[1] Askha runakunan ñoqayku ukhupi imaymanakunaqa, cheqaqpuni kasqanta kantullanmanta qelqayta munarqanku.
[2] Qallariymantapacha, rikuq kaqkunan ñoqaykumanpas willawarqanku. Paykunaqa, kikin ñawinkuwan rikuqkuna, hinallataq simitapas willaqkunan kanku. Paykunaq willawasqankuman hinataqmi, qelqani.
[3] Ñoqapas, qallariymantapacha, tukuy imakunachus kasqanta allin yuyaywanmi tapupakurqani. Chayraykun, ancha respetana yaw Teófilo, ñoqamanpas kaykunata kantullanmanta qelqamuyniyqa allinpuni rikch'akuwarqan.
[4] Imakunatachus yachachirqasunkiku, chay cheqaq kaqkunata allinta reqsinaykipaqmi qelqamuyki.
[5] Judea probinsiapi, rey Herodes kamachikushasqan p'unchaykunapitaqmi, huk saserdote Zakarías sutiyoq karqan. Payqa, Abiaspa t'aqanmantan karqan. Esposantaqmi, Aaronpa ususinkunamanta miramuq Elisabet sutiyoq karqan.
[6] Iskayninkupas Diospa ñawpaqenpi chaninpunin karqanku. Señorpa tukuy kamachikuyninkunapipas, hinallataq kamachisqa kasukuykunapipas mana imamanta huchachanatan kawsarqanku.
[7] Elisabetqa, mana wachakuqmi karqan. Hinallataq iskayninkupas yuyaqñan karqanku. Chayraykun, mana wawayoq karqanku.
[8] Hinan Diospa ñawpaqenpi Zakariasqa, t'aqan saserdoteq ruwanan tupamuqtin, payqa chay ruwananta ruwasharqan.
[9] Hinan saserdotekunaq ruwayninkuman hina, insiensota ruphachimunanpaq sortiasqa karqan. Chaymi Señorpa t'aqasqa cheqasninman haykurqan.
[10] Insiensota ruphachina orastataqmi, llaqtantin llapan runakunaqa, hawa patiopi Diosman parlaspa kasharqanku.
[11] Hinan insiensota ruphachina altarpa paña ladonpi Señorpa angelninqa sayaykuspa Zakariasman rikhurirqan.
[12] Angelta rikuruspantaqmi, Zakariasqa muspharisqa, hinallataq sinchi mancharisqa kasharqan.
[13] Angeltaq ichaqa, payta nirqan: ―¡Zakarías, Diosmi mañakusqaykita uyarisunki! Chayrayku ama mancharikuychu. Esposayki Elisabetmi, qhari wawata wachakunqa, hinan Juan sutiwan sutichanki.
[14] Qanpaqtaqmi q'ochukuy, hinallataq kusikuy kanqa. Nasemusqanwantaqmi askha runakuna q'ochukunqaku.
[15] Paymi, Señorpa ñawpaqenpi hatun kanqa. Manan hayk'aqpas binotaqa, nitaq ima machana kaqtapas ukyanqachu. Mamanpa wiksanmantapacharaqmi, Santo Espirituwan hunt'aykusqa kanqa.
[16] Israel llaqtaq askha wawankunatataqmi, Señor Diosninkuman kutirichinqa.
[17] Juan kikintaqmi Señorpa ñawpaqenta Eliaspa espiritunwan, hinallataq atiyninwan rinqa. Tayta-mamakunaq sonqontapas wawankuman kutirichinanpaqmi rinqa. Hinallataqmi mana kasukuqkunaq sonqonkutapas chanin runakunaq yuyayninkuman kutirichinanpaq rillanqataq. Chay hinapin, Señorta chaskinankupaq llaqtanta wakichinqa, nispa.
[18] Zakariastaq angelta nirqan: ―Ñoqaqa machuñan kani, hinallataq esposaypas yuyaqñan kallantaq. Chayrayku, ¿imaynapitaq kay niwasqaykitari yachasaq? nispa.
[19] Angeltaqmi Zakariasman kutichispa nirqan: ―Ñoqaqa, Diospa ñawpaqenpi kashaq Gabrielmi kani. Qanmanmi rimaykunaypaq, hinallataq kay allin willakuyta willanaypaq Diosqa kachamuwarqan.
[20] Qhawariy, qanqa kay rimaykusqay simikunatan mana kreenkichu. Kaykunaqa, tiemponpin hunt'akunqa. Chayraykun, upaman tukupunki, hinallataq kay rimaykusqay hunt'akunankama, mana rimay atiq kapunki, nispa.
[21] Llaqtantin runataq, Zakariasta suyasharqanku. Hinan t'aqasqa cheqasmanta mana rikhurimusqanrayku yuyayninkupi mana kabesqa kasharqanku.
[22] Lloqsimuspantaqmi ichaqa, paykunata mana rimaykuyta atirqanchu. Chaymi t'aqasqa cheqaspi rikhuriy rikumusqanta paykunaqa repararqanku. Zakariastaqmi, señaschaspallaña runakunata rimapayarqan, hinan upayasqa qhepakapurqan.
