[1] Jesusqa uyariqnin llaqta runakunaman tukuy rimaykuyninkunata tukuspanmi, Kapernaum llaqtaman haykurqan.
[2] Chaypitaqmi, huk senturión runaq ancha munasqan kamachinqa onqosqa wañunan patapiña kasharqan.
[3] Payqa, Jesusmanta rimaytan uyarisqa karqan. Chayraykun, judío runakunamanta kurak runakunata Jesusman rinankupaq kacharqan. Kamachinta qhaliyachinanpaq, Jesusta balikamunankupaqmi, paykunataqa kacharqan.
[4] Kurak runakunataq Jesusman rispanku, anchatapuni balikuspa nirqanku: ―Payqa kay balikusqanta ruwapunaykipaq hinapunin.
[5] Payqa suyunchista munakuqmi, hinallataq pay kikinmi, judío runakunaq huñukunayku wasitapas ruwachipuwarqanku, nispanku.
[6] Hinan Jesusqa paykunawan rirqan. Wasiman yaqaña chayaykushaqtinkutaq, senturión runaqa wakin amigonkunata kay hinata payman rimaykunankupaq kachamurqan: ―Señor, manan wasiyman haykunaykipaq hinachu kani. Chayrayku amaña hamuyñachu.
[7] Chay hinallataqmi, manan ñoqa kikiypas qanman hamunaypaq hinachu kani. Aswanpas rimariykullay, hinaspataqmi kamachiyqa qhaliyapunqa,
[8] Ñoqapas kamachina runan kani. Kamachinay soldadoykunapas kantaqmi. Hinan huk kaqninta nini: ‘riy,’ nispay. Hinan rin. Huknintataq nini: ‘Hamuy,’ nispay. Hinan hamun. Kamachiytataq nini: ‘Kayta ruway,’ nipay. Hinan ruwan, nispa.
[9] Chayta uyarispantaqmi, chay runamanta Jesusqa yuyayninpi mana kabesqa kasharqan. Hinan qatikuqnin askha runakunaman kutirispa nirqan: ―Niykichismi: ‘¡Manan Israel llaqtapipas kay hina iñiytaqa tarirqanichu!’ nispay, nispa.
[10] Chay kachamusqan runakuna wasiman kutipuspankutaqmi, chay onqosqa kamachitaqa qhaliyasqataña tarirqanku.
[11] Chay hina kaqtinmi, qhepantin p'unchay Jesusqa Naín sutiyoq llaqtaman rirqan. Askha yachachisqankuna, hinallataq ancha askha runakunataqmi paytaqa riysirqanku.
[12] Llaqta punkuman chayaqtintaqmi, chayllaman p'ampamunankupaq, huk ayata wantusharqanku. Chay ayaqa, huk biuda warmiq sapallan qhari wawanmi karqan. Llaqtamanta askha runakunataqmi riysisharqanku.
[13] Chayta rikuspantaqmi, Señorqa chay warmimanta khuyalliykukuspa, payta nirqan: ―Ama waqayñachu, nispan.
[14] Asuykuspantaqmi, aya wantunankuta llamiykurqan. Hinan wantuqkunaqa sayaykurqanku. Wañusqatataqmi, Jesusqa nirqan: ―Wayna, qantan niyki: ‘Sayariy,’ nispay, nispan.
[15] Wañusqa waynataqmi tiyarispa, rimayta qallarirqan. Hinan Jesusqa, mamanman qopurqan.
[16] Llapankutaq sinchi mancharisqa karqanku, hinan Diosta hatunchaspa nirqanku: ¡Huk hatun, Diospa rantinpi rimaqmi ñoqanchis ukhumanta hatarimun! ¡Diostaqmi llaqtanta yanapaykunanpaq watukamun! nispanku.
[17] Hinan Jesusmanta rimayqa, llapan Judea probinsiantinpi, hinallataq llapan muyuriqnin cheqaskunapi ch'eqerirqan.
[18] Llapan chay imaymanakuna pasasqantataqmi, Juanpa yachachisqankunaqa payman willarqanku. Hinan Juanqa, iskay yachachisqankunata waqyarqan.
