[1] Chay hina kaqtinmi, chay p'unchaykunapi Cesar Augustomanta huk kamachikuy qelqa lloqsimurqan. Chay kamachikuy qelqaqa, llapa kay pachantinpi tiyaq runakuna padronachikunankupaqmi lloqsimurqan.
[2] Kay ñawpaq kaq runa padronayqa, Siria suyupi Sirenio kamachikuq kashallaqtinraqmi karqan.
[3] Hinan llapan runakunaqa, sapanka llaqtankupi padronachikunankupaq rirqanku.
[4] Joseqa, Davidpa familia mirayninmantan karqan. Chayraykun payqa, Galilea probinsiapi Nazaret llaqtamanta, Judea probinsiapi Belén sutiyoq Davidpa llaqtanman wicharqan.
[5] Kasarakunanpaq rimaykusqaña kashaq warmin Mariapiwanmi padronachikuq wicharqan. Mariaqa, hunt'a onqoqñan kasharqan.
[6] Chay hina kaqtinmi, paykuna chaypi kashaqtinku, wachakunan p'unchayqa hunt'akurqan.
[7] Hinan phiwi qhari wawata wachakurqan. Qorpachakuna wasipi paykunapaq mana kampo kasqanraykutaqmi, walthanawan wawata walthaykuspa, uywa qaranapi puñuykachirqan.
[8] Chay probinsiapitaq, obeha michiqkuna tropantin obehankuta illariqnintin kuidaspa kasharqanku.
[9] Chayllamanmi Señorpa huk angelnin paykunaman rikhurirqan. Señorpa k'anchariynintaq paykunaq muyuriqninkuta k'anchaykurqan. Hinan sinchitapuni mancharikurqanku.
[10] Angeltaq ichaqa, paykunata nirqan: ―Ama mancharikuychischu. Qhawariychis, huk allin willakuyta kusikunaykichispaq willasqaykichis. Kay kusikuyqa, llapan llaqtantinpaqmi kanqa.
[11] Kunanmi Davidpa llaqtanpi huk Qespichiq Cristo Señorqa nasepusunkichis.
[12] Kaytaqmi qankunapaq señalqa kanqa: Huk wawatan walthanawan walthaykusqata huk uywa qaranapi puñuykachisqata tarinkichis, nispa.
[13] Qonqayllamantaq chay angelwan kuska, hanaq pachamanta askha mana yupay atiy angelkuna Diosta yupaychaspa rikhurimurqanku.
[14] Nirqankutaq: ―¡Hanaqkunapi Diosman yupaychay kachun! ¡Hallp'a pachapitaq, thak kay kachun! ¡Hinallataq runakunapurapipas, allin qhawarinakuy kachun! nispanku.
[15] Chay hina kaqtinmi, michiqkunaq qayllanmanta, angelkunaqa hanaq pachaman ripurqanku. Michiqkunataqmi paykunapurapi ninakurqanku: ―Kunanpacha Belén llaqtaman haku risunchis. Hinaspataq Señorpa imachus niwasqanchis pasasqanta rikumusunchis, nispanku.
[16] Usqhayllaman rispankutaqmi Mariatawan, Josetawan, hinallataq wawatapas, uywa qaranapi puñushaqta tarirqanku.
[17] Rikuruspankutaq, imakunatachus chay wawamanta angelpa nisqanta anchatapuni willakurqanku.
[18] Llapan uyariqkunataq, michiqkunaq willakusqankumanta yuyayninkupi mana kabesqa kasharqanku.
[19] Mariataqmi ichaqa, llapan chay imaymanakunata sonqollanpi yuyaymanaspa waqaycharqan.
[20] Imaynatachus angelqa michiqkunata nisqa karqan chayqa, chay hinapunin karqan. Michiqkunataq llapan chay uyarisqankumanta, hinallataq rikusqankumantapas Diosta hatunchaspa, yupaychaspa ima kutipurqanku.
[21] Wawata sirkunsidanapaq pusaq p'unchay hunt'akuqtintaqmi, Jesús sutiwan suticharqanku. Chay sutiqa, manaraq María wiksallikushaqtinmi, angelpa churasqanña karqan.
[22] Moisespa Kamachikuy Siminman hinataqmi, paykunaq ch'uyanchakuyninku p'unchaykuna hunt'akurqan. Hinan wawata Señorman qopunankupaq Jerusalén llaqtaman aparqanku.
[23] Señorpa Kamachikuy Siminpipas qelqasqan kashan: ‘Llapa phiwi qhari wawan, Señorpaq t'aqasqa nispa sutiyasqa kanqa,’ nispan. (Éxo. 13:2, 12)
[24] Chayrayku, Señorpa Kamachikuy Siminpi nisqanman hina, ofrendata haywaq rirqanku. Kamachikuy Simiqa ninmi: ‘Iskay kullkukunata, otaq iskay malqo urpichakunata haywachunku,’ nispa. (Leb. 12:8)
[25] Qhawariychis, Jerusalén llaqtapin huk chanin, hinallataq khuyapayakuq runa Simeón sutiyoq kasharqan. Paymi Israel llaqtaq sonqochasqa kananta suyakusharqan. Santo Espiritutaq paypi kasharqan.
[26] Simeonmantaqmi, Santo Espirituqa willasqaña karqan: ‘Señor Diospa Hawisqanta manaraq rikushaspaykiqa, manan wañunkiraqchu,’ nispan.
