[1] Tiberio Cesarmi chunka phisqayoq wataña kamachikusharqan. Ponsio Pilatotaqmi, Judea probinsiapi kamachikusharqan. Galilea probinsiapitaq, tetrarka Herodes umalliq kasharqan. Wawqen tetrarka Felipetaq, Iturea hap'iypi, hinallataq Trakonite hap'iypiwan umalliq kasharqan. Tetrarka Lisaniastaqmi Abilinia hap'iypi umalliq kasharqan.
[2] Chay tiempopitaqmi, Anaswan, Kaifaspiwan hatun umalliq saserdotekuna kasharqanku. Hinan Diospa siminqa, Zakariaspa churin Juanman ch'inniqpi hamurqan.
[3] Hinaqtinmi Juanqa, Jordán mayuq llapan muyuriqnin suyukunata purirqan. Hinan huchanku pampachasqa kananpaq, payqa yuyayman kutirikuy bautismomanta willakurqan.
[4] Diospa rantinpi rimaq Isaiaspa qelqasqan qelqapipas nishanmi: ‘Ch'inniqpin huk runa kunkayoqta waqyakun: “¡Señorpa ñanninta allichaychis! Purinankunatapas siwkta ruwaychis,” nispan.
[5] Llapan wayq'okunan hunt'achisqa kanqa. Hinallataq alto orqokunapas, moqokunapas pampayachisqan kanqa. Q'ewi-q'ewi ñankunatapas siwkta ruwaychis. Hinallataqmi khallka ñankunapas llamp'uyachisqa kanqa.
[6] Llapan runakunataqmi Diospa qespichiyninta rikunqaku,’ nispa. (Isa. 40:3-5)
[7] Askha runakunataqmi Juanpa bautisasqan kanankupaq lloqsirqanku. Hinan payqa, runakunata nirqan: ―¡Mach'aqway miraykuna! ¿Pitaq Diospa hamuq k'arak phiñakuyninmanta ayqekunaykichispaqri yachachirqasunkichis?
[8] Niykichismi: ‘Diosqa kay rumikunamantapas Abrahampa wawankunataqa hatarichiyta atinmanmi,’ nispay. Chayrayku yuyayman kutirikusqaykichis ruruykunata rikuchikuychis. Amataq kikiykichispi niychischu: ‘Abrahampa churinkunan kanchis,’ nispaqa.
[9] Hinallataqmi hachapas mallkikunaq saphin pataman churasqaña kashan. Chayraykun, llapan mana allin ruruq mallkiqa wit'usqa kapunqa, hinaspataq ninaman wikch'uykapusqa kanqa, nispa.
[10] Chay askha runakunataqmi tapukurqanku: ―Chay hinaqa, ¿imatataq ruwasaqkuri? nispanku.
[11] Hinan paykunaman kutichispa, nirqan: ―Pipas iskay p'achayoqqa, mana p'achayoqman qoykuchun. Mikhunayoqpas, chay hinallatataq ruwachun, nispan.
[12] Hinallataqmi, wakin tributo qolqe kobraqkunapas bautisachikunankupaq hamuspanku, Juanta tapurqanku: ―Yachachikuq, ¿imatataq ruwasaqkuri? nispanku.
[13] Juantaq paykunata nirqan: ―Tributo qolqetaqa, kamachisqasunkichisman hinalla chaskiychis. Amataq chaymanta aswantaqa chaskiychischu, nispan.
[14] Hinan wakin soldadokunapas Juanta tapukullarqankutaq: ―¿Ñoqaykuri, imatataq ruwasaqku? nispanku. Paykunatataqmi nirqan: ―Ama pitapas manchapachispa qechuychischu. Amallataq yanqa qasinmanta tumpaychischu. Aswanpas pagollaykichiswan kusisqa kaychis, nispa.
[15] Llaqtantin runakunaqa, makillan Cristota suyakusharqanku. Chaymi llapanku, Juanchu Cristoqa kananmanta, sonqonkupi tapukurqanku.
[16] Juanqa llapankuman kutichispataq nirqan: ―Cheqaqtapunin ñoqaqa unupi bautisaykichis. Ichaqa ñoqamanta aswan atiyniyoqmi hamushan. Manan ñoqaqa husut'anpa watullantapas paskanaypaq hinachu kani. Paymi Santo Espiritupi, hinallataq ninapi bautisasunkichis.
[17] Wayrachinanqa makinpiñan kashan. Hinan payqa eranta allinta llimphuyaspa trigota taqepunqa. Pajantataqmi ichaqa, mana hayk'aqpas thaniq ninawan ruphachipunqa, nispa.
[18] Chay imaymanakunawan, hinallataq ancha kallpanchaykunawanmi llaqtaman allin willakuyta willarqan.
[19] Hinaqtinmi Juanqa, huknin probinsiapi Tetrarka Herodesta phiñarikurqan. Wawqen Felipeq esposan Herodiaswan tiyasqanmanta, hinallataq lliw imaymana mana allinkuna ruwasqanmantawanmi phiñarikurqan.
[20] Hinan Herodesqa, Juanta karselpi wisq'achisqanwan, tukuy chay mana allin ruwasqankunaman aswantaraq yapaykukurqan.
[21] Hinaqtinmi Juanqa, llapa llaqtantin runakunata bautisasharqan. Hinallataq Jesustapas bautisarqan. Hinamantataqmi Jesusqa Diosman parlarqan, hinan hanaq pachaqa kicharikurqan.
[22] Santo Espiritutaq Jesuspa patanman sut'itapuni paloma hina rikch'ayniyoq uraykamurqan. Chayllamanmi hanaq pachamanta huk kunka nimurqan: ―Qanmi, munakusqay Churiyqa kanki. Qanwanmi anchatapuni kusikuni, nispa.
[23] Kikin Jesusmi yachachiyta qallarishaspanqa, kinsa chunka watayoq hina karqan. Runakunaq yuyaykusqanman hinaqa Josepa churinsi karqan. Josetaqmi, Elipa churin karqan.
[24] Elitaq, Matatpa churin, Matattaq, Levipa churin, Levitaq, Melkiq churin, Melkitaq, Janaq churin, Janataq, Josepa churin karqan.
[25] Josetaq, Matatiaspa churin, Matatiastaq, Amospa churin, Amostaq, Nahumpa churin, Nahumtaq, Esliq churin, Eslitaq, Nagaipa churin karqan.
[26] Nagaitaq, Maatpa churin, Maattaq, Matatiaspa churin, Matatiastaq, Semeipa churin, Semeitaq, Josepa churin, Josetaq, Judapa churin karqan.
[27] Judataq, Joananpa churin, Joanantaq, Resaq churin, Resataq, Zorobabelpa churin, Zorobabeltaq, Salatielpa churin karqan.
[28] Salatieltaq, Neriq churin, Neritaq, Melkiq churin, Melkitaq, Adipa churin, Aditaq, Kosampa churin, Kosamtaq, Elmodampa churin, Elmodamtaq, Erpaq churin karqan.
[29] Ertaq Josuepa, churin, Josuetaq, Eliezerpa churin, Eliezertaq, Jorimpa churin, Jorimtaq, Matatpa churin karqan.
[30] Matattaq, Levipa churin, Levitaq, Simeonpa churin, Simeontaq, Judapa churin, Judataq, Josepa churin, Josetaq, Jonanpa churin, Jonantaq, Eliakinpa churin karqan.
[31] Eliakintaq, Meleapa churin, Meleataq, Mainanpa churin, Mainantaq, Matataq churin, Matatataq, Natanpa churin karqan.
[32] Natantaq, Davidpa churin, Davidtaq, Isaipa churin, Isaitaq, Obedpa churin, Obedtaq, Boozpa churin, Booztaq, Salmonpa churin, Salmontaq, Nasonpa churin karqan.
[33] Nasontaq, Aminadabpa churin, Aminadabtaq, Arampa churin, Aramtaq, Jorampa churin, Joramtaq, Esronpa churin, Esrontaq, Farespa churin, Farestaq, Judapa churin karqan.
[34] Judataq, Jakobpa churin, Jakobtaq, Isaakpa churin, Isaaktaq, Abrahampa churin, Abrahamtaq, Tarepa churin karqan.
[35] Taretaq, Nakorpa churin, Nakortaq, Serugpa churin, Serugtaq, Ragaupa churin, Ragautaq, Pelegpa churin, Pelegtaq, Eberpa churin, Ebertaq, Salaq churin karqan.
[36] Salataq, Kainanpa churin, Kainantaq, Arfasadpa churin, Arfasadtaq, Sempa churin, Semtaq, Noepa churin karqan.
[37] Noetaq, Lamekpa churin, Lamektaq, Matusalenpa churin, Matusalentaq, Enokpa churin, Enoktaq, Jaredpa churin, Jaredtaq, Mahalaleelpa churin, Mahalaleeltaq, Kainanpa churin karqan.
[38] Kainantaq, Enospa churin, Enostaq, Setpa churin, Settaq, Adanpa churin, Adantaq, Diospa wawan karqan.