[1] Chay tiempollapitaqmi, wakin runakunaqa chaypi kasharqanku. Hinan Galilea probinsiayoq runakunaq yawarninkuta, sakrifisio yawarwan Pilatoq chhaqrusqanmanta Jesusman willasharqanku.
[2] Hinan Jesusqa kutichispa, paykunata nirqan: ―¿Chay Galilea probinsiayoq runakunata chay hina pasasqanraykuchu, llapan Galilea probinsiayoq runakunamanta aswan huchasapa kasqankuta yuyaykushankichis?
[3] Niykichismi: ‘Manan. Aswanpas, sichus mana yuyayman kutirikunkichischu chayqa, llapallaykichismi, chay hinallatataq wañunkichis,’ nispay.
[4] Siloé torre urmaykuspan, chunka pusaqniyoq runakunata wañuchirqan. ¿Chay wañusqakuna, llapan Jerusalén llaqtapi tiyaq runakunamanta aswan huchasapa kasqankutachu yuyaykushankichis?
[5] Niykichismi: ‘Manan. Aswanpas, sichus mana yuyayman kutirikunkichischu chayqa, llapallaykichismi, chay hinallatataq wañunkichis,’ nispay, nispa.
[6] Hinan Jesusqa, kay rikch'anachiyta nirqan: ―Huk runan, chakranpi igosta tarpusqa karqan. Rurusqanta maskhaq rispantaqmi, mana ima rurutapas tarirqanchu.
[7] Hinan chakran llank'aqta nirqan: ‘Qhawariy, kinsa watañan kay igos sach'aq rurusqanta maskhaq hamurqani. Ichaqa manataqmi rurusqanta tarirqanichu. Chay hinaqa, hallp'atapas ama sayk'uchishananpaq, wit'urapuy,’ nispan.
[8] Hinan llank'aqninqa kutichispa nirqan: ‘Wiraqochay, kay watatawan saqellayraq. Ñoqañan sach'aq muyuriqninta hasp'iruspay, wanuta churarusaq.
[9] Sichus rurunqa chayqa, allin kanqa. Sitaqchus mana rurunqapunichu chayña, wit'upunki,’ nispan, nispa.
[10] Sábado p'unchaypin, Jesusqa, judío runakunaq huñukunanku wasipi yachachisharqan.
[11] Chayllamanmi, chunka pusaqniyoq wataña onqoy espirituyoq huk warmi chaypi kasharqan. Payqa, k'umuykuspanmi purirqan. Manataqmi imaynanmantapas rektotaqa sayariyta atirqanñachu.
[12] Rikuruspantaqmi, Jesusqa payta waqyaspa nirqan: ―Warmi, onqoyniykimantaqa qhaliyachisqañan kanki, nispa.
[13] Hinan makinta paypa patanman churaykurqan. Kasqan ratupachataqmi, rektota sayaripuspan, Diosta yupaycharqan.
[14] Judío runakunaq huñukunanku wasipi umalliq runaqa, Jesuspa sábado p'unchaypi qhaliyachisqanmanta phiñakuspanmi, runakunata nirqan: ―Llank'anapaqqa, soqta p'unchaymi kan. Chayrayku, chay p'unchaykunapi qhaliyachinasunkichispaqqa hamuychis. Amataq sábado p'uchaypiqa hamuychischu, nispa.
[15] Hinan kutichispa, Señorqa payta nirqan: ―¡Iskay-uyakuna! ¿Manachu qankunapas sapankaykichis wakaykichistapas, otaq asnoykichistapas uywa qaranamanta paskaraspa, unu ukyaqta apankichis?
[16] Kay warmitaqmi, Abrahampa ususin kashaspa, qhawariy, chunka pusaqniyoq wataña onqoywan Satanaspa watasqan kasharqan. ¿Manachu chay watasqamanta sábado p'unchaypi paskarayta atikun? nispa.
[17] Jesusqa, chay imaymanakunata niqtintaq, llapan awqankunaqa p'enqasqa karqanku. Tukuy chay musphana ruway ruwasqanmantataqmi ichaqa, llaqtantin runakunaqa q'ochukurqanku.
[18] Hinan Jesusqa nirqan: ―¿Diospa qhapaq suyunqa, imamantaq rikch'akun? ¿Imawantaq wakichachisaqri?
[19] Mostasa muhumanmi rikch'akun. Chaytan huk runaqa hap'ispa, wertanpi tarpurqan. Hinan wiñaspa hatun mallkiman tukurqan. Hinaqtinmi phalaq animalkunapas k'allmankunapi q'esachakurqanku, nispa.
