[1] Chaypitaqmi, ancha askha wara-waranqanpi runakunaqa, paykunapura sarunakunankukamaraq huñukamurqanku. Hinan Jesusqa yachachisqankunataraq ñawpaqta niyta qallarirqan: ―Fariseokunaq iskay-uya kayninku lebaduramanta kuidakuychis.
[2] Runakunaqa, tukuy imaymanakunatapas pakankun. Diostaqmi ichaqa, chaykunata sut'iman horqomunqa. Runakunaqa, tukuy imaymanakunatapas pakankun. Diostaqmi ichaqa, llapan chaykunata yachan.
[3] Chay hinapi, laqha-tutayaqpi llapan nisqaykichispas aswan sut'ipiraq uyarisqa kanqa. Hinallataq, wasi ukhupi ninrillaman rimasqaykichiskunapas, wasi patakunapiraq waqyakusqa kanqa.
[4] Qankuna amiguykunamantaqmi ichaqa, niykichis: ‘Aycha kuerpota wañuchiqkunataqa ama manchakuychischu. Chaymanta aswantaqa, manan ima ruwaytapas atinkumanchu,’ nispay.
[5] Ñoqataq ichaqa, pitachus manchakunaqa kasqanta yachachisqaykichis: ‘Pichus wañuchisqanmantapas infiernoman wikch'uykunanpaq atiyniyoq kaqta manchakuychisqa,’ nispay. Arí, niykichismi: ‘Payta manchakuychisqa,’ nispay.
[6] ¿Manachu phisqa pichinkuchakunaqa, iskay huch'uy qolqechakunallaman bendekunri? Chaywanpas, manan hukchallanpas Diospa ñawpaqenpiqa qonqasqachu kashan.
[7] Ichaqa, uma chukchaykichiskunapas, llapachallanmi Diospa yupasqan kashan. Qankunataqmi, askha pichinkuchakunamantapas aswan balorniyoqraq kankichis. Chay hinaqa, amapuni manchakuychischu.
[8] Nillaykichistaqmi: ‘Pipas runakunaq ñawpaqenpi ñoqamanta rimariqtaqa, Runaq Churinpas Diospa angelninkunaq ñawpaqenpi rimarillanqataqmi.
[9] Pipas runakunaq ñawpaqenpi mananchawaqniyqa, Diospa angelninkunaq ñawpaqenpin mananchallasqataq kanqa.
[10] Hayk'an, Runaq Churinpa kontranpi ima simillatapas rimaqqa, pampachasqan kanqa. Pipas Santo Espírituq kontranpi k'arak k'amiqmi ichaqa, mana pampachasqachu kanqa,’ nispay.
[11] Judío runakunaq huñukunanku wasikunaman, umalliqkunaman, hinallataq kamachikuqkunamanpas apasunkichismanmi. Sichus chay hina kanman chayqa, ama imaynata kutichinaykichismanta, nitaq ima nispa rimanaykichismantaqa llakikunkichischu.
[12] Chay oraspi, imatachus rimanaykichistaqa, Santo Espíritun yachachisunkichis, nispa.
[13] Askha runakunamanta hukninmi, Jesusta nimurqan: ―Yachachikuq, tupaqniyta qoykapuwananpaq wawqeyta niykampuway, nispan.
[14] Jesustaq payta nirqan: ―Yaw runa, ¿qankunapurapi chaninchaq kanaypaq, otaq kaqniykichiskunata rakiq kanaypaqri, pitaq churawarqan? nispa.
[15] Runakunatataqmi ichaqa, nirqan: ―Runaq kawsayninqa manan askha imaymanayoq kaypichu kashan. Chayrayku, llapan munapayaykunamanta makilla qhawakuychis, hinallataq kuidakuychis, nispa.
[16] Hinaqtinmi, huk rikch'anachiyta, paykunaman nirqan: ―Huk qhapaq runaq chakranmi, ancha askhata rurusqa karqan.
[17] Hinan payqa, sonqon ukhupi yuyaykuspa nirqan: ‘Mikhuyniykunatan mana maymanpas churayta atishaniñachu. Chayrayku, ¿imatataq ruwasaqri?’ nispan.
[18] Nillarqantaq: ‘¡Kayta ruwasaq! Taqeykunata thunipuspa, wak hatuchachaq taqekunata ruwasaq. Chaymantaq llapan kosechaykunata, hinallataq kaqniykunatapas waqaychasaq.
[19] Hinaspataqchá almayta nisaq: “Almallay, askha watakunapaqmi askha kaqniykikuna waqaychasqa kapushasunki. Samakuy, mikhukuy, ukyakuy, kusikuy,” nispay,’ nispan.
