[1] Jaldaabti Ween tuumman 'deerka kahte Yeesso woyte Bilaato igeesse.
[2] Chirraas on usu cheekteene wihi icho yidaaheen, “Eta usuhi yaafteen baabiicho khabanne. Karnati ili Rooma kooddihi liiguto 'dii'da, Ki Lasubhe karnatenye iskawaha.”
[3] Bilaato la wihi us Yeesso worsate, “Karnati Ya'huud a ati?” Yeesso wihi us ilaabe, “A rum, a i'daas at elatti on.”
[4] Bilaato la wihi us kuhaaniyyohi wewween ichoow urur ba iyidah, “An eta walah lakacheekti an argo mele.”
[5] I'daasenyi weyti tirriinsateene wihi icho yidaaheen, “Ili Ya'huudiya tuumman ka 'doo'de walah abcha, ichoowka enenyet seley fida. Wihi us 'doo'd abcho la boroofenhi Gaalilaaya kasookhabte ichoowka toolla inta yimiy.”
[6] Chirri Bilaato waha daage ka usu eta 'doo'di Gaalilaaya yahe worsate.
[7] Chirri us saggi Yeesso ili 'Herood itoollo ikayimiy kase ka, Yeesso 'Herood ierge. 'Herood rubeytiis la geedda ka ilkerengeetti weene Yeerusaleeme kajira.
[8] 'Herood la chirri us Yeesso arge ka hamaade, i'di tahe geeddi deere yeed Yeesso daage, ulla geeddi deere usuhi Yeesso argo 'doone. Ulla Yeessohi wihi weeli enenyet yeelin iubaa'dan yeelo khajjeela.
[9] Ulla Yeesso wihi buure worsate, i'daasenyi Yeesso walah us ilaabe mele.
[10] Kuhaaniyyohi wewween ichoow tagaammeti amurre intaase toollaane, weyti riireene Yeesso cheekteen.
[11] 'Herood ichoow iskartiis ba Yeesso lakhaanyo kadoweene kachaarteen. Darfohi karnat gesseene, khaateene Bilaato ilaabeen.
[12] Maalinkaas goya, 'Herood ichoow Bilaato ba aal yitaaheen, goorat 'hor la a isichiiy.
[13] Bilaato kuhaaniyyohi wewween ichoow 'doo'di wewween ichoow 'doo'di addan ba isiwahe,
[14] wihi us iyidah, “Atin eta ani ikeenteene, 'doo'de baabiicha sirgaal 'dii'da idowa tidaaheen. Ani la ortiin ka wihi nool worsade wohoo kaldaye atin kacheekatteen la an ma kaargin.
[15] 'Herood laka walah suujenye eta yeele us arge mele, jeentetaase toro inno ikasoolaabe. Eta walah us yeele omoot liigoocho mele.
[16] Maantaka laajja on ka a ladoocho 'dee a la'diicho a irti.”
[18] Urur dakkhamba hooyoo kalday ka riire, “Eta agiise, Barraba nah isoofur!”
[19] Barraba la goorat wihi jeela lakagesse, ilkerengeetti weene Yeerusaleem ka, 'doo'doo sirgaal 'dii'do goya kijire, toro la enenyet laka yigis.
[20] Bilaato usuhi Yeesso 'diicho 'doona, toro urur inokhte.
[21] I'daasenyi urur riire “Massalaaba kakaah! Massalaaba kakaah!” esse.
[22] Bilaato toro koli seyyahnaatteet icho leeyeede, “A i'doh? Eta suujoonkoh yeele? An wihi eta yeele omoot liikagoocho ma argo. Maantaka a lajaha one 'dee la'diicha.”
[23] I'daasenyi weyti riireene katirriinsateene, usu massalaaba a lakakaaho, ichoowka Bilaato jeenteti riirit u 'doo'd agaafte.
[24] Bilaato 'deerka wihi icho daaheen siin gooche.
[25] Eti icho daahenee goorat sirgaal 'dii'do toro la enenyet yigisye jeela kijire soofure. Yeesso la dahanticho gesse 'dee wihi icho 'doonaan a yeeleen.
[26] Chirra icho woyaan ka, etoo ilkerengeetti Kureene Siimon layadeehe gosiis kayimiy khabteene, massalaaba korcheene ihosseene ulla Yeesso 'dubiis leeraahe.
[27] Ururi buure la Yeesso 'dubiis leeyimiy. Urur goyaka la deyyehotoo jeente Yeessuu ooyto uuwwisso a jirta.
