[1] Paykunamanta llapan runakuna sayarispankutaqmi, Pilatoq ñawpaqenman Jesusta aparqanku.
[2] Hinan yanqanmanta huchachayta qallarispanku nirqanku: ―Kay runatan, suyuyku waqllichishaqta tarimuyku. Cesarman qolqe qonatapas manan munanchu. Hinallataq nirqanmi: ‘Ñoqaqa, Rey, hinallataq Criston kani,’ nispan, nispanku.
[3] Hinan Pilatoqa Jesusta tapuspan nirqan: ―¿Judío runakunaq Reynin qanchu kanki? nispa. Jesustaq payman kutichirqan: ―Nisqayki hinapunin, nispa.
[4] Hinan Pilatoqa, umalliq saserdotekunatawan, chay askha runakunatawan nirqan: ―Manan ima mana allin ruwasqantapas kay runapiqa tarinichu, nispa.
[5] Paykunataq ichaqa, nishallarqankupuni: ―Llaqtantintan ch'aqwarachimushan. Galilea probinsiamanta qallarispantaqmi, kaykama llapan Judea probinsiantinpi yachachimushan, nispanku.
[6] Hinaqtinmi Pilatoqa, Galilea probinsiamanta Jesuspa kasqanta uyarispan, Galileamantapunichus payqa kasqanta tapurqan.
[7] Hinan Pilatoqa, Herodespa kamachikusqan suyumanta Jesuspa kasqanta yachaspan, Herodesman apachirqan. Chay p'unchaykunapitaqmi, Herodesqa Jerusalén llaqtapi kashallarqantaq.
[8] Jesusmanta rimaqtan Herodesqa uyarisqa karqan. Hinan ima señalkunallatapas rikuyta munaspa, suyakusharqan. Chayraykun, unay tiempomantaña rikuyta munasqanhawa, Jesusta rikuruspanqa anchatapuni kusikurqan.
[9] Herodesqa, askha simikunawanmi Jesusta tapusharqan. Paytaq ichaqa, mana imatapas kutichirqanchu.
[10] Umalliq saserdotekuna, hinallataq kamachikuy simita yachachiqkuna, chaypi aswan kallpawanraq yanqanmanta huchachasharqanku.
[11] Herodestaq ichaqa, soldadonkunapiwan Jesusta pisichaspanku, hinallataq asipayaspanku, k'ancharishaq p'achawan p'acharachirqanku. Hinan Herodesqa, Pilatoman kutichipurqan.
[12] Chay kasqan p'unchaytaqmi, Pilatowan, Herodeswan allipunapurqanku. Ñawpaqtataqmi ichaqa, awqantin kasqaku karqan.
[13] Hinan Pilatoqa, umalliq saserdotekunata, chaninchaqkunata, hinallataq llaqtantin runakunata waqyachirqan.
[14] Paykunatataqmi nirqan: ―Llaqtantin runakuna waqllichiqta hinapunin kay runata ñawpaqeyman apamuwarqankichis. Qhawariychis, ñoqaqa qankunaq ñawpaqeykichispin yapa-yapa tapuni. Chaymi llapan yanqa qasi tumpasqaykichiskunaman hinaqa, manan ima mana allin ruwasqankunatapas tarinichu.
[15] Ñoqaqa Herodesmanmi apachirqani. Chaymi paypas, manallataq imatapas tarisqachu karqan. Qhawariychis, manan ima mana allintapas wañunanpaq hinaqa ruwasqachu karqan.
[16] Chay hinaqa, allinta soq'aykuchispan kacharipusaq, nispa.
[17] Sapa wata fiestapin huk presota kacharipunanpuni karqan.
[18] Llapan runakunataqmi ichaqa, huk kunkalla qaparirqanku: ―¡Chay runataqa ama kachariychu! ¡Barrabasta kacharipuwayku! nispanku.
[19] Barrabasqa, llaqtapi runakunata ch'aqwananpaq hatarichisqanmanta, hinallataq runa wañuchisqanmantawanmi karselpi wisq'asqa kasharqan.
[20] Hinaqtinmi Pilatoqa, Jesusta kacharipuyta munaspa, runakunata wakmanta rimapayarqan.
[21] Paykunataq ichaqa, yapamanta qaparirqanku: ―¡Chakatay! ¡Chakatay! nispanku.
[22] Pilatotaq ichaqa, kinsa kutinpi paykunata nirqan: ―¿Chayri, ima mana allintataq kay runari ruwarqan? Ñoqaqa manan ima mana allintapas wañunanpaq hinaqa tarinichu. Chayraykun allinta soq'aykuchispay, payta kacharipusaq, nispa.
[23] Paykunataq ichaqa, aswan kunkayoqtaraq chakatananpaq mañakuspanku qaparirqanku. Hinallataqmi umalliq saserdotekunapas, mana thanispa qaparillarqankutaq.
[24] Hinan Pilatoqa, runakunaq mañakusqanku ruwakunanpaq chanincharqan.
