[1] Chay hina kaqtinmi, Jesusqa huk cheqaspi Diosman parlasharqan. Tukuruqtin hinataq, huknin yachachisqanqa payta nirqan: ―Señor, imaynan Juanpas yachachisqankunaman Diosman parlayta yachachirqan, chay hinallatataq ñoqaykumanpas yachachiwayku, nispa.
[2] Jesustaq paykunata nirqan: ―Diosman parlaspaykichisqa kay hinata ninkichis: ‘Hanaq pachakunapi kashaq Yayayku, sutiyki hatunchasqa kachun. Qhapaq suyuyki hamuchun. Imaynan hanaq pachapipas, chay hinallataq kay hallp'a pachapipas, munayniyki ruwasqa kachun.
[3] Sapa p'unchay t'antaykuta kunan qowayku.
[4] Ñoqaykupas, lliw huchallikuwaqniykutaqa pampachaykun. Chayrayku, huchaykutapas pampachaykuwayku. Amataq wateqaymanqa churawaykuchu, aswanpas mana allin kaqmanta kacharichiwayku,’ nispaykichis, nispan.
[5] Nillarqantaq: ―Qankunaq mayqenniykichispapas huk amigoykichis kanmanmi, hinaspa kuska tuta orasta rispataq, niwaqchis: ‘Amigoy, kinsa t'antallaykita manuykuway.
[6] Huk amigoymi purisqanmanta chayaramuwan, manataqmi imaypas qoykunaypaq kapuwanchu,’ nispa.
[7] Paytaq ukhumanta kutichimunman: ‘Puñukunayta rikch'achimushawanki. Punkutapas wisq'akampuniñan, wawaykunapas puñunaypiñan ñoqawan puñushanku. Manataqmi mañakuwasqaykita qonaypaqqa sayarimuyta atiymanñachu,’ nispan.
[8] Niykichismi: ‘Amigonraykuña mana hatarispapas, waqyakachakusqanraykun sayarispa, llapan nesesitasqanta qonqa,’ nispay.
[9] Ñoqataqmi niykichis: ‘Mañakuychis, qosqataqmi kasunkichis. Maskhaychis, tarinkichistaqmi. Waqyakuychis, kicharisqataqmi kasunkichis.
[10] Llapa mañakuqqa chaskinmi, maskhaqpas tarinmi, punkumanta waqyakuqpas kicharisqan kanqa’ nispay.
[11] ¿Qankunamanta mayqen taytapas, sichus wawaykichis t'antata mañakunman chayqa, rumita qowaqchischu? ¿Otaq, challwata mañakunman chaypas, mach'aqwayta qowaqchischu?
[12] ¿Otaq runtuta mañakunman chaypas, alakrán kuruta qowaqchischu?
[13] Qankunapas millay runakuna kashaspaykichismi, allin kaqkunata wawaykichismanqa qoyta yachankichis. Sitaqchus chay hina chayqa, hanaq pacha Yayaykichisqa aswantaraqmi Santo Espirituta mañakuqninkunaman qonqapuni, nispa. Supaykunata Jesuspa qarqosqanmanta Mat. 12:22-37 Mar. 3:20-30
[14] Jesusmi huk upayachiq supayta qarqosharqan. Hinan chay upayachiq supay lloqsirapuqtin, chay runaqa rimaripurqan. Chaytaqmi, runakunaq yuyayninkumanqa mana kaberqanchu.
[15] Wakinninkutaqmi ichaqa, nirqanku: ―Supaykunaq umalliqnin Beelsebuwanmi supaykunataqa qarqon, nispanku.
[16] Wakinkunañataqmi, Jesusta wateqayta munaspanku, hanaq pachamanta huk señal ruwananta munasharqanku.
[17] Jesustaqmi ichaqa, yuyaykusqankuta reparaspa, paykunata nirqan: ―Lliw qhapaq suyupas, kikinpi t'aqanasqaqa thunikapunqapunin. Hinallataq huk wasipas, kikinpa kontranpi kashaqqa, urmaykapunqapunin.
[18] Sichus Satanás, pay kikin iskayman t'aqakunman chayqa, ¿imaynatataq qhapaq suyunri takyashallanman? Qankunan nishankichis: ‘Beelsebuwanmi payqa supaykunata qarqoshan,’ nispaykichis.
[19] Sitaqchus ñoqa Beelsebuq yanapayninwan supaykunata qarqoshani chayqa, ¿churiykichiskunari, piqpa yanapayninwantaq qarqoshanku? Chaymi paykuna chaninchaqniykichiskunaqa kanqaku.
