[1] Chay hina kaqtinmi, Jesusqa sábado p'unchaypi chakrachakranta risharqan. Hinan yachachisqankunaqa, trigoq umanta k'aphtaspanku, makinkupi qhaqospa mikhurqanku.
[2] Wakin fariseokunataqmi ichaqa, nirqanku: ―¿Imanaqtintaq sábado p'unchaypi mana ruwana kaqtari ruwashankichis? nispanku.
[3] Kutichispantaqmi, Jesusqa paykunata nirqan: ―¿David, hinallataq paywan kaqkunapiwan yarqachikuspanku, imatachus ruwasqankumanta manachu chayllatapas ñawincharqankichis?
[4] Payqa, Diospa wasinta haykuspanmi, Diospa rikunanpaq haywasqa t'antata hoqarispa mikhurqan. Hinallataq paywan kaqkunamanpas qollarqantaq. Chaytaqa manan paykunaqa mikhunankuchu karqan, aswanpas saserdotekunallan mikhunanku karqan, nispa.
[5] Paykunatan nillarqantaq: ―Runaq Churinqa, sábado p'unchaypapas Señorninmi, nispa.
[6] Chay hina kaqtinmi, huk kaq sábado p'uchaypi, Jesusqa judío runakunaq huñukunanku wasiman haykuspa, yachachirqan. Hinan chaypi, ch'akisqa paña makiyoq huk runa kasharqan.
[7] Kamachikuy simita yachachiqkunataq, fariseokunapiwan sábado p'unchaypi Jesusqa payta qhaliyachinqachus, icha manachus, chayta makilla qhawasharqanku. Paypi ima mana allintapas tarispanku, huchachanankupaqmi qhawasharqanku.
[8] Jesustaq ichaqa, yuyaykusqankuta yachaspa, ch'akisqa makiyoq runata nirqan: ―Sayariy, hinaspa chawpinkupi chakimanta churaykukuy, nispan. Paytaq sayarispan, chawpinkupi chakimanta churaykukurqan.
[9] Hinaqtinmi Jesusqa chay rudío runakunata nirqan: ―Ñoqa hukta tapusqaykichis: ‘¿Sábado p'unchaypiri allin kaqta ruwaychu, icha mana allin kaqta ruwaychu atikun? ¿Kawsayta qespichiychu, icha wañuchiychu atikun?’ nispay, nispa.
[10] Llapan muyuriqninpi kaqkunata qhawarispantaq, chay runata nirqan: ―Makiykita haywariy, nispa. Hinan payqa, makinta haywarirqan. Makintaqmi huk kaq makin hina qhali kapurqan.
[11] Hinaqtinmi, chay makilla qhawashaqkunaqa, sinchi phiñasqa kasharqanku. Paykunapurapitaqmi, Jesusta kontrallikuspa imatachus ruwanankupaq rimanakusharqanku.
[12] Chay hina kaqtinmi, haqay p'unchaykunapi Jesusqa orqo pataman Diosman parlaq wicharqan. Hinan illariqnintin, Diosman parlarqan.
[13] P'unchayaramuqtintaq, yachachisqankunata waqyarqan. Hinaspataq paykunamanta chunka iskayniyoqta akllarqan. Hinan paykunata apostolkuna nispa suticharqan.
[14] Simontan akllarqan. Paytan Pedro sutiwan suticharqan. Hinallataq Simonpa wawqen Andrestapas, Jakobotapas, Juantapas, Felipetapas, Bartolometapas akllarqan.
[15] Hinallataq Mateotapas, Tomastapas, Alfeoq churin Jakobotapas, Zelote sutiyoq Simontapas akllarqan.
[16] Chaymantataq, Jakoboq churin Judasta, hinallataq Judas Iskariotetapas akllallarqantaq. Paymi Jesusta hap'ichiqqa karqan.
[17] Jesusqa, apostolninkunawan uraykuspantaq, askha yachachisqankunawan, hinallataq wak ancha askha runakunapiwan huk pampapi sayaykurqan. Chay ancha askha runakunaqa, llapan Judea probinsiamanta, Jerusalén llaqtamanta, mamaqochaq qayllanpi kashaq Tiro llaqtamanta, hinallataq Sidón llaqtamanta iman karqanku. Paykunaqa, Jesusta uyarinankupaqwan, onqoyninkumantapas qhaliyachisqa kanankupaqwanmi hamusqaku karqan.
