[1] Inkoo Seeri Lanaso kute ka Maariyati ilkerengeetti Magdaala ichoow Maariyati abar Yaakoobee ichoow Saloome miricchihoo weyti uyuuge soogateen, sar Yeesso kasubhaanee.
[2] Ibeenki oraate teebataas ka, uus orrahe sookorte kaheene, go'ddi Yeesso lakahawwaale ibaheen.
[3] “Ayyo 'dee daddaabti go'd af lakorche inno i'dembeleeliya?” iche isworsateen.
[4] I'daasenyi chi'icho serey yeyeen ka, daddaabti la'dembeleeliye argeen chi'iche buurtahe laka.
[5] Chi'icho go'd geleen ka, eti nugule anki miigeet fiddiyo darfohi daddakhan khabo argeene, naheen.
[6] Ulla wihi us iyidah, “Anahina! Yeessohi Naasarete goorat massalaaba lakakaahe iche yowattaan. Omoot a kasookahe, inta ma kijiro! Meessi icho kareecheen yeya.
[7] I'daasenyi nyaama, abattitiis ichoow Beetero mehe itadeehiin ya, ‘Yeesso ortiinna ili Gaalilaaya irta. I'di goorat us atin iyidah u, intaakka a agartaan.’ ”
[8] Oboorri hamar kayimiyye girmeeste, go'd kabahe, firde. Etoo kalday laka ma icheekin, a mehe roorro khabeen.
[9] Ibeenki oraate teebataase us omoot kasookahe ka, kolooraat Maariyati ilkerengeetti Magdaala goorat us ginna teeba kabahche isoobahe.
[10] Iche la iratte, 'doo'di goorat Yeesso leejire icheekte. Icho la a wihi uuwwicho ooyo.
[11] Chirri icho saggi Yeesso inoolyahe ichoow saggi iche iagarte daageen ka, rummeysawwaayeen.
[12] Waha 'dubicho ka, Yeesso uummankoo yeere ka 'doo'doo lammeenye ilkerengeet khariis raaho isoobahe.
[13] Chi'iche eti us yahe kasse ka, nokhatte, ti addan icheekte, i'daasenyi iche laka ma rummeysan.
[14] Yomboka golossataani Yeesso ichehi tomon ichoow koowe isoobahe. Jeenteti icho kakhuufnaanki icho usu kakhuufaan ikhabin ichoow matahmiigti icho wori 'doo'di inkoo us omoot kasookahe arge irummeysan u, leejaakhe.
[15] Wihi us icho iyidah, “Nyaama harra tuumman taba, Wori Haaggan la 'doo'di Waakh soouume tuumman icheeka.
[16] Eti rummeesti toro labaattissiyo, a lariba. I'daasenyi eti irummeysan Waakh uskeel a igoocha.
[17] 'Doo'di rummeesti wahanyeyyoha miigti Waakh tuso a yeela. Antohi magaheey ka ginna enenyet a kabahcha, afi us idaagin laka kayeyyeeda.
[18] Toof laka dahan a kakhabta, toro chu'us hadaadohi uskul yabhuub laka ma gaameeraan i'daaru laka. 'Doo'di khakkhannan dahano on korcha, 'doo'd samaata.”
[19] Inkoo Yeessohi Kamure icho leeyeede ka goobi Waakh liikorche, Waakh anki dahantiisti miigeet orronte.
[20] Abatti 'deerka bahte Wori Haaggan meel tuumman ka cheekte. Kamur la icho hil leehaaggiche, yeedicho ichoow wahanyeyyohi miigti Waakh tuso sooraahe ka, yeedi icho cheekeen rummaache.