[20] Ichaqa sitaqchus Diospa atiyninwan supaykunata qarqoni chayqa, cheqaqtapunin Diospa qhapaq suyunqa qankunaman chayamunña.
[21] Maypachachus kallpasapa runa wasinta armakunawan kuidan chayqa, kaqninkunaqa thak kaypin kashan.
[22] Ichaqa, paymanta aswan kallpasapa wak runa hamuruspantaq, atiparun. Hinallataq konfiakusqan llapan armankunata qechuruspa, kaqninkunatapas rakirapun.
[23] Pipas mana ñoqawan kashaqqa, ñoqaq kontraypin kashan. Hinallataq ñoqawan mana pallaqqa, wishñipushanmi, nispa.
[24] Jesusqa nillarqantaqmi: —Qhelli supay espíritu, runamanta lloqsiruspanmi, samananpaq maskhaspan ch'aki cheqasnintakama puririn. Mana tarispantaq nin: ‘Maymantachus lloqsimurqani, chay wasiyman kutipusaq,’ nispa.
[25] Kutipuspantaq, chay wasitaqa pichasqata, hinallataq sumaq allicharusqata tarin.
[26] Hinan kutispa, paymanta aswan millay qanchis espiritukunata pusamun. Haykuspankutaq, chaypi tiyapunku. Hinan chay runaqa ñawpaq kawsayninmantapas, aswan millaymanraq tukupun, nispan.
[27] Chaykunata Jesusqa rimashallaqtinraqmi, huk warmi askha runakuna chawpimanta waqyakamuspa, payta nimurqan: ―Wiksanpi apaqniyki, hinallataq ñuñuqniyki warmiqa, kusisamiyoqmi, nispan.
[28] Jesustaqmi ichaqa nirqan: ―Aswanpas, Diospa siminta uyarispa kasukuqkunan, aswan kusisamiyoqqa kanku, nispa.
[29] Jesusman askha runakuna huñukamuqtinkutaqmi, payqa rimaykuyta qallarirqan: ―Kay tiempopi, mana allin runakunaqa señaltan mañawan. Ichaqa manan ima señaltapas paykunamanqa qosaqchu. Aswaspas Diospa rantinpi rimaq Jonaspa señalnillanmi kanqa.
[30] Imaynan Nínive llaqtapi tiyaq runakunapaq, Jonás señal karqan, chay hinallataqmi, Runaq Churinpas, kunan tiempo runakunapaq señal kallanqataq.
[31] Uray ladomanta reynan, hallp'a pachaq tukukuyninmantaraq, Salomonpa yachaysapa kayninta uyarinanpaq hamurqan. Chayraykun payqa, taripay p'unchaypi hatarimuspa, kunan tiempo runakunata huchachanqa. Hinaqa, qhawariychis. ¡Hukmi, Salomonmanta aswan hatunpaq qhawarisqa kaq kaypi kashan!
[32] Nínive llaqta runakunaqa, Jonaspa willasqanwanmi yuyayman kutirikurqanku. Chayraykun paykunaqa, taripay p'unchaypi kay tiempo runakunaq kontranpi hatarimuspa, huchachanqaku. Hinaqa, qhawariychis. ¡Jonasmanta, aswan hatunpaq qhawarisqa kaqmi, kaypi kashan! nispan.
[33] Nillarqantaqmi: ―Manan pipas lamparata hap'ichispanqa, pakaman churanmanchu. Nitaqmi raki ukhumanpas churanmanchu. Aswanmi wasiman haykuqkunaq rikunankupaq, lámpara churana pataman churan.
[34] Kuerpoykiq k'anchayninqa ñawiykin. Ñawiykichus allin kashan chayqa, llapan kuerpoykipas k'anchashanmi. Ñawiykitaqchus mana allin kashan chaytaqmi ichaqa, kuerpoykipas laqha-tutayaqpi kashallantaq.
[35] Chayrayku qhawariy. Ama qanpi k'anchayqa laqha-tutayaq kachunchu.
[36] Chay hinaqa, llapan kuerpoyki k'anchashachunpuni. Amataq mayqen partillanpas laqha-tutayaqqa kachunchu. Chay hinapin, llapan k'ancharishaq kanki. Imaynan huk lamparapas k'anchayninwan k'anchaykusunki, chay hinata k'ancharinki, nispa.
[37] Jesusqa rimayta tukuruqtintaq, huk fariseoqa paywan kuska mikhunanpaq balikurqan. Jesustaqmi, chay fariseoq wasinman haykuspa, mesaman tiyaykurqan.
[38] Hinan Jesuspa mikhunanpaq mana mayllikusqanta rikuspa, fariseoqa yuyayninman mana kabesqa kasharqan.
