[1] Jesusmi yachachisqankunata nirqan: ―Misk'akuykunaqa kanqapunin. Ichaqa, ¡ay haqay misk'achiq runamanta, imaynaraq kanqa!
[2] Kay huch'uykuna- manta huknin misk'achinanmantaqa, chay runata huk molino rumita kunkanman wataruspa mama-qochaman wikch'uykuyninkun aswan allinqa kanman.
[3] Qankuna kikiykichista qhawakuychis. Wawqeykitaqchus kontraykipi huchallikun chayqa, anyaykamuy. Yuyayman kutirikuqtintaq pampachaykuy.
[4] Wawqeyki, huk p'unchaypi qanchis kutita qanpa kontraykipi huchallikunmanmi. Hinaqa qanchis kutillatataq chay p'unchaypi hamuspa nisunkiman: ‘Huchaytan reqsikuni,’ nispa. Chay hina kaqtinqa, pampachaykullay, nispa.
[5] Apostolkunataqmi Señorta nirqanku: ―Señor, iñiyta yapaykuwayku, nispanku.
[6] Hinan Señorqa nirqan: ―Sichus mostasa ruru sayayllapas iñiyniykichis kanman chayqa, kay sikómoro sach'atan niwaqchis: ‘T'irakuspayki, mama-qochapi saphichakuspa mallkikamuy,’ nispaykichis, chay sach'ataqmi kasukusunkichisman, nispan.
[7] Nillarqantaqmi: ―¿Qankunamanta mayqenniykichistaq chakra llank'aq, otaq uywa michiq kamachiykichis kampomanta kutimuqtin niwaqchis: ‘Haykumuy, hinaspa mesapi tiyaykuy,’ nispaykichis?
[8] Aswanqa, ¿manachu ninkichis: Mikhunata wayk'umuy, hinaspataq chumpikuspayki mikhunaykama, hinallataq ukyanaykama serbimuway, chaymantañan qanqa mikhunki, hinallataq ukyankipas,’ nispaykichis?
[9] ¿Kamachiykichiskunata ninkichischu: ‘Ruwasqaykimanta grasias,’ nispaykichis?
[10] Chay hinallataqmi qankunawanpas kanqa. Kamachisqallata ruwankichis chayqa, ninkichismi: ‘Tukuy imachus kamachisqallantan ruwarqanchis. Chayraykun, mana baleq kamachikunaqa kanchis,’ nispaykichis, nispa.
[11] Chaymantataqmi, Jesusqa, Jerusalén llaqtaman rishaspa, Samaria llaqtanta, hinallataq Galilea probinsianta pasasharqan.
[12] Huk llaqta kantuman haykushaqtintaq, chunka runakuna lepra onqoyniyoq chaypi kasharqanku. Hinan Jesusman hamuspanku, karullapi sayaykurqanku.
[13] Qaparispankutaq nirqanku: ―¡Yachachiqniy Jesús, yanapaykuwayku! nispanku.
[14] Paykunata rikuruspantaqmi, Jesusqa nirqan: ―Rispaykichis, saserdotekunaman qhawachikamuychis, nispa. Hinan rishallaqtinkuraq qhaliyasqa kapurqanku.
[15] Paykunamanta hukninkutaq, qhaliyachisqa kasqanta rikukuspan, kunkayoqta Diosta hatunchaspa, Jesusman kutimurqan.
[16] Hinan grasiasta qospa, Jesuspa ñawpaqenpi pampakama k'umuykuspan, qonqoriykukurqan. Payqa Samaria llaqtamantan karqan.
[17] Kutichispantaq Jesusqa nirqan: ―¿Manachu qhaliyachisqakunaqa chunka karqankichis? ¿Maypitaq isqon qhaliyachisqakunari kashanku?
[18] ¿Manachu pipas, kutimuspan Diosman hatunchayta qoqqa kan? ¿Aswanpas kay wak suyumanta runallachu kutimuspa Diostaqa hatunchan? nispa.