[19] Hinaspataq Jesusta tapumunankupaq paykunata kacharqan: ―¿Pichus hamunan karqan, chay qanchu kanki, icha huktachu suyasaqku? nispanku.
[20] Chay runakuna Jesusman hamuspankutaqmi, payta nirqanku: ―Bautisaq Juanmi kay hinata niwaspanku, qanman kachamushawanku: ‘¿Pichus hamunan karqan chayqa, qanchu kanki, icha huktachu suyasaqku?’ niwaspanku, nispanku.
[21] Chay kasqan ratupitaqmi, Jesusqa askha millay onqoyniyoqkunatapas, plagaq ñak'arichisqankunatapas, millay supay espiritukunayoqtapas qhaliyachirqan. Hinallataq askha ñawsaLUKAS 7,186 kunatapas qhawarichirqan.
[22] Kutichispantaqmi, Jesusqa paykunata nirqan: ―Rispa rikusqaykichista, hinallataq uyarisqaykichistawan Juanman willamuychis: ‘Ñawsakunan qhawaripunku, wist'ukunan puriripunku, lepra onqoyniyoqkunapas qhaliyachisqañan kapunku, roqt'okunan uyaripunku, wañusqakunapas kawsarichisqañan kanku, hinallataq wakchakunamanpas allin willakuyqa willasqañan kashan,’ nispaykichis.
[23] Lliw ñoqamanta mana p'enqakuqqa kusisamiyoqmi, nispan.
[24] Juanpa willakuqninkuna kutipuqtinkutaq, Jesusqa Juanmanta chay askha runakunaman willayta qallarispa nirqan: ―Ch'inniqmanqa, ¿ima qhawaqtaq lloqsirqankichis? ¿Wayraq maywisqan soqosta qhawaqchu lloqsirqankichis?
[25] Hinaqa, ¿ima qhawaqtaq lloqsirqankichisri? ¿Sumaq p'achawan p'acharusqa runa qhawaqchu lloqsirqankichis? Qhawariychis, balorniyoq p'achawan p'achasqa kaqkunaqa, hinallataq sumaq kawsaypi kawsaqkunapas reykunaq wasinkunapin kashanku.
[26] Ichaqa, ¿ima qhawaqpunitaq lloqsimurqankichisri? ¿Diospa rantinpi rimaqta qhawaqchu lloqsirqankichis? ¡Arí, niykichismi: ‘Payqa Diospa rantinpi rimaqmantapas aswan hatunpaq qhawarisqapunin!’ nispay.
[27] Haqay pimantachus qelqasqa kashan chayqa paymi. Chay Qelqataqmi nin: ‘Qhawariy, qanpa ñawpaqeykitan willaqniyta kachani. Paymi ñawpaqeykipi ñanniykita allichanqa,’ nispan. (Mal. 3.1)
[28] Niykichismi: ‘Warmikunamanta naseqkunapurapi manan mayqenpas bautisaq Juanmanta aswan hatunpaq qhawarisqaqa kanchu. Chaywanpas, Diospa qhapaq suyunpi huch'uylla kaqqa, Juanmanta aswan hatunpaq qhawarisqapunin kanqa,’ nispay.
[29] Llaqtantin runakuna, hinallataq tributo qolqe kobraqkunapas Jesusta uyarispankun, Diospa chanin kayninta yacharqanku. Paykunaqa, Juanpa bautismonwan bautisasqañan kasqaku karqan.
[30] Ichaqa fariseokuna, hinallataq kamachikuy simita sut'inchaqkuna, Juanpa bautismonwan mana bautisachikusqakuchu karqan. Chayraykun, paykunapaq imatachus Diosqa munarqan, chayta wikch'uykukurqanku.
[31] Señortaq nirqan: ―¿Imawantaq kay runa-miraytari wakichachisaq? ¿Imamantaq paykunaqa rikch'akunku?
[32] Plasapi hinalla tiyakuq waynakunamanmi rikch'akun. Paykunan paykunapurapi waqyanakunku: ‘Qenata waqachipuykiku, manataq tusunkichischu. Aya p'ampanapaq takikunatan takimuyku, manataq waqankichischu,’ nispanku.
