[1] Jesusmi yachachisqankunata nillarqantaq: ―Huk qhapaq runaqmi mayordomon kapurqan. Chay mayordomon, patronninpa ñawpaqenpi kaqninkunata q'aruchaqmanta tumpasqa karqan.
[2] Hinan patronninqa payta waqyaspa nirqan: ‘¿Imatataq qanmanta kaytari uyarishani? Manañan mayordomuy kaytaqa atiwaqñachu. Chayrayku mayordomo kayniykimanta kuentata qoway,’ nispa.
[3] Hinan chay mayordomoqa pay kikinta nikurqan: ‘Patronniy mayordomo kayniyta qechurapuwaqtinqa, chakrapi llank'apakunaypaq kallpaymi mana kapuwanñachu. Hinallataq mañapakuytapas p'enqakunin. Chayrayku, ¿imatataq ruwasaqri?
[4] Mayordomo kayniymanta wikch'upuwaqtinqa, wakin runakuna wasinkupi chaskiwanankupaq, imatachus ruwaytaqa yuyayurukuniñan,’ nispan.
[5] Hinan patronninpa sapanka manunkunata waqyarqan. Ñawpaq kaqtataq nirqan: ‘¿Patronniymanri, hayk'ataq manu kashanki?’ nispa.
[6] Paytaq nirqan: ‘Pachak tumin aseitin,’ nispa. Hinan payta nirqan: ‘Qelqa ruwasqaykichista hap'iy, hinaspa tiyaykuspayki usqhaylla phisqa chunkallataña qelqayuruy,’ nispa.
[7] Chaymantataq huk kaqtapas nillarqantaq: ‘¿Qanri hayk'a manutaq kashanki?’ nispa. Paytaq chay mayordomota nirqan: ‘Pachak tupu trigon,’ nispan. Hinan chay mayordomoqa payta nirqan: ‘Qelqa ruwasqaykichista hap'iy, hinaspa, pusaq chunkallataña qelqayuruy,’ nispa.
[8] K'anchay wawakunamantaqa, kay pacha runa-miraypa wawankunan aswan yuyaysapa kanku. Chayraykun, chay mana chanin mayordomota, yuyaysapa kayninwan ruwasqanmanta, patronninqa hatuncharqan.
[9] Ñoqataqmi ichaqa, niykichis: ‘Chay mana chanin qhapaq kaykunawan amigokunata tariychis. Chay hinapin, qankuna pisichikuqtiykichis, paykuna wiñay tiyanakunapi chaskiykusunkichis,’ nispay.
[10] Sinchi pisi kaqllapi hunt'aqqa, askhapipas hunt'aqllataqmi. Hinallataq sinchi pisi kaqllapi mana chaninqa, manallataqmi askha kaqpipas chaninllataqqa kanmanchu.
[11] Chay hinaqa, mana chanin qhapaq kaykunapi manataq hunt'ankichischu chayqa, ¿pitaq cheqaq kaqtari hap'ichisunkichisman?
[12] Sichus hukpa kaqninkunapi mana hunt'aqchu kankichis chayqa, ¿pitaq paypa kaqninkunatari qosunkichisman?
[13] Manan pi kamachipas iskay patronkunataqa serbiyta atinmanchu. Huknintan munakunman, huk kaqtataq cheqnikunman. Otaq, huknintan allinpaq hap'inman, huk kaqtataq pisinchanman. Chayraykun, Diostawan, qhapaq kaytawanqa mana serbiyta atiwaqchischu, nispa.
[14] Qolqe sonqo fariseokunataqmi ichaqa, Jesuspa tukuy chay imaymanakuna rimasqanta uyarispa, asipayarqanku.
[15] Jesustaq paykunata nirqan: ―Runakunaq ñawpaqenpi sumaq rikch'ayniyoq kaqqa, Diospa ñawpaqenpiqa sinchi millakuymi. Chayraykun qankunaqa, runakunaq ñawpaqellanpi chaninman tukuq kankichis. Diosmi ichaqa, sonqoykichista reqsin, nispa.
[16] Jesusqa nillarqantaqmi: ―Kamachikuy Simipas, hinallataq Diospa rantinpi rimaqkunapas Bautisaq Juankamallan karqanku. Chaymantapachataqmi, Diospa qhapaq suyunmanta allin willakuytaqa willakushanku. Hinan llapallan runakunaqa chayman haykunankupaq kallpachakushanku.
