[1] Qallariypiqa, Simin karqan. Simitaq, Dioswan karqan. Simitaqmi, Diospuni karqan.
[2] Payqa, qallariypin Dioswan karqan.
[3] Tukuy imaymanakunapas paypa ruwasqanmi karqan. Mana paywanqa, tukuy imaymana ruwasqa kaqkunapas manan ruwasqachu kanman karqan.
[4] Paypin kawsayqa kasharqan. Chay kawsaytaqmi, runakunapaq k'anchay karqan.
[5] K'anchaymi laqha-tutayaqpi k'anchan. Laqha-tutayaqtaqmi ichaqa, manapuni k'anchaytaqa atipayta atirqanchu.
[6] Huk runan, Diospa kachamusqan karqan. Chay runaq sutintaqmi, Juan karqan.
[7] Payqa willakuq kananpaqmi hamurqan. Hinallataq k'anchaymanta willakusqan chawpinta, llapa runakuna iñinankupaqmi hamurqan.
[8] Manan Juanchu k'anchayqa karqan. Aswanpas k'anchaymanta willakunanpaqmi payqa hamurqan.
[9] Chay k'anchaymi, cheqaq kaq k'anchayqa karqan. Hinan kay pachaman hamuq llapa runakunata k'anchashan.
[10] Payqa, kay pachapin kasharqan. Paypa chawpintataqmi, kay pachaqa ruwasqa karqan. Kay pachapi runakunataqmi ichaqa, manapuni payta reqsirqankuchu.
[11] Payqa, paypa kaqkunamanmi hamurqan. Paypa kaq runakunataqmi ichaqa, mana payta chaskirqankuchu.
[12] Llapallan payta chaskikuqkunaman, hinallataq sutinpi iñiqkunamanmi ichaqa, Diospa wawankuna kanankupaq atiyta qorqan.
[13] Paykunaqa, manan yawarmantachu, nitaq aycha kuerpoq munayninmantachu, nillataq qhariq munayninmantapaschu naserqanku. Aswanpas Diosmantan naserqanku.
[14] Simitaqmi aycha runaman tukurqan. Hinan ñoqanchis ukhupi tiyarqan. Hatun atiynintataqmi yuyaywan allinta qhawarqanchis. Yayaq sapallan Churinpa chay hatun atiynintaqmi allinpaq qokuywan, hinallataq cheqaq kaqwan hunt'aykusqa karqan.
[15] Juanmi paymanta willakurqan, hinallataq kunkayoqta waqyakuspa nirqan: —Ñawpaqtañan chay runamantaqa rimarqani. Nirqanitaq: ‘Ñoqaq qhepayta hamuqmi, ñoqamantapas ñawpaqtaraq karqan. Payqa, ñoqamanta ñawpaq kaqmi karqan,’ nispay, nispa.
[16] Llapallanchismi paypa allipaq qokuywan hunt'aykusqa kayninmanta yapa-yapamanta chaskirqanchis.
[17] Kamachikuy Simiqa, Moisespa chawpinta qosqan karqan. Allinpaq qokuywan, cheqaq kaqwantaqmi ichaqa, Jesucristoq chawpinta chayamurqan.
[18] Diostaqa, manapunin pipas rikurqanchu. Aswanpas Yayaq marq'ayninpi kashaq sapallan Churinmi Diostaqa rikuchirqan.
[19] Juanpa willakuyninqa kaymi. Jerusalén llaqtamanta judío runakunan, saserdotekunata, hinallataq levitakunata ima, Juanpa kasqanman kacharqanku. Paykunan Juanta tapumurqanku: —¿Pitaq qanri kanki? nispanku.
[20] Payqa manan mananchakurqanchu, aswanpas willakurqanmi. Willakuspantaqmi nirqan: —Ñoqaqa manan Cristochu kani, nispa.
[21] Hinan tapullarqankutaq: —Chay hinaqa, ¿Eliaschu kanki? nispanku. Juantaq kutichispan nirqan: —Manan ñoqachu kani, nispa. Tapullarqankutaqmi: —¿Diospa rantinpi rimaqchu kanki? nispanku. Paytaqmi kutichispan nillarqantaq: —Manan, nispa.
[22] Hinaqtinmi payta nirqanku: —Pikunachus kachamuwarqanku paykunaman ñoqayku kutichinaykupaq, ¿pipunitaq qanri kanki? ¿Imatataq qan kikiykimantari ninki? nispanku.
[23] Juantaq nirqan: —Diospa rantinpi rimaq Isaiasmi nirqan: ‘Ch'inniqpin huk runa kunkayoqta waqyakun: “Señorpa ñanninta siwk hinata ruwaychis,” nispan,’ nispa. (Isa. 40:3) Chayqa ñoqan kani, nispa.
[24] Chay kachamusqakunataqmi fariseokunaqmanta karqanku.
[25] Hinan tapuspanku Juanta nirqanku: —¿Hinaqtinri, manataq Cristopaschu, nitaq Eliaspaschu, nillataq Diospa rantinpi rimaqpaschu kanki chayri, imanaqtintaq bautisankiri? nispanku.
[26] Juantaqmi paykunaman kutichirqan: —Ñoqaqa unupin bautisani. Qankuna ukhupitaqmi ichaqa, huk mana reqsisqaykichis runa kashan.
[27] Ñoqaq qhepayta hamuqqa paymi. Manataqmi paypa husut'anpa watullantapas paskanaypaq hinachu kani. Payqa ñoqamanta ñawpaq kaqmi karqan, nispa.
[28] Jordán mayuq wak ladon Betábara llaqtapin Juanqa bautisasharqan. Chaypin chay imaymanakunaqa pasarqan.
[29] Qhepantin p'unchaytaqmi, Juanqa Jesusta payman hamushaqta rikurqan. Hinan nirqan: —¡Kay pachantinpi runakunaq huchankuta qechuq Diospa Korderonta, qhawariychis!
[30] Ñawpaqtañan chay runamantaqa rimarqani. Nirqanitaq: ‘Ñoqaq qhepayta hamuq runaqa ñoqamantapas ñawpaqtaraqmi karqan. Payqa, ñoqamanta ñawpaq kaqmi karqan, nispay.
[31] Manataqmi ñoqaqa payta reqsirqanichu. Aswanpas Kordero Israel llaqtaman rikuchisqa kananpaqmi, ñoqaqa unupi bautisaspa hamurqani, nispa.
[32] Willakuspantaqmi, Juanqa nirqan: —Espírituq hanaq pachamanta paloma hina urayamuspa, pay patapi takyaykusqantan rikurqani.
[33] Manataqmi ñoqaqa payta reqsirqanichu. Ichaqa, unupi bautisamunaypaq kachamuwaqniymi niwarqan: ‘Espirituqa piqpa patanmanchus urayamuspan takyaykusqantaqa rikunkin. Santo Espiritupi bautisaqqa paymi,’ nispan.
[34] Payqa Diospa Churinpuni kasqantan rikurqani. Hinan paymanta willakurqani, nispa.
[35] Qhepantin p'unchaytaqmi Juanqa, iskay yachachisqankunapiwan wakmanta kasharqan.
[36] Hinan Jesusta chaynin purishaqta rikuspa, Juanqa nirqan: —¡Diospa Korderonta qhawariychis! nispa.
[37] Hinan iskaynin yachachisqankunaqa chay nisqanta uyarirqanku. Hinaspataq Jesusta qatikurqanku.
[38] Jesustaq kutirispan, qatikusqankuta rikuspan paykunata nirqan: —¿Imatan maskhashankichis? nispa. Paykunataq kutichispa nirqanku: —Rabí, ¿maypitaq tiyankiri? nispanku. ‘Rabí’, ninantaqa ‘Yachachiqniy’ ninantan nin.
[39] Jesustaqmi paykunata nirqan: —Hamuychis, hinaspa rikumuychis, nispa. Chay hina kaqtinmi rirqanku, hinaspa maypichus tiyasqanta rikumurqanku. Chunka kaq oras hinaña kasqanraykutaq, chay p'unchayqa paywan qhepakurqanku.
[40] Simón Pedroq wawqen Andresqa, Juanta iskaynin uyariqkunaq, hinallataq Jesusta qatikuqkunaq hukninmi karqan.
[41] Andresmi, wawqen Simonta ñawpaqta tarirqan. Hinan payta nirqan: —Mesiastan tarimuyku, nispa. ‘Mesías’ ninantaqa ‘Cristo’ ninantan nin.
[42] Hinan Andresqa Jesusman Simonta pusarqan. Jesustaq payta rikuspan nirqan: —Qanqa Jonaspa churin Simonmi kanki. Cefas sutiwanmi sutiyasunkiku, nispa. ‘Cefas’ sutiqa ‘Pedro’ ninantan nin.
[43] Qhepantin p'unchaytaqmi Jesusqa, Galilea probinsiaman riyta munarqan. Hinan Felipeta tarirqan. Jesustaq payta nirqan: —Qatikamuway, nispa.
[44] Andrespapas, hinallataq Pedroqpas llaqtanku Betsaida llaqtamantan Felipeqa karqan.
[45] Felipetaq, Natanaelta tarispan, payta nirqan: —Pimantachus Moisesqa Kamachikuy Simipi qelqarqan, paytan tarimuyku. Diospa rantinpi rimaqkunapas paymantaqa qelqarqankun. Payqa Nazaret llaqtamanta, hinallataq Josepa churin Jesusmi, nispa.
[46] Hinan Natanaelqa payta nirqan: —¿Nazaret llaqtamanta imallapas allin kaq hamuyta atinmanchu? nispa. Felipetaq payta nirqan: —Riy, hinaspa rikumuy, nispa.
[47] Jesusqa, paypa kasqanman Natanaelpa hamusqanta rikuspantaqmi, paymanta nirqan: —Israel suyumanta cheqaq runata qhawariychis. Paypiqa manan ima q'otukuypas kanchu, nispa.
[48] Natanaeltaq payta nirqan: —¿Imaynapitaq reqsiwankiri? nispa. Jesustaq kutichispan payta nirqan: —Manaraq Felipe waqyamushasuqtiykin, igos sach'aq pachanpi kashaqtiyki rikurqayki, nispa.
[49] Natanaeltaqmi, Jesusman kutichispa, nirqan: —Rabí, ¡Qanqa Diospa Churinmi kanki! ¡Qanqa Israel suyuq Reyninmi kanki! nispa.
[50] Jesustaq kutichispan payta nirqan: —‘¿Igos sach'aq pachanpin rikurqayki’ nispa nisqayraykuchu, qan iñinki? ¡Kaykunamantapas aswan hatun imaymanakunataraqmi rikunki! nispa.
[51] Hinan payta nirqan: —Cheqaqta, cheqaqtan niykichis: ‘Hamuq p'unchaykunapi, hanaq pacha kicharikuqtinmi, Diospa angelninkunata Runaq Churinpa hawanpi wichashaqta, hinallataq uraykamushaqtapas rikunkichis,’ nispa.