[1] Mana lebadurayoq t'anta mikhuna Paskua sutichasqa fiesta p'unchay qallariyñan kasharqan.
[2] Hinan umalliq saserdotekuna, hinallataq kamachikuy simita yachachiqkunapas imaynanmanta Jesusta wañuchinankupaq maskhasharqanku. Ichaqa llaqtatataqmi manchakusharqanku.
[3] Hinallamanmi Satanasqa, Judas Iskarioteman haykurqan. Payqa, chunka iskayniyoq akllasqakunamanta hukninmi karqan.
[4] Jesusta imaynanmantachus hap'ichinanpaqmi Judasqa umalliq saserdotekunaman, hinallataq soldadokunaq umalliqninkunamanwan rispa rimanakamurqan.
[5] Paykunataqmi kusikurqanku. Hinan qolqeta qonankupaq rimanakurqanku.
[6] Chay hinapi rimanakuspankun, Judasqa runakunaq mana yachasqallan ima ratuchus hap'ichinanpaq maskhasharqan.
[7] Hinan Mana Lebadurayoq T'anta fiesta p'uchayqa chayamurqan. Chay Paskua fiestapitaqmi obehata nak'aspa sakrifi- sioqa haywanapuni karqan.
[8] Jesustaqmi Pedrota, hinallataq Juantapas kachaspa nirqan: ―Rispaykichis, Paskua fiestapi mikhunata mikhunanchispaq wakichimuychis, nispa.
[9] Paykunataq Jesusta tapurqanku: ―¿Maypi wakichimunaykutataq munankiri? nispanku.
[10] Hinan Jesusqa paykunata nirqan: ―Qhawariychis, llaqtaman haykushaqtiykichismi, p'uyñupi unuta apashaq huk runawan tupankichis. Hinan may wasimanchus haykunqa, chaykama qatikunkichis.
[11] Chay wasiyoq wiraqochatataqmi ninkichis: ‘Yachachikuqmi nisunki: “¿Yachachisqaykunawan Paskua mikhuna mikhunaypaq mayqen kaq wasin kashan?” nispan,’ nispaykichis.
[12] Paytaqmi ña allichasqataña hatun altos wasita rikuchisunkichis, hinan chaypi wakichimunkichis, nispa.
[13] Hinan paykunaqa rispanku, imaynatachus Jesuspa nisqanman hina tarirqanku. Chaypitaqmi Paskua mikhunataqa wakichimurqanku.
[14] Ora chayamuqtintaq, Jesusqa chunka iskayniyoq apostolninkunawan mesaman tiyaykurqan.
[15] Paykunatataqmi nirqan: ―Manaraq ñak'arishaspay qankunawan maytapuni Paskua mikhunata mikhuykuyta munarqani.
[16] Qankunatan niykichis: ‘Diospa qhapaq suyun hunt'akunankaman kay Paskua mikhunata manapuniña mikhusaqchu,’ nispay, nispa.
[17] Huk kopata hap'ispantaq, grasiasta qospan nirqan: ―Kay kopata hap'iychis, hinaspataq qankunapurapi haywanakuychis.
[18] Niykichismi: ‘Kunanmantapachan Diospa qhapaq suyunpi hamunaykama kay ubaspa rurunmantaqa, manapuni ukyasaqñachu,’ nispay, nispa.
[19] Hinan t'antata hap'ispan, grasiasta qospa, phakmirqan. Paykunaman qospantaq nirqan: ―Kay t'antaqa qankunarayku qosqay kuerpoymi. Kaytaqa, sapa kuti yuyariwanaykichispaqmi ruwankichis, nispa.
[20] Chay hinallataqmi mikhusqankumantaña, kopatapas hap'ispa, paykunata nirqan: ―Kay kopaqa, yawarniypi mosoq rimanakuymi. Qankunaraykutaqmi hich'akun, nispa.
[21] Jesusqa nillarqantaqmi: ―Qhawariychis, hap'ichiqniypa makinmi ñoqaq makiywan kuska mesapi kashan.
[22] Cheqaqtapunin, Runaq Churinqa, Diospa munayninman hina rishan. Ichaqa ¡ay haqay hap'ichiqninmanta, imaynaraq kanqa! nispan.
[23] Hinan paykunaqa, mayqenninkuchus chay ruwaq kanman, chaymanta paykunapurapi tapunakuyta qallarirqanku.
[24] Hinaqtinmi, paykunapurapi, mayqenninkuchus aswan allin kaqqa kasqankumanta churanakuy kasharqan.
[25] Jesustaqmi ichaqa, paykunata nirqan: ―Reykunaqa, kamachikusqankupi munayniyoqmi kanku. Hinallataqmi chaypi kamachikuqkunapas allin ruwaqkuna nispa sutichakunku.
