[1] Chay hina kaqtinmi, sábado p'uchaypi Jesusqa fariseokunaq umalliqninkuq wasinman mikhuq haykurqan. Hinan paykunaqa, makillapuni payta qhamiyasharqanku.
[2] Hinallamanmi, Jesuspa ñawpaqenpi punkillisqa huk runa kasharqan.
[3] Hinan Jesusqa kamachikuy simita sut'inchaqkunata, fariseokunatawan rimaykuspa nirqan: ―¿Kamachikuy Simiman hina, sábado p'unchaypi, qhaliyachiyri atikunmanchu? nispa.
[4] Paykunataqmi ichaqa, upallalla karqanku. Hinan Jesusqa, punkillisqa runata hap'iykuspa, qhaliyachirqan. Hinamantataq kacharparipurqan.
[5] Paykunatataq nirqan: ―Sichus qankunaq wawaykichis, otaq toroykichis sábado p'uchaypi huk t'oqoman urmaykun chayqa, ¿manachu usqhayllaman horqomunkichis? nispa.
[6] Chay imaymanakuna nisqanmantaqmi mana kutichiyta atirqankuchu.
[7] Mikhunankupaq waqyasqakuna, mesaman tiyaykunankupaq, imaynatachus ñawpaq kaq tiyanakunata akllasqankutan Jesusqa qhawasharqan. Hinan huk rikch'anachiyta paykunaman rimaykurqan.
[8] Nirqantaq: ―Pipas kasarakuy fiestaman waqyachisunki chayqa, aman ñawpaq kaq tiyanapiqa tiyaykunkichu. Paqtan, qanmanta aswan reqsisqa waqyachisqan runa kashanman.
[9] Hinan waqyachimuqniykiqa, huk kaq waqyachimusqanta rikuruspa nisunkiman: ‘Tiyanaykita payman qoy,’ nispa. Hinaqtintaq p'enqasqa, qhepa kaq tiyanaman rispa tiyawaq.
[10] Maypachachus fiestaman waqyachisunki chayqa, riy, hinaspa qhepa kaq tiyanallapi tiyaykunki. Chay hinapin, waqyachimuqniykiqa hamuspan nisunki: ‘Amigoy, ñawpaqman pasaykamuy,’ nispa. Hinaqtinmi mesaman tiyaykuqmasiykikunaq hatunchasqan kanki.
[11] Pipas hatunchakuqqa, huch'uyachisqan kanqa. Huch'uyaykukuqtaqmi ichaqa, hatunchasqa kanqa, nispa.
[12] Chay fiestaman waqyachimuqtataqmi, nillarqantaq: ―Mikhunata, otaq senata wakichinki chayqa, aman amigoykikunatachu, nitaq wawqe-panaykikunatachu, nitaq familiaykikunatachu, nillataq qhapaq wasimasiykikunatapaschu waqyachimunki. Mana hinaqa, paykunapas waqyachimullasunkikumantaqmi hinan ayni kutichisqaña kapuwaq.
[13] Ichaqa, maypachachus hatun mikhuna fiestata wakichinki chayqa, wakchakunata, ñuk'ukunata, wist'ukunata, ñawsakunata ima waqyachimunki.
[14] Paykunaqa, manan kutichipuyta atisunkiku manchu. Chanin runakunaq kawsarimpuynin p'uchaypin ichaqa, kutichipusqa kanki. Chayraykun, kusisamiyoqqa kanki, nispa.
[15] Chayta uyarispantaqmi, mesapi tiyashaqkunamanta hukninku, Jesusta nirqan: ―¡Diospa qhapaq suyunpi mikhunata mikhuqmi kusisamiyoqqa kanqa! nispa.
[16] Jesustaq ichaqa, payta nirqan: ―Huk runan, hatun mikhuna fiestata wakichirqan. Hinaspataq askhata waqyamurqan.
[17] Mikhuna oras chayamuqtintaq, waqyamusqankunata nimunanpaq kamachinta kacharqan: ‘Llapanmi wakichisqaña kashan, chayrayku hamuychis,’ nispa nimuychis.
