[1] Jesusmi Jerikó llaqtaman haykurqan. Hinan chay llaqta chawpinta pasasharqan.
[2] Chayllamanmi, Zaqueo sutiyoq huk qhapaq runa chaypi kasharqan. Payqa, tributo qolqe kobraqkunaq umalliqninmi karqan.
[3] Hinan payqa, pipunichus Jesús kasqanta rikuytapuni munarqan. Ichaqa ancha askha runakunaq kasqanrayku, hinallataq taksalla kasqanraykun, mana rikuyta atirqanchu.
[4] Jesusqa chaynintapunin rinan karqan. Chayraykun ñawpaqman phawaylla rispan, Jesusta rikunanpaq, huk sikómoro sach'aman wicharqan.
[5] Jesusqa, chay cheqasman chayaspanmi, wichayta qhawarispa, Zaqueota rikurqan. Hinan payta nirqan: ―Zaqueo, kunanmi wasiykipi qhepakunaypuni kashan. Chayrayku usqhaylla uraykamuy, nispa.
[6] Hinan payqa, usqhaylla uraykamuspan, Jesusta kusisqa chaskirqan.
[7] Chayta rikuspankutaqmi, llapallanku chhuchupakuspa nirqanku: ―Huk huchasapa runaq wasinmanmi qorpachakuq haykun, nispanku.
[8] Hinan Zaqueoqa sayarispa Señorta nirqan: ―Qhawariy Señor, kaqniykunamanta kuskannintan wakchakunaman qosaq. Sichus pimantapas imallatapas q'otuspa suwakurqani chayqa, tawa kutitaraqmi kutichipusaq, nispa.
[9] Jesustaq nirqan: ―Paypas Abrahampa churin kasqanrayku, kunan kay wasiman qespikuyqa chayamun.
[10] Runaq Churinqa, chinkasqata maskhananpaq, hinallataq qespichinanpaqmi hamurqan, nispa.
[11] Jerusalén llaqta qayllapiñan kasharqanku. Hinan paykunaqa, chaykunata uyarispa, Diospa qhapaq suyunqa usqhayllaman rikhuriramunanpaqña, yuyaykusharqanku. Chaymi Jesusqa, huk rikch'anachiyta paykunaman rimaykurqan.
[12] Nirqantaq: ―Huk allin reqsisqa runan, huk qhapaq suyuta chaskimuspa, chaymantataq kutimpunallanpaq, wak lado suyuta puririrqan.
[13] Hinan paypa chunka kamachinkunata waqyaspa, chunka mina qolqeta paykunaman rakirqan. Nirqantaq: ‘Kay mina qolqeta kutimunaykama llank'achishaychis,’ nispa.
[14] Chay allin reqsisqa runaq llaqtamasinkunataq ichaqa, payta cheqnikurqanku. Hinan qhepanta, willaq runakunata kamachispanku, nichimurqanku: ‘Ñoqaykupurapi qanpa kamachikunaykitaqa manan munaykuchu,’ nispanku.
[15] Hinan chay qhapaq suyuta chaskisqanmanta, chay allin reqsisqa runaqa kutimurqan. Hinan, qolqe qosqan kamachinkunata waqyachimurqan. Sapankankuq qolqe ganachimusqankuta yachananpaqmi waqyachimurqan.
[16] Ñawpaq kaq kamachintaq hamuspa nirqan: ‘Patronniy, mina qolqeykiqa, chunka mina qolqetawanmi wacharamun,’ nispa.
[17] Patronnintaq payta nirqan: ‘Allinpuni, allin kamachi, pisillapipas hunt'aqpuni kasqaykiraykun, chunka llaqtakunaq kamachiqnin kanki,’ nispa.
[18] Iskay kaq kamachin hamuspantaq, payta nirqan: ‘Patronniy, mina qolqeykiqa phisqa mina qolqetawanmi wacharamun,’ nispa.
[19] Hinan paytapas patronninqa nillarqantaq: ‘Qanpas phisqa llaqtakunaq kamachiqninmi kanki,’ nispa.
[20] Huk kaqñataq, hamuspa nirqan: ‘Patronniy qhawariy, mina qolqeykiqa kaymi kashan. Kay qolqeykitaqa khipunapi khipuruspaymi waqaycharqani.
[21] Sinchi millay runa kaspaykin, mana churashaspaykipas horqoq kanki. Hinallataq mana tarpushaspaykipas kosechaq kanki. Chayraykun qanta manchakuspay chay hinata ruwarqani,’ nispa.
[22] Hinan patronninqa payta nirqan: ‘¡Mana allin kamachi, rimasqaykiraykun huchachasqayki! Sinchi millay runa kaspay, mana churasqaymanta horqoq kasqayta, hinallataq mana tarpushaspay kosechaq kasqaytapas yacharqankin.
[23] Chay hinaqa, ñoqa kutimuspay, wachaynintinta horqokapunaypaq ¿imanaqtintaq qolqeytari mana bankomanchu churarqanki?’ nispa.