[26] Qankunapurapiqa manan chay hinachu kanqa. Aswanpas qankunapurapi kurak kaqqa, sullk'a hinapuni kachun. Hinallataq kamachikuqpas, serbiq hina kachun.
[27] ¿Mayqentaq aswan allin kaqri? ¿Mesapi tiyaqchu icha serbiqchu? Mesapi tiyaqmi riki. Chaywanpas, ñoqaqa qankunapurapi serbiq hinan kashani.
[28] Pruebasqa kayniykunapi ñoqawan kuska takyaqkunaqa qankunan kankichis.
[29] Imaynan Yayayqa huk qhapaq suyuta ñoqapaq churapuwan, chay hinallataqmi ñoqapas huk qhapaq suyuta qankunapaq churapuykichis.
[30] Qhapaq suyuypi kaspaykichis mesaypi mikhunaykichispaq, hinallataq ukyanaykichispaq churapuykichis. Hinallataqmi chunka iskayniyoq Israel ayllukunata tiyaykuspa chaninchanaykichispaqwan churapuykichis, nispa.
[31] Hinan Señorqa nirqan: ―Simón, Simón, qhawariy. Satanasmi trigota hina suysunasunkipaq maskhashasunki.
[32] Ñoqataqmi ichaqa, iñiyniyki ama pisi-kallpayananpaq, hinallataq yuyayman kutirikuspayki wawqepanakunata kallpachanaykipaq Yayayta balikurqani, nispa.
[33] Simontaq ichaqa, payta nirqan: ―Señor, karselmanpas, hinallataq wañuymanpas qanwan kuska rinaypaq wakichisqañan kashani, nispa.
[34] Jesustaq nirqan: ―Pedro, qantan niyki: ‘Manaraq gallo waqashaqtinmi reqsiwasqaykitaqa kinsa kutita mananchawanki,’ nispay, nispa.
[35] Jesustaq apostolninkunata nirqan: ―Mana wayaqayoqta, mana qolqeyoqta, hinallataq mana husut'ayoqta kachashaqtiyqa, ¿imallamantapas pisichikurqankichischu? nispa. Paykunataq nirqanku: ―Manan imapas pisiwarqankuchu, nispanku.
[36] Hinan paykunata nirqan: ―Kunantaq ichaqa, wayaqayoqpas, qolqeyoqpas, chaykunata apakullachun. Mana espadayoqtaq kapanta bendespa huk espadata rantikuchun.
[37] Niykichismi: ‘Ñoqamanta qelqasqa kashaqqa hunt'akunanpunin. Chay ñoqamanta qelqataqmi nin: “Mana kamachikuy simiwan kashaq runakunatawanmi yuparqanku,” nispa. (Isa. 53:12) Chayraykun chay ñoqamanta ñawpaq qelqasqankunaqa ñoqapi hunt'akunanpuni,’ nispay, nispa.
[38] Hinan paykunaqa nirqanku: ―Señor, qhawariy, iskay espadan kaypi kashan, nispanku. Jesustaq paykunata nirqan: ―Chayllaña kachun, nispa.
[39] Chaymanta lloqsispantaq, maymanchus rillaqpuni chay hinata Olibos nisqa orqoman rirqan. Yachachisqankunataqmi qatikullarqankutaq.
[40] Chay cheqasman chayaspankutaqmi, paykunata nirqan: ―Ama wateqasqa kanaykichispaq Diosman parlaychis, nispa.
[41] Hinan Jesusqa, paykunamanta huk rumi chanqayman hina t'aqarikurqan. Chaypi qonqoriykukuspantaq Diosman parlarqan.
[42] Nirqantaq: ―Yayay, sichus munanki chayqa, kay kopata ñoqamanta anchhurichiy. Ichaqa, ama ñoqaq munasqaychu ruwakuchun. Aswanpas qanpa munasqayki ruwakuchun, nispa.
[43] Hinan Jesusta kallpachananpaq, hanaq pachamanta huk angelqa rikhurimurqan.
[44] Ancha llakikuyninpitaq, aswantaraq Diosman parlarqan. Hinallataq hump'inkunapas hatuchachaq yawar sut'uy hinaraq hallp'a pampaman sut'urqan.
[45] Diosman parlasqanmanta sayarispantaq, yachachisqankunaman kutispa, llakikuyhawa puñushaqta paykunata tarirqan.
[46] Hinan paykunata nirqan: ―¿Imanaqtintaq puñushankichisri? Sayariychis. Hinallataq ama wateqasqa kanaykichispaq Diosman parlashallaychispuni, nispa.
[47] Chayllamanmi, rimashallaqtinraq, askha runakunaqa hamusharqanku. Paykunaq ñawpaqenkutataqmi Judasqa hamusharqan. Payqa, chunka iskayniyoq yachachisqankunamanta hukninmi karqan. Hinan much'aykunanpaq Jesusman asuykurqan.
[48] Hinaqtinmi Jesusqa payta nirqan: ―Judas, ¿Runaq Churinta huk much'aykuywanchu hap'ichinki? nispa.
[49] Chaypi Jesuswan kashaqkunataqmi, imachus pasasqanta reparaspanku payta nirqanku: ―Señor, espadawan k'irisaqkuchu, nispanku.
[50] Hinan paykunamanta hukninkuqa, hatun umalliq saserdoteq kamachinta k'irispa, paña lado ninrinta qhorururqan.
[51] Kutichispantaqmi, Jesusqa nirqan: ―Amaña chay hinata ruwaychu, nispa. Chay runaq ninrinta llamiykuspantaq qhaliyachirqan.
[52] Hinan Jesusqa, paypa kontranpi hamuq umalliq saserdotekunatawan, Dios yupaychana wasipi umalliqkunatawan, hinallataq llaqta umalliq runakunatawan rimaykurqan: ―¿Suwaman hinachu espadakunantin, k'aspikunantin ima hamushawankichis?
[53] Sapa p'unchayña Dios yupaychana wasipi qankunawan kasharqani chaypas, manapunin makiykichistaqa ñoqaq kontraypi haywariwarqankichischu. Kay ratutaqmi ichaqa, ña qankunaq oraykichisña kashan. Hinallataq tutayaqpa atiyninpa rikuchikuyninña kashan, nispa.
[54] Jesustan hap'ispa aparqanku, hinan hatun umalliq saserdoteq wasinman apaykurqanku. Pedrotaqmi karullamanta qatikusharqan.
[55] Patio chawpipi ninata hap'ichiqtinkutaqmi, muyuriqpi tiyarqanku. Pedropas paykunawan kuskan chaypi tiyashallarqantaq.
[56] Hinan huk kamachi sipasqa, nina k'anchaypa qayllanpi tiyashaqta Pedrota rikururqan. Allinta qhawaykuspantaqmi nirqan: ―¡Kay runaqa Jesuswanmi kasharqan! nispa.
[57] Pedrotaq ichaqa, mananchaspa nirqan: ―Warmi, manan paytaqa reqsinichu, nispan.
[58] As unayllanmantataq hukpas rikuruspan, nillarqantaq: ―¡Qanpas paykunamantan kanki! nispan. Pedrotaq nirqan: ―Runa, manan paykunamantachu kani, nispa.
[59] Huk oramanta hinataq huk runapas nipayashallarqantaq: ―Paypas Galileallamantataqmi. Chayrayku payqa cheqaqtapuni Jesuswan kasharqan, nispa.
[60] Hinan Pedroqa nirqan: ―¡Runa, rimasqaykitaqa manan yachanichu! nispa. Hinan manaraq rimayta tukushaqtin, kasqan ratupacha galloqa waqamurqan.
[61] Señortaqmi kutirispa, Pedrota qhawarirqan. Hinan Pedroqa, imaynatachus Señorqa nirqan, chay simimanta yuyarirurqan. Señorqa nisqan karqan: ‘Manaraq gallo waqamushaqtinmi, kinsa kutita mananchawanki’ nispan.
[62] Hinan Pedroqa hawaman lloqsispan, sinchi khuyayta waqarqan.
[63] Jesusta kuidaq runakunataqmi, asipayaspanku payta maqarqanku.
[64] Ñawinta wataruspankutaqmi uyanpi saqmarqanku. Hinan Jesusta tapurqanku: ―Pichus saqmashasunki, chayta watuy, nispanku.
[65] Paypa kontranpi k'arakta k'amispankutaqmi, wak askha imaymanakunata nirqanku.
[66] Pacha illariramuqtintaq, llaqta umalliq runakuna, umalliq saserdotekuna, hinallataq kamachikuy simita yachachiqkunapas huñukamurqanku. Hinan Jesusta paykunaq huñukuyninku Konsilio Sanedrinman aparqanku.
[67] Hinan chaypi paykunaqa nirqanku: ―Sichus qan Cristo kanki chayqa, ¡niwayku! nispanku. Jesustaqmi ichaqa, paykunata nirqan: ―Sichus niykichisman chayqa, manan kreewankichismanchu.
[68] Chaymantapas, sichus ñoqa tapuykichisman chayqa, manan kutichiwankichismanchu, nitaqmi kachariwankichismanpaschu.
[69] Kunanmanta ñawpaqmanmi ichaqa, Runaq Churinqa, Diospa paña lado atiyninpi tiyaykunqa, nispan.
[70] Hinan llapanku Jesusta nirqanku: ―Chay hinaqa, ¿Diospa Churinchu qan kanki? nispanku. Jesustaq paykunata nirqan: ―Qankunaq nisqaykichis hinapunin, nispa.
[71] Hinaqtinmi paykunaqa nirqanku: ―Ñoqanchis kikinchismi siminwan nisqanta uyarinchis. Chayrayku, ¿ima testigotañataq nesesitanchisri? nispanku.