[1] Chay hina kaqtintaqmi, chaykuna qhepata Jesusqa llapan llaqtakunapipas, hinallataq llaqta kantukunapipas purimurqan. Diospa qhapaq suyunmanta allin willakuyta willaspa, hinallataq sut'inchaspanmi, chunka iskayniyoq yachachisqankunapiwan purimurqanku.
[2] Hinallataqmi wakin warmikuna, pikunatachus millay espiritukunamantapas, onqoykunamantapas qhaliyachisqankunapas payta riysirqanku. Paykunataqmi karqanku: Magdalena sutiyasqa María, paymantan qanchis supaykunaqa lloqsisqa karqan.
[3] Hinallataq Herodespa kaqninkuna qhawaq Kusaq warmin Juanapas, Susanapas, hinallataq wakin warmikunapas karqanku. Paykunan, kaqninkuwan Jesusta serbirqanku.
[4] Ancha askha runakunan Jesusman huñukamurqanku. Hinallataqmi sapanka llaqtamantapas payman hamurqanku. Hinan Jesusqa, huk rikch'anachiypa chawpinta paykunaman rimaykurqan.
[5] Nirqantaq: ―Huk muhu t'akaqmi t'akamunanpaq rirqan. T'akashaqtintaqmi, wakin muhuqa ñan pataman chayarqan, hinaspataq sarusqa karqan. Hinan phalaq animalkunaqa pallarapurqanku.
[6] Wakin muhutaq, rumi t'aqraman chayarqan. Ichaqa, mana unuyoq kasqanraykutaqmi, wiñamuspan ch'akipurqan.
[7] Wakin muhutaq, kiska-kiskaman chayarqan. Hinan chaywan kuska wiñamuq kiskakunaqa, p'amparapurqan.
[8] Wakin muhuñataq, allin hallp'aman chayarqan. Hinan wiñaspan ch'ullallamanta pachakta rururqan, nispa. Chaykunata rimashaspantaq, kunkayoqta nirqan: ―Pipas uyariq ninriyoq kan chayqa, uyarichun, nispan.
[9] Yachachisqankunataq, chay rikch'anachiyqa imaninantachus nisqanmanta Jesusta tapukurqanku.
[10] Hinan Jesusqa nirqan: ―Diospa qhapaq suyunmanta pakasqa yachaykunata yachanaykichispaq qankunamanqa qosqan kasunkichis. Wakinmanmi ichaqa, rikch'anachiypi rimaykuni. Qelqataqmi nin: ‘Qhawashaspankupas, manan rikunkuchu. Hinallataq uyarishaspankupas, manallataqmi entiendinkuchu,’ nispa. (Isa. 6:9)
[11] Chay rikch'anachiyqa kay ninantan nin: Muhuqa Diospa siminmi.
[12] Ñan pataman chayaq muhutaqmi, simita uyariqkuna kanku. Ichaqa saqra hamuruspantaq, sonqonkumanta Diospa siminta qechurapun. Mana iñinankupaq, hinallataq Dios mana paykunata qespichinanpaqmi qechurapun.
[13] Rumi t'aqraman chayaq muhutaq, Diospa siminta uyarispanku kusisqa chaskikuqkuna kanku. Paykunataqmi ichaqa, mana saphiyoqchu kanku. Pisi tiempolla kreenku, hinaspataq sasachay tiempokuna chayamuqtin t'aqarikapunku.
[14] Kiska-kiskaman chayaq muhutaqmi, Diospa siminta uyariqkuna kanku. Ichaqa kawsayninkupi purishaqtinkutaqmi, llakikuykuna, qhapaq kay yuyaykuykuna, hinallataq kay pachaq q'ochukuyninkuna p'amparapun. Chay hinapin ruruyninkuqa, mana poqonchu.
[15] Allin hallp'aman chayaq muhuñataqmi ichaqa, allin, hinallataq chanin sonqowan uyariqkuna kanku. Paykunaqa Diospa siminta uyarisqankutan takyachinku. Qaqata sayasqankuraykutaqmi, rurunku, nispa.
[16] Nillarqantaqmi: ―Manan pipas lamparata hap'ichispaqa, rakiwan p'aktinmanchu. Nitaqmi puñunaq pachanmanpas churanmanchu. Aswanpas, lámpara churana patamanmi churan. Chay hinapin, llapallan wasiman haykuqkunaqa, k'anchayta rikunku.
[17] Manan imapas runaq pakasqan, Diospa mana sut'inchananqa kanchu. Nitaqmi imapas mana piqpa yachasqan kaq, Diospa mana rikhurichimunan, hinallataq sut'iman horqomunanpaq kaqpas kanchu.
[18] Pipas kaqniyoqmanqa, aswantaraqmi qosqa kanqa. Pipas mana kaqniyoqmantataqmi ichaqa, kapunanpaq yuyaykusqantawanraq qechusqa kanqa. Chayrayku, imatachus uyarisqaykichista, allintapuni qhawakuychis, nispa.