[24] Chaypi kashaqkunatataqmi nirqan: ‘Chay mina qolqeta qechuychis, hinaspa chunka mina qolqeyoqman qoychis,’ nispa.
[25] Paykunataqmi nirqanku: ‘Patronniyku, paypaqa ñan chunka mina qolqen kashanña,’ nispanku.
[26] Patrontaqmi kutichirqan: ‘Qankunataqa niykichismi: “Hayk'an kaqniyoqmanqa aswantaraqmi qosqa kanqa. Mana kaqniyoqmantataqmi ichaqa, kaqninkunatawanpas qechupusqa kanqa,” nispay.
[27] Ichaqa, chay awqaykuna, paykunapurapi kamachikuqninku kanayta mana munaqkunatataq, kayman apamuychis. Hinaspa ñawpaqeypi kunkanta qhoruychis, nispan, nispa.
[28] Chayta nispantaq, ñawpaqta rispa, Jerusalén llaqtaman wichasharqan.
[29] Chay hina kaqtinmi, Betfagé llaqta, hinallataq Betania llaqta qayllaman haykushaspanña, iskay yachachisqankunata Olibos nisqa orqoman kacharqan.
[30] Hinan paykunata nirqan: ―Chimpa llaqta kantuta rirqoychis. Chayman haykuspaykichistaq, huk malta asnochata watasqata tarinkichis. Chay asnochapiqa, manan hayk'aqpas pi runapas sillakunraqchu. Chaytan paskaraspa aysaramunkichis.
[31] Sichus pipas tapusunkichis: ‘¿Imapaqmi chay asnochata paskashankichis?’ nispa chayqa, qankunaqa ninkichis: ‘Señormi nesesitashan,’ nispaykichis, nispa.
[32] Hinan Jesuspa kamachisqankunaqa, imaynatachus nirqan, chay hinatapuni tarirqanku.
[33] Asnochata paskashaqtinkutaq, asnoyoqkunaqa paykunata nirqanku: ―¿Imapaqmi chay asnochata paskashankichis? nispanku.
[34] Kamachisqankunataq nirqanku: ―Señormi nesesitashan, nispanku.
[35] Hinan Jesusman aysamuspanku, p'achankuwan qataykuspa, Jesusta asnochaman sillaykuchirqanku.
[36] Jesús rishaqtintaq, ñan pataman p'achankuta mast'arqanku.
[37] Olibos nisqa orqomanta urayamunamanmi Jesusqa chayasharqanña. Hinan atiywan tukuy imaymana musphana ruwaykunata rikusqankurayku, chay llapan askha yachachisqankunaqa kusikuymanta kunkayoqta Diosta yupaychayta qallarirqanku.
[38] Nirqankutaq: ―¡Señorpa sutinpi hamuq Reyqa, saminchasqa kachun! ¡Hanaq pachapi thak kay kachun, Hanaqkunapipas yupaychay kachun! nispanku. (Sal. 118:26)
[39] Hinan wakin fariseokunaqa, askha runakuna chawpimanta Jesusta nimurqanku: ―Yachachikuq, yachachisqaykikunata phiñarikuy, nispanku.
[40] Kutichispantaq Jesusqa paykunata nirqan: ―Niykichismi: ‘Sichus paykuna upallakunkuman chayqa, rumikunan qaparinkuman,’ nispay, nispa.
[41] Llaqtaman qayllaykushaspantaqmi, chay llaqtata qhawarispa waqarqan.
[42] Nirqantaq: ―Sichus kay p'unchaynillaykipipas thak kayniykipaq kaqta reqsiwaq chayqa, manan kunanqa ñawiykikunamanta pakasqachu kashanman.
[43] Awqaykikunaq muyuykusqan kanayki p'unchaykunan chayamunqa. Muyuriqmantan muyuykusunkiku, hinallataq llapan ladomanta k'iskichaykusunkiku.
[44] Qespichiqniyki hamushaqtinmi mana chaskirqankichu. Chayraykun, pampakamaraq thunisunkiku, wawaykikunatataq wañuchinqaku. Hinallataqmi rumipas, rumi patapi mana qanpiqa qhepanqachu, nispa.
[45] Dios yupaychana wasiman haykuspantaqmi, Jesusqa chaypi qhatuqkunata, hinallataq rantiqkunata hawaman qarqoyta qallarirqan.
[46] Hinan paykunata nirqan: ―Qelqasqan kashan: ‘Ñoqaq wasiyqa, Diosman parlana wasin,’ nispa. (Isa. 56:7) Qelqaqa nillantaqmi: ‘Qankunataq ichaqa, suwakunaq mach'ayninman tukurachisqankichis,’ nispan, nispa. (Jer. 7:11)
[47] Sapa p'unchaymi Jesusqa, Dios yuspaychana wasipi yachachisharqan. Ichaqa, umalliq saserdotekunapas, kamachikuy simita yachachiqkunapas, llaqta umalliq runakunapas paytaqa wañuchiytapunin munasharqanku.
[48] Llaqtantin runakunaqa ancha yuyaywanmi uyarisharqanku. Chayraykun mana ima ruwaytapas atisharqankuchu.