[23] Chay hina kaqtinmi, Diosta serbinan p'unchaykuna hunt'akuqtin, Zakariasqa wasinman ripurqan.
[24] Chay p'unchaykuna qhepatataq, esposan Elisabetqa wiksallikapurqan. Hinan phisqa killata wasillapi pakakurqan.
[25] Nirqantaq: ―Runakunaq p'enqawasqanta upallachinanpaqmi, kay p'unchaykunapi Señorqa kay hinata uyariykuwaspa ruwawarqan, nispa.
[26] Soqta kaq killapitaq, Galilea probinsiapi Nazaret llaqtaman Diosqa angelnin Gabrielta kacharqan.
[27] Davidpa mirayninmanta José sutiyoq runawan kasarakunanpaq rimaykusqaña kashaq, huk donsella sipasmanmi kacharqan. Chay donsella sipaspa sutintaqmi, María karqan.
[28] Sipaspa kasqanman haykuspantaqmi, angelqa nirqan: ―¡Napaykuyki! ¡Qanqa warmikunamanta Diospa ancha saminchasqanmi kanki! Señorqa qanwanpunin kashan, nispan.
[29] Paytaq ichaqa, angelta rikuruspa, rimarisqanwan mancharikurqan. Hinan yuyayninpi nirqan: ―¿Imayna napaykukuytaq kayri? nispa.
[30] Hinaqtinmi angelqa payta nirqan: ―Diosmi allinpaq qokuyninwan qhawarisunki. Chayrayku, ¡María, ama mancharikuychu!
[31] Qhawariy, wiksallikuspan, huk qhari wawata wachakunki. Hinan Jesús sutiwan sutichanki.
[32] Payqa, allinpaq qhawarisqan kanqa. Hinallataqmi, Ancha Hatunchasqa Diospa Churin nispa sutichasqa kanqa. Taytan Davidpa chaninchana tiyanantataqmi, Señor Diosqa qopunqa.
[33] Hinan Jakobpa mirayninpi wiñaypaq kamachikunqa. Kamachikuynintaqmi mana tukukuq kanqa, nispa.
[34] Hinaqtinmi Mariaqa, angelta nirqan: ―Ñoqaqa, manan qharita reqsinichu. Chay hinaqa, ¿imaynataq chayri kanman? nispa.
[35] Kutichispantaq, angelqa payta nirqan: ―Santo Espíritun qanman hamunqa. Hinan Ancha Hatunchasqa Diospa atiynin qanta llanthuykusunki. Chaymi Diospaq T'aqasqa naseq Wawaqa, Diospa Churin nispa sutichasqa kanqa.
[36] Qhawariy, familiayki Elisabetpas yuyaq kayninpiñan huk qhari wawata wiksallikun. Chay mana wachakuq warmi nisqankuq, wiksallikusqantaqmi ichaqa, soqta killaña kashan.
[37] Diospaqqa manapunin imapas mana atikuq kanchu, nispa.
[38] Hinaqtinmi Mariaqa nirqan: ―Qhawariy, Señorpa kamachin warmiqa, kaypin kashani. Qanpa nisqaykiman hinapuni ñoqawan ruwakuchun, nispa. Hinan Maríaq qayllanmanta angelqa ripurqan.
[39] Chay p'unchaykunapin Mariaqa, sayarispan, Judea probinsiapi kashaq orqo-orqo chawpipi huk llaqtaman usqhaylla rirqan.
[40] Zakariaspa wasinman haykuspataq, Elisabetta napaykurqan.
[41] Chay hina kaqtinmi, Maríaq napaykuyninta Elisabet uyariqtin hina, wawaqa wiksanpi ‘wat'ak’ nirqan. Santo Espiritutaqmi, Elisabetman hunt'aykurqan.
[42] Hinan Elisabetqa, kunkayoqta nirqan: ―¡Qanqa warmikunapurapi saminchasqan kanki! ¡Wiksaykimanta nasemuq wawapas, saminchasqallataqmi kanqa!
[43] ¿Imaynapitaq Señorniypa mamanri ñoqaman hamuwan?
[44] Qhawariy, napaykuwasqaykita uyariqtiy hinan, wawaqa kusikuymanta wiksaypi ‘wat'ak’ nirqon.
[45] Señorpa nisqanqa hunt'akunqapunin. Chayraykun chayta kreeqqa, kusisamiyoq kanqa, nispa.
[46] Hinan Mariaqa nirqan: ―Almaymi Señorta hatunchan.
[47] Espirituytaqmi, Qespichiqniy Diospi q'ochukun.
[48] Wakcha kamachi warmitan Diosqa qhawariwan. Chayrayku qhawariychis, kunanmantaqa llapan runamiraykunan ‘kusisamiyoqmi kanki,’ nispa niwanqaku.
[49] Hatun imaymanakunatan Atiyniyoqqa ñoqapaq ruwarqan. Sutinpas ch'uyapunitaqmi.
[50] Diosta manchakuqkunapaqqa, yanapaykuyninpas runamiraymanta, runa-miraykamaraqmi.
