[1] Jesusqa, Santo Espirituwan hunt'aykusqan, Jordán mayumanta kutipurqan. Hinan Espirituqa ch'inniqman payta tawa chunka p'unchaypaq pusarqan.
[2] Hinan saqraqa Jesusta wateqarqan. Chay p'unchaykunapitaqmi, mana imatapas mikhurqanchu. Chay tawa chunka p'unchay hunt'akuqtintaq yarqachikurqan.
[3] Hinan saqraqa, Jesusta nirqan: ―Sichus Diospa Churin kanki chayqa, kay rumita t'antaman tukunanpaq niy, nispa.
[4] Jesustaqmi, kutichispa nirqan: ―Qelqasqan kashan: ‘Manan t'antallawanchu runaqa kawsanqa, aswanpas Diospa lliw siminkunawanmi kawsanqa,’ nispan, nispa. (Deut. 8:3)
[5] Saqrataqmi, alto orqoman pusaspan, huk ratullapi llapan kay pacha qhapaq suyukunata qhawarichirqan.
[6] Hinan saqraqa payta nirqan: ―Tukuy kay kamachikuyniyoq kaypas, hinallataq qhapaq kayninpas ñoqaman qosqan. Ñoqataqmi pimanchus qoyta munani, payman qosaq. Chaymi kaykunata qanman qosayki.
[7] Chay hinaqa, sichus ñawpaqeypi qonqoriykukuspa yupaychawanki chayqa, llapallanmi qanpa kapunqa, nispa.
[8] Hinan Jesusqa kutichispa nirqan: ―Satanás, ¡ñoqamanta anchhuriy! Qelqasqan kashan: ‘Señor Diosllaykitan yupaychanki. Pay sapallantataqmi serbinkipas,’ nispan, nispa. (Deut. 6:13)
[9] Jerusalén llaqtaman pusaspantaqmi, Dios yupaychana wasiq kantun patapi saqraqa Jesusta sayaykuchirqan. Hinan nirqan: ―Sichus Diospa Churin kanki chayqa, wikch'uykukuy.
[10] Qelqasqan kashan: ‘Angelninkunatan qanpa kasqaykiman waqaychanasunkipaq kachamunqa.
[11] Hinan chakiykita rumipi mana takakunaykipaq, makinkupi hap'isunkiku,’ nispan, nispa. (Sal. 91:11-12)
[12] Kutichispantaq, Jesusqa saqrata nirqan: ―Qelqaqa nishanmi: ‘Señor Diosniykitaqa, aman wateqankichu,’ nispan, nispa. (Deut. 6:16)
[13] Saqrataqmi tukuypi wateqayta tukuruspan, huk tiempollapaq Jesusmanta t'aqarikurqan.
[14] Hinaqtinmi Jesusqa, Espírituq atiyninwan, Galilea probinsiaman kutipurqan. Paymanta rimaytaq, chay llaqtaq muyuriqninkunamanraq ch'eqerirqan.
[15] Jesusqa, judío runakunaq huñukunanku wasikunapin yachachisharqan. Llapa runakunataq payta hatuncharqanku.
[16] Maypichus uywasqa karqan, chay Nazaret llaqtamanmi kutipurqan. Hinan payqa, imaynatachus rillaqpuni, chay hinata sábado p'uchaypi judío runakunaq huñukunanku wasiman haykuspa, ñawinchananpaq sayarirqan.
[17] Hinan Diospa rantinpi rimaq Isaiaspa qelqasqan qelqa k'uyuta payman hap'iykuchirqanku. Chay qelqa k'uyuta kicharispantaq, kay hina qelqasqata tarirqan.
[18] Chay qelqaqa nirqanmi: ‘Señorpa Espiritunmi ñoqapi kashan. Chaymi payqa, wakchakunaman allin willakuyta willanaypaq hawiwarqan. K'irisqa sonqoyoqkunata qhaliyachinaypaqmi kachamuwarqan. Presochasqa kaqkunatapas kacharichinaypaq, hinallataq ñawsakunata qhawarichinaypaq kachamuwarqan. Sarunchasqakunatapas kacharichinaypaqmi kachamuwarqan.
[19] Hinallataqmi Señorpa allin kaqnin watata willanaypaq kachamuwarqan,’ nispa. (Isa. 61:1-2)
[20] Hinan chay qelqa k'uyuta k'uyuykapuspa, qelqa waqaychaqman haywaripurqan. Chaymantataq tiyaykapurqan. Chay judío runakunaq huñukunanku wasipi kashaqkunataqmi, llapallanku mana chinkachispa Jesusta qhawasharqanku.
[21] Hinan paykunaman niyta qallarirqan: ―Uyarisqaykichisman hinapas kunanmi chay Qelqaqa hunt'akun, nispa.
[22] Llapa runakunataqmi, paymanta allinta willakurqanku. Sumaq misk'i rimakuyninmantataqmi yuyayninkupi mana kabesqa kasharqanku. Nirqankutaq: ―¿Manachu payqa Josepa churin kashan? nispanku.
[23] Hinan Jesusqa paykunata nirqan: ―Cheqapaq qankunaqa kay rimakuytapunin niwankichis: ‘Hampiq, qan kikiykita hampikuy. Kapernaum llaqtapi tukuy imaymanakuna ruwasqaykitaqa uyariykun. Chay hinallatataq, kay llaqtaykipipas ruway,’ nispaykichis, nispa.
