[1] Ama pisi-kallpayaspa Diosman parlashanallapuni kasqanmantan yachachisqankunaman huk rikch'anachiyta Jesusqa rimaykurqan.
[2] Paykunatan nirqan: ―Huk llaqtapin, Diosta mana manchakuq, hinallataq runamasintapas mana respetaq, chaninchaq runa karqan.
[3] Chay llaqtapin, huk biuda warmi kallarqantaq. Paymi chaninchaqman hamurqan. Nirqantaq: ‘Awqay kontra chaninchayta ruwapullawayña,’ nispan.
[4] Hinan chaninchaqqa, unayña mana munar- qanchu. Ichaqa pay kikinpitaqmi, yuyaykukuspa nirqan: ‘Ñoqaqa, Diostapas manan manchakunichu, nitaq runamasiytapas respetanichu.
[5] Chaywanpas, kay biuda warmin, umayta nanachiwan. Amaña sapa ratu hamuspa, pasiensiayta tukuwashananpaq, chaninchayta ruwapullasaqña,’ nispan, nispa.
[6] Hinaqtinmi Señorqa nirqan: ―Mana chaninninpi chaninchaqpa nisqanta uyariychis.
[7] Chay hinallataq, ¿manachu Diosqa akllasqankuna tuta-p'unchay payman waqyakuqkunata chaninchayta ruwapunqa? ¿Kutichinanpaqri, unaytachu suyachikunqa?
[8] Niykichismi: ‘Usqhayllan qankunapaqqa chaninchayta ruwapusunkichis,’ nispay. Ichaqa Runaq Churin hamuspanqa, ¿kay pachapi iñiytari tarinqachu? nispa.
[9] Hukkunan, kikinkupi konfiakuspa chaninman tukuqku, wakinkunatataq pisinchaqku. Paykunamanmi kay rikch'anachiyta Jesusqa rimarqan.
[10] Nirqantaq: ―Iskay runakunan, Dios yupaychana wasiman Diosman parlaq wicharqanku. Hukninmi, fariseo karqan, huk kaqtaqmi tributo qolqe kobraq karqan.
[11] Fariseotaqmi, sayaykuspa pay kikillanpaq Diosman parlaspa, kay hinata nirqan: ‘Diosniy, tukuy kaykunamantan grasiasta qoyki. Ñoqaqa manan wakin runakuna hinachu, suwa, mana chanin, wasanchaq, nitaq kay tributo qolqe kobraq hinapaschu kani.
[12] Hinallataq ñoqaqa iskay kutitan semanapi ayunani. Llapan kaqniykunamantapas diezmoytaqa qoykin,’ nispa.
[13] Tributo qolqe kobraqñataqmi ichaqa, karullapi sayaykuspa, mana hanaq pachata qhawariyllatapas munarqanchu. Aswanmi qhasqonta takakuspa nirqan: ‘Diosniy, ñoqaqa huchasapan kani, chayrayku yanapaykuway,’ nispan.
[14] Pipas hatunchakuqqa, huch'uyachisqan kanqa. Huch'uyaykukuqtaqmi, hatunchasqa kanqa. Chayrayku niykichis: ‘Chay huchasapa kaqmi, ñawpaq kaqmantaqa chaninman tukuchisqa, wasinman uraykampurqan,’ nispay, nispa.
[15] Wawakunatan llamiykunanpaq, Jesusman apamurqanku. Hinan yachachisqankunaqa, chayta rikuspa, wawa apamuqkunata phiñarikurqanku.
[16] Jesustaqmi ichaqa, yachachisqankunata waqyaspa nirqan: ―Hanaq pacha qhapaq suyuqa wawakunaqmi. Chayrayku, wawakunaqa hinalla ñoqaman hamuchunku, amataq hark'aychischu.
[17] Cheqaqtan niykichis: ‘Pipas Diospa qhapaq suyunta, mana huk wawa hina chaskiqqa, manan chay qhapaq suyuman haykunqachu,’ nispay, nispa.
[18] Huk umalliq runan, Jesusta tapuspa nirqan: ―Allin Yachachikuq, ¿wiñay kawsayta tarinaypaqri, imatataq ruwasaq? nispa.
[19] Jesustaq payta nirqan: ―¿Imanaqtintaq ‘allin’ nispari sutiyawanki? Manan pipas allinqa kanchu, aswanqa Dios sapallanmi.
[20] Kamachikuy Simiqa ninmi: ‘Aman wasanchankichu. Aman runata wañuchinkichu. Aman suwakunkichu. Aman runamasiykita yanqa qasinmanta tumpankichu. Taytaykitapas, mamaykitapas allinpaq qhawarinki,’ nispan. (Éxo. 20:12-16 Deut. 5:16-20) Chaytaqa yachankiñan, nispa.
