[1] Goorat maantaas Kaaysarhi Agaasta layadeeh amuri 'doo'di ili Rooma tuummane us anti lakeekkaacho iche bahche.
[2] Waha a maanti oraate 'doo'd leekkaache geeddi Kiriiniyas gaafanahi Siiriya eheet.
[3] Ebba la ilkerengeetti goorat aacchinyetiis fiddiite irte 'dee sirgaal magahiis a chiiro.
[4] Yuussuf 'deerka ilkerengeetti Naasarete boroofenhi Gaalilaaya kajirto kakahe, boroofenhi Ya'huudiya ka, ilkerengeetti Be'deleheem layadeehe goorat karnati Dawuud layadeeh kadesse irte. Yuussuf la jeenteti us hiiy Dawuud iyahe, iche ilkerengeettaas iirte.
[5] Yuussuf la Maariyati goorat us alkume leeirte, 'dee sirgaal magahenyeticho a chiiro. Maariya la chirraas a hulees.
[6] Ilkerengeetti Be'deleheem kajiraani, Maariya hayohiche massateene, chiisse.
[7] Maariya la huuratiche ka inankoo desse, darfo kaayyuubte, 'dari haanki hoolaat lakachibo goya kareeyisse. I'di tahe looj ka meel a waayeen.
[8] Ilaas ka la ersimohoo adihicho fooricho ibeen toorribti a jiraan.
[9] Hertoo Kamur la icho isoobahte, ababnaanki Kamur la il isooyage, intaas iifche. Ersimo dakkhan la weyti naheen.
[10] I'daasenyi herti Waakh wihi iche ersimo itidah, “Roorro akhabina. I'di tahe ani Wori Haaggane 'doo'd tuumman kahamaadicho atin ikeene.
[11] Ibeenka goya, ilkerengeet Dawuud ka 'Doorribe a atin liidele, ulla a Ki Lasubhe Kamure!
[12] Wihi eti us yahe atin tuso a waha, weeli rucchule darfo lakaayyuube 'dar goya jiifo a agartaan.”
[13] Chirraas on herti Waakhe ittaawenye serey kijirto geeyo dowto Waakh saa'ddaayi soobahte, herta Waakh isookhayte, wihi iche tidah,
[14] “Waakkhi saraat a lasaa'do. 'Doo'di harrata ka Waakh kahamaado la nebey a lakakaalo!”
[15] Inkoo herti Waakh nokhatte serey ikorte ka, ersimo wihi icho isiyidaaheen, “Kaha bal ilkerengeetti Be'deleheem a iranni waha yitahye Kamur inno isoocheeke a sooagarro.”
[16] Ersimo 'deerka dowwa on irteene, Maariya ichoow Yuussuf 'heleene, weeli 'dar goya jiifo la argeen.
[17] Inkoo ersimo weel argeen ka, wori kootte weel miinsane icho daageen 'doo'd icheekeen.
[18] 'Doo'di tuummane wihi ersimo yidaaheen daage la, weyti girmeeste.
[19] I'daasenyi Maariya waha tuumman kasoo'hesse, weyti kamalatte.
[20] Ersimo ichohi wihi icho daageen ichoow wihi icho argeen ka Waakh weynaacho toro saa'do nokhteen. Wihi icho argeen la a i'di kootte herti Waakh itidah on.
[21] Inkoo teebatoo kutte ibeenki weel lakhandiyo yitah ka, weel magah liibahche, Yeesso layidah. Magaha la a ki goorat geeddi us uur laka igelin, herti Waakh ibihisse.
[22] I'di Amurre Muusa liikachiiruu, maanti abarti weel desse daawti isladikho massisse ka, Yuussuf ichoow Maariya ba weel khaateene ilkerengeetti weene Yeerusaleem geecheen, Yeesso Kamur ibahchaanee.
[23] I'di Amurreti Kamur liikachiiruu, “Inanki huraate tuumman Kamure liibahcha.”
[24] Soorriyoti Amurreti Kamur kachiiran bahcheen, waha la a “kutukuurrug lamma burbuure ommos kutukuurrug lamma rurrucchul.”
[25] Maantaas la makhaabaloo Siimiyon layadeeh ilkerengeetti weene Yeerusaleem a kijira. Ulla a eti fissane Waakh karooro. Ulla yaafohi Issiraayele uur lakhoboocho iche suga. Rubeyti Munyee la usu a leejirte.
[26] Rubeyti Munyee la goorat wihi iche usu ibabbakkaahisse a mehe ya, geeddi us Ki Lasubhe koo Kamure iargin ma yamuut.
