la orcho lakeene.
[67] Icho tuumman la wihi icho worsateen, “Nah isoocheek cha'at Ki Lasubhe tahe.” Yeesso wihi us ilaabe, “Cha'an atin isoocheeke, ma irummeysattaan.
[68] Cha'an wohoo atin worsade la, ma isoolaabtaan.
[69] I'daasenyi uus toolla kakhabatti, Ínam Aadam Waakkhi miig leh anki dahantiisti miigeete orronta.”
[70] Icho dakkhan la wihi icho worsateen, “Ati 'deerka Weeli Waakhe?” Wihi us ilaabe, “Atine i'daas tidaaheen.”
[71] Icho la wihi icho yidaaheen, “A i'doh 'doo'doo addane gar laabo iyowanna? Afiis ka wihi us yidah a daagne.”