[33] Bautisaq Juanqa hamurqanñan. Payqa manan mikhunata mikhurqanchu, nitaq binotapas ukyarqanchu. Qankunataq ichaqa, ninkichis: ‘Supayniyoqmi kashan,’ nispaykichis.
[34] Runaq Churinmi hamurqan. Payqa mikhunmi, hinallataq ukyanmi. Qankunataq ichaqa, ninkichis: ‘Qhawariychis, payqa huk rakrapu, hinallataq bino ukyaq runan. Tributo qolqe kobraqkunaqpas, hinallataq huchasapakunaqpas amigonmi,’ nispaykichis.
[35] Yachaymi ichaqa, chanin kasqanta llapan wawankunapi rikuchikun, nispa.
[36] Fariseokunamanta hukninkutaqmi, paywan mikhunanpaq Jesusta balikurqan. Hinan fariseoq wasinman haykuspa, mesaman tiyaykurqan.
[37] Chayllamanmi llaqtamanta huk huchasapa warmiqa, fariseoq wasinpi mesaman Jesuspa tiyaykusqanta yacharurqan. Hinan huk alabastro rumimanta tuminchapi q'apashaq hawinata apamurqan.
[38] Hinan Jesusta, qhepallanmanta asuykuspa, waqasqan weqenwan chakinkunata ch'aranchayta qallarirqan. Chukchanwantaq ch'akichirqan. Chakinkunata much'aspantaq, q'apashaq hawinawan hawirqan.
[39] Chayta rikuspantaq, waqyamuqnin fariseoqa sonqon ukhupi nirqan: ―Kay warmiqa huchasapan. Chayrayku, sichus kay runa Diospa rantinpi rimaq kanman chayqa, imayna puriq warmichus llamiykusqantaqa yachanmanmi, nispan.
[40] Kutichispantaqmi, Jesusqa payta nirqan: ―Simón, qanmanmi hukta ninay kashan, nispa. Simontaq nirqan: ―Yachachikuq, nillaway, nispan.
[41] Jesustaq nirqan: ―Huk qolqe manuq runaqmi iskay manukuqninkuna karqan. Hukninmi phisqa pachak denario qolqe manu karqan. Huknintaq phisqa chunka denario qolqe manu karqan.
[42] Paykunaq pagapunankupaq mana imankupas kaqtintaqmi, iskayninkuta pampacharqan. Chay hinaqa, ¿chay iskayninmanta, mayqen kaqtaq aswantari munakunman? Chayta niway, nispan.
[43] Kutichispantaq, Simonqa nirqan: ―Chay askha kaq pampachasqa kaqpunin kanman, nispa. Jesustaq payta nirqan: ―Allillantan chaninchanki, nispan.
[44] Warmi ladoman kutirispantaq, Simonta nirqan: ―¿Kay warmita rikushankichu? Qanqa, wasiykiman haykumuqtiymi, mana unuta chakiy mayllikunaypaq qowarqankichu. Kay warmitaq ichaqa, chakiykunata weqenwan ch'aranchaspa, chukchanwan ch'akichin.
[45] Qanqa, manan much'aykuwarqankichu. Kay warmitaqmi ichaqa, haykumusqaymantapacha, mana thanispa chakiykunata much'ashan.
[46] Qanqa, manan umayta aseitewan hawiykuwarqankichu. Kay warmitaqmi ichaqa, q'apashaq hawinawan chakiykunata hawiwan.
[47] Chaymi qanta niyki: ‘Payqa, ancha munakuq kasqanraykun, sinchi askha huchankunata pampachani. Pitachus pisillapi pampachakun chaytaqmi ichaqa, pisillata munakun,’ nispay, nispa.
[48] Hinan warmita nirqan: ―Huchaykikunataqa pampachaykiñan, nispa.
[49] Paywan mesapi kashaqkunataq, paykunapurapi ninakuyta qallarirqanku: ―¿Pitaq kay runaqa, huchakunatawanpas pampachaqri? nispanku.
[50] Hinaqtinmi Jesusqa, warmita nirqan: ―Iñiyniykin qespichisunki. Thak kaypi ripuy, nispa.