[1] Jesusqa, chunka iskayniyoq yachachisqankunatan waqyarqan. Hinaspataq, llapan supaykunata qarqomunankupaq, hinallataq onqosqakunatapas qhaliyachimunankupaq atiytawan, kamachikuyniyoq kaytawan qorqan.
[2] Hinallataqmi, Diospa qhapaq suyunmanta willanankupaqwan, onqosqakunatapas qhaliyachimunankupaqwan kacharqan.
[3] Paykunatataqmi nirqan: ―Ñanniykichispaqqa aman tawnatapas, nitaq wayaqatapas, nitaq t'antatapas, nitaq qolqetapas, nitaq imatapas apakunkichischu. Amallataq iskay p'achatapas apakunkichischu.
[4] Mayqen wasimanpas haykunkichis chayqa, chayllapin ripunaykichiskama qhepakunkichis.
[5] Mayqen llaqtapipas mana chaskisunkichischu chayqa, chay llaqtamantan lloqsipunkichis. Hinallataq paykunaq kontranpi kasqanta rikuspa yachanankupaq, chakiykichismanta hallp'ata chhaphchirikunkichis, nispa.
[6] Lloqsispankutaq, sapanka llaqta kantukunantakama allin willakuyta willaspa, hinallataq tukuy cheqaspi onqosqakunata qhaliyachispa, purirqanku.
[7] Tetrarka Herodesqa, Jesuspa tukuy imaymanakuna ruwashasqantan uyarirqan. Hinan mana imanakuytapas atisharqanchu. Wakin runakunan nirqanku: ―Bautisaq Juanmi wañusqanmanta kawsariramun, nispanku.
[8] Wakintaq nirqanku: ―Eliasmi rikhuriramun, nispanku. Wakinkunañataq nirqanku: ―Ñawpa tiempopi Diospa rantinpi rimaqkunaq hukninmi kawsariramusqa, nispanku.
[9] Herodestaqmi ichaqa, nirqan: ―Ñoqan, Bautisaq Juanpa umanta qhoruchirqani. ¿Chay hinari, pitaq chay imaymana ruwaqmanta uyarishasqayqa kanman? nispan. Hinan rikuytapuni munasharqan.
[10] Apostolkunataq kutimuspanku, tukuy imakunatachus ruwamusqankuta Jesusman willarqanku. Hinan Jesusqa paykunata pusarikuspa, Betsaida sutiyoq llaqtaq qayllan wak lado ch'inniq cheqasman ripurqan.
[11] Askha runakunataqmi ichaqa, chayta yachaspanku qatikurqanku. Hinan Jesusqa paykunata chaskiykuspa, Diospa qhapaq suyunmanta rimaykurqan. Hinallataq qhaliyay munaqkunatapas qhaliyachirqan.
[12] Tardeyaykushaqtinñataq, chunka iskayniyoq yachachisqankunaqa Jesusman asuykuspanku, payta nirqanku: ―Ch'inniq cheqaspin kashanchis. Chayrayku, runakuna llaqta kantukunaman, hinallataq llaqtaq kamponkunaman rispanku, qorpachakamunankupaq, mikhunatapas maskhakamunankupaqwan kacharparipullayña, nispanku.
[13] Jesustaq paykunata nirqan: ―Qankunayá mikhunataqa qoychis, nispa. Paykunataq ichaqa nirqanku: ―Llapan llaqtantin runakunapaq rantimuykuman chayllachá, ñoqaykuqqa manan kanchu. Aswanpas phisqa t'anta, iskay challwachallapiwanmi kapushawanku, nispanku.
[14] Yaqapas phisqa waranqa qharikunan karqanku. Chaymi Jesusqa, yachachisqankunata nirqan: ―Phisqa chunka, phisqa chunkamanta, t'aqa-t'aqapi tiyachimuychis, nispa.
[15] Nisqanman hinataq, llapankuta tiyachimurqanku.
[16] Hinan Jesusqa, phisqantin t'antakunata, hinallataq iskaynin challwachakunatapas hoqarispan, hanaq pachata qhawarispa samincharqan. Phakmispantaq, yachachisqankunaman qorqan. Paykunataq chay askha runakunaq ñawpaqenkuman churamurqanku.
[17] Llapallankun mikhurqanku, hinaspataq saksaykurqanku. Phakmisqa puchuqmantataq, chunka iskayniyoq kanastakunapi hoqaripurqanku.
[18] Chay hina kaqtinmi, Jesusqa, sapallanpi Diosman parlasharqan. Yachachisqankunataq paywan kasharqanku. Hinan paykunata tapurqan: ―¿Chay runakunari, ñoqa pi kasqaytataq niwanku? nispan.
[19] Kutichispankutaq, paykunaqa nirqanku: ―Wakinqa, Bautisaq Juanmi nisunkikun. Wakintaq, Eliasmi nisunkiku. Wakinkunañataqmi ichaqa, ñawpa tiempopi Diospa rantinpi rimaqkunamanta hukninmi kawsariramusqa nisunkiku, nispanku.