[19] Jesuspa maman, hinallataq wawqenkunan, payman hamurqanku. Ichaqa askha runakunaq kasqankuraykutaqmi, mana payman asuykuyta atirqankuchu.
[20] Hinaqtinmi Jesusman willarqanku: ―Mamitaykin, wawqeykikunapiwan hawapi kashanku. Rikuykuytataqmi munashasunkiku, nispanku.
[21] Kutichispantaqmi, Jesusqa paykunata nirqan: ―Pikunachus Diospa siminta uyarispa hunt'anku, paykunan mamaypas, hinallataq wawqeykunapas kanku, nispa.
[22] Chay hina kaqtintaq, chay p'unchaykunapi Jesusqa, yachachisqankunapiwan huk barkaman haykurqanku. Paykunatataq nirqan: ―Wak lado qocha chimpaman chimpasunchis, nispa. Hinan chimparqanku.
[23] Ichaqa qochata chimpashaqtinkutaqmi, Jesusqa puñurapurqan. Hinan qochapi huk tutuka wayra hatarimuqtin, sasachaypi rikukuspa chinkaykapushar qankuña.
[24] Jesusman asuykuspankutaq, rikch'achispa nirqanku: ―¡Yachachiqniy, Yachachiqniy, chinkaykapushanchisñan! nispanku. Paytaqmi ichaqa, rikch'arispan wayrata, unu phoqchiytawan phiñarikurqan. Hinan thanipurqanku. Thak kaytaq karqan.
[25] Hinaqtinmi paykunata nirqan: ―¿Maypitaq iñiyniykichisri kashan? nispan. Paykunataq mancharisqa, hinallataq yuyayninkupi mana kabesqa kasharqanku. Hinan paykunapurapi ninakurqanku: ―¿Wayrapas, unupas kamachiqtin kasunankupaqqa, pitaq kay runari? nispanku.
[26] Galilea probinsiaq chimpanpi kashaq Gadara suyu runakunaq kasqanmantaqmi, qochanta chimparqanku.
[27] Hallp'aman chayaqtinku hinataq, Jesuswan tupaq huk supayniyoq runaqa, chay llaqtamanta lloqsimurqan. Payqa, unay tiempoñataqmi manaña p'achawanpas p'achakusqachu karqan. Nitaq wasinpipas tiyasqañachu karqan. Aswanpas aya p'ampana t'oqokunapin tiyasqa karqan.
[28] Jesusta rikuruspantaqmi ichaqa, paypa ñawpaqenman qonqoriykukuspa, kunkayoqta qaparispa nirqan: ―Ancha Hatunchasqa Diospa Churin Jesús, ¿iman qanwan ñoqawan ruwananchis? Ama muchuchiwanaykipaqmi balikuyki, nispa.
[29] Kadenakunawan, hinallataq fierro thunkunakunawanmi t'eqesqaku karqan. Ichaqa chay t'eqesqakunata p'itispataqmi, supaypa kallpachasqan ch'inniq cheqaskunaman riq. Unay tiempomantañan chay supayqa munaychakusqa karqan. Chayraykun Jesusqa, qhelli supay espirituta chay runamanta lloqsinanpaq kamachirqan.
[30] Hinan Jesusqa payta tapurqan: ―¿Iman sutiyki? nispa. Paytaq nirqan: ―Legionmi, nispa. Askha supaykunan paymanqa haykusqaku karqan. Chayraykun ‘Legionmi’ nispaqa nirqan.
[31] Supaykunataq chinkay-chinkay ukhu pachaman ama wikch'uykunanpaq Jesusta balikurqanku.
[32] Chay orqopitaqmi, tropantin khuchikunaqa mikhusharqanku. Hinan chay khuchikunaman haykunankupaq supaykunaqa Jesusta balikurqanku. Paytaqmi munallarqan.
[33] Chay runamanta lloqsiruspankutaqmi, supaykunaqa khuchi kunaman haykurqanku. Hinan chay tropantin khuchikunaqa, qaqapaykuspa, qochapi heq'epapurqanku.
[34] Chay khuchi michiqkunataqmi, imachus pasasqanta rikurqanku. Hinan ayqekuspanku llaqtapi, hinallataq kampokunapipas willakurqanku.
[35] Hinaqtinmi, llaqta runakunaqa, imachus pasasqanta rikunankupaq lloqsimurqanku. Jesuspa kasqanman chayamuspankutaq, pimantachus supaykunaqa lloqsisqa karqan, chay runata tarirqanku. Paytataq, Jesuspa ñawpaqen pampapi p'acharusqa yuyayninpiña tiyashaqta tarirqanku. Hinan runakunaqa, mancharikurqanku.
[36] Chay supayniyoq runata, imaynatachus Jesusqa qhaliyachisqanta rikuqkunataqmi, chay runakunaman willarqanku.