[20] Diostaq ichaqa, payta nirqan: ‘¡Mana yuyayniyoq runa! kunan tutan, almayki qechusqa kanqa. ¿Huñusqaykikunari, pipaqtaq kanqa?’ nispa.
[21] Chay hinan, pay kikillanpaq qhapaq kayta huñuqqa, Diospaqmi, mana qhapaqchu, nispan.
[22] Hinan yachachisqankunata Jesusqa nirqan: ―Chay hinaqa, qankunatan niykichis: ‘Kawsanaykichispaq imatachus mikhunaykichismanta, hinallataq aycha kuerpoykichista imawanchus p'achachinaykichismantapas ama llakikuychischu.
[23] Kawsaymi mikhunamantapas aswan baleqqa. Hinallataq aycha kuerpon p'achamantapas aswan baleqqa,’ nispay.
[24] Alqamarikunata qhawariychis. Paykunaqa, manan tarpunkuchu, nitaq ichhunkupaschu, nitaq taqenkupaschu, nillataq truhinkupas kanchu. Diostaqmi paykunataqa mikhuchin. ¿Manachu qankunaqa phalaq animalkunamantapas aswantaraq balinkichis?
[25] Qankunamanta, ¿mayqenniykichistaq sinchita llakipakusqanwan, huk maki khukuchullatapas sayayninmanqa yapaykukuyta atinman?
[26] Chay huch'uy kaqkunallatapas manataq atinkichischu chayqa, ¿imanaqtintaq wakin kaqkunamantari llakipakunkichis?
[27] Lirio t'ikakunaq wiñasqanta qhawariychis. Manan llank'ankuchu, nitaq puskankupaschu. Niykichismi: ‘Salomonpas, tukuy qhapaq kayninwan, manan mayqen kaq t'ika hinallapas p'achakurqanchu,’ nispay.
[28] Kampopi kunan kashaq, paqarintaq hornoman wikch'uykuna qoratapas Diosqa chay hinatan p'achachin. Pisi iñiyniyoq runakuna, ¿manachu qankunataqa aswantaraq p'achachisunkichis?
[29] Qankunaqa, imatachus mikhunaykichista, hinallataq ukyanaykichista ama maskhaychischu, nitaq llakipakuychispaschu.
[30] Llapan chaykunataqa, kay pacha runakunallan maskhanku. Qankunaq Yayaykichismi ichaqa, imakunachus pisisqasunkichista yachanña.
[31] Aswanpas Diospa qhapaq suyunta maskhaychis. Hinan llapan chay imaymanakunaqa yapasqa kapusunkichis.
[32] Qhapaq suyuta qankunaman Yayaykichispa qoyninqa allinpunin payman rikch'akurqan. Chayrayku, pisi t'aqallaña kankichis chaypas, ama manchakuychischu.
[33] Kaqniykichiskunata bendespa, wakchakunaman limosnata qoychis. Mana thantakuq wayaqakunatataq ruwakuychis. Hanaq pachapi mana hayk'aq tukukuqpaq qhapaq kay waqaychayqa chaymi. Chaymanqa suwapas manan chayayta atinchu. Nitaq thutapas thutanchu.
[34] Maypichus qhapaq kayniykichis waqaychasqa kashan, chayllapitaqmi sonqoykichispas kashanqa, nispa.
[35] Nillarqantaqmi: ―Sinturaykichispas allin chumpisqallapuni kashachun. Hinallataq lamparaykichiskunapas hap'ichisqallaña kashachun.
[36] Hinallataq kasarakuymanta kutimuq patronninku chayamuspa, waqyakamuqtin, usqhaylla kicharinankupaq suyashaq runakuna hinapuni kashaychis.
[37] Patronninku chayamuspa, mayqen kamachinkunatachus rikch'aspa suyakushaqta tarinqa, chaykunan kusisamiyoqqa kanqaku. Cheqaqtan niykichis: ‘Kikin patronninkun p'achanta watakuspa, mesaman tiyaykuchispa, paykunaman serbinqa.
[38] Kuska tuta orastaña, otaq illarimuytaña patronninku hamuspa, sichus chay kamachikunata rikch'aspa suyakushaqta tarinqa chayqa, ¡chay kamachikunaqa kusisamiyoqmi kanku!’ nispay.
[39] Ichaqa, kayta yachaychis: Wasiyoq wiraqochachus imay oras suwaq hamunanta yachanman chayqa, rikch'ashanmanmi, hinaspan wasintaqa mana suwachinmanchu.
[40] Runaq Churinqa, mana yuyasqaykichis orastan hamunqa. Chayrayku qankunapas, wakichisqallapuni kashaychis, nispa.
[41] Hinaqtinmi Pedroqa Jesusta nirqan: ―Señor, ¿chay rikch'anachiytari, ñoqallaykupaqchu nishanki, icha llapapaqwanchu nishanki? nispan.
[42] Señortaq nirqan: ―¿Pitaq hunt'aq yachaysapa mayordomori? Paytan patronninqa, wasinta qhawananpaq, hinallataq wasinpi kaqkunaman orasninpi mikhunata qonanpaqpas churanqa.
[43] Patronnin hamuspa, pitachus kamachisqanman hina ruwashaqta tarinqa chayqa, chay kamachin kusisamiyoqqa kanqa.
[44] Cheqaqtan niykichis: ‘Llapan kaqninkunata qhawananpaqmi chay kamachitaqa churanqa,’ nispay.
[45] Ichaqa, chay kamachitaqchus sonqonpi ninman: ‘Patronniyqa manan hamunmanraqchu,’ nispan. Hinaspataq, patronninpa wasinpi kaq kamachi qharikunatapas, kamachi warmikunatapas maqayta qallarinman. Hinallataq mikhuyta, ukyayta, machayta imaraq qallarinman.
[46] Sichus chay hina kanman chayqa, chay kamachiq patronninmi mana suyasqan p'unchaypi, hinallataq mana yachasqan oraspi hamunqa. Hinan payta allin-allintapuni p'anaykuspa, mana iñiqkunaq kasqanman churanqa.
[47] Chay kamachiqa, patronninpa imatachus munasqanta yachashaspanmi, mana wakichikurqanchu. Nitaq patronninpa munasqanta hinapaschu ruwarqan. Chaymi chay kamachiqa sinchi hasut'isqa kanqa.
[48] Pikunamanchus askha qosqa karqan, chaykunaqa askhapin kuentata qonanku kanqa. Hinallataq pikunamanchus askha saqesqa karqan, chaykunamantapas askhallapitaqmi mañasqa kanqa. Chayrayku, mana yachashaspa huchallikuqqa, sinchi hasut'isqaña kanan kashan chaypas, pisillata hasut'isqan kanqa, nispa.
[49] Jesusqa nillarqantaqmi: —Kay hallp'a pachamanqa, ninata apamuspaymi hamurqani. ¡Maytapunitaqmi yawrashanantaña munashayman!
[50] Huk bautismotan chaskiykunay kashan. Hinan hunt'akunankama ¡maytapuni muchushani!
[51] ¿Kay pachaman thak kayta apamuspa, hamunaypaqchu yuyaymanasharqankichis? Niykichismi: ‘Manan. Aswanpas, ¡t'aqanachinaypaqmi hamurqani!’ nispay
[52] Hinaqa, kunanmanta ñawpaqmanmi, huk wasipi phisqa runa t'aqanakunqaku. Kinsa, iskaypa kontranpi, iskaytaq, kinsaq kontranpi t'aqanasqa kanqaku.
[53] Taytanmi, churinpa kontranpi, churintaq, taytanpa kontranpi hatarinqa. Mamanmi, ususinpa kontranpi, ususintaq, mamanpa kontranpi hatarinqa. Suegrantaq, qhachuninpa kontranpi, qhachunñataq, suegranpa kontranpi hatarillanqataq, nispa.
[54] Chay askha runakunamanmi, Jesusqa nillarqantaq: ―Inti chinkaykuy ladomanta, phuyo lloqsimuqta rikuspaykichismi ninkichis: ‘Paranqan,’ nispaykichis. Paramunpunitaqmi kanpas.
[55] Uray ladomanta wayramuqtintaq ninkichis: ‘Ruphayanqan,’ nispaykichis. Ruphayanpunitaqmi kanpas.
[56] ¡Iskayuyakuna! Hanaq pachaq, hinallataq hallp'a pachaq rikch'aynintaqa reparayta yachankichismi. ¿Imanaqtintaq, kay tiempo reparaytari, mana yachankichischu? nispa.
[57] Nillarqantaqmi: —¿Imanaqtintaq qankuna kikiykichisri, chanin kaqta mana chaninchankichischu?
[58] Chaninchaqman awqaykiwan rinki chayqa, ñanta rishaspallaykiraq usqhaylla paywan allipunapuy. Mana hinaqa, chaninchaqmanmi apasunkiman. Chaninchaqtaq, guardiaman hap'ichisunkiman. Guardiañataq, karselman wisq'amusunkiman.
[59] Nishaykin: ‘Llapachallanta pagapunaykikaman karselmantaqa mana lloqsimpuyta atinkichu,’ nispay, nispa.