[20] Hinan Jesusqa paykunata nirqan: ―¿Qankunari, ñoqa pi kasqaytataq niwankichis? nispa. Pedrotaq kutichispan, nirqan: ―Diospa Cristonpunin kanki, nispan.
[21] Jesustaqmi ichaqa, ama pimanpas willanankupaq anchatapuni kamachirqan.
[22] Nirqantaq: ―Runaq Churinqa imaymanakunapipas ñak'arinanpunin kanqa. Hinan, kurak runakunapas, hatun umalliq saserdotekunapas, kamachikuy simita yachachiqkunapas, pisichaspanku wañuchinqakupuni. Hinan kinsa p'unchaymanta kawsarimpunqa, nispa.
[23] Hinan Jesusqa, llapankuta nirqan: ―Sichus pipas qatikamuwayta munan chayqa, pay kikinta mananchakuchun. Krusninta apayukuspantaq, qatikamuwachun.
[24] Pipas kawsayninta qespichiyta munan chayqa, chinkachipunqan. Pipas ñoqarayku kawsayninta churaqtaqmi ichaqa, kawsayninta qespichinqa.
[25] Sichus huk runa llapan kay pachantintaña tarinman, ichaqa kawsaynintaq wañuy ñak'ariyman rinman chayqa, ¿imapaqtaq paypaqri balinman? Otaq, ¿pay kikin chinkayman riqtinri, imapaqtaq balinman?
[26] Pipas ñoqamanta, hinallataq simiykunamantapas p'enqakunmanmi. Chay hina kaqtinqa, Runaq Churinpas k'anchariyninpi, Yayanpa k'anchariyninpi, hinallataq ch'uya angelkunaq k'anchariyninpi hamuspanmi, paymanta p'enqakullanqataq.
[27] Cheqaqtapunin niykichis: ‘Kaypi kashaqkunamanta wakinniykichismi, Diospa qhapaq suyunta rikunaykichiskama mana wañunkichischu,’ nispay, nispa.
[28] Hinaqtinmi, chay simikuna rimasqanmanta pusaq p'unchay qhepata hina, Pedrota, Juanta, hinallataq Jakobota Jesusqa pusarikurqan. Hinan orqo patata Diosman parlaq wicharqanku.
[29] Diosman parlashatintaq, uyanpa rikch'ayninqa huk nirayman tukurqan. Hinallataq p'achanpas, yuraq lliphipipishaqman tukurqan.
[30] Chayllamanmi, iskay qharikunaqa Jesuswan rimasharqanku. Chay qharikunaqa Moiseswan, Eliaswanmi karqanku.
[31] Paykunaqa, k'anchariy chawpipin rikhurimurqanku. Hinan Jesuspa wañunanmantawan, Jerusalén llaqtapi imakunatachus hunt'amunanpuni karqan, chaymantawan rimaykusharqanku.
[32] Pedro, hinallataq paywan kashaqkunataqmi puñuywan aysachikusharqanku. Ichaqa tutantinmi rikch'ashallarqanku. Hinan Jesuspa k'anchariyninta, hinallataq paywan kashaq chay iskay qharikunatapas rikurqanku.
[33] Hinaqtinmi, chay iskay qharikunaqa, Jesusmanta t'aqarikapusharqanku. Pedrotaqmi, mana imatachus rimashasqanta yachaspalla nirqan: ―Allin Yachachiqniy, kaypi kashasqaykuqa allinpunin. Kinsa ch'ukllakunata ruwapusaykiku. Hukta qanpaq, hukta Moisespaq, huktataq Eliaspaq ruwapusaykiku, nispa.
[34] Pedro chayta rimashallaqtinraqmi, huk phuyo hamuspa, paykunata pakaykurqan. Hinan phuyu pakaykuqtin, paykunaqa mancharikurqanku.
[35] Hinaqtinmi, chay phuyo ukhumanta huk kunka paykunata nimurqan: ―Munakusqay Churiyqa kaymi. Payta uyariychis, nispa.
[36] Chay kunka tukupuqtintaq, Jesustaqa sapallantaña rikurqanku. Hinan paykunaqa, upallalla kaspanku, chay p'unchaykunapi rikusqankumanta mana pimanpas rimarirqankuchu.
[37] Chay hina kaqtinmi, qhepantin p'unchay, orqomanta uraykamushaqtinku, ancha askha runakuna payman ayparqanku.
[38] Chayllamantaqmi, chay ancha askha runakuna chawpimanta huk runa waqyakamurqan: ―Yachachikuq, churiyqa sapallanmi kapuwan, chaymi qhawaykampuwanaykipaq balikuyki.
[39] Qhawariy, huk mana allin espíritun qonqay-qonqayllamanta hap'iruspa qaparichin. Hinan wat'akichispa ñak'arichin. Phosoqotaraq aqtuchispataq ñak'ayta kacharin.
[40] Chay mana allin espirituta qarqonankupaqmi yachachisqaykikunata balikurqani. Manataqmi ichaqa, qarqoyta atirqankuchu, nispan.
[41] Jesustaqmi kutichispa nirqan: ―¡Yaw mana iñiq waqllisqa miraykuna! ¿Hayk'aqkamataq qankunawanri kasaq? ¿Hayk'aqkaman pasiensiayta tukuwankichis? Kayman churiykita apamuy, nispa.