[51] Makinwanmi atiywan ruwaykunata ruwarqan. Hinallataq sonqonkupi yuyaykuspa, anchaykachaqkunatapas ch'eqechirqanmi.
[52] Atiyniyoqkunatan kamachikuq tiyanankumanta wikch'upurqan. Huch'uyaykukuqkunatataqmi, altoman hoqarirqan.
[53] Yarqachikuqkunamanmi, allin kaqkunawan hunt'aykurqan. Qhapaqkunatataqmi, mana imayoqta kacharparipurqan.
[54] Yanapakuyninmanta yuyarispanmi, kamachin Israelta yanaparqan.
[55] Chay hinatan Abrahamman, hinallataq mirayninkunamanpas wiñaypaq rimaykurqan. Paykunaqa, machulanchiskunan kanku, nispa.
[56] Hinan Mariaqa, Elisabetwan kinsa killa hina qhepakurqan. Chaymantataq wasinman kutipurqan.
[57] Elisabetpa wachakunan tiempo hunt'akuqtintaqmi, payqa huk qhari wawata wachakurqan.
[58] Wasimasinkuna, hinallataq ayllunkunapas Elisabetpaq Señorqa hatun yanapakuynin qosqanta uyarispankun, paywan kuska q'ochukurqanku.
[59] Chay hina kaqtinmi, pusaq p'unchaymanta wawata sirkunsidanankupaq runakuna chayamurqanku. Hinaspataqmi taytan Zakariaspa sutinwan suticharqanku.
[60] Mamantaqmi kutichispa nirqan: ―¡Manan! Aswanpas sutinqa Juanmi kanqa, nispa.
[61] Hinan Elisabetta nirqanku: ―Manamá pipas aylluyki ukhupi chay hina sutiyoqqa kanchu, nispanku.
[62] Taytantataqmi, mayqen sutiwanchus wawanta sutichay munasqanta señaschaspalla tapurqanku.
[63] Hinan Zakariasqa, qelqananpaq huk tablachata mañakuspan, chaypi qelqarqan: ―Juanmi sutinqa kanqa, nispan. Chaytaqmi llapankuq yuyayninkuman mana kaberqanchu.
[64] Kasqan ratupachataqmi paypa siminqa kicharikapurqan, hinallataq qallunpas paskarikapurqan. Hinan Diosta saminchaspan, rimayta qallarirqan.
[65] Llapan wasimasinkunataq, mancharikurqanku. Hinan tukuy chay orqo-orqo Judea probinsiapi llapan chay imaymanakunaqa willasqa karqan.
[66] Cheqaqmantapunin Señorpa makinqa wawawan kasharqan. Chayraykun, llapallan uyariqkunaqa sonqonku ukhullapi waqaycharqanku. Nirqankutaq: ―¿Pichá kay wawaqa kakunpas? nispanku.
[67] Juanpa taytan Zakariasmi Santo Espírituq hunt'aykusqan karqan. Hinan payqa profetisarqan.
[68] Nirqantaq: ―Israelpa Diosnin Señorqa saminchasqa kachun. Paymi llaqtanta watukamun, hinallataq rantipapunpas.
[69] Ñoqanchispaqmi huk atiyniyoq qespikuyta, kamachin Davidpa wasinpi hatarichipuwanchis.
[70] Kayqa, imaynan qallariymantapacha, Diospa rantinpi ch'uya rimaqkunaq nisqankuman hinan karqan.
[71] Awqanchiskunamanta, hinallataq llapan cheqnikuqninchiskunaq makinmanta qespichiwananchispaqmi prometewarqanchis.
[72] Taytanchiskunata yanapaykunanpaq, hinallataq ch'uya rimanakuyninmanta yuyarinanpaqmi, prometewarqanchis.
[73] Taytanchis Abrahamman hurasqan huramentoqa chaymi.
[74] Payqa, awqanchiskunamanta kacharichiwasqanchis qhepata, ama manchapakuspa Diosta serbikunanchispaqmi, hurarqan.
[75] Llapan kawsasqanchis p'unchaykunapi, paypa ñawpaqenpi ch'uya kaypi, hinallataq chanin kaypi payta serbikusunchis.
[76] Qantaq wawa, Señorpa ñawpaqenta ñanninkunata allichanaykipaq rinki. Chayraykun, Ancha Hatunchasqa Diospa rantinpi rimaq nispa sutichasqa kanki.
[77] Llaqtanman qespikuyta reqsichinanpaq, hinallataq huchankunata pampachananpaqmi qanqa rinki.
[78] Diosninchisqa, ancha khuyapayakuyninwanmi, pacha illariy hina, hanaq pachamanta watukamuwasunchis.
[79] Chay k'anchayqa tutayaqpi, hinallataq wañuy llanthupi kawsaqkunatan k'anchaykunqa. Hinallataqmi chakinchiskunatapas thak kay ñanman churaykunanpaq k'anchaykullanqataq, nispa.
[80] Hinan wawaqa, espiritunpi kallpachakuspa wiñarqan. Israel llaqtaman reqsichikunan p'unchaykamataqmi, ch'inniq cheqaspi tiyarqan.