[1] Huk p'unchaymi, llaqtantin runakunaman Dios yupaychana wasipi Jesusqa yachachisharqan. Hinallataq allin willakuytapas willasharqan. Chayllamanmi saserdotekuna, kamachikuy simita yachachiqkuna, hinallataq umalliq runakunapas Jesusman asuykurqanku.
[2] Hinan payta rimaykurqanku: ―¿Ima kamachikuyniyoq kaywantaq kay imaymanakunatari ruwanki? ¿Pitaq chay kamachikuyniyoq kaytari qorqasunki? Chayta niwayku, nispanku.
[3] Jesustaqmi paykunaman kutichispa nirqan: ―Ñoqapas huk tapukuyta tapullasaykichistaq.
[4] ¿Bautisaq Juanpa bautisayninri hanaq pachamantachu karqan, icha runakunallamantachu karqan? Chayta kutichiwaychis, nispa.
[5] Paykunataq, paykunapurapi ninakurqanku: ―Sichus hanaq pachamantan nisunchis chayqa, niwasunchischá: ‘¿Imanaqtintaq manari kreerqankichischu?’ nispa.
[6] Llapa runakunan, Juanqa Diospa rantinpi rimaq kasqanta yachanku. Chayrayku, sichus runakunallamantan nisunchis chayqa, llaqtantin runachá rumiwan ch'aqewasunchis, nispanku.
[7] Hinan maymantachus karqan, chayta mana kutichirqankuchu.
[8] Jesustaqmi paykunata nirqan: ―Ñoqapas manallataqmi ima kamachikuyniyoq kaywanchus kay imaymanakuna ruwasqaytaqa nisaykichischu, nispa.
[9] Hinan llaqtantin runakunaman kay rikch'anachiyta Jesusqa rimaykuyta qallarirqan: ―Huk runan, chakranpi ubasta tarpurqan. Chakra llank'aqkunaman arrendaspantaq, unay tiempopaq karu llaqtata ripurqan.
[10] Hinan tiemponpi, chakra llank'aqkuna ubas chakraq rurusqanta qomunankupaq, huk kamachinta kamachirqan. Chakra llank'aq runakunataqmi ichaqa, maqaykuspanku, mana imallantinta kutichipurqanku.
[11] Huk kamachintañataqmi kamachillarqantaq. Ichaqa paytapas kasqallantataqmi p'enqayta maqaykuspanku, mana imallantinta kutichipullarqankutaq.
[12] Kinsa kaq kamachintan kamachillarqantaq. Ichaqa paytapas k'iriykuspankun, chakramanta qarqomurqanku.
[13] Hinan chakrayoq wiraqochaqa nirqan: ‘¿Imatataq ruwasaqri? Munasqay churiyta kachasaq. Imaynapipas payta rikuspaqa, manchaykukunkumanpaschá,’ nispa.
[14] Chakra llank'aqkunataqmi ichaqa rikuruspanku, paykunapurapi rimanakurqanku: ‘Kayqa, erensiata chaskiqmi. Chay tupaqnin erensia ñoqanchispa kapunanpaq payta wañurachisunchis,’ nispanku.
[15] Hinan ubas chakramanta qarqospa, payta wañuchirqanku. Chay hinaqa, ubas chakrayoq wiraqochaqa, ¿imatataq paykunawanri ruwanqa?
[16] Hamuspanmi, chay llank'aqkunata wañuchipunqa. Hinan ubas chakranta hukkunaman qopunqa, nispa. Paykunataq chayta uyarispa nirqanku: ―¡Amapuni hayk'aqpas chay hinaqa kachunchu! nispanku.
[17] Jesustaq ichaqa, paykunata qhawarispa nirqan: ―¿Imanispataq Qelqari nin? Qelqaqa nishanmi: Wasi ruwaqkunaq wikch'usqanku rumin, eskina hap'iq rumiman tukupun,’ nispa. (Sal. 118:22)
[18] Pipas chay rumi pataman urmaykuqqa, chhallukunqan. Chay rumi, piqpa patanmanchus urmaykunqa chaytaqmi ñut'upunqa, nispa.
[19] Hinan umalliq saserdotekunaqa, kamachikuy simita yachachiqkunapiwan, paykunaq kontranpi chay rikch'anachiy rimasqanta entiendirqanku. Chayraykun chay orapi hap'irqoytapuni munasharqanku, ichaqa manchakusharqankutaqmi.
[20] Chaninman tukuspalla, makilla qhawaq runakunatan kamachirqanku. Chaymi, ima rimasqallanpipas hap'irqospa, atiyniyoq kamachikuqpa makinman hap'ichinankupaq qhamiyasharqanku.
[21] Hinan paykunaqa, Jesusta tapuspa nirqanku: ―Yachachikuq, chanin rimaq, hinallataq allin yachachiq kasqaykitaqa yachaykun. Manan runakunaq rikch'aynintachu qhawanki. Aswanpas Diospa ñanninta cheqaq kaywan yachachinki. Chaytapas yachallaykutaqmi.
[22] ¿Cesarman tributo qolqe pagayniykuri allinchu, icha manachu? nispanku.
