[1] Chay hina kaqtintaq, Jesusqa, Genesaret qochaq kantunpi sayasharqan. Hinan ancha askha runakuna, Diospa siminta uyarikunankupaq payman huñunakamurqanku.
[2] Hinan Jesusqa, iskay barkakunata qocha kantupi kashaqta rikurqan. Challwaqkunataqmi, chay barkakunamanta uraykuspa, challwana llikankuta mayllisharqanku.
[3] Simonpa kaq barkanman haykuspantaq, Jesusqa barkanta aswan qocha ukhuman apaykunanpaq payta balikurqan. Hinan chay barkapi tiyaykuspa, chay askha runakunaman yachachirqan.
[4] Paykunaman rimaykuyta tukuruspantaqmi, Simonta nirqan: ―Qocha chawpiman barkaykichista apaykuychis. Hinaspataq challwanaykichispaq llikaykichista wikch'uykuychis, nispa.
[5] Kutichispantaq, Simonqa payta nirqan: ―Yachachiqniy, illariqnintinmi challwaykamuyku, manataqmi imallatapas hap'imurqaykuchu. Ichaqa qanpa nisqaykirayku, challwana llikayta wikch'uykamusaq, nispa.
[6] Wikch'uykuspankutaqmi ancha askha challwakunata hap'irqanku. Hinan challwana llikankuqa llik'ikapusharqanña.
[7] Hamuspa yanapanankupaqtaqmi, huk kaq barkapi challwaqmasinkuta señascharqanku. Paykunataqmi hamuspa, yanaparqanku. Hinan iskaynin barkakunaqa, challwa hunt'aruqtin, unuman chinkayapusharqanña.
[8] Chayta rikuspantaq Simón Pedroqa, Jesuspa ñawpaqenpi qonqoriykukurqan Nirqantaq: ―¡Señor, huchasapa runa kasqayrayku, ñoqamanta achhuriy! nispa.
[9] Chay askha challwa hap'isqankuta rikuspankutaqmi, Pedropas, hinallataq llapan paywan kaqkunapas, sinchi mancharisqa kasharqanku.
[10] Chay hinallataqmi, Zebedeoq churinkunaqa, Jakobopiwan, Juanpiwan sinchi mancharisqa kasharqanku. Paykunaqa Simonpa llank'aqmasinkunan karqanku. Hinan Jesusqa Simonta nirqan: ―Ama mancharikuychu. Kunanmantaqa runakunata challwaqmi kapunki, nispa.
[11] Barkakunata hallp'a pataman horqoruspankutaqmi, llapanta saqerparispa Jesusta qatikurqanku.
[12] Hinaqtinmi Jesusqa, chay hukkaqnin llaqtapi kasharqan. Chaypitaqmi, huk runa sinchi lepra onqoyniyoq kasharqan. Paymi Jesusta rikuruspan, qonqorinpanmanta pampakama k'umuykuspa balikurqan. Hinan nirqan: ―Señor, sichus munanki chayqa, qhaliyaykachiway, nispa.
[13] Hinaqtinmi Jesusqa, makinta haywarispa, payta llamiykurqan. Nirqantaq: ―Arí munanin. ¡Qhali kapuy! nispa. Kasqan ratupachataqmi lepra onqoyninqa qhaliyarqapurqan.
[14] Hinan Jesusqa, ama pimanpas willakunanpaq kamachispa nirqan: ―Rispayki, saserdoteman rikuchikamuy. Moisespa kamachikusqanman hinataq ch'uyanchakunaykipaq ofrendata haywamuy. Chaytaqmi, paykunaq rikunankupaq kanqa, nispa.
[15] Chaywanpas Jesuspa reqsichikuyninqa aswan-aswantaraqmi ch'eqerirqan. Hinan ancha askha runakunaqa uyarinankupaq, hinallataq onqoyninkumantapas qhaliyachisqa kanankupaq payman huñukamurqanku.
[16] Paytaq ichaqa, ch'inniq cheqaskunaman t'aqarikuspa, Diosman parlarqan.
[17] Chay hina kaqtinmi, huk p'unchay Jesusqa yachachisharqan. Chaypin wakin fariseokuna, hinallataq kamachikuy simita yachachiqkuna tiyasharqanku. Paykunaqa Galilea probinsiaq, Judea probinsiaq, hinallataq Jerusalén llaqtaq lliw kantunkunamantaraqmi hamusqaku karqan. Qhaliyachinanpaqtaqmi, Señorpa atiyninqa Jesuswan kasharqan.
[18] Chayllamanmi, wakin runakunaqa huk mana kuyuriq such'u runata kamillapi wantumurqanku. Hinan paykuna ukhuman wantuykuyta, hinallataq Jesuspa ñawpaqenman churaykuyta munasharqanku.
[19] Askha runakunan kasharqanku. Chayraykun mana imaynata wantuykuyta atispanku, wasi pataman such'u runata wichachirqanku. Chaymantataq tehakunata paskaraspa, kamillantinta Jesuspa ñawpaqenman uraykuchirqanku.