[19] Hinan chay runata nirqan: ―Sayariy, hinaspa ripuy. Iñiyniykin qhaliyachisunki, nispa.
[20] Diospa qhapaq suyun hayk'aqchus hamunanmantan fariseokunaqa Jesusta tapurqanku. Kutichispantaqmi, Jesusqa paykunata nirqan: ―Diospa qhapaq suyunqa, manan willakuspachu hamunqa.
[21] Qhawariychis, Diospa qhapaq suyunqa, qankuna chawpipiñan kashan. Chayraykun, manaña ninqakuñachu: ‘Qhawariychis kaypin kashan, otaq haqaypin kashan,’ nispaqa, nispa.
[22] Yachachisqankunatan nirqan: ―Ñoqa Runaq Churinpa huknin p'unchayniy rikuyta munanaykichis tiempoqa chayamunqan. Manataqmi rikunkichischu.
[23] Nisunkichismi: ‘Qhawariychis, kaypin kashan, otaq qhawariychis, haqaypin kashan,’ nispanku. Ichaqa aman rinkichischu, nitaq qatikunkichispaschu.
[24] Rayoq lliphllikiynin k'anchayqa, hanaq pachamanta huk lado k'uchunmanta, wak lado k'uchunkamaraq k'ancharimun. Chay hinallataqmi Runaq Churinpa p'unchayninpipas kanqa.
[25] Ñawpaqtaqa anchatapuniraqmi ñak'arinan kashan. Hinallataq kay runa-miraykunaqpas mana chaskisqan kanqa.
[26] Imaynan Noepa p'unchayninkunapi karqan, chay hinallataqmi Runaq Churinpa p'unchayninkunapipas kanqa.
[27] Chay p'unchaykunapiqa kay hinan karqan. Arkaman Noepa haykunan p'unchaykaman, runakunaqa mikhusharqanku, ukyasharqanku, kasarakusharqanku hinallataq kasarakunankupaqpas rimaykusqa kasharqanku. Chayllamanmi paraqa chayamuspan, llapanta wañuchipurqan.
[28] Chay hinallataqmi, Lotpa p'unchayninkunapipas karqan. Mikhusharqanku, ukyasharqanku, rantikusharqanku, bendesharqanku, tarpusharqanku, hinallataq wasikunatapas hatarichisharqanku.
[29] Lotqa, Sodoma llaqtamanta lloqsipusqan p'unchaytaqmi ichaqa, hanaq pachamanta asufriyoq nina-para chayarqan. Hinan llapankuta ruphapurqan.
[30] Runaq Churinpa rikhurimusqan p'unchaypipas chay hinallataqmi kanqa.
[31] Haqay p'unchaypi, wasi patapi kashaqqa, wasinmanta imaymanankuna horqomunanpaqqa amaña uraykuchunñachu. Chay hinallataq, chakrapi kashaqpas amaña wasinta kutichunñachu.
[32] Lotpa warminmanta yuyariychis.
[33] Pipas kawsayninta waqaychay munaqqa, kawsayninta chinkachinqan. Pipas kawsayninta chinkachiqtaqmi ichaqa, kawsayninta qespichinqa.
[34] Niykichismi: ‘Chay tutapin, huk puñanapi iskay puñushanqaku. Hukninmi apasqa kanqa, huknintaq saqesqa kanqa.
[35] Iskay warmikunan kuska kutashanqaku. Hukninmi apasqa kanqa, huknintaq saqesqa kanqa.
[36] Iskaymi chakrapi kashanqaku. Hukninmi apasqa kanqa, huknintaq saqesqa kanqa,’ nispay, nispa.
[37] Yachachisqankunataq kutichispa, Jesusta tapurqanku: ―Señor, ¿maypitaq chaykunari kanqa? nispanku. Paytaq nirqan: ―Maypichus ayakuna kashanqa, chaymanmi gallinasokunapas huñukunqaku, nispa.