[1] Semana qallariy p'unchaypitaqmi, ancha tutallamanta, q'apashaq hawinakuna wakichikusqankuta apariyukuspa chay qatikuq warmikunaqa aya p'ampana t'oqota rirqanku. Hinan wakin warmikunapas paykunawan rillarqankutaq.
[2] Hinan aya p'ampana t'oqo wisq'asqa rumita kuyurichisqata tarirqanku.
[3] Haykuspankutaq ichaqa, Señor Jesuspa kuerpontaqa mana tarirqankuchu.
[4] Chay hina kaqtinmi, paykunaqa chay hina kasqanmanta sinchi muspharisqa kasharqanku. Chayllamantaqmi iskay qharikuna, k'ancharishaq yuraq p'achayoq paykunaq kasqankupi sayaykurqanku.
[5] Hinan paykunaqa, mancharikuymanta pampakama k'umuykurqanku. Chay qharikunataqmi, paykunata nirqanku: ―¿Imanaqtinmi wañusqakunapurapi kawsashaqta maskhashankichis?
[6] Manan kaypiñachu kashan, aswanpas kawsarimpunñan. Galileapiraq kashaspa nisqasunkichista yuyariychis.
[7] Nirqanmi: ‘Ñoqa Runaq Churintaqa huchasapakunaq makinkuman hap'ichiwanqakupunin, hinallataq chakatawanqakupunin. Kinsa p'unchaymantataq ichaqa, kawsarimpusaq,’ nispan, nispanku.
[8] Hinan chay warmikunaqa imanispachus nirqan, chay simikunamanta yuyarirqanku.
[9] Aya p'ampana t'oqomanta kutipuspankutaqmi, lliw chay imaymanakunata chunka hukniyoq yachachisqakunaman, hinallataq llapallan wakin runakunamanwan willarqanku.
[10] Apostolkunaman chay imaymanakunata willaqkunaqa, Magdala llaqtayoq María, Juana, Jakoboq maman María, hinallataq paykunawan kashaq wakin warmikunapiwanmi karqanku.
[11] Chay warmikunaq rimaykusqankutaqmi ichaqa, paykunapaqqa waq'ayasqaq rimasqankuna hina karqan. Hinan mana kreerqankuchu.
[12] Pedrotaqmi ichaqa, sayarispa aya p'ampana t'oqoman phawaylla phawarqan. Hinan aya p'ampana t'oqo ukhuta k'umuykuspa qhawaykurqan. Hinaqtinmi Jesuspa kuerpon k'uyusqanku sabanakunataqa huk runaq churaykusqanta hina rikurqan. Chay hina kasqanmantataqmi, yuyayninpi mana kabesqa ripurqan.
[13] Chayllamanmi, kasqan p'unchaypacha, Emaús sutiyoq llaqtachata paykunamanta iskay qharikunaqa risharqanku. Chay llaqtachaqa, Jerusalén llaqtamanta soqta chunka estadiokuna hina karupin kasharqan.
[14] Lliw chay imaymanakuna pasasqanmanta paykunapurapi rimaspan, chay iskay qharikunaqa risharqanku.
[15] Hinan paykunaqa rimaspanku, hinallataq paykunapurapi churanakuspanku, risharqanku. Chayllamanmi Jesusqa paykunaman asuykuspan, paykunawan kuska risharqan.
[16] Jesustaq ichaqa, paykunaq ñawinkuta arphayachirqan. Chaymi mana payta reqsirqankuchu.
[17] Hinan paykunata nirqan: ―¿Purishaspaykichisri, imamantataq qankunapurapi rimashankichis? ¿Chay rimashasqaykichismantachu khuyay kashankichis? nispa. Hinan khuyaylla sayarparirqanku.
[18] Hinan paykunamanta hukninku Kleofás sutiyoq karqan. Paymi, kutichispa Jesusta nirqan: ―¿Qan sapallaykichu karu llaqtayoq, kay p'unchaykuna Jerusalenpi chay imaymanakuna pasasqanta mana yachaq kanki? nispa.
[19] Paykunatataqmi Jesusqa nirqan: ―¿Imakunata? nispan. Hinan paykunaqa nirqanku: ―Nazaret llaqtayoq Jesusmantayá. Payqa Diospa rantinpi rimaq runan karqan. Hinallataq rimakuyninpipas, ruwayninpipas, Diospa ñawpaqenpi, hinallataq llapan llaqtantin runaq ñawpaqenpipas, atiyniyoqmi karqan.
[20] Umalliq saserdotekunaman, hinallataq ñoqaykuq umalliqniyku kaqkunamanpas wañuchisqa kananpaq hap'ichirqanku. Chay hinapitaq chakatarqanku. Chay imaymakunamantan rimasharqaykuqa.
[21] Ñoqaykutaqmi ichaqa, Israel llaqtata paypa rantipapunanta suyakusharqayku. Tukuy chaykunaq pasasqanmantataqmi kunanqa kinsa p'unchayña pasarun.
[22] Chaymantapas ñoqaykumanta wakin warmikunan aya p'ampana t'oqota rirqanku. Hinan muspharichispa niwarqanku: ‘Aya p'ampana t'oqotan ancha tutallamanta rirqayku.
[23] Hinan kuerponta mana tarirqaykuchu. Ichaqa iskay angelkunatan rikurqayku. Paykunataq niwarqanku: “Jesusqa kawsashanmi,” nispanku,’ nispa.
[24] Ñoqaykumanta wakinniykun aya p'ampana t'oqota rillarqankutaq. Hinan warmikunaq nisqanta hinapuni tarirqanku. Pay kikintan ichaqa, mana tarirqankuchu, nispanku.
[25] Hinan Jesusqa paykunata nirqan: ―Diospa rantinpi rimaqkunaq lliw nisqankuta, mana entiendiqkuna, mana kreeqkuna, hinallataq rumi sonqokunan kankichis.
[26] Cristoqa, chay imaymanakunapi, ¿manachu ñak'arinanpuni karqan? Hinallataq hatunchasqa kananmanpas, ¿manachu haykunanpuni karqan? nispa.
[27] Hinan Jesusqa llapallan paymanta rimaq Qelqakunata sut'incharqan. Moisespa qelqasqankunamantapacha qallarispan, Diospa rantinpi rimaqkunaq llapan nisqankunakama sut'incharqan.
[28] Chay hinapin, maymanchus risqanku llaqtachaman chayarqanku. Jesustaqmi ichaqa, aswan karuman riq hina karqan.
[29] Paykunataq ichaqa, rimapayaspa nirqanku: ―Ch'isiyarapushanñamá, tardeñataq kanpas. Chayrayku ñoqaykuwan qhepakullayña, nispanku. Chaymi paykunawan qhepakunanpaq wasiman haykurqan.
[30] Chay hina kaqtinmi, mesapi paykunawan tiyaykurqan. T'antata hap'ispantaq samincharqan. Hinan phakmispa paykunaman qorqan.
[31] Hinan ñawinku kicharikuqtin Jesusta reqsirurqanku. Paytaqmi ichaqa, ñawinkumanta chinkarapurqan.
[32] Hinan paykunapurapi ninakurqanku: ―Ñanpi rimaykushawaqtinchis, hinallataq Qelqakunata qhawachishawaqtinchis, ¿manachu sonqonchisqa rupharisharqan? nispanku.
[33] Kasqan ratupachataqmi, paykunaqa sayarispa, Jerusalén llaqtaman kutipurqanku. Hinan chunka hukniyoq yachachisqakunata, hinallataq paykunawan kaqkunatapas huñunasqata tarirqanku.
[34] Hinan nirqanku: ―¡Cheqaqtapunin Señorqa kawsarirampusqa, hinan Pedromanpas rikhurisqa karqan! nispanku.
[35] Hinan paykunaqa, imaynapichus ñanpi tuparqanku, chayta willakurqanku. Hinallataq imaynapichus t'antata phakmishaqtin reqsirusqankutawan willakurqanku.
[36] Chay imaymanakunamanta rimashanankukamallataqmi, Jesusqa paykunaq chawpinkupi rikhurirqan. Hinan paykunata nirqan: ―Thak kay qankunawan kachun, nispa.
[37] Hinan paykunaqa mancharisqa, llaksasqa ima kaspanku, huk espirituta rikunankupaq yuyaykurqanku.
[38] Jesustaq ichaqa, paykunata nirqan: ―¿Imanaqtintaq mancharisqa kashankichis, hinallataq sonqoykichispi chay hinakunata yuyaykushankichisri?
[39] Qhawariychis. Makiykunatapas, chakiykunatapas llamiykuychis. Hinallataq ñoqa kikiypuni kasqayta rikuychis. Huk espirituqa mana aychayoqmi, mana tulluyoqmi. Rikushawankichis hinapas, ñoqaqa aychayoq, hinallataq tulluyoqmi kashani, nispa.
[40] Chayta nispantaqmi makinkunatapas, chakinkunatapas qhawachikurqan.
[41] Paykunataqmi kusikuymanta yuyayninkupi mana kabesqa kasharqanku. Mana kreeqtinkutaqmi Jesusqa paykunata nirqan: ―¿Kaypi ima mikhunallaykichispas kashanchu? nispa.
[42] Hinan huk phakmi challwa kankachata, hinallataq wanqoyruq misk'intawan Jesusman haywarqanku.
[43] Hinan chayta chaskispa, paykunaq qayllankupi mikhurqan.
[44] Hinan nirqan: ―Qankunawan kashaspayraqmi kay simikunataqa rimaykurqaykichis. Nirqaykichisqa: ‘Moisespa qelqasqan Kamachikuy Simipi, Diospa rantinpi rimaqkunaq qelqasqankupi, hinallataq Salmos qelqapi, llapan ñoqamanta qelqasqakunaqa hunt'akunanpunin,’ nispaymi, nispan.
[45] Hinaqtinmi Qelqakunata entiendinankupaq, yuyayninkuta kicharirqan.
[46] Hinan paykunata nirqan: ―Qelqakunaq nisqanman hinan, Cristoqa ñak'arinanpuni karqan. Hinaspataq kinsa p'unchaymanta wañusqakunamanta kawsarimpunanpuni karqan.
[47] Paypa sutinpi yuyayman kutirikuy, hinallataq hucha pampachay llapan suyukunaman willakunanqa nesesariopunin karqan. Chaytaqmi Jerusalén llaqtamantapacha qallarimunan karqan.
[48] Qankunataqmi, chay imaymanakunamanta testigokuna kankichis.
[49] Qhawariychis, Yayaypa prometesqantan qankunaman kachamusaykichis. Qankunataqmi ichaqa, hanaq pachamanta Diospa atiyninwan p'achallisqa kanaykichiskama, Jerusalén llaqtapi qhepakunkichis, nispa.
[50] Hinan Jesusqa, Betania llaqtakama paykunata pusarqan. Makinkunata haywarispantaq, paykunata saminchaykurqan.
[51] Chay hina kaqtinmi, saminchaykusqan qhepata, paykunamanta t'aqarikapurqan. Hinan hanaq pachaman apasqa karqan.
[52] Paykunataqmi Jesusta yupaychaspankuña, hatun kusikuywan Jerusalén llaqtaman kutipurqanku.
[53] Hinan Diosta yupaychaspanku, hinallataq saminchaspanku, Dios yupaychana wasipi mana kuyurispa, kasharqanku. Ahinapuni kachun.