[1] Llapa tributo qolqe kobraqkuna, hinallataq huchasapakunapas Jesusta uyarinankupaqmi qayllaykurqanku.
[2] Hinan fariseokunapas, kamachikuy simita yachachiqkunapas chhuchupakuspa nirqanku: ―Kay runaqa, huchasapakunatan chaskin, hinallataq paykunawanmi mikhunpas, nispanku.
[3] Hinan Jesusqa, paykunaman huk rikch'anachiyta yachachirqan.
[4] Nirqantaq: ―Qankunamanta mayqenniykichispapas pachak obehanmanta huknin chinkarunmanmi. Chay hina kaqtinqa, ¿manachu isqon chunka isqonniyoqta ch'inniqpi saqeykuspa, chinkasqa obehata tarimunankama maskhaq rinman?
[5] Tariruspataq, kusisqa rikranpi q'epiyakanpun.
[6] Wasiman chayaramuspantaq, amigonkunata, hinallataq wasimasinkunatapas huñuruspa nin: ‘Chinkasqa obehaytan tarirqakanpuni, chayrayku ñoqawan q'ochukuychis,’ nispa.
[7] Niykichismi: ‘Isqon chunka isqonniyoq chanin kaqkuna, manaña yuyayman kutirikuyta nesesitankuñachu. Chaykunamanta aswantaraqqa, huk huchasapa yuyayman kutirikuqtinmi, chay hina kusikuyraq hanaq pachapi kanqa,’ nispay, nispa.
[8] Nillarqantaqmi: —Otaq mayqen warmipas, chunka drakma qolqeyoq kashaqtin, hukninqa chinkarunmanmi. Chay hina kaqtinqa, ¿manachu lamparanta hap'ichispa wasita pichan, hinaspataq tarinankama allintapuni maskhanman?
[9] Tarirqamuspantaq reqsinakuqmasinkunata, hinallataq wasimasinkunata huñuruspa nin: ‘Chinkasqa drakma qolqeytan tarirqakapuni, chayrayku ñoqawan q'ochukuychis,’ nispa.
[10] Niykichismi: ‘Chay hinallataqmi Diospa angelninkunaq ñawpaqenpipas, huk huchasapa yuyayman kutirikusqanmantaqa kusikuy kan,’ nispay, nispa.
[11] Chaymantapas Jesusqa nillarqantaqmi: ―Huk runaqmi iskay churinkuna kapurqan.
[12] Hinan sullk'a kaq churinqa taytanta nirqan: ‘Kaqniykimanta tupaqniyta qopullawayña,’ nispa. Taytantaqmi kaqninkunamanta payman t'aqapurqan.
[13] Pisi p'unchaykunamantataqmi, sullk'a kaq churinqa llapanta huñuruspan, karu suyuta ripurqan. Chaypitaqmi, kacharisqa millay kawsaypi purispan, kaqninkunata q'aruchapurqan.
[14] Maypachachus llapan kaqninkunata tukuruqtintaqmi, chay suyupi hatun yarqay karqan. Hinan pisichikuyta qallarirqan.
[15] Chay suyupi tiyaq huk runaman rispantaq, k'askarukurqan. Paytaqmi, khuchinkunata michimunanpaq asiendanman kacharqan.
[16] Waynataqmi, khuchikunaq mikhunankunawan saksaykuyta munarqan. Ichaqa manataqmi pillapas qorqanchu.
[17] Hinan yuyayninman kutirikuspa, waynaqa nirqan: ‘Taytaypa wasinpiqa askha llank'apakuqninkunan allin mikhusqa kashanku. Ñoqataq ichaqa, kaypi yarqaymanta ñak'arishani.
[18] Sayarispay, taytayman ripusaq, hinaspa nisaq: “Taytay, hanaq pachaq kontranpi, hinallataq qanpa ñawpaqeykipin huchallikuni.
[19] Manañan ‘churiy’ niwanaykipaq hinañachu kani. Aswanpas huknin llank'apakuqniykita, hinallaña hap'ikapuway,” nispay,’ nispan.
[20] Hinan sayarispa taytanman kutimpurqan. Karullapiraq kashaqtintaq, taytanqa rikururqan. Hinan khuyallikuywan phawarispa, uqllaykukuspan payta much'aykurqan.
[21] Churintaq taytanta nirqan: ‘Taytay, hanaq pachaq kontranpiwan, qanpa ñawpaqeykipiwanmi huchallikuni. Manañan ‘churiy’ niwanaykipaq hinañachu kani,’ nispa.
[22] Taytantaq ichaqa, kamachinkunata nirqan: ‘Allin kaq p'achata horqomuspa, p'achachiychis. Makinmantaq huk sortijawan churaychis, hinallataq chakinkunamanpas husut'awan churaychis.
[23] Hinallataq wirayasqa torilluta apamuspa, nak'aychis. Hinaspataq chayta mikhuspa, fiestata ruwasunchis.
[24] Kay churiyqa, wañusqan kasharqan, hinan kawsarimpun. Chinkapurqanmi, ichaqa tarisqan kapun,’ nispan. Hinan q'ochukuyta qallarirqanku.
[25] Kurak kaq churintaqmi, chakrankupi kasharqan. Hamuspantaq, wasiman qayllaykamushaspanña tukaykunata, hinallataq tusuqkunata uyarirqan.
[26] Huknin uywasqanku waynata waqyaspantaqmi, imachus chaykunaqa kasqanta tapurqan.
[27] Paytaq nirqan: ‘Sullk'a wawqeykin kutirampusqa. Hinan allinllata, qhalillata chaskisqanrayku, taytaykiqa wirayasqa torilluta nak'achin,’ nispa.
[28] Kurak kaq churintaq ichaqa, phiñakuspa mana haykuyta munarqanchu. Chaymi taytanqa lloqsimuspan, haykunanpaq chay churinta balikurqan.
[29] Paytaq ichaqa, taytanman kutichispa nirqan: ‘Qhawariy, kamachikusqaykikunataqa mana hayk'aqpas p'akispaymi, unay watakunaña serbiyki. Manataqmi hayk'aqpas huk kabrachallatapas, amigoykunawan q'ochukunaypaq qowarqankichu.
[30] Kay churiykin, qhellipi puriq warmikunawan, kaqniykikunata tukurampun. Kutiramuqtintaq ichaqa, wirayasqa torillutaraq paypaq nak'arachinki,’ nispa.
[31] Hinan taytanqa payta nirqan: ‘Churiy, qanqa ñoqallawanpunin kashanki. Chaymi llapan kaqniykunapas qanllapaqpuni kanqa.
[32] Kay wawqeykiqa, wañusqan kasharqan. Kunantaq ichaqa, kawsarimpun. Hinallataq chinkasqan kasharqan. Kunantaq ichaqa, tarisqa kapun. Chayraykun fiestataqa ruwananchispuni, hinaspa q'ochukunanchispuni,’ nispan, nispa.