[42] Ichaqa wayna chimpaykushallaqtinraqmi, supayqa payta pampaman wikch'uspa wat'akichirqan. Jesustaqmi ichaqa, chay qhelli supay espirituta phiñarikurqan. Hinan waynata qhaliyachispa, taytanman qopurqan.
[43] Llapallan runakunataqmi, Diosqa hatun atiyniyoq kasqanmanta utirayasharqanku.
[44] Jesuspa tukuy chaykunata ruwasqanmantan, llapallanku utirayasqa kasharqanku. Hinan payqa yachachisqankunata nirqan: ―Kay rimasqaykunata allintapuni uyariwaychis. Runaq Churinqa, runakunaq makinmanmi hap'ichisqapuni kanqa, nispa.
[45] Ichaqa, Jesuspa chay nisqanmi, paykunamanta pakasqa karqan. Chayraykun paykunaqa, mana entiendirqankuchu. Hinan chay rimasqanmanta tapuytapas manchakurqanku.
[46] Hinan yachachisqankunapurapi mayqenchus allinpaq qhawarisqaqa kasqankumanta churanakuy kasharqan.
[47] Jesustaqmi ichaqa, sonqonkupi yuyaymanasqankuta yachaspan, huk wawata hap'ispa, ladonpi sayaykuchirqan.
[48] Hinan paykunata nirqan: ―Llapallaykichis, qankunapurapi huch'uylla kashaqmi, allinpaq qhawarisqa kanqa. Chayrayku, pipas kay wawata sutiypi chaskiqqa, ñoqata chaskiwan. Ñoqata chaskiwaqniytaqmi, kachamuwaqniyta chaskillantaq, nispa.
[49] Kutichispantaqmi, Juanqa nirqan: ―Yachachiqniy, sutiykipi supaykunata qarqoshaqtan, huk runata rikumurqayku. Chaymi, mana ñoqanchista qatikuwasqanchisrayku payta hark'amurqayku, nispa.
[50] Jesustaq paykunata nirqan: ―Pipas mana ñoqanchispa kontranchispi kashaqqa, ñoqanchiswanmi kashan. Chayrayku paytaqa, ama hark'amuychischu, nispa.
[51] Chay hinapin, hanaq pachaman wicharipunanpaq p'unchaykuna hunt'akamusharqan. Hinan Jerusalén llaqtamanqa rinanpuni karqan.
[52] Willaqninkunatataq paypa ñawpaqenta kacharqan. Paykuna rispankutaqmi, Samaria runakunaq llaqtanku kantuman haykuspanku, Jesusqa chayman chayananpaq wakichimpusharqanku.
[53] Samaria runakunataqmi ichaqa, Jesuspa Jerusalén llaqtaman rishasqanta yachasqankurayku, mana chaskiyta munarqankuchu.
[54] Hinan chayta rikuspanku, yachachisqankunaqa Jakobowan, Juanpiwan Jesusta nirqanku: ―Señor, ¿paykunata ruphaykachimunaykupaq, hanaq pachamanta nina yawrayta uraykachimunaykuta munankichu? ¿Manachu chay hinata Eliaspas ruwarqan? nispanku.
[55] Paykunaman kutirispantaq, Jesusqa phiñarikuspa nirqan: ―Mayqen espiritumantachus qankuna kasqaykichistaqa manan yachankichischu.
[56] Runaq Churinqa, manan runakunaq kawsayninkuta chinkachinanpaqchu, aswanpas qespichinanpaqmi hamurqan, nispan. Hinan huk kaq lado llaqta kantuman ripurqanku.
[57] Paykuna ñanta rishaqtinkutaq, huk runaqa Jesusta nirqan: ―Señor, mayman riqtiykipas qatikusaykin, nispa.
[58] Jesustaq payta nirqan: ―Atoqkunaq mach'ayninkupas, hinallataq phalaq animalkunaq q'esankupas kanmi. Runaq Churinpan ichaqa, mana mayman umanta samaykuchinallanpaqpas kapunchu, nispa.
[59] Hinan huk kaq runata nillarqantaq: ―Qatikuway, nispa. Chay runataq ichaqa, nirqan: ―Señor, ñawpaqtaqa taytayta p'ampaq rinaypaq saqeykullawayraq, nispan.
[60] Jesustaq payta nirqan: ―Hina wañusqakunaqa wañusqapura p'ampanakamushachunku. ¡Qantaq ichaqa rispayki, Diospa qhapaq suyunmanta willamuy! nispa.
[61] Hinallataqmi, huk runapas nillarqantaq: ―Señor qatikusaykin, ichaqa ñawpaqta wasiypi kaqkunamanta despedikamunaypaq saqeykullawayraq, nispa.
[62] Jesustaqmi ichaqa, payta nirqan: ―Manan pipas yapuna takllaman makinta churaspañaqa, qhepata qhawashallanmanchu. Sichus chay hina kanman chayqa, manan Diospa qhapaq suyunman haykunanpaq hinachu, nispa.