[37] Hinaqtinmi chay askha runakunaqa, sinchi mancharisqa kasharqanku. Chayraykun llapan chay Gadara suyumanta kaqkunaqa, llaqtankumanta ripunanpaq Jesusta balikurqanku. Hinan payqa, barkaman wichapuspa ripurqan.
[38] Pimantachus supaykunaqa lloqsisqa karqan, chay runataqmi Jesusta balikurqan: ―Qanwanmi riyta munani, nispan. Jesustaq ichaqa, kutichirqan: ―Wasiykiman kutipuspa, may hatun imakunatachus Diosqa qanpaq ruwapusqasunkikunata willamuy, nispan.
[39] Hinan chay runaqa, ripuspa, llaqtantinpi may hatun imakunatachus Jesusqa paypaq ruwasqanta willakurqan.
[40] Hinaqtinmi, askha runakuna Jesuspa kutimpunanta suyasharqanku. Chayraykun chayampuqtinqa, llapallanku kusisqa payta chaskiykurqanku.
[41] Chayllamanmi, judío runakunaq huñukunanku wasipi umalliq Jairo sutiyoq runaqa Jesusman hamurqan. Jesuspa chakinman qonqoriykukuspataqmi, wasinman rinanpaq balikurqan.
[42] Paypataqmi, sapan ususichallan chunka iskayniyoq watayoq hina kapurqan. Chay ususichanmi, yaqaña wañurapusharqan. Rishaqtintaqmi, runakunaqa aswanta mat'inaykakamurqanku.
[43] Hinan huk warmi, chunka iskayniyoq wataña yawar apay onqoywan kasharqan. Paymi askha hampiqkunaman rispan, kaqninkunatapas tukupusharqanña. Chaywanpas, manataqmi qhaliyaytaqa atirqanchu.
[44] Jesuspa qhepanmanta asuykuspantaq, paypa p'achanpa kantunta llamiykurqan. Hinan yawar apay onqoyninqa, kasqan ratupacha qhaliyarapurqan.
[45] Hinaqtinmi Jesusqa nirqan: ―¿Pin llamiyarqamuwan? nispa. Llapanku mananchakuqtinkutaqmi, Pedroqa, paywan kaqkunapiwan nirqanku: ―Yachachiqniy, askha runakunan mat'inaykakamuspa ñit'imushasunkikuña. Qantaq nishanki: ‘¿Pin llamiyarqamuwan?’ nispayki, nispanku.
[46] Jesustaq nirqan: ―Ñoqamanta atiy lloqsirusqantan reparakuni. Chayraykun mayqenchus llamiyaramuwasqantaqa yachani, nispa.
[47] Hinaqtinmi warmiqa, mana pakakuyta atispan, khatatataywan chimpaykurqan. Jesuspa ñawpaqenpi qonqoriykukuspantaqmi, llaqtantin runakunaq qayllanpi, imanaqtinchus tupaykusqanta willakurqan. Hinallataq imaynatachus kasqan ratupacha qhaliyarqapurqan, chaytapas willakullarqantaq.
[48] Jesustaq warmita nirqan: ―Ususiy, kallpachakuy, iñiyniykin qhaliyachirqasunki. Thak kaypi ripuy, nispa.
[49] Jesusqa manaraq rimayta tukushaqtintaq, judío runakunaq huñukunanku wasipi umalliqpa wasinmanta, huk runa hamurqan. Hinan Jairota nirqan: ―Ususichaykiqa, wañurqakapunñan. ¿Imapaqñataq yachachikuqtari rimapayanki? nispan.
[50] Chayta uyarispantaq, Jesusqa kutichispa nirqan: ―Ama mancharikuychu, aswanpas iñillay, hinaqa qhaliyapullanqan, nispan.
[51] Wasiman chayaspankutaq, Jesusqa mana pitapas paywan haykunanta munarqanchu. Aswanpas Pedrota, Jakobota, Juantawan, hinallataq sipaschaq tayta-mamallantawanmi haykunankutaqa munarqan.
[52] Chaypi kaqkunaqa llapankun sipaschamanta waqasharqanku, hinallataq khuyayta waqapakusharqanku. Jesustaqmi ichaqa, nirqan: ―Amaña waqaychisñachu. Sipaschaqa manan wañusqachu kashan, aswanpas puñushallanmi, nispa.
[53] Paykunataq, wañusqaña kasqanta yachaspanku, Jesusmanta asikurqanku.
[54] Hinan Jesusqa, llapankuta hawaman qarqorqan. Sipaschata makinmanta hap'iykuspantaq, kunkayoqta nirqan: ―Sipascha, sayariy, nispan.
[55] Sipaschaq espirituntaq payman kutiykapurqan. Hinan kasqan ratupacha sayaripurqan. Jesustaqmi, mikhunata qonankupaq kamachirqan.
[56] Sipaschaq tayta-mamantaq utirayasqa kasharqanku. Paykunatataqmi, ama pimanpas chaykuna pasasqanmanta willanankupaq Jesusqa kamachirqan.