[1] Yeesso chirri us ergaanotiisti tomon ichoow lammee isiwahe ka, miig ichoow antohi icho ginnayyo tuumman kabahchaane toro icho sugeerre kasamaachaan siiche.
[2] Ulla ergaano ili kharaat ierge, 'dee wori dakhi Waakh miinsan cheekta, 'doo'di khakkhannan laka samaassa.
[3] Wihi us iyidah, “Chirri atin irattaan la, wohoo rucchul laka asi'danna. Wul ommos urgo ommos golol ommos chilimme ommos ubbaaroo deere addan laka asi'danna.
[4] Mimbaaw atin gesseen on fiddiya ichoowka ilkerengeettaas kabaha.
[5] Chirri enenyet atin imartiisan, ebeeri luhlo atin fuulo sahda geedda atin ilkerengeetticho kabahtaan. Waha a garti icho cheekatti.”
[6] Ergaano 'deerka kolba gooboo iratte Wori Haaggan cheekte, 'doo'di khakkhannan laka meelal tuumman ka samaasse.
[7] Chirri 'Heroodhi boroofenhi Gaalilaaya iween wihi yitah tuumman daage ka, mal waaye. I'di tahe 'doo'd gaasoo Yoohanahi Enenyet Baattissiyo iche omoot lakasookahche, iche essa.
[8] Gaasoo la Eliiya soobahe essaane, gaasoo la, etoo goorat Waákh íyeyyeedo iche sookahe iche essaan.
[9] I'daasenyi 'Herood wihi us yidah, “Ani goorat Yoohana matah gooche. Eta toro wahanyeyyoha i'dee yeelo an daago a ayyo?” 'Herood la jiti us Yeesso kaargo yowte.
[10] Chirri ergaano soonokhatte ka, wihi iche yeesse Yeesso icheekte. Yeesso 'deerka ergaano khaatte ilkerengeettoo Bessaayda layadeeh ka intoo khaawwan irteen.
[11] I'daasenyi ururre kasse, 'dubiis leetimiy. Ulla soodowweeste toro wori dakhi Waakh miinsan icheeke, 'doo'di khakkhannan laka samaache.
[12] Chirri orrahe soodihto ka, ergaanoti tomon ichoow lammee itimiyye wihi iche itidah, “Urur laabe 'dee goobassi soodow ichoow gosasha soodow ka golol ichoow bari a yowti. A mehe inta a yibe.”
[13] Wihi us ilaabe, “Atin rubeytiin wohoo icho yamhiin siicha.” Wihi iche ilaabte, “Wihi nah khabno a makaate chan ichoow bahag lamma kalday on. Chi' nah iranni nah 'doo'da tuumman golol isooganno on menye.”
[14] Mejeli intaas kajire a geeddi alif chan. I'daasenyi wihi us abattitiis iyidah, “Bal koobbinohi geeddi tomon chacchane koorromicha.”
[15] Abatti i'daas yeesse, enenyet tuumman la orronte.
[16] Makaateyyohi chane ichoow bahaggi lammee khaate, serey yeye, Waakh kala'd ilaabe, jejjebche. 'Deerka abatti idiibe 'dee 'doo'd a gisso.
[17] Enenyet tuumman golossate, darge. Abatti la enjel tomon ichoow lamma gololi laajjebche lasoowaache buuhaan soosuunte.
[18] Maantoo chirra Yeesso keley Waakh wahti abattitiis la a leejirta, wihi us icho worsate, “Ururre an a ayyo elatta?”
[19] Wihi iche ilaabte, “Gaasoo ati a Yoohanahi Enenyet Baattissiyo essa, gaasoo a Eliiya essa, gaasoo laka at a etoo goorat Waákh íyeyyeedo omoot ka sookahe essa.”
[20] “I'daasenyi atin la? An a ayyo tadeehiin?” worsate. Beetero wihi us ilaabe, “At a Ki Lasubhe, a ki Waakh.”
[21] Yeesso la weyti abatti tootooche, uus iche waha etoo kalday laka icheekine.
[22] Toro wihi us iyidah, “Ínam Aadam sinati buurenye latusa, ewweenki Ya'huud ichoow kuhaaniyyohi wewween ichoow tagaammeti amurre usu 'dii'daane, layagiise ibeenki seyyahnaatteet ka omoot lakasookahcha.”
[23] 'Deerka wihi us icho tuumman iyidah, “Chirri etoo isooraahin 'doono awtiis a 'dii'do toro la kol dakkhan massalaabatiis barbar a sookorsati a isooraaho.
[24] A mehe eti tuummane jirotiis ribin 'doono, jiroti rummaat a waaya. I'daasenyi eti tuummane harrata ka jirotiis ani iwaayo jirotiisti rummaat a riba.
[25] Etoo maanta a chirri us wohoo 'hele, chirri us wihi harrata tuumman 'hele, i'daasenyi awtiis waaye ommos baabe?
[26] Chirri etoo ani ikuuryaawo toro yeedeey kuuryaawo, Ínam Aadam maanti us ababnaankiis ichoow ababnaan Aabbahiis ichoow ki herti Waakhe munyee leesoonokhti usu a kuuryaawa.
[27] Rume atin icheeka, gaasiinkoo maanta inta kijiro, omoot ma argo geeddi icho dakhi Waakh iargin.”
[28] Inkoo us yeeda yidahye geeddi ibeen siyyeete kutte ka, Yeesso Beetero ichoow Yoohana ichoow Yaakoobo khaatte, haloo leekore weeste.
[29] Weestaayi, fooliis urgiye, gaaddiis la urgiite weyti dakhnaatte.
[30] Reeroo lammee, a Muusa ichoow Eliiya,
[31] ichohi weyti ababo soobaheene, Yeesso leeyyeedeen. Wihi icho Yeesso kaleehawwoocheen a omoottiisti us 'dee kola ibeenneta ilkerengeetti weene Yeerusaleem ka yamuut. Waha la a wihi goorat Waakh Yeesso igooche us dowwanoha ka soobuuhicho.
[32] Beetero ichoow wahalhiis ba weyti yuufeen. I'daasenyi chirri icho sooneybaateen ka Yeessohi ullaka ababo argeene reeri lammeenye Yeesso leetoollo laka argeen.
[33] Chirra reer Yeesso katabo ka, Beetero wihi us Yeesso iyidah, “Kamur, a haaggantahe gon chi' nah inta kijirro. Alley gaayim seyyah a disno, too a taahha, too a too Muusa, too la a too Eliiya.” Beetero la wihi us essi ma garti ba.
[34] Yeyyeedaayi, mirisoo soobahe icho tuumman ankube, abatti la chirri miris sarcho kore ka roorro gesse.
[35] Hooyoo la mirisaas goyaka sooyeede wihi us yidah, “Waha a Weeleeyki an soobahsade, usu nabah isuda!”
[36] Chirri hooy gammadiche ka, saggi Yeesso keley iyahe kaseen. Abatti waha leegammadisse, et iche wihi iche chirraas agarte icheekte mele.
[37] Ibeenki kaas sooraaho, chirri icho hal kasookhubteen ka, ururi buure or kasoodowe.
[38] Etoo la urur goya kasooriire, wihi us yidah, “Eti ween a kihawwaasde, inankeey uur isoonugleyso. A mehe a inanki kaldaye an khabo.
[39] Ginna a khabatta, chirraas on riira, harmissa 'dombo af leekeena. Geeddi deer ma 'diisso, weyti sina kawaarissa.
[40] Abattitaah a hawwaasde, 'dee ginna weel kibihissa, i'daasenyi a agaafatte.”
[41] Yeesso wihi us ilaabe, “'Doo'di wey'dane uskeel lehe Waakh ikakhuufin! Geeddoh atin leefiddiyo? Geeddoh atin igarrahsadi? Inankaah inta keen!”
[42] Inam soosohtaayi ginna toro il kagu'dubte weyti kaharmisse. I'daasenyi Yeesso ginna leejaakhe, inam samaache, ooyohi dele dahan gesse.
[43] Icho tuumman la miigti Waakh kagirmeesteen. 'Doo'd tuumman wihi Yeesso yeele kagirmeestaayi, Yeesso wihi us abattitiis iyidah,
[44] “Taba waha an atin isooadeeh mujjum nabah isuda! Ínam Aadam dowwanoha ka 'dube lagoocha, dahanohi enenyet lagessa.”
[45] I'daasenyi waha wihicho ma aban. I'di tahe icho waha a lakadagche, uus 'dee icho wihi icho yahiin garanne. Icho la usu worsan karooreen.
[46] Abatti goyaka iriirtoo soobahte, eti berri 'doo'd tuumman iween isleeiriirte.
[47] Yeesso la malicho a garta gone, weeloo rucchul khaate garabiis toolliche.
[48] Wihi us icho iyidah, “Eti tuummane jeenteti us abattiteey iyahuu weela rucchul martiisti, ani imartiista. Eti tuummane ani imartiisti la eti isooergate martiista. A mehe eti goytiin ka weyti rucchul usu weyti ween.”
[49] Yoohana la wihi us Yeesso iyidah, “Kamur, nah etoo antohi magahaah ka ginnayyo enenyet kabahcho a agarre, nah la usu toollin leheet, jeenteti us keen ieheynan u.”
[50] “Ajeyinna,” Yeesso yidah. “A mehe eti atin i'dii'din, a aaliinna.”
[51] Inkoo ibeenki Yeesso goobi Waakh lageecho soodowwaate ka, Yeesso saggi us ilkerengeetti weene Yeerusaleem iirti gooche, kahe irte.
[52] Ulla ergattitoo orey iergate. Icho la a irtaane geeddi us ankhanyahe ilkerengeettoo ili Saamariya ka inti us baryo yowtaan.
[53] I'daasenyi 'doo'di ilkerengeettaas Yeesso martiisan 'dii'de jeenteti us ilkerengeetti weene Yeerusaleem ikasohti u.
[54] Chirri abattiti koo Yaakoobo yahe koo la Yoohana yahe saggi Yeesso lii'dii'de argeen ka wihi icho Yeesso worsateen, “Kamur at nahi Waakh, ‘Serey ka 'dab keene, 'doo'da gub!’ inadeeh a 'doonta?”
[55] I'daasenyi Yeesso abattitiis iurgiye, leejaakhe.
[56] Yeesso ichoow abattitiis ba ilkerengeettoo addan irteen.
[57] Ildah raahaani, etoo wihi us Yeesso iyidah, “Meelbaaw at iratti ka an a kiraaha.”
[58] Yeesso wihi us ilaabe, “'Dowwohoyyo lumame khabaane, chimbirohi saraat la minchimbiroote khabaan. I'daasenyi Ínam Aadam inti us matah gesso laka ma khabo.”
[59] Etoo addan wihi us iyidah, “Kaale toolla isooraahe, abattiteey ateeh.” I'daasenyi et wihi us soolaabe, “Kamur, alley koloo a irdi, aabbaheey a laabo.”
[60] Yeesso wihi us iyidah, “'Doo'di tuume lamaa'do a hili 'doo'di tuume. I'daasenyi at iro wori dakhi Waakh miinsan 'doo'd icheek.”
[61] Etoo addan toro wihi us yidah, “Kamur, an kiraaha, i'daasenyi alley koloo a irdi 'doo'deey a ‘Waakh atin bariisti,’ iidaahe.”
[62] Yeesso wihi us ilaabe, “Eti tuummane ani isooraaho, toro jirotiisti oraat ijiitti, indigir us hili dakhi Waakh ikhabo mele.”