[1] Chay imaymanakuna qhepatataq, Señorqa wak qanchis chunka yachachisqankunata akllarqan. Hinan ñawpaqenta, iskay-iskaymanta llapan llaqtakunaman, hinallataq maykunamanchus rinan cheqaskunaman paykunata kacharqan.
[2] Nirqantaq: ―Cheqapaqpunin, kosecha llank'anaqa askhallaña kashan. Llank'aqkunataqmi ichaqa, pisilla kashanku. Chayrayku, chakrayoq Señorta kosechanman llank'aqkunata kachamunanpaq balikuychis.
[3] Riychis. Qhawarillaychispas, ñoqaqa lobokuna chawpimanmi obehakunata hina kachashaykichis.
[4] Aman qolqe ch'uspatapas, nitaq wayaqatapas, nillataq husut'atapas apankichischu. Amallataqmi ñanpiqa pitapas napaykunkichischu.
[5] Mayqen wasimanña haykunkichis chaypas, ñawpaqtaqa ninkichis: ‘Kay wasipaq thak kay kachun,’ nispaykichis.
[6] Sichus chay wasipi thak kayniyoq runa kashan chayqa, thak kayniykichis paypi takyanqa. Manachus kanqa chaytaqmi ichaqa, thak kayniykichisqa qankunaman kutimpusunkichis.
[7] Llank'aqqa llank'asqanmanta pagonta chaskikapunanpunin. Chayrayku, kasqan wasillapi imatachus qosqasunkichista mikhuspaykichis, hinallataq ukyaspaykichis qorpachakunkichis. Amataqmi wasin-wasintaqa purinkichischu.
[8] May haykusqaykichis llaqtapipas chaskisunkichis chayqa, ñawpaqeykichisman churamusqankuta mikhunkichis.
[9] Chaypi onqosqa kashaqkunata qhaliyachispaykichistaq, ninkichis: ‘Qankunamanmi Diospa qhapaq suyunqa sispaykamunña,’ nispaykichis.
[10] Mayqen llaqtapipas haykuqtiykichis, mana chaskisunkichischu chayqa, kallenkunapi puriq lloqsinkichis.
[11] Hinan ninkichis: ‘Chakiykuman k'askaq llaqtaykichis hallp'atapas qankunaq kontraykichispin chhaphchikuyku. Ichaqa Diospa qhapaq suyunmi qankunaman sispaykamunña. Chayta yachaychis,’ nispaykichis.
[12] Niykichismi: ‘Haqay p'unchaypi chay llaqtaqa, Sodoma llaqtamantapas sinchi muchuchisqaraqmi kanqa,’ nispay.
[13] Askha atiywan ruwaykunan qankunapi ruwasqa karqan. Sichus chay ruwaykuna Tiro llaqtapiwan, Sidón llaqtapiwan ruwakunman karqan chayqa, maypachañan yuyayman kutirikunkuman karqan. Hinallataq luto p'achawan p'achakuspa, uspha patapi tiyankuman karqan. Chayrayku ¡ay qanmanta Korasín llaqta, imaynaraq kanki! Hinallataq, ¡ay qanmanta Betsaida llaqta, imaynaraq kanki!
[14] Chaymi taripay p'unchaypiqa Tiro llaqtamantapas, Sidón llaqtamantapas sinchi muchuchiyraq qankunapaqqa kanqa.
[15] ¿Qanri Kapernaum llaqta, hanaq pacha kamaraqchu hoqarisqa kashanki? !Hades kamaraqmi wikch'uykusqa kanki!
[16] Pipas uyarisunkichis chayqa, ñoqatan uyariwan. Pipas wikch'uykukun chaytaqmi ichaqa, ñoqatapas wikch'uykukun. Ñoqata wikch'uykukuqtaqmi, kachamuwaqniytapas wikch'uykukullantaq, nispa.
[17] Qanchis chunkantin kusisqa kutimpuspankutaq, nirqanku: ―Señor, ¡sutiykipiqa supaykunapas kasuwarqankun! nispanku.
[18] Hinan Jesusqa paykunata nirqan: ―Satanastan, hanaq pachamanta rayoq lliphllikiynin hinaraq urmaykamushaqta ñoqa rikurqani.
[19] Qhawariychis, mach'aqwaykunatapas, alakrán kurukunatapas, hinallataq awqaykichiskunaq tukuy atiynintapas sarunchanaykichispaq kamachikuyniyoq kaytan qoykichis. Hinan chaykunaqa mana imanasunkichispaschu.
[20] Chaywanpas, ama supaykunaq kasukusqasunkichiswanchu q'ochukuychis. Aswanpas, sutiykichis hanaq pachapi qelqasqa kashasqanmanta q'ochukuychisqa, nispa.
[21] Chay kasqan ratupitaqmi, Jesusqa Santo Espiritupi q'ochukurqan. Nirqantaq: ―Yayallay, hanaq pachaqpas, hallp'a pachaqpas Señorninmi kanki. Qantan yupaychayki. Kaykunatan yachaysapakunamanta, hinallataq yuyaysapakunamanta pakarqanki. Wawakunamantaqmi ichaqa, kaykunata sut'incharqanki. Qanqa, chay hinatapunin ruwayta munarqanki. Chayraykun, Yayallay, chay hinatapuni ruwarqanki, nispa.