[18] Hinan llapallanku mana hamuyta munaspanku, niyta qallarirqanku. Ñawpaq kaqmi nirqan: ‘Huk chakratan rantirukuni, chaytaraq qhawaq rirqosaq. Chaymi pampachaykuwanaykipaq balikuyki,’ nispan.
[19] Huk kaqtaq nirqan: ‘Phisqa masa torokunatan rantirukuni. Yapunchus, icha manachus, chayta yachaqraqmi rinay kashan. Chaymi pampachaykuwanaykipaq balikuyki,’ nispan.
[20] Huk kaqñataq nirqan: ‘Chayllaraqmi kasararukuni, chaymi mana riyta atiymanchu,’ nispan.
[21] Hinan chay kamachiqa kutimuspan, lliw chaykunata wasiyoq patronninman willarqan. Hinaqtinmi patronqa, kamachinta phiñasqa nirqan: ‘Usqhaylla llaqta kallekunaman, hinallataq plasakunaman rispayki, wakchakunata, ñuk'ukunata, ñawsakunata, wist'ukunata ima pusamuy,’ nispa.
[22] Chaymantataqmi, kamachiqa nirqan: ‘Patronniy, kamachikusqaykita hinapunin ruwarqani. Kampotaqmi ichaqa, kashanraq,’ nispa.
[23] Hinan patronqa, kamachinta nirqan: ‘Wasiy hunt'a kananpaq, ñan patakunaman, hinallataq kallekunaman rispayki, runakunata pusaykamuy,’ nispa.
[24] Niykichismi: ‘Manan mayqen kaqpas chay waqyamusqay runakunamantaqa mikhunayta mallinqakuchu,’ nispay, nispa.
[25] Ancha askha runakunan, Jesuswan risharqanku. Hinan payqa, chay ancha askha runakunaman kutirirqan.
[26] Nirqantaq: ―Sichus pillapas ñoqaman hamuspa, taytantapas, maman tapas, esposantapas, wawankunatapas, wawqenkunatapas, panankunatapas hinallataq kikin kawsaynintawanpas manataq cheqnikunmanchu chayqa, manan yachachisqay kaytaqa atinmanchu.
[27] Hinallataq, pipas krusninta apaspa, qhepayta mana hamuqqa, manallataqmi yachachisqay kayta atinmanchu.
[28] Qankunamanta mayqenniykichispas, huk torreta hatarichiyta munanmanmi. Sichus chay hina kanman chayqa, ¿manachu ñawpaqtaraq tiyaykuspa, gastunkuna tukunanpaq kashanchus, icha manachus, chayta tantiyaykukun?
[29] Mana hinaqa, teqsita churaspa, mana perqayta tukuqtinmi, lliw rikuqkuna payta asipayankuman.
[30] Ninkumantaq: ‘Kay runaqa, perqayta qallarin, manataqmi ichaqa, tukuyta atinchu,’ nispankun.
[31] Huk rey, wak reypa kontranpi awqa tinkuq lloqsinmanmi. Payqa chunka waranqa soldadokunallayoqmi kashan. Awqantaqmi ichaqa, iskay chunka waranqa soldadokunayoq hamushan. Sichus chay hina kanman chayqa, ¿llalliyta atinmanchus, icha manachus, chayta tiyaykuspa, manachu yuyaymanarinman?
[32] Mana atiqpaq hina kaspantaq, chay awqan karullataraq hamushaqtin, payqa willaqkunata thak kayta mañamunankupaq kachanqa.
[33] Chay hinaqa, qankunamanta mayqenniykichispas, llapan imaymana kaqninkunata mana saqepunmanchu chayqa, manan yachachisqay kayta atinmanchu.
[34] Kachiqa allinmi. Ichaqa, kachitaqchus q'aymayarapunman chayqa, ¿imawantaq kachichakunmanri?
[35] Manan pampaman hich'anapaqpas, nitaq wanuchanapaqpas balinñachu. Chaymi hawaman hich'apunku. Pipas uyariq ninriyoq kan chayqa, uyarichun, nispa.