[25] Hinan runakunata ch'aqwananpaq hatarichiq, hinallataq runa wañuchiq, karselpi wisq'asqanku Barrabasta kacharipurqan. Chayta kacharinanpaqmi, runakunaqa mañakusqaku karqan. Jesustataqmi ichaqa, munasqankuta ruwanankupaq hap'ichirqan.
[26] Jesusta apashaspankutaqmi paykunaqa, kampomanta hamushaq Cirene suyumanta Simonta hap'irqanku. Hinan Jesuspa qhepanta q'epinanpaq, krustaqa Simonpa patanman churaykurqanku.
[27] Llaqtamanta askha runakunan qatikurqanku. Hinallataq warmikunapas khuyayta waqaykuspanku qatikullarqankutaq.
[28] Jesustaq ichaqa, paykunaman kutirispa nirqan: ―Jerusalenpa ususinkuna, ama ñoqamanta waqaychischu. Aswanpas qankuna kikiykichismantawan, wawaykichiskunamantawan waqaychis.
[29] Qhawariychis, sasa p'unchaykuna chayamuqtinmi ninkichis: ‘Kusisamiyoqmi mana wachakuqkunaqa, mana wiksallikuqkunapas, hinallataq wawata mana ñuñuq warmikunapas kanku,’ nispaykichis.
[30] Hinaqtinmi orqokunata niyta qallarinkichis: ‘Ñoqayku pataman urmaykamuwayku,’ nispaykichis. Hinallataq moqokunatapas ninkichis: ‘Pakaykuwayku,’ nispaykichis. (Ose. 10:8)
[31] Sichus q'omer mallkiwan kay hinata ruwanku chayqa, ¿ch'akisqa mallkiwanri, imataraqtaq ruwankuman? nispa.
[32] Hinallataqmi, iskay mana chanin ruwaq runakunata Jesuswan kuskata chakatamunankupaq aparqanku.
[33] Uman tullu nisqa orqoman chayaruspankun, chaypi Jesusta chakatarqanku. Hinallataqmi, chay mana chanin ruwaq runakunatapas, hukninta paña ladonman, huk kaqtataq lloq'e ladonman chakatarqanku.
[34] Jesustaqmi nirqan: ―Yayay, manan imatachus ruwashasqankuta yachankuchu. Chayrayku paykunata pampachaykuy, nispa. Hinan p'achantapas, sortiaspa rakinakurqanku.
[35] Llaqtantin runakunataq sayaykuspa qhawasharqanku. Hinallataqmi kamachikuqkunapas Jesusmanta asikuspanku nirqanku: ―Hukkunataqa qespichirqanmi. Chay hinaqa, sichus Diospa Cristonpuni chayqa, pay kikintapas qespichikuchunyá, nispanku.
[36] Soldadokunapas, binagreta haywanankupaq asuykuspankuqa, asipayallarqankutaqmi.
[37] Hinan Jesusta nirqanku: ―Sichus judío runakunaq Reynin kanki chayqa, qan kikiykitayá qespichikuy, nispanku.
[38] Jesuspa krusninpitaqmi huk qelqaqa griego rimaypi, latín rimaypi, hinallataq hebreo rimaypi kay hina qelqasqa kashallarqantaq: JUDÍO RUNAKUNAQ REYNINQA KAYMI, nispa.
[39] Chay mana chanin ruwaq runakuna warkusqankumanta huknintaqmi Jesusta k'amirqan: ―Sichus qan Diospa Cristonpuni kanki chayqa, ¡qan kikiykitayá qespichikuy, hinaspa ñoqaykutapas qespichiwayku! nispan.
[40] Huknin kaqñataq ichaqa, kutichispa phiñarikurqan: ―¿Kasqan ñak'ariypi kashaspaykichu, Diosta mana manchakunki?
[41] Cheqaqtapunin ñoqanchisqa, mana chanin ruwasqanchiskunamanta ñak'ariyta chaskishanchis. Paymi ichaqa, mana ima mana allintapas ruwarqanchu, nispa.
[42] Hinan payqa, Jesusta nirqan: ―Señor, qhapaq suyuykipi hamuspayki ñoqamanta yuyariykukuwanki, nispa.
[43] Hinaqtinmi Jesusqa payta nirqan: ―Cheqaqtan niyki: ‘Kunanmi ñoqawan paraisopi kanki,’ nispay, nispa.
[44] Yaqa soqta kaq orasña kashaqtintaq, isqon kaq oraskama llapan hallp'a pachantinpi laqha-tutayay karqan.
[45] Hinan intipas tutayapurqan. Dios yupaychana wasiq kortinantaqmi kuskanmanta llik'ikurqan.
[46] Hinan Jesusqa kunkayoqta qaparispa nirqan: ―¡Yayay, makiykimanmi espirituyta hap'ichimuyki! nispa. Chayta nispantaq, wañukapurqan.
[47] Senturión runataq, chaykuna pasasqanta rikuspa, Diosta hatunchaspan nirqan: ―¡Cheqaqtapunