[1] Qhawarispantaqmi Jesusqa, ofrenda churanaman qhapaqkunaq ofrenda churasqankuta rikurqan.
[2] Hinallataqmi, huk wakcha biudaq kobremanta iskay qolqechakunata ofrenda churanaman churasqantapas rikullarqantaq.
[3] Hinan nirqan: ―Cheqaqtapunin niykichis: ‘Kay wakcha biudan, llapankumantapas aswan askhata churaykun,’ nispay.
[4] Llapan chay churaqkunaqa, qhapaq kayninkumanta puchuqllantan Diospaq ofrendataqa churanku. Kay wakcha biudataqmi ichaqa, llapan kawsananpaq kaqta churaykapun, nispa.
[5] Hinan wakin runakunaqa, Dios yupaychana wasi, munay rumikunawan, hinallataq qokuy ofrendakunawanpas sumaq- chasqa kasqanmanta rimasharqanku.
[6] Chaymi Jesusqa paykunata nirqan: ―Kay imaymanakuna rikusqaykichismanqa, p'unchaykunan chayamunqa. Hinan llapachallan thunisqa kanqa. Manataqmi rumipas, rumi patapiqa qhepanqachu, nispa.
[7] Hinaqtinmi Jesusta tapuspa nirqanku: ―Yachachikuq, ¿hayk'aqtaq chayri kanqa? Hinallataq, ¿chay imaymanakuna pasananpaq kashaqtinri, ima señaltaq kanqa? nispanku.
[8] Hinaqtinmi Jesusqa nirqan: ―Askhan ñoqaq sutiypi hamuspa ninqaku: ‘Ñoqan Cristoqa kani,’ nispanku. Hinallataq: ‘Ñan tiempopas qayllaykamushanña,’ nispanku. Chayrayku qhawakuychis, amataq q'otuchikuychischu. Nitaq qhepankutapas riychischu.
[9] Ñawpaqtaqa tukuy kaykunan pasananpuniraq, ichaqa manan kasqan ratuchu p'uchukayqa kanqa. Chayrayku, awqa tinkuymanta, hinallataq maqanakuykunamanta uyarispaykichisqa, ama mancharikunkichischu, nispa.
[10] Hinan paykunata nillarqantaq: ―Huk suyun wak suyuq kontranpi hatarimunqa. Hinallataqmi huk qhapaq suyupas, wak qhapaq suyuq kontranpi hatarimullanqataq.
[11] Askha cheqaskunapin, hatun pacha chhaphchikuykuna, yarqaykuna, hinallataq sinchi millay onqoykuna kanqa. Hanaq pachamantataqmi sinchi mancharikuy, hinallataq hatun señalkunapas kallanqataq.
[12] Lliw chay imaymanakunamanta ñawpaqtataqmi ichaqa, sutiyrayku qatiykachasqa kankichis. Hap'ispataq, judío runakunaq huñukunanku wasikunaman, hinallataq karselkunaman hap'ichisunkichis. Hinan reykunaman, hinallataq kamachikuqkunaq ñawpaqenmanpas apasunkichis.
[13] Chaykunataqmi, qankuna ñoqamanta willanaykichispaq kanqa.
[14] Ama imatachus kutichinaykichista ñawpaqmantaraqqa yuyaykukuychischu.
[15] Ñoqan rimariyta, hinallataq yachaytapas qosaykichis. Chaymantaqmi, mana pi kontrallikuqniykichiskunaqa kutichiytapas, nitaq sayachiytapas atinqakuchu.
[16] Tayta-mamaykichiskunapas, familiaykichiskunapas, amigoykichiskunapas, wawqe-panaykichiskunapas, hap'ichisunkichismi. Hinan qankunamanta wakinniykichista wañuchisunkichis.
[17] Sutiyraykutaqmi, llapa runakuna cheqnikusunkichis.
[18] Ichaqa manan umaykichismanta ch'ulla chukchallaykichispas chinkanqachu.
[19] Mana qhepaman kutispa, qaqata sayasqaykichiswanmi kawsaytaqa tarinkichis, nispa.
[20] Jesusqa nillarqantaqmi: ―Jerusalén llaqtata ejersitukunaq muyuykusqanta rikuspaykichismi, chay llaqta thunisqa kanantaqa yachankichis.