[20] Hinan Jesusqa, paykunaq iñiyninkuta rikuspan, mana kuyuriq such'uta nirqan: ―Runa, huchaykikunaqa pampachasqañan kanku, nispa.
[21] Hinaqtinmi, kamachikuy simita yachachiqkuna, hinallataq fariseokunapas kay hinata yuyaykuyta qallarirqanku: ―¿Diosta k'arakta k'aminanpaq, pitaq kay runari? ¿Pitaq hucha pampachaytari atinman? Aswanpas sapan Diosllapunin atinmanqa, nispanku.
[22] Jesustaqmi ichaqa, paykunaq yuyaykusqankuta yacharqan. Hinan kutichispa, paykunata nirqan: ―¿Imatataq sonqoykichispiri yuyaykushankichis?
[23] ¿Imataq aswan fasilchalla niyri: ‘Huchaykikunatan pampachayki niychu, ichari, sayarispa ripuy niytaqchu?’
[24] Ichaqa, Runaq Churinqa, hallp'a pachapi hucha pampachananpaq atiyniyoq kasqanta yachanaykichispaqmi, chay hinata, niykichis. Hinan mana kuyuriq such'u runata nirqan: ―Qantan niyki: ‘Sayariy, hinaspa kamillaykita hoqarispa, wasiykita ripuy,’ nispay, nispan.
[25] Paytaq, kasqan ratupacha llapankuq ñawpaqenkupi puñusqan kamillanta hoqarispa, hinallataq Diosta hatunchaspan wasinman ripurqan.
[26] Llapankutaq utirayasqa kaspa, Diosta hatuncharqanku. Sinchi mancharisqa kaspankutaq nirqanku: ―Kunanmi musphana ruwayta rikunchis, nispanku.
[27] Chaykuna qhepatataqmi, Jesusqa chaymanta lloqsipuspan, huk tributo qolqe kobraq Leví sutiyoq runata rikurqan. Leviqa, tributo qolqe chaskina cheqaspin tiyasharqan. Hinan Jesusqa payta nirqan: ―¡Qatikamuway! nispa.
[28] Llapanta saqerparispantaq, Leviqa sayarirqan. Hinan Jesusta qatikurqan.
[29] Hinaqtinmi Leviqa, wasinpi hatun mikhuna fiestata wakichirqan. Hinan askha tributo qolqe kobraqkuna, hinallataq hukkunapas paykunawan mikhunankupaq mesaman tiyaykurqanku.
[30] Paykunaq kamachikuy simita yachachiqninkunataqmi, hinallataq fariseokunapas, Jesuspa yachachisqankunaq kontranpi chhuchupakuspa nirqanku: ―¿Imanaqtintaq tributo qolqe kobraqkunawan, hinallataq huchasapakunawanpas mikhunkichis, hinallataq ukyankichispasri? nispanku.
[31] Kutichispantaq, Jesusqa paykunata nirqan: ―Qhali kaqkunaqa manan hampiqta nesesitankuchu. Aswanpas onqosqakunallan hampiqtaqa nesesitanku.
[32] Manan ñoqaqa, chanin kaqkunata waqyaqchu hamurqani. Aswanpas huchasapakunata yuyayman kutirikunankupaq waqyaqmi hamurqani, nispa.
[33] Hinaqtinmi chay runakunaqa, Jesusta nirqanku: ―¿Imanaqtintaq Juanpa yachachisqankuna, hinallataq fariseokunaq yachachisqankunapas sapa kutilla ayunankupas, mañakunkupasri? Qanpa yachachisqaykikunataqmi ichaqa, mikhushallanku, hinallataq ukyashallanku, nispanku.
[34] Jesustaq paykunata nirqan: ―¿Kasarakuyman hamuqkunari, kasarakuq qhari paykunawan kashaqtinqa ayunayta atinkumanchu? Manapunin.
[35] Ichaqa kasarakuq qhari paykunamanta qechusqa kanan p'unchaykunaqa chayamunqan. Chayñan chay p'unchaykunapi ayunanqaku, nispa.
[36] Huk rikchanachiytan paykunaman nillarqantaq: ―Manan pipas mosoq telata wit'uspa, chaywan huk mawk'a p'achataqa remendanmanchu. Sichus chay hina kanman chayqa, mosoq telan mawk'a p'achata llik'irapunman. Hinan chay wit'usqa mosoq tela mana mawk'a p'achawanqa tupanmanchu.
[37] Manallataqmi pipas upi binotaqa mawk'a odrekunaman hillp'unmanchu. Sichus chay hina kanman chayqa, upi binon mawk'a odrekunata phatarachinman. Hinan binoqa hich'arparikapunman, hinallataq odrekunapas chinkapunman.
[38] Aswanmi upi binotaqa mosoq odrekunaman hillp'ukun. Chay hinapin, kuskamanta waqaychanakunku.
[39] Manallataqmi poqosqa bino ukyaqpas upi binotaqa munanmanchu. Chay hinapin poqosqa binota ukyaqqa ninman: ‘Poqosqa binon aswan allinqa,’ nispan, nispa.