[39] Hinaqtinmi Señorqa, payta nirqan: ―Kunan qankunaqa fariseokuna, qeroqtapas p'ukuqtapas hawallantan mayllinkichis. Ukhuykichistaqmi ichaqa, suwakuy munaq kaywan, hinallataq mana allin kaqkunawan hunt'aykusqa kashan.
[40] Mana yuyayniyoqkuna, ¿manachu qeroq hawanta ruwaqqa ukhuntapas ruwallarqantaq?
[41] Ichaqa, kaqniykichismanta limosnata qoychis. Qhawariychis, tukuy imaymanakunapas qankunapaqqa llimphuymi kanqa.
[42] Qankunaqa, mentamantapas, rudamantapas, hinallataq llapan asnapakunamantapas diezmota qonkichismi. Diospa chanin kayninta, hinallataq munakuynintataqmi ichaqa, mana ruwankichischu. Chay nisqaykunata ama saqespallaykichis, chaykunatapas ruwallawaqchispuni karqan. Chayrayku fariseokuna, ¡ay qankunamanta, imaynaraq kankichis!
[43] Qankunaqa, judío runakunaq huñukunanku wasikunapin ñawpaq kaq tiyanakunata, hinallataq plasakunapipas napaykukunatan munankichis. Chayrayku fariseokuna, ¡ay qankunamanta, imaynaraq kankichis!
[44] Qankunaqa, mana rikuna aya p'ampana t'oqo hinan kankichis. Hinan runakunaqa, patantaña purishaspapas, mana reparankuchu. Chayrayku kamachikuy simita yachachiqkuna, hinallataq iskay-uya fariseokuna, ¡ay qankunamanta, imaynaraq kankichis! nispa.
[45] Kamachikuy simita sut'inchaqkunamanta hukninmi, kutichispa Jesusta nirqan: ―Yachachikuq, chayta nispaykiqa, ñoqaykutawanmi k'amishawankiku, nispa.
[46] Jesustaq payta nirqan: ―Qankunaqa, runakunamanmi mana apay atina q'epikunata q'epichinkichis. Qankuna kikiykichistaqmi ichaqa, mana huk dedollaykichiswanpas q'epikunataqa tupaykullankichispaschu. Chayrayku kamachikuy simita sut'inchaqkuna, ¡ay qankunamantapas, imaynaraq kankichis!
[47] Qankunan, Diospa rantinpi rimaqkunaq aya p'ampana t'oqonkunata perqankichis. Taytaykichiskunataqmi ichaqa, paykunata wañuchirqanku. Chayrayku, ¡ay qankunamanta, imaynaraq kankichis!
[48] Cheqaqtapunin taytaykichiskunaqa, paykunata wañuchirqanku. Qankunataqmi ichaqa, aya p'ampana t'oqonkunata perqankichis. Chayraykun, chay perqasqaykichiswan taytaykichiskunaq ruwasqankumanta testigokuna, hinallataq yachaqkuna kankichis.
[49] Chay hinapin Diospas, yachaysapa kayninwan nirqan: ‘Diospa rantinpi rimaqkunata, hinallataq apostolkunatan kachamusaykichis. Hinan paykunamanta wakinninta wañuchinkichis, Wakintataq qatiykachankichis, nispan. (II Krón. 24:19-21)
[50] Kay pacha kamasqa kasqanmantapacharaqmi, Diospa rantinpi rimaqkunaqa yawarninkuta hich'arqanku. Hinan kay tiempo runakunapas, llapan chaykunamantapacharaq kuentata qonankupuni kanqa.
[51] Abelpa yawarninmantapacha, hinallataq Dios yupaychana wasi altar cheqaspi, Zakariasta wañuchisqankumantaraqmi kuenta qonankupuni kanqa. Arí, niykichismi: ‘Paykunaq yawarninmi, kay tiempo runa-miraykunata huchachanqa,’ nispay.
[52] Qankunaqa, allin kaq reqsinatan hark'akunkichis, manataqmi qankuna kikiykichispas reqsinkichischu. Hinallataqmi yachay munaqkunatapas hark'akunkichis. Chayrayku kamachikuy simita sut'inchaqkuna, ¡ay qankunamanta, imaynaraq kankichis! nispa.
[53] Jesusqa chaykunata niqtintaq, kamachikuy simita yachachiqkuna, hinallataq fariseokunapas, askha imaymanakunamantawan rimachiytapuni munarqanku.
[54] Huchachayta munasqankuraykutaqmi, ima rimasqallanpipas hap'irunankupaq wateqasharqanku.