[21] Hinaqtintaq, Judea probinsiapi kashaqkunaqa orqokunaman ayqekuchunku. Llaqta chawpipi kashaqkunataq, llaqta hawaman ayqekuchunku. Hinallataq kampokunapi kashaqkunapas amaña llaqtaman haykuchunkuñachu.
[22] Chaykunaqa, Diospa phiñakuynin p'unchaykunapi lliw Qelqakunaq hunt'akunanmantan kanku.
[23] Kay hallp'a pachantinpaqmi hatun ñak'ariy chayamunqa. Hinallataqmi kay llaqtapaqpas k'arak phiñakuy chayamunqa. Chayrayku ¡ay chay p'unchaykunapi, wiksallikuq warmikunamanta, hinallataq wawa ñuñuq warmikunamantapas, imaynaraqmi kanqaku!
[24] Hinan paykunaqa espadawan wañuchisqa kanqaku. Hinallataq llapan suyukunamanmi ñak'arichisqa kanankupaq preso apasqa kanqaku. Mana-judío runakunaq tiemponku hunt'akunankamataqmi, paykunaqa Jerusalén llaqtata sarunchanqaku, nispa.
[25] Nillarqantaqmi: ―Hinan intipi, killapi, hinallataq ch'askakunapipas señalkuna kanqa. Hinallataq mama-qochapas phoqchispa qaparinqa. Chaymi, lliw hallp'a pachantinpi runakunapaq, musphariy kasqanhawa llakikuy kanqa.
[26] Hanaq pachapi atiykunan chhaphchirisqa kanqa. Chayraykun, kay pachaman imaymana mana allinkuna hamusqanmanta, hinallataq mancharikuymanta kay pachapi tiyaq runakunaqa muspharinqaku.
[27] Hinaqtintaqmi phuyupi, atiywan, hinallataq hatun k'anchariywan Runaq Churinta hamushaqta rikunqaku.
[28] Rantipapusqa kanaykichismi chayamushanña. Chayrayku kay imaymanakuna pasayta qallarishaqtinqa, umaykichista altoman hoqarispa qhawariychis, nispa.
[29] Hinan huk rikch'anachiyta paykunaman Jesusqa nillarqantaq: ―Igos sach'ata, hinallataq llapan mallkikunatapas qhawariychis.
[30] Raphinkuna ch'ikchimushasqanta rikuspaykichismi, poqoy tiempoq qayllaña kashasqantaqa yachankichis.
[31] Chay hinallataqmi, kay imaymanakuna pasasqanta rikuspaykichisqa, Diospa qhapaq suyun sispallapiña kashasqanta yachankichis.
[32] Cheqaqtan niykichis: ‘Tukuy chaykuna hunt'akunankamaqa, manan kay runa-mirayqa tukukunqachu.
[33] Hanaq pachapas, hallp'a pachapas tukukunqan. Simiykunan ichaqa, manapuni hayk'aqpas tukukunqachu,’ nispay.
[34] Saksapakuykunawan, machaykunawan, hinallataq kay pacha kawsaypi llakipakuykunawan ama sonqoykichis hunt'aykusqachu kashachun. Hinallataq ama qonqayllamanta chay p'unchay hap'inasunkichispaq, qankuna kikiykichista kuidakuychis.
[35] Llapan hallp'a pachantinpi tiyaq runakunatan, toqlla hina qonqaylla hap'iramunqa.
[36] Tukuy chay imaymanakuna pasaqtin ayqenaykichispaq, hinallataq Runaq Churinpa ñawpaqenpi sayayta atinaykichispaq kuidakuychis. Chay hinaqa, tukuy tiempopipas mañakuspallapuni, hinallataq rikch'ashaspallapuni kashaychis, nispa.
[37] Chay p'unchaykunapitaqmi, Jesusqa Dios yupaychana wasipi yachachirqan. Tutataqmi ichaqa, Olibos nisqa orqoman samaykunanpaq wichapurqan.
[38] Llapa llaqtantin runakunataq Jesusta uyarinankupaq, tutallamanta Dios yupaychana wasiman rirqanku.