[23] Jesustaqmi ichaqa, yuyaysapa kasqankuta yachaspa, paykunata nirqan: ―¿Imanaqtintaq wateqaytari munawankichis?
[24] Huk denario qolqeta qhawachiwaychis. ¿Piqpa rikch'aynintaq kayri? Hinallataq, ¿piqpa sutintaq kaypi qelqasqapas kashanri? nispa. Kutichispankutaqmi nirqanku: ―Cesarpan, nispanku.
[25] Hinan paykunata nirqan: ―Chay hinaqa, Cesarpa kaqta Cesarman qopuychis. Diospa kaqtataq Diosman qopuychis, nispa.
[26] Llaqta runakunaq qayllanpitaq, mana ima rimasqallanpipas urmachinankupaq hap'irqoyta atirqankuchu. Aswanmi kutichisqanwan, yuyayninkupi mana kabesqa kaspa, upallakapurqanku.
[27] Saduseokunaqa ninkun: ‘Kawsarimpuyqa manan kanchu,’ nispanku. Paykunamanta wakinninkutaqmi Jesusman asuykuspa tapurqanku.
[28] Nirqankutaq: ―Yachachikuq, Moisesmi qelqapuwarqanku: ‘Sichus piqpapas kurak wawqen mana wawayoq kashapa wañukapun chayqa, sullk'a wawqenmi chay warminwan kasarakapunqa. Hinan kurak wawqenpa mirayninta hatarichinqa,’ nispan.
[29] Chay hinaqa, qanchis wawqekunan karqanku. Ñawpaq kaqmi kasarakurqan, hinan mana wawayoq kashaspallaraq wañukapurqan.
[30] Hinallataqmi iskay kaq wawqenpas chay warmiwan kasarakullarqantaq. Hinan paypas, mana wawayoq kashaspallaraq wañukapurqan.
[31] Kinsa kaq wawqenpas chay warmiwan kasarakullarqantaq. Chay hinallataqmi, llapan qanchisnintin wawqekunapas chay warmiwan kasarakurqanku. Hinan mana wawayoq kashaspallankuraq wañukapurqanku.
[32] Chaymantataqmi warmipas wañukapullarqantaq.
[33] Qanchisnintin wawqekunaq esposankun karqan. ¿Kawsarimpuypiri, mayqenninkuq esposantaq kanqa? nispanku.
[34] Hinan Jesusqa paykunaman kutichispa nirqan: ―Kay pachapi runakunaqa, kasarakunku, hinallataq kasarachinkun.
[35] Ichaqa Diospa wakichisqan hamuq pachaman, hinallataq wañusqakunaq kawsarimpuyninkuman aypanankupaq hina kaqkunapas kankun. Paykunan manaqa kasarakunkuchu nitaq kasarachinkupaschu.
[36] Angelkuna hinan kanku. Hinallataqmi kawsarimpuq kaspanku, Diospa wawankunaqa kanku. Chayraykun manaña wañuyta atinqakuñachu.
[37] Wañuqkunaq kawsarimpunanmanta Moisesqa t'ankarmanta qelqasqanpin, yachachirqanña. Hinan payqa Señorta nirqan: ‘Qanmi, Abrahampa Diosnin, Isaakpa Diosnin, hinallataq Jakobpa Diosninpas kanki,’ nispa. (Éxo. 3:6)
[38] Diospaqqa llapallanmi kawsashan. Chaymi Diosqa mana wañusqakunaq Diosninchu, aswanpas kawsashaqkunaq Diosninmi, nispa.
[39] Wakin kamachikuy simita yachachiqkunataq kutichispa nirqanku: ―Yachachikuq, allintan ninki, nispanku.
[40] Hinan manaña aswantapas tapupayaytaqa munarqankuñachu.
[41] Hinaqtinmi Jesusqa paykunata nirqan: ―¿Imaynapitaq, Cristoqa Davidpa Churinmi nispari ninku?
[42] David kikinmi Salmos Qelqapi qelqarqan.
[43] Nirqantaq: ‘Señormi Señorniyta nirqan: “Awqaykikunata chakiykiq pachanman churanaykama paña ladoypi tiyaykuy,” nispan, nispa. (Sal. 110:1)
[44] Chay hinaqa, Davidtaq ‘Señorniy’, nispa sutiyan chayqa, ¿imaynapitaq paypa churinri kanman? nispa.
[45] Llaqtantin llapallan runakuna uyarishaqtintaq, Jesusqa yachachisqankunata rimaykurqan.
[46] Nirqantaq: ―Kamachikuy simita yachachiqkunamanta kuidakuychis. Paykunaqa pampakama p'achayoq puriyta, hinallataq plasakunapipas napaykusqa kaytan munanku. Hinallataq judío runakunaq huñukunanku wasikunapipas, mikhuna fiestakunapipas, ñawpaq kaq tiyanakunallapi tiyayta munanku.
[47] Chay runakunaqa, biudakunaq wasinkutan q'arunku. Runakunawan mana reparachikunankupaqtaqmi unayta Diosman parlaq tukunku. Paykunan aswan sinchi huchachaytaqa chaskinqaku, nispa.