[24] Nillarqantaqmi: ―Cheqaqtan niykichis: ‘Diospa rantinpi rimaqqa, manan mayqenpas kikin llaqtanpiqa chaskisqachu kanman,’ nispay.
[25] Cheqaqtan nillaykichistaq: ‘Eliaspa p'unchayninkunapin, kinsa wata soqta killan Diosqa hanaq pachata wisq'arqan. Chaymi tukuy chay suyuntinpi hatun yarqay kasqanwan, Israel llaqtapi askha biudakuna karqan.
[26] Diosmi ichaqa, mana mayqen chay biudakunamanpas Eliastaqa kacharqanchu. Aswanpas Sidón probinsiapi kashaq, Sarepta llaqtayoq huk biuda warmillamanmi kacharqan.
[27] Hinallataqmi, Israel llaqtapi Diospa rantinpi rimaq Eliseoq tiemponpi, askha lepra onqoyniyoqkuna karqan. Eliseotaqmi ichaqa, mana mayqenninkutapas qhaliyachirqanchu. Aswanpas Siria suyumanta Naamanllatan qhaliyachirqan,’ nispay, nispa.
[28] Judío runakunaq huñukunanku wasipi kaqkunataq, lliw chay imaymanakunata uyarispa, k'arakta phiñakurqanku.
[29] Hinan paykunaqa sayarispa, llaqtamanta qarqorqanku. Llaqtankuqa orqo patapi hatarichisqan karqan. Chaymi chay orqomanta tanqaykunankupaq aparqanku.
[30] Jesustaqmi ichaqa, runakunaq chawpinkumanta lloqsispa ripurqan.
[31] Hinaqtinmi, Galilea probinsiapi kashaq Kapernaum llaqtaman Jesusqa uraykurqan. Chaypitaq, sábado p'unchaykunapi yachachirqan.
[32] Kamachikuyniyoq hinan rimarqan. Chayraykun yachachikuyninmantaqa utirayarqanku.
[33] Chay judío runakunaq huñukunanku wasipin, huk runa qhelli supay espirituyoq kasharqan.
[34] Paytaqmi kunkayoqta qaparispa nirqan: ―¡Yaw, Nazaretmanta Jesús! ¿iman qanwan ñoqaykuwan ruwananchis? ¿Ñoqaykuta ch'usaqyachiqchu hamurqanki? Pichus kasqaykitaqa yachanin. ¡Qanqa Diospa Ch'uya akllasqanmi kanki! nispan.
[35] Hinan Jesusqa phiñarikuspa payta nirqan: ―¡Upallay, hinaspa paymanta lloqsiy! nispa. Hinaqtinmi supayqa, llapa runaq chawpinpi chay runata pampaman wikapaspa, paymanta lloqsirqan. Ichaqa manataqmi k'irillarqanpaschu.
[36] Llapallankutaqmi, yuyayninkupi mana kabesqa kaspanku, paykunapurapi ninakurqanku: ―¿Imayna rimaytaq kayri, chaytaq atiywan, hinallataq kamachikuq kaywan qhelli espiritukunatapas kamachin, hinaspataq lloqsinku? nispanku.
[37] Hinan Jesuspa reqsichikuyninqa, llapan chay suyuq muyuriqnintin cheqaskunapi ch'eqerirqan.
[38] Sayarispantaqmi, Jesusqa judío runakunaq huñukunanku wasimanta lloqsipuspan, Simonpa wasinman haykurqan. Chaypitaqmi, Simonpa suegranqa sinchi ruphapakuy onqoywan kasharqan. Hinan payta qhaliyachinanpaq balikurqanku.
[39] Onqosqaman k'umuykuspantaqmi, ruphapakuy onqoyta phiñarikurqan, hinan ruphapakuy onqoyqa thanipurqan. Hinamantataq payqa, sayarispan, paykunaman serbiyta qallarirqanpacha.
[40] Inti chinkayapushaqtinñataq, llapan onqosqakunayoqqa, imaymana onqoyniyoqkunata Jesusman apamurqanku. Paytaq, sapanka onqosqakunaq patanman makinta churaykuspa, qhaliyachirqan.
[41] Hinallataqmi askha runakunamanta askha supaykunaqa lloqsirqan. Chay supaykunan, Jesusqa Cristopuni kasqanta yacharqanku. Chayraykun kunkayoqta qaparispa nirqanku: ―¡Qanqa Diospa Churin Cristopunin kanki! nispanku. Jesustaq ichaqa, phiñarikuspa manaña rimarichillarqanpaschu.
[42] P'unchayña kashaqtintaq, Jesusqa chaymanta lloqsispa huk ch'inniq cheqasman ripurqan. Hinan chay askha runakunaqa, payta maskhasharqanku. Jesuspa kasqanman chayaspankutaqmi, paykunaq kasqankumanta ama ripunanpaq hark'arqanku.
[43] Jesustaqmi ichaqa, paykunata nirqan: ―Siminkunata willanaypaqmi, Diosqa kachamuwarqan. Chayraykun Diospa qhapaq suyunmanta allin willakuykunataqa, wakin llaqtakunamanpas willamunaypuni kashan, nispa.
[44] Hinan Galilea probinsiapi, judío runakunaq huñukunanku wasikunapi Diospa siminta willarqan.