[1] Uumaccho ka ki magahiis Yeed layadeeh a jire one, Yeed Waakhe leejire, Yeed la a Waakh ekkatiissa.
[2] Ulla uumaccho ka Waakhe leejire.
[3] Waakh usu ka, walah tuumman a soouume. Walah lasoouume laantiis lasoouume mala.
[4] Usu jiroti rummaat lakeela. Jirota la weeli enenyete banay ikeenta.
[5] Banayhaas la mug'di goya kabolkhaane, i'daasenyi mug'di jirtuu ma khaato.
[6] Etoo Waakh leesoofarme a yimiyye, magahiis la a Yoohana.
[7] Ulla a yimiyye garti banayhaas 'doo'd icheeke, 'dee usu ka 'doo'd tuumman woraas rummeesta.
[8] Yoohana rubeytiis banayhaas menye, us eti garti banayhaas 'doo'd icheeko on eheet.
[9] Eti banayhi rummaatenye weeli enenyet tuumman banay tuso la yomboka harra a yamiit.
[10] Us harratane kijire. Chi' usu ka walah tuumman lasoouume laka, 'doo'di harrata eti us yahe ma aban.
[11] Us 'doo'diissa iyimiyye, i'daasenyi 'doo'diis usu ma khaatan.
[12] I'daasenyi 'doo'di tuummane usu khaatte, magahiis rummeeste, nyaakhuti Waakhe icho yateehiin a mu'danyahiin.
[13] Nyaakhuta delmaatti sarti weeli enenyet ma kasoouummamine ommos wihi weeli enenyet gooche menye, ommos 'dooninti mejel mee. I'daasenyi Waakh rubeytiissa nyaakhutiis kayeesse.
[14] Ki magahiis Yeed layadeeh weeli enenyet yitahye, harrata ka goyteen furte. Inno la weynaantiisti weyti haaggan a agarre, weynaanti weeli keleyenye Waakh. Ulla usuhi haaggi Waakhe buure ichoow rume buuhaane Aabbaheen kayimiy.
[15] Yoohana la runti usu miinsan enenyet a icheeke, riire wihi us urur iyidah, “Kan a eti an, ‘Etoo ani ikaween 'dubeey ka a yamiit, i'di tahe us geeddi an idelan laka a jire on,’ eldi.”
[16] Yeesso Kiriisto tuunki haaggiiski buure ka, buuhiis a inno ikasookhakkhaye.
[17] A mehe Waakh amurretiis Muusa ka a inno siiche. Haaggi Waakhe buure ichoow runtiis la Yeesso Kiriisto ka a inno tuste.
[18] Et injire Waákh arge mele. I'daasenyi Weeliiski kaldaye ullaka Waakhenye Aabbaheen garabiis kijiro, eti Waakh yahe a inno isoobabbakkaahiche.
[19] Maanti weynaanti yaafohi Ya'huude ilkerengeetti weene Yeerusaleem taal, kuhaaniyyo ichoow 'doo'doo goob Laaweenye kuhaaniyyo gargaaro Yoohana ieregte, eti us yahe iche worsatte.
[20] Ulla eti us yahe ma daginne, 'doo'd ortiis ka cheeke, wihi us iyidah, “An Ki Lasubhe lasugo mee.”
[21] Iche la wihi iche worsatte, “At 'deerka a ayyo? At a Eliiya?” Ulla, “Mele,” yidah. “At a eti Waákh íyeyyeedo inno sugno?” worsateen. Wihi us ilaabe, “Mele.”
[22] 'Da'ddaboka wihi icho yidaaheen, “At a ayyo? Wihi nah 'doo'di nah sooergate ilaabno nah sii. At a ayyo istadeeh?”
[23] Yoohana yeedi eti Waákh íyeyyeedo Isaaya layadeeh ka ilaabe, “Etoo hidaad ka a rirriira. ‘Jiti Kamur ficcha,’ iche essa. Eta la a ani.”
[24] Farissaayotoo lasooergate,
[25] wihi iche worsatte, “Chirri at Ki Lasubhe ieheynane ommos at eti meel Eliiya gele ieheynane ommos at eti Waákh íyeyyeedo inno sugno ieheynan, a i'dohe 'doo'd ibaattissita?”
[26] Yoohana wihi us ilaabe, “An bicche enenyet kabaattissiya, i'daasenyi etoo goytiin kijiro atin igaran, a jira.
[27] Usu a kiiyye dubeey ka yamiite, anna falfihi kobtiissa an jalkhicho ma mu'dan.”
[28] Waha tuumman la ilkerengeetti Be'daaniya hawti Yoordane 'dusso berihicheenye Yoohana enenyet kabaattissiyo, iche kayitaaheen.
[29] Ibeenki kaas sooraaho ka, Yoohanahi Enenyet Baattissiyo Yeessohi soosohti arge. Yoohana la wihi us yidah, “Yeya, Heleenki Waakhe uskeeli 'doo'di harrata bahcho kalla.
[30] Kan a eti an woriis kaayyeede, ‘Etoo 'dubeey ka a yamiite, ulla a ikaweenyahe i'di tahe us geeddi an idelan laka a jire,’ an atin idowe.
[31] Ani rubeyteey eti us yahe ma garan. I'daasenyi wihi ikeene an bicche 'doo'd kabaattissiyo, a jitoo 'dee usu 'doo'di Issiraayel liikababbakkaahicho.”
[32] Yoohana 'deerka runta cheeke, wihi us yidah, “An Rubeyti Munyeenye i'di kutukuurrug u, goobi Waakh katimiyye usu kafiddiite a arge.
[33] Sag an eti us yahe igardi mele sammata Waakkhi isooergate, 'dee 'doo'd bicche kabaattis iyidah waha ani ikiidaahan, ‘Eti at agarto Rubeyti Munyee goobi Waakh ka isooyagte kafiddiite, usu Rubeyti Munyee ka 'doo'd baattissiya.’
[34] An waha a arge, saggi rumanka us Weeli Waakh iyahe, a cheeka.”
[35] Ibeenki kaas sooraaho, Yoohana abattitiistoo lammee khabaayi toro intaase toolla.
[36] Chirri us Yeessohi kuto arge ka, wihi us yidah, “Yeya, Heleenki Waakh kuulla.”
[37] Chirri abattita lammee usuhi waha essi daagte ka, Yeesso raahte.
[38] Yeesso urgiye, ichehi usu sooraahto arge, “Mehe 'doontaan?” worsate. Iche la, “Eti weenoow, at intoh fiddiita?” worsatte.
[39] Wihi us ilaabe, “Kaaleya 'dee arga.” 'Deerka iratte, meessi us fiddiyo agarte. Wahaas la a geeddi saha'd affarti chirdeereet. Maantaas tuumman usu on lee'hadde.
[40] Reera lammeenye wihi Yoohana essi daage Yeesso raahe, kichokoo a Andereeyahi walaal Siimonhi Beetero layadeeh.
[41] Wihi kolooraate Andereeya yeele, Siimonhi walaaliisenye yowte, “Ki Lasubhe a 'helle,” iyidah. Ulla a Kiriistohi lasugo.
[42] Ulla Siimon Yeessó ikeene. Yeesso la yeye wihi us iyidah, “At a Siimonhi ínam Yoohanee menya? Magahaah kola Keefas iche layadeeh.” Ayta chirri lalaabe a Beetero ommos Daddaab.
[43] Ibeenki kaas sooraaho ka, Yeesso usuhi boroofenhi Gaalilaaya irti gooche. Fiilif 'hele wihi us iyidah, “Kaale abattiteey ateeh.”
[44] Fiilif i'di Andereeya ichoow Beeteruu, ullaka ilkerengeetti Bessaayda kayimiy.
[45] Fiilif Na'daanayel 'hele wihi us iyidah, “Nah eti goorat Muusa Chiirnaanneti Amurre ka chiire, 'doo'di Waákh íyeyyeedo laka woriis chiireen a 'helle. Ulla a Yeessohi ilkerengeetti Naasarete, a ínam Yuussuf.”
[46] “Ilkerengeetti Naasaret a! Rumanka wohoo rucchule haaggan intaas a kasoobahaan on a?” Na'daanayel worsate. Fiilif la wihi us iyidah, “Kaale, isiagar.”
[47] Chirri Yeesso Na'daanayelhi isoosohti arge ka, wihi usu miinsane us yidah, “Eti rumanka Issiraayelenye wihi beenaat liika'helin kalla.”
[48] Na'daanayel la wihi us worsate, “At saggoh ani igaratta?” Yeesso wihi us ilaabe, “Geeddi Fiilif kiwahin, atihi geeyi fiig iliis fiddiito iche kiarge.”
[49] Na'daanayel wihi us yidah, “Eti weenoow! Ati Weeli Waakhe. Ati a karnati Issiraayel.”
[50] Yeesso la wihi us iyidah, “At jeenteti an atihi geeyi fiig iliis fiddiito kiarge kiidahye ani irummeysatta? Wihi wahaas kussan a agarta.”
[51] Wihi us kakhaye, “Rume atin icheeka, goobi Waakh usuhi furane herti Waakh ínam Aadam isookhubatti toro korto a agarta.”