[22] Yachachisqankunaman kutirispantaq, paykunata nirqan: ―Yayayqa, lliw imaymanakunatan ñoqaman hap'ichiwarqan. Pichus Churiqa kasqanta, manapunin pipas reqsinchu, aswanpas Yayallan reqsin. Hinallataqmi, pichus Yayaqa kasqanta, manapunin pipas reqsinchu, aswanpas Churillan reqsin. Pikunamanchus Churiqa reqsichiyta munan, paykunallataqmi Yayataqa reqsinku, nispa.
[23] Yachachisqankunaman kutirispantaqmi, sapaqllapi paykunata nirqan: ―Qankunaq rikusqaykichista rikuq ñawikunaqa kusisamiyoqmi kanku.
[24] Niykichismi: ‘Askha Diospa rantinpi rimaqkunan, hinallataq reykunan qankunaq rikusqaykichistaqa rikuytapuni munarqanku. Ichaqa, manataqmi rikurqankuchu. Hinallataqmi uyarisqaykichistapas uyariyta, munarqanku. Ichaqa, manataqmi uyarirqankuchu,’ nispay, nispa.
[25] Chayllamanmi kamachikuy simita sut'inchaq huk runaqa, Jesusta wateqananpaq sayarirqan. Hinan nirqan: ―Yachachikuq, ¿imata ruwaspaytaq wiñay kawsayniyoqri kayman? nispan.
[26] Jesustaq payta nirqan: ―¿Kamachikuy Simipiri, ima nispataq qelqasqa kashan? ¿Imaynatataq Kamachikuy Simitari ñawinchanki? nispa.
[27] Kutichispantaq payqa nirqan: ―Señor Diosniykitan tukuy sonqoykiwan, tukuy almaykiwan, tukuy kallpaykiwan, tukuy yuyayniykipiwan munakunki. (Deut. 6:5) Hinallataq runamasiykitapas qan kikiykita hinapunin munakunki, nispa. (Leb. 19:18)
[28] Hinan Jesusqa, payta nirqan: ―Allintan kutichiwanki. Chayta ruway, hinaspataqmi kawsanki, nispan.
[29] Paytaq ichaqa, chaninman tukuyta munaspa, Jesusta tapurqan: ―¿Pitaq runamasiyri? nispa.
[30] Kutichispantaqmi, Jesusqa nirqan: ―Huk runan Jerusalén llaqtamanta, Jerikó llaqtaman uraykushaspa, suwakunaq makinman urmarqan. Chay suwakunan p'achanta q'alata ch'utirqanku, hinallataq payta k'irirqanku. Yaqapas wañusqata, hinañataq wikch'uspa pasakapurqanku.
[31] Chaypaq hinataqmi, huk saserdoteqa chay ñanninta uraykusharqan. Hinan chay k'irisqa runata rikuruspa, wak ladollanta pasarparirqan.
[32] Chay hinallataqmi, huk Levita runapas, chay cheqasman chayallarqantaq. Hinan chay k'irisqa runata rikuruspa, wak ladollanta pasarparillarqantaq.
[33] Samaria llaqtayoq huk runan ichaqa, ñan purisqanpi, chay k'irisqa runaq kasqanman chayarqan. Hinan payta rikuruspan, khuyalliykukurqan.
[34] Hinan k'irisqa runaman asuykuspa, aseitewan, hinallataq binowan hampiykurqan. K'irinkunata wataykuspataq, pay kikinpa sillakunan uywaman sillaykuchirqan. Hinan huk qorpachakuna wasiman apaspa, payta kuidarqan.
[35] Qhepantin p'unchay puriripushaspantaq, iskay denario qolqenta horqokuspa, qorpachakuna wasiyoqman qorqan. Nirqantaq: ‘Kuidaykapullawanki. Llapan gastasqaykikunataqa kutimuspayñan pagapusayki,’ nispan.
[36] Chay kinsantinmanta, ¿mayqen kaqtaq suwakunaq makinman urmaykuqpa runamasinri kanman? nispa.
[37] Chay kamachikuy simita sut'inchaqtaq, nirqan: ―K'irisqa runata yanapaykuqmi, nispan. Hinan Jesusqa, payta nirqan: ―Ripuy, hinaspa qanpas chay hinallatataq ruwamuy, nispan.
[38] Aswanta purispankutaqmi, Jesusqa huk llaqta kantuman haykurqan. Hinan Marta sutiyoq huk warmiqa wasinpi chaskiykurqan.
[39] Martaq ñañanmi María sutiyoq karqan. Mariaqa, Jesuspa ñawpaqen pampapi tiyaykuspanmi, rimasqankunata uyarisharqan.
[40] Martataqmi ichaqa, imaymana ruwanakunallapi kasharqan. Hinan payqa, Señorman chimpaykuspa, nirqan: ―Señor, ñañayqa sapallay serbisqayta hinalla qhawashawasqanmanta, ¿manachu imaninkipas? Señor, yanapawananpaq payta niykapuway, nispan.
[41] Kutichispantaqmi Señorqa, payta nirqan: ―Marta, Marta, imaymana ruwanakunallapin afanasqa, hinallataq llakipakuspa kashanki.
[42] Llapan ruwanakunamanta aswan allin kaqqa ch'ullallan. Chaymi Mariaqa, chay allin kaqta akllakun. Chaytaqa manan pipas qechunqachu, nispan.