[21] Hinan umalliq runaqa nirqan: ―Llapan chaykunataqa, wayna kasqaymantapacharaqmi waqaycharqani, nispa.
[22] Chaykunata uyarispantaqmi, Jesusqa payta nirqan: ―Hukmi ruwanayki kashanraq: Llapan kaqniykikunata benderamuspa, wakchakunaman rakimuy. Hinan hanaq pachapi qhapaq kayniykiqa kapusunki. Hamuspaykitaq qatikamuway, nispa.
[23] Hinan chay waynaqa, ancha qhapaq kasqanrayku, chay simikunata uyarispa, sinchita llakikurqan.
[24] Hinan sinchi llakisqa kasqanta rikuspa, Jesusqa chay waynata nirqan: ―Qhapaq kayniyoq runakunaqa, may sasatapunin Diospa qhapaq suyunmanqa haykunqaku.
[25] Huk qhapaq runaq Diospa qhapaq suyunman haykunanmantaqa, yawriq ninrinta huk kamelloq suskhuyninmi aswan atikuqqa kanman, nispa.
[26] Chayta uyariqkunataqmi nirqanku: ―Hinaqa, ¿pitaq qespikuytari atinman? nispanku.
[27] Hinan Jesusqa nirqan: ―Runakunapaq mana atikuqpas, Diospaqqa atikullanpunin, nispa.
[28] Hinan Pedroqa nirqan: ―Qhawariy, ñoqaykuqa, tukuy kaqniykuta saqespaykun qatikushaykiku, nispa.
[29] Jesustaq paykunata nirqan: ―Cheqaqtan niykichis: ‘Diospa qhapaq suyunrayku wasintapas, otaq esposantapas, otaq wawqe-panankunatapas, otaq tayta-mamantapas, otaq wawankunatapas saqemuqkunaqa kankupunin.
[30] Paykunataqmi llapallanku, kunan tiempollapiraq ancha askhata chaskinqaku. Hinallataq, hamuq tiempopipas wiñay kawsayta chaskinqaku,’ nispay, nispa.
[31] Jesusqa chunka iskayniyoq yachachisqankunata pusashaspanmi, paykunata nirqan: ―Qhawariychis, Jerusalén llaqtamanmi wichashanchis. Hinan Runaq Churinmanta, Diospa rantinpi rimaqkunaq qelqasqanku llapachallanpuni hunt'akunqa.
[32] Mana-judío runakunamantaqmi, hap'ichinqaku. Paykunan asipayanqaku, k'aminqaku, hinallataq thoqaykunqaku.
[33] Soq'aykusqankumantataqmi wañuchinqaku. Kinsa p'unchaymantataqmi ichaqa, kawsarimpunqa, nispa.
[34] Yachachisqankunataqmi ichaqa, tukuy chay imaymanakunamanta mana imatapas entiendirqankuchu. Jesuspa chay rimaykusqankunaqa paykunamanta pakasqan kasharqan. Chaymi, chay rimaykusqankunataqa, mana entiendirqankuchu.
[35] Hinaqtinmi, Jerikó llaqtaman Jesusqa qayllaykusharqan. Huk ñawsa runataq, limosnata mañakuspa, ñan patapi tiyasharqan.
[36] Hinan chay ñawsa runaqa, askha runakunaq pasashasqanta uyarispa, imachus chayqa kasqanta tapukurqan.
[37] Runakunataq payta nirqanku: ―Nazaret llaqtayoq Jesusmi pasashan, nispanku.
[38] Chaymi ñawsa runaqa qaparispa nirqan: ―¡Davidpa Churin Jesús, yanapaykuway! nispa.
[39] Ñawpaq riqkunataqmi, upallananpaq phiñarikurqanku. Paytaq ichaqa, aswantaraq waqyakuspa nirqan: ―¡Davidpa Churin, ñoqata yanapaykuway! nispa.
[40] Hinan Jesusqa sayaykurqan. Apamunankupaqtaq kamachikurqan. Asuykachimuqtinkutaqmi, ñawsa runata tapurqan.
[41] Nirqantaq: ―¿Ima ruwapunaytataq munankiri? nispan. Chay ñawsa runataqmi nirqan: ―Señor, qhawaripuytan munani, nispa.
[42] Jesustaq payta nirqan: ―Qhawaripuy, iñiyniykin qhaliyachisunki, nispa.
[43] Kasqan ratupacha qhawaripuspantaq, Diosta hatunchaspa Jesusta qatikurqan. Hinan, llapa llaqtantin runakunaqa chayta rikuspanku, Diosta yupaycharqanku.