[20] Wakmantan Jesusqa nillarqantaq: ―¿Diospa qhapaq suyuntari imawantaq wakichachisaq?
[21] Huk warmin lebadurata hap'ispa, kinsa tupu hak'uman llapanta poqochinankama p'amparqan. Chaymanmi, hanaq pacha qhapaq suyuqa rikch'akun, nispa.
[22] Jerusalén llaqtaman rishaspanmi, llaqtakuna chawpinta, hinallataq llaqta kantukuna chawpinta yachachispa, Jesusqa pasasharqan.
[23] Hinaqtinmi, huk runa Jesusta nirqan: ―Señor, ¿pisillachu qespisqa kaqkunaqa kanku? nispa.
[24] Jesustaq payta nirqan: ―K'illku punkunta haykunaykichispaq kallpachakuychis. Niykichismi: ‘Askhan haykuyta munanqaku, manataqmi atinqakuchu,’ nispay.
[25] Wasiyoq wiraqocha sayarispan, punkuta wisq'apuqtinmi, qankunaqa punkuta takakuspa hawamanta waqyakuyta qallarinkichis: ‘¡Señor, Señor, punkuta kicharimuwayku!’ nispaykichis. Paytaqmi ichaqa, kutichimuspa nimusunkichis: ‘Maymantachá kakunkichispas, manapunin reqsiykichischu,’ nispan.
[26] Hinaqtinmi, kay hina niyta qallarinkichis: ‘Qanpa ñawpaqeykipin mikhurqaykupas, ukyarqaykupas. Plasaykupitaqmi yachachirqankipas,’ nispaykichis.
[27] Ichaqa, kay hinatataqmi nimusunkichis: ‘Maymantachá kakunkichispas, manapunin reqsiykichischu. ¡Mana allin ruwaqkuna, llapaykichis ñoqamanta anchhuriychis!’ nispan.
[28] Abrahamta, Isaakta, Jakobta, hinallataq llapan Diospa rantinpi rimaqkunatan, Diospa qhapaq suyunpi rikunkichis. Qankunataqmi ichaqa, hawaman wikch'usqa kankichis. Chaypitaqmi qankunapaqqa waqaypas, kiru k'arkakichiypas kanqa.
[29] Wichay ladomantapas, uray ladomantapas, inti lloqsimuy ladomantapas, hinallataq inti haykuy ladomantapas hamuspankun, Diospa qhapaq suyunpa mesanpi tiyaykunqaku.
[30] Qhawariychis, qhepa kaqkunan, ñawpaqpi kanqaku. Ñawpaq kaqkunataqmi, qhepapi kanqaku, nispa.
[31] Kasqan p'unchaymi, wakin fariseokunaqa chayamuspa, Jesusta nirqanku: ―Herodesmi wañuchiyta munashasunki. Chayrayku, kaymanta lloqsiy, hinaspa ripuy, nispanku.
[32] Hinan paykunata nirqan: ―Riychis, hinaspataq chay atoqman nimuychis: ‘Qhawariy, kunan p'unchaytawan, paqarintawanmi supaykunata qarqoshani, onqosqakunata qhaliyachishani. Minchha p'uchaypitaqmi ruwanaykunata tukupusaq,’ nispaykichis, nispa.
[33] Chaywanpas, huk Diospa rantinpi rimaqqa manan huk lado llaqtapi wañunmanchu. Aswanpas, Jerusalén llaqtallapipunin wañunanqa. Chayraykun kunanpas, paqarinpas, minchha p'unchaypas ñanniytaqa purinallaypuni kashan.
[34] ¡Jerusalén, Jerusalén, Diospa rantinpi rimaqkunatan wañuchinki! ¡Hinallataq, qanman kachamusqaykunatan rumiwan ch'aqenki! ¡Imaynan wallpapas, raphran ukhupi chiwchinkunata huñuykun, chay hinatan, askha kutita qanpa wawaykikunata huñuykuyta munarqani! ¡Ichaqa, manataqmi munarqankichu!
[35] Qhawariychis, wasiykichismi wikch'usqa purunyapunqa. Niykichismi: ‘Huk p'unchaymi ninkichis: “Señorpa sutinpi hamuqqa saminchasqapuni kachun,” nispaykichis. Chay p'unchay chayamunankamataqmi, manaña rikuwankichisñachu,’ nispay, nispa.