[17] Ichaqa Kamachikuy Simimantaqa huch'uy seq'echallanpas yanqayananmantaqa, hanaq pachaq, hinallataq hallp'a pachaq tukukuyninmi aswan fasilchallaqa kanman, nispa.
[18] Nillarqantaqmi: ―Pipas warminwan t'aqanakuspa, huk warmiwan kasarakun chayqa, wasanchanmi. Hinallataq qosanpa wikch'usqan warmiwan kasarakuqpas wasanchallantaqmi, nispa.
[19] Jesusqa nillarqantaqmi: ―Huk qhapaq runan karqan. Paymi sani-puka p'achawan, hinallataq ancha balorniyoq p'achakunawanpas p'achakurqan. Sapa p'unchaytaqmi, hatun mikhuna fiestakunallata ruwaq.
[20] Hinan huk Lázaro sutiyoq wakcha runapas kallarqantaq. Paymi qhapaqpa wasin hatun punkupi lliqnishaq k'iriyoq wikch'urparisqa kasharqan.
[21] Paytaq, qhapaqpa mesanmanta urmamuq ususqa mikhunakunawan saksaykuyta munasharqan. Alqokunataqmi hamuspa, paypa lliqnishaq k'irinta llaqwarqan.
[22] Hinallamanmi, wakcha runaqa wañukapurqan. Hinan angelkuna, Abrahampa marq'ayninman apapurqanku. Qhapaq runapas wañukapullarqantaqmi. Hinan p'ampasqa karqan.
[23] Qhapaq runataq, Hadespi ñak'arispa kasharqan. Karumanta qhawarispataq, Abrahamta rikurqan. Hinallataq Lazarotapas, Abrahampa marq'ayninpi rikullarqantaq.
[24] Hinan qhapaq runaqa, kunkayoqta waqyakuspa, nirqan: ‘Taytay Abraham, yanapaykuway. Kay nina yawray ñak'ariypin kashani. Chayrayku, Lazarota dedonpa puntallantapas unuman challpuykuspa, qalluyman sut'uykachimuwananpaq kamachiy,’ nispa.
[25] Abrahamtaq nirqan: ‘Waway, qhapaq kaykunatan kawsasqayki p'unchaykunapi chaskirqanki. Hinallataq Lazaropas mana allinkunata chaskirqan. Chaykunata yuyariy. Kunantaqmi payqa, kusichisqa kashan. Qantaq ichaqa, ñak'ariypi kashanki.
[26] Tukuy chaykunamantapas aswantaqa, huk tutayaq ukhu wayq'on qankunamanta ñoqaykuta t'aqawananchispaq churasqa kashan. Hinan kaymanta qankunaman hamuy munaqkunaqa, mana chimpamuyta atinkumanchu. Nitaq chaymanta kaymanpas chimpamuyta atimullankumantaqchu.’ nispa.
[27] Chay qhapaq runataq nirqan: ‘Taytay Abraham, ñoqaq taytaypa wasinman Lazarota kachanaykipaqmi balikuyki.
[28] Ñoqaqa phisqa wawqeyoqmi kani. Paykunapas amaña kay ñak'arina cheqasman hamunankupaq, Lazarota willamunanpaq kamachiy’ nispa.
[29] Abrahamtaq nirqan: ‘Moisespa, hinallataq Diospa rantinpi rimaqkunaq qelqasqankutapas paykunaqa hap'ishankun. ¡Chaykunatayá kasukuchunku!’ nispa.
[30] Hinan chay qhapaq runaqa nillarqantaq: ‘Manan taytay Abraham. Aswanpas, sichus mayqenpas wañusqakunamanta rinqa chayqa, yuyaymanqa kutirikunqakupunin,’ nispa.
[31] Abrahamtaq ichaqa, payta nirqan: ‘Sichus Moisespa, hinallataq Diospa rantinpi rimaqkunaq qelqasqankutapas mana kasukunqakuchu chayqa, pillapas wañusqankunamantaña riqtinkupas manallataqmi kasukunkumanchu,’ nispan, nispa.