[27] Siimiyon Rubeyti Munyee soowoyte uranti minki Waakhe buure gele. Chirri Yuussuf ichoow Maariya ba Yeesso minki Waakhe buure goya leesoogeleene icho wihi Amurre 'doonto yeelaan ka,
[28] Siimiyon weel okhsate, Waakh kooliche wihi us yidah,
[29] “Kamuri Miig Tuumman Leh, saggi at iayyissuu, anihi falfataahe toolla an nebey khabo ikhaat.
[30] A mehe eti 'doorribo indoheey ka a arge.
[31] At la usu a tannabissa enenyet tuumman arga.
[32] Usu yaafohi Ya'huud ieheynane banay ibabbakkaahicha, 'doo'daahki Issiraayel la inkaanyit ikeena.”
[33] Ooyo ichoow abarti weel ba wihi Siimiyon yidahye weel miinsan weyti kagirmeesteen.
[34] Siimiyon 'deerka icho iweeste, Maariyati abarti weele la wihi us iyidah, “Weela Waakhe soobahsate, 'dee 'doo'di Issiraayel gaasoo riba gaasoo la bar tira. Ulla miigti Waakhe enenyet tusa, i'daasenyi 'doo'di buure usu a tirrima.
[35] Waha a yitaaheene 'dee Waakh wihi icho uurassicho goyaka dowtaan soobabbakkaahicha. Ati la bolokkhi rubeytaah 'huno a i'di bolokkhi birlabi af leh.”
[36] Maantaas la toro makhaabassoo Waákh íyeyyeeddo magahiche Aanna layadeeh laka a jirta. Iche la a inanti makhaabaloo Faanuwel layadeehe yaafticho la Aacha layadeeh. Iche la weyti araarrowte. Aanna la inkoo ladise, gu'h teeba on makhaabal leejirte,
[37] makhaabaliche buje. 'Deerka muunkho eheete ichoowka gu'h tomon siyyeet ichoow gu'h affar eleesse. Iche la injire minki Waakhe buure ma kabahine, i'daasenyi ibeen ichoow maalim ba Waakh on wahatta, af hidatta toro weysatta.
[38] Iche laka chirraas on timiyye jeenteti Yeessohi dessuu Waakh kala'd ilaabte, toro la 'doo'di Waakkhi 'doo'di ilkerengeetti weene Yeerusaleem furo sugo laka weel woriis icheekte.
[39] Chirri Yuussuf ichoow Maariya ba wihi Amurreti Kamur 'doonto massicheen ka, goobichoki Naasarete boroofenhi Gaalilaaya kajiro inokhteen.
[40] Yeesso la weynaate toro miigowe, weyti kharaawe, haaggi Waakhe buure la usu a leejire.
[41] Gu'hi soomaro tuumman Yuussuf ichoow Maariya ba ilkerengeetti weene Yeerusaleeme irtaane daawti Baasakka gelaan.
[42] Maanti Yeesso gu'h tomon ichoow lamma eleele ka, i'di orrangateet u irteene daawti Baasakka geleen.
[43] Inkoo daawe massatte ka, anki goob miinsateene Yeessohi inankichee la ilkerengeetti weene Yeerusaleem ka'hade. I'daasenyi Yuussuf ichoow Maariya saggi us i'hade ma kasin.
[44] Kol us 'doo'di addan goya sooraaho on koogyahiine maalinki nool sohteen. Yomboka Yeesso 'doo'dicho ichoow aalassicho goya kayowteen.
[45] Chirri icho waayeen ka ilkerengeetti weene Yeerusaleem inokhteene intaas ka yowteen.
[46] Ibeenki seyyahnaatteet inkoo icho Yeerusaleem kakaheen ka, Yeessohi uranti minki Waakhe buure ka 'doo'di Yeedi Waakh 'doo'd abcho goycho fiddiyo, wihi icho essaan dagansati toro walah wowworsati 'heleen.
[47] 'Doo'di wihi laworsate us soolaabe daage tuumman la kharatiis weyti kagirmeeste.
[48] Aabbahiis ichoow abartiis la chirri icho argeen ka weyti girmeesteene, abartiis la wihi iche itidah, “Inankaaw a i'doh i'da nah iyeessa? Ani ichoow aabbahaah ba weyti nahne geeddi nah kiyowanni on.”
[49] Yeesso la wihi us worsate, “A i'doh iyowattaan? Saggi an min Aabbaheey ifiddiyo ma garattaan a?”
[50] I'daasenyi icho wihi us idowo wihi icho miinsanyahiin ma aban.
[51] Yeesso 'deerka aabbahiis ichoow abartiis raahe ilkerengeetti Naasaret ikhubteene, wihi icho iyidaaheen la weyti raahe. I'daasenyi abartiis wihi us essi tuumman uur on ilaabatte.
[52] Yeesso la weynaate toro weyti kharaawe, Waakh ichoow weeli enenyet ba jilhaateen.