[18] Hinan qhelli supay espiritukunaq ñak'arichisqan kaqkunaqa qhaliyachisqa karqanku.
[19] Jesusmantan atiy lloqsisharqan. Hinan llapan onqosqakunata qhaliyachirqan. Chayraykun, llapan runakunaqa Jesusta llamiykuytapuni munasharqanku.
[20] Yachachisqakunata qhawarispantaq Jesusqa, nirqan: ―Diospa qhapaq suyunqa wakchakunaqmi. Chayraykun qankuna wakcha kaqkunaqa, kusisamiyoq kankichis.
[21] Kunan yarqachikuqkunataqa Diosmi saksachisunkichis. Chayraykun kusisamiyoqqa kankichis. Kunan waqaqkunaqa qhepamanñan asikunkichis. Chayraykun kusisamiyoqqa kankichis.
[22] Runaq Churinrayku, maypachachus runakunaqa qankunata cheqnisunkichispas, paykuna ukhumanta qarqosunkichispas, k'amisunkichispas, hinallataq qankunaq sutiykichista mana allinpas kanman hina pisichanqakupas chayqa, kusisamiyoqmi kankichis.
[23] Chay hinallatataqmi, paykunaq machulankupas Diospa rantinpi rimaqkunata ruwarqanku. Chayraykun chay p'unchaypiqa q'ochukunkichis, hinallataq kusikuymanta p'itaykachankichis. Qhawariychis, hanaq pachapi premioykichisqa hatunpunin kashan.
[24] Qhapaqkuna, sonqochasqallapuniñan kashankichis. Chayrayku, ¡ay qankunamanta, imaynaraq kankichis!
[25] Kunan saksaykusqa kaqkuna, qankunaqa yarqaytan muchunkichis. Chayrayku, ¡ay qankunamanta, imaynaraq kankichis! Kunan asikuqkuna, qankunaqa waqapakunkichismi, hinallataq waqankichismi. Chayrayku, ¡ay qankunamanta, imaynaraq kankichis!
[26] Llapa runachus qankunamanta allinmi nispa rimanku chayqa, ¡ay qankunamanta, imaynaraq kankichis! Chay hinallatataqmi, machulankupas falso profetakunata ruwarqanku, nispa.
[27] Nillarqantaqmi: ―Qankuna uyariqkunamanmi ichaqa, niykichis: ‘Awqaykichista munakuychis, hinallataq cheqnikuqniykichiskunapaqpas allintapuni ruwapuychis.
[28] Ñakaqniykichiskunata saminchaychis. Hinallataq mana allin ruwaqniykichiskunapaqpas Diosman parlapuychis.
[29] Paña lado uyaykipi ch'aqlaqniykimanqa, lloq'e ladoykitapas kutirillaytaq. Hinallataq kapaykita qechuqmanqa, ama p'achaykitapas hark'apakuychu.
[30] Pipas mañakuqniykimanqa qoykullay. Hinallataq pipas qanpa kaqta qechuqniykimantaqa ama chaskikapuychu,’ nispay.
[31] Runakunaq imayna ruwapunasunkichistachus munankichis, chay hinallatataq qankunapas paykunapaq ruwapuychis.
[32] Sichus munakuqnillaykichista munakunkichis chayqa, ¿ima allintataq ruwashankichisri? Huchasapakunapas chay hinallatataqmi ruwanku.
[33] Sitaqchus allin ruwaqnillaykichispaq allinta ruwankichis chayqa, ¿ima allintataq ruwashankichisri? Huchasapakunapas chay hinallatataqmi ruwanku.
[34] Mayqenchus manusqaykichismanta wachaynintinta kutichipuyta atisunkichis chayllaman manunkichis chayqa, ¿ima allintataq ruwashankichisri? Huchasapakunapas pikunachus wachaynintinta kutichipuyta atinku chaykunallamanmi manunku.
[35] Yayaqa, mana grasiasta qoqkunapaqpas, millay runakunapaqpas sumaq sonqoyoqmi. Chayrayku qankunapas awqaykichista munakuychis, hinallataq allinta ruwapuychis. Ama imatapas chaskikapuyta yuyaspallachu manuychis. Hinan qankunaq premioykichisqa hatunpuni kanqa. Hinallataq Ancha Hatunchasqa Diospa wawankuna kapunkichis.
[36] Imaynan Yayaykichisqa yanapaykukuqllapuni, chay hinallataq qankunapas yanapaykukuqllapuni kaychis, nispa.
[37] Nillarqantaqmi: ―Mana chaninchasqa kanaykichispaq, ama chaninchaychischu. Mana huchachasqa kanaykichispaqpas, amallataq huchachaychischu. Pampachaqllapuni kaychis, hinan qankunapas pampachasqallataq kankichis.
[38] Kasqan tupusqaykichis tupunawanmi tupusqallataq kankichis. Chayrayku qoychis, qankunamanpas Diosqa qollasunkichistaqmi. Allin tupusqata, ñit'i-ñit'iykuspa, chhaphchi-chhaphchirispa, unkhuyniykichispi phoqchirishaqtaraq qosunkichis, nispa.
[39] Hinallataqmi kay rikch'anachiyta paykunaman nillarqantaq: ―¿Huk ñawsa runaqa, ñawsamasinta pusayta atinmanchu? ¿Manachu iskayninku t'oqoman urmaykapunkuman?
[40] Yachaqakuqqa, manan yachachiqninmanta aswan allinpaq qhawarisqaqa kanmanchu. Ichaqa pipas tukuypi allintapuni yachachisqaqa, yachachiqnin hinan kanqa.
[41] ¿Imanaqtintaq wawqeykiq ñawinpi kashaq ichhutari qhawashanki, ichaqa manataq kikin ñawiykipi kashaq kurkutaqa rikukunkichu?
[42] Ñawiykipi kashaq kurkuta mana rikukushaspaykiqa, ¿imaynatataq wawqeykita niyta atiwaq: ‘Wawqey, ñawiykipi ichhuta horqorusqayki,’ nispari? ¡Yaw, iskay-uya! ñawiykimanta kurkutaraq ñawpaqtaqa horqokuy. Chaymantañan wawqeykiq ñawinpi kashaq chay ichhutaqa horqonaykipaq allinta rikunki.
[43] Allin sach'aqa manapunin mana allin rurutaqa rurunmanchu. Nitaqmi mana allin sach'apas allin rurutaqa rurullanmantaqchu.
[44] Igostaqa manan kiska-kiskamantachu pallakun, nillataqmi ubastapas t'ankarmantachu pallakun. Chayraykun, sapanka sach'apas rurusqanpi reqsichikun.
[45] Runaq sonqonpi imachus hunt'a kashan, chaytan siminqa riman. Chayrayku, allin runaqa sonqonpi allin kaq waqaychasqanmanta allin kaqta horqomun. Hinallataqmi millay runapas, sonqonpi mana allin kaq waqaychasqanmanta mana allin kaqta horqomullantaq, nispa.
[46] Nillarqantaqmi: ―¿Imanaqtintaq rimasqaykunata mana ruwashaspari: ‘Señor, Señor,’ nispa sutiyawankichis?
[47] Lliw ñoqaman hamuspa, simiykunata uyarispa kasukuqmantan, huk rikch'anachiyta ñoqa qhawarichisaykichis.
[48] Huk runa, wasita ruwakunanpaq ukhuta hasp'ispa, qaqa patapi teqsita churaqmanmi payqa rikch'akun. Hinan mayuqa chayamurqan. Hinallataq unu phoqchiypas hamuspa, chay wasiman kallpawan waqtakurqan. Qaqa patapi teqsin churasqa kasqanraykutaqmi ichaqa, chay wasita mana kuyurichirqanchu.
[49] Pipas simiykunata uyarishaspa, mana kasukuqmi ichaqa, huk runa hallp'a patapi mana teqsiyoq wasinta hatarichiqman rikch'akun. Chay wasiman, unu phoqchiy kallpawan waqtakuqtintaqmi, urmaykapurqan. Hinan chay wasiq thunikuyninqa may hatunpuni karqan, nispa.