[28] Yeesso la wihi us deyyehota iyidah, “Deyyehoti ilkerengeetti weene Yeerusaleem, ani iooyina, atin on isooya, toro la nyaakhutiin ooya.
[29] I'di tahe ibeen a yamiit ki ‘Deyyehoti Waakh imaale, a ti mahanenye injire ideline, weel inuugsan,’ layadeeh.
[30] 'Deerka, “ ‘Halal mehe iyadeehiin ya, “Nah kasooreya!” Kuro la mehe iyadeehiin ya, “Nah dagcha!” ’
[31] A mehe chirri 'doo'd anihi fissan sinati geeddee ituso, 'doo'di suujoon yeele sinati weyti buurenye kawaarichaan.”
[32] Reeroo addane lammeenye chiftee laka usu a laleekhaate, 'dee layagiis.
[33] Chirri icho meessi Lafohi Matahe Enenyet layadeeh sooeleeleen ka, Yeesso intaas ka massalaaba kakaaheen. Chiftati lammee laka leekaahte. Koo ankiiski miigeet kakaaheene, ki addan la ankiiski gurro kakaaheen.
[35] Urur a toolla 'dey'doocha, ewweenki Ya'huud la Yeesso kachaarta. Wihi icho yidaaheen, “'Doo'di addan a ribe, chirri us rumanka Ki Lasubhe Koo Waakhenye Ki Lasoobahsate yahe, bal a isribo!”
[36] Iskare laka timiyye usu kachaaratte, farsoti sabiibe birrakhe siisse.
[37] Wihi icho iyidaaheen, “Chirri at karnati Ya'huud tahe isrib.”
[38] Matakkiis sartiis la wihi lakachiire a mehe ya, Waha a Karnati Ya'huud.
[39] Chiftataas Yeesso laleekaahe koo Yeesso leeabaarrame wihi us iyidah, “At a Ki Lasubhe gone, isribe nah laka nah rib!”
[40] I'daasenyi ki addan leejaakhe wihi us iyidah, “At Waakh ma karoorto? At laka i'diis u omoote lakigooche.
[41] Lammateen jeenteti uskeeli inno yeelle on inno liiyagiis, i'daasenyi us walah suujenye us yeele mele.”
[42] 'Deerka wihi us yidah, “Yeesso maanti at karnati dakhaah titah ikasoo'hel.”
[43] Yeesso wihi us ilaabe, “Rume kicheeka, at maalinka goobi Waakh ka a ileejirta.”
[44] Geedda ka il a geeddi saha'd lihti maalimeet, il tuumman la mug'di yitahye, ichoowka saha'd saagaale eleesse,
[45] a mehe orrahe banay soobihin a 'diisse. Dafarti weyti yobbeenye minki Waakhe buure seley goosso meel lamma seley igoote.
[47] Chirri eti koobbintoo iskareet itoollo wihi yitah arge ka, Waakh saa'de wihi us yidah, “Rumanka eta eti fissane eheet!”
[48] Chirri 'doo'di tuummane kootte sookulme wihi yitah 'dey'dooche wihi yitah arge ka, bolokh ka kacchach isgu'ddeene irteen.
[49] I'daasenyi 'doo'di usu garti tuumman deyyehoti goorat boroofenhi Gaalilaaya kasooraahte khabaani foga tolossateene wahanyeyyoha 'dey'doocheen.
[50] Etoo Yuussuf layadeehe ilkerengeetti Arima'daaya ili Ya'huudiya kajirto yaal la a jira. Ulla a etoo haaggane toro fissane toro dakhi Waakhe suga.
[51] Ulla a etoo Jaldaabti Weene Ya'huud goya kijiro, i'daasenyi wihi icho goocheen ichoow wihi icho yeeleen ma leegoon.
[52] Ulla Bilaato iirte sar Yeesso daahe.
[53] 'Deerka massalaaba kasooyagche, dafartoo kaayyuube go'ddoo daddaab ka lakhute, injire enenyet liikahawwaalin goya kareeche.
[54] Waha la a Ibeenki Latannabti, Seeri Lanaso la a soodeylanta.
[55] Deyyehoti Yeesso ilkerengeetti Gaalilaaya ka sooraahte la Yuussuf raahte go'ddi Yeesso lakahawwaale ichoow saggi sartiis go'ddaas ka liireeche argeen.
[56] 'Deerka goob inokhteene miricchi ichoow geeyohi uyuuggee tuumman tannabicheen. Waha la a wihi icho sar Yeesso kadowaan. I'daasenyi Seeri Lanaso ka naseen i'di amur i'doonuu.