[27] Espírituq pusasqan kaspataqmi, Simeonqa Dios yupaychana wasiman rirqan. Kamachikuy Simiman hinataqmi ruwanankupaq, tayta-mamanqa Jesús sutiyoq wawata apamurqanku.
[28] Hinan Simeonqa wawata marq'ariykukuspa Diosta samincharqan.
[29] Nirqantaq: ―Kunanqa munayniyoq Señorniy, nisqaykiman hina, kay kamachiykita thak kaypi pusakapullawayña.
[30] Ñawiykunawanmi qespichiyniykita rikuniña.
[31] Kay Qespichiqtataqmi, llapa llaqtakunaq ñawpaqenpi wakichirqanki.
[32] Paymi mana-judío runakunaman k'anchayta rikuchinqa. Hinallataq Israel llaqtaykipaqpas k'anchariy kanqa, nispa.
[33] Chay imaymanakunata wawamanta rimasqantaqmi, Josepa, hinallataq wawaq maman Maríaq yuyayninkumanpas mana kaberqanchu.
[34] Paykunata saminchaykuspantaq Simeonqa wawaq maman Mariata nirqan: ―Qhawariy, kay wawatan Israel llaqtapi askha runakuna urmanankupaq, otaq hatarinankupaq señalta Diosqa churamun. Chay señalpa kontranpitaq hatarinqaku.
[35] Chay hinapin, askha runakunaq sonqonkupi yuyaykusqankuta Diosqa sut'inchanqa. Qantataqmi, huk espada sonqoykita t'urpuspa nanachisunki, nispa.
[36] Chaypin, Aser ayllumanta Fenuelpa ususin profetisa Anapas kasharqan. Payqa yuyaqñan karqan. Donsella kashaspallanraqmi, qosanwanqa kasarakusqa karqan, ichaqa qanchis watallatan tiyasqaku karqan.
[37] Hinan Anaqa pusaq chunka tawayoq wataña biuda karqan. Payqa Dios yupaychana wasimanta manan kuyurirqanchu. Hinan tuta-p'unchay ayunuwan, Diosman mañakuypiwan Diosta serbisharqan.
[38] Chay kasqan ratullapitaqmi, Anaqa chimpaykamuspan, Señorman grasiasta qorqan. Hinallataq Diospa rantipapunanta Jerusalén llaqtapi llapan suyakuqkunaman chay wawamanta rimaykurqan.
[39] Señorpa llapan Kamachikuy Siminpa nisqankunata hunt'aspankutaqmi, Galilea probinsiapi Nazaret llaqtankuman kutipurqanku.
[40] Hinan wawaqa, espiritunpi kallpachakuspa, hinallataq yachaywan hunt'aykusqa wiñarqan. Diospa allinpaq qokuynintaq, paypi kasharqan.
[41] Sapa wata Paskua fiestapaqmi Jerusalén llaqtaman taytamamanqa rillaqkupuni.
[42] Jesusqa, chunka iskayniyoq watayoqña kashaqtintaq, imaynan Jerusalén llaqtapi fiestaman rinallapuni karqan, chayman hina wicharqanku.
[43] Fiesta p'unchaykuna tukukuytataq, paykuna kutipushaqtinku, Jesusqa Jerusalén llaqtapi qheparukusqa karqan. Hinan Joseqa, hinallataq wawaq mamanpas qheparukusqanta mana yacharqankuchu.
[44] Runa-runa ukhupi kashananpaq yuyaspankutaqmi, huk p'unchay puriy ñantaña ripusharqanku. Hinamantataqmi familiankunapurapi, hinallataq reqsisqankunapurapi maskharqanku.
[45] Manapuni tarispankutaqmi, Jerusalén llaqtaman maskhaspa kutirqanku.
[46] Chay hinapin, kinsa p'unchaymantaña Dios yupaychana wasipi Jesustaqa tarirqanku. Paytaqa, kamachikuy simita yachachiqkunaq chawpinkupi tiyaykuspa, paykunata uyarispa, hinallataq tapuspa kashaqtan tarirqanku.
[47] Hinan yuyaysapa kasqanwan, hinallataq imaynatachus kutichisqanwan, llapa uyariqninkunaqa utirayasharqanku.
[48] Payta rikuruspankutaqmi, tayta-mamanqa yuyayninkupi mana kabesqa kasharqanku. Hinan mamanqa Jesusta nirqan: ―Waway, ¿imanaqtintaq kaytari ruwawankiku? Qhawariy, taytaykipas, ñoqapas llakisqan maskhayamushaykiku, nispa.
[49] Hinaqtinmi Jesusqa paykunata nirqan: ―¿Imanaqtintaq maskhamuwashankichisri? ¿Manachu Yayaypa ruwanankunapipuni kashanaytaqa yacharqankichis? nispa.
[50] Paykunataq ichaqa, rimasqankunata mana entiendirqankuchu.
[51] Hinan Jesusqa, paykunawan uraykapuspa, Nazaret llaqtaman kutipurqan. Chaypitaqmi tayta-mamanta kasukuspa kawsarqan. Mamantaqmi ichaqa, tukuy chay imaymanakunata sonqollanpi waqaycharqan.
[52] Hinan Jesusqa yachaypi, sayayninpipas wiñarqan. Hinallataq Diospa qhawarinanpaq, runakunaq qhawarinanpaqpas allinta kawsaspa wiñarqan.