[1] Maalinkoo Seeri Lanasee Yeesso abattitiis khabaayi gosase goya raaha. Abattitiis la ilmohoo 'dargaayye guratte, dahanohicho ka butatte tuhum.
[2] Farissaayotoo la wihi iche worsatte, “Atin a i'doh Seeri Lanaso ka wihi amurre 'dii'ddantahe iyeessaan?”
[3] Yeesso wihi us icho ilaabe “Atin injire wihi Dawuud yeele maanti usu ichoow 'doo'di us khabe ba raarahteen Yeedi Waakh ka ma soomin a?
[4] Dawuud uranti minki Waakhe gele, makaateti Waakh liibahche khaate, yuhuyye, toro reeri leejire laka wohoo siiche. Amurreti laraaho ka la kuhaaniyyo kaldaye makaatetaas yaham.”
[5] Yeesso la wihi us icho iyidah, “Ínam Aadam a Kamuri Seeri Lanaso.”
[6] Maantoo addane Seeri Lanasee ka, Yeesso toro minki weysiite Ya'huud gele, 'doo'd wori Waakh abche. Etoo dahanti miigeet hanjaawte la intaas a kijire.
[7] Farissaayo ichoow tagaammeti amurre wohoo icho Yeesso kacheektaane yowtaane, 'deerka usu Yeesso Seeri Lanaso ka etaas samaacho mujjum fiiricheen.
[8] I'daasenyi Yeesso malicho a garta wihi us eti dahan laa iyidah, “Kah enenyet tuumman ortiis tolosso.” Et 'deerka kahe intaas tolossate.
[9] Yeesso 'deerka wihi us icho iyidah, “Wihi an atin worsadi, wihi haaggane layeelo ichoow suujoonki layeelo koh amurreteen israahaan? Jiroti enenyete laribo israahaan bal jiroti enenyete labaabiicho?”
[10] Yeesso icho tuumman indo leeraahe 'deerka wihi us et iyidah, “Dahantaah fiti!” Et i'daas yeele, dahane toro tuum haagsatte.
[11] I'daasenyi sirgoweene, i'di icho Yeesso yadeehiin isworsan sookhabteen.
[12] Ibeennetaas kichekoo Yeesso bahe burroo kore, ibeenki nool Waakh wahte.
[13] Chirri il soobaryo ka abattitiis isiwahe, goyche ka et tomon ichoow lamma soobahche, ergaanotiis kayeesse.
[14] 'Doo'daas us soobahsate a Siimonhi us magahoo addan ibahche Beetero yidah, walaaliiski Andereeya layadeeh, Yaakoobo, Yoohana, Fiilif, Bar'dolomaayo,
[15] Mattaayo, Toomas, Yaakoobohi inam Alfaayee, Siimonhi magahiis Yaaftiis'doone layadeeh ichoow,
[16] Yuuda inam Yaakoobo ichoow Yuuda Iskaariyoot ki yomboka Yeessó 'dub gooche.
[17] Ulla ergaanotiis khabaayi bur kasookhubte 'dowhoo tolossate. Ururi buurenye abattitiise ichoow 'doo'di ittaawenye boroofenhi Ya'huudiya ichoow ilkerengeetti weene Yeerusaleem ichoow ilkerengeetohi rurrucchule beyti buure afiche yaalle i'di maanta Tiiro ichoow Siidon illehe laka, intaas a kijire.
[18] 'Doo'daas tuumman la a yimiyye 'dee wihi Yeesso essi dagansata, toro sugeerreticho lakasamaacha. 'Doo'di ginnayyo dakhtaan laka lasamaache.
[19] 'Doo'd tuumman ebba Yeesso 'daarin 'doona, i'di tahe miige usu kasoobahta icho tuumman samaassa.
[20] Yeesso la abattitiis yeye, wihi us yidah, “'Doo'di Waakh imaalo, a atinhi toolla miskiine, a mehe dakhi Waakh a kiinna.
[21] 'Doo'di Waakh imaalo, a atinhi toolla raarah khabtaan, i'di tahe a atin ladargichaa! 'Doo'di Waakh imaalo, a atinhi toolla ooytaan, i'di tahe a atin lahamaadichaa.
[22] Waakh a atin imaala maanti enenyet jeente Ínam Aadam u atin 'dii'do, atin riho, ommos atin abaaro, magahiin uskeeli nool kawaho.
[23] “Taba gi'de chirri sina atin lakawaariche laka, weyti hamaada, gir'daama, i'di tahe Waakh goobiis ka kala'ddi buurenye atin gutaa. A mehe ooyenyetiche saggaas on 'doo'di Waákh íyeyyeedo sina ikawaaarisse.
[24] “I'daasenyi atinhi toolla kamurree sinati atin sugto eenna a buure! I'di tahe haaggi harrata orey on uur atin khobooche.
[25] Atinhi toolla dargan, sinati atin sugto eenna a buure! I'di tahe a raarahattaan. Atinhi toolla hamaaddaan sinati atin sugto eenna a buure! I'di tahe a uuwwissaane ooytaan.
[26] Atinhi toolla 'doo'd tuumman atin koolicho, sinati atin sugto eenna a buure. I'di tahe aacchinyetiin laka goorat saggaas on 'doo'di 'doo'di Waákh íyeyyeedo iskaayyeelo ikoolisse.
[27] “Atinhi idagansattaan wihi an atin iadeeh, chiiytiin 'doona, 'doo'di atin 'dii'do la haag on tusa,
[28] 'doo'di atin falo imaala, ki atin leeabaarramo la Waakh iwaha.
[29] Chirri etoo fodooroo kigu'dde, fodoori addan laka siiche a kigu'ddo. Chirri etoo kabuu'daah kaakhaate, ubbaaraahki deere us khaato laka atiran.
[30] Eti tuummane walah kidaahe siiche, chi' etoo wohoo wahaahe khaate la, aleemarmine a kasookhaatin.
[31] Wihi kootte incheenka atinhi atin liiyeelo 'doontaan, 'doo'di addan iyeela.
[32] “Chirri atin 'doo'di atin 'doono kalday on 'doontaan, walah iche atin ibahto mele. 'Doo'di uskeel leh laka, 'doo'di icho 'doono a 'doonaan!
[33] Chirri atin 'doo'di haag atin iyeelo kalday on atin laka haag iyeessaan la walah iche atin ibahto mele. 'Doo'di uskeel leh laka i'daas a yeela on.
[34] Chirri atin 'doo'di mog atin kagele 'dee atin mogtaas kasugtaan kaldach on mog siissaan la mehe atin ibahta? 'Doo'di uskeel leh laka, 'doo'di addane uskeel lehe 'dee mog sooguto mog a siicha on!
[35] I'daasenyi taba chiiytiin 'doona, haag iyeela, mog siicha ichohi atin isooguto asugina. 'Deerka kala'ddiin la a buuraatta, toro nyaakhuti Waakkhi Weyti Weene tateehiin. A mehe us 'doo'di kala'd ikhabin ichoow ki sussuuje uur a i'dabakhyahe.
[36] Saggi Aabbahiin uur inugulyahe u, atin laka 'doo'di addan uur inugleesda.
[37] “Taba uurassiin goyaka enenyet ahukkumina uus Waakh atin hukkumine. Taba enenyet uskeele yeesseen iidowina, uus atin laka uskeele yeesseen atin liidaahane. Taba enenyet uskeel ikakuta, 'dee uskeeliin a atin liikakuto.
[38] Enenyet walah siicha, atin la walah a atin lasiichaa. Wihi buurenye, meel liijahe, laruhe ichoowka khubti iche sabho lakaachiba. A mehe geeddi atin 'doo'di addan iyeessaan, geeddaase atin liiyeela.”
[39] Mammahta laka 'doo'd ibahche. “Etoo indo laa, koo indo laa a angaamicha? Lammache ankhar ma iskaleedihto?
[40] Eti walah laabcho, eti walah abcho ma kaween. I'daasenyi eti tuummane walah mujjum laabche, i'di eti walah abche yateeh.
[41] “A i'doh urufti il walaalaah kijirto iagarta, gurtunki issaah goya kijiro la iargin?
[42] At saggoh walaalaah, ‘Walaalaaw, alley uruftaas il kaajirto a kaabahcho,’ ikatadeeh ati rubeytaah la gurtunki issaah goya kijiro ma agarto? Iskaayyeessooy koloo gurtunki issaah goya kajiro bihiche, 'dee urufti il walaalaah goya kajirto mujjum agare, bihi.
[43] “Geey haaggane gurnaanki suuje bahcho mele, geey suujenye gurnaanki haaggan bahcho mele.
[44] Geeyba gurnaanki us bahcho lakaabta. Iyookkoka geeyi bilhil dommog ma kaguratti ommos geeyi khasah medeer ma kaguratti.
[45] Eti haaggan uuriis laka a haagganyahe gone, haaggaas on dela. Eti suuje la uuriis a suuj gone suujoonkaas on dela. A mehe wihi afiis kasoobaho, a wihi uuriis goya buuho.
[46] “A i'doh ani, ‘Kamur, Kamur,’ ikadowtaane wihi an atin idowo la iyeelina?
[47] Eti ani iyamiite wihi an idowo daago toro la raaho, wihi us iyoogyahe a atin tusa.
[48] Etaas a i'di eti min diso, weyti il khute, inti ng'aajjee ka daddaabohi ilaat dise. 'Duley yimiyye, bicchehi buure minkaas gu'ddeene, i'daasenyi ma sesseehin, i'di tahe mujjume disanyahee.
[49] I'daasenyi eti yeedeey daago toro iraahin a i'di eti min dise min la daddaabohi ilaat ikhabin. Uus hafari miige sookahe minkaas gu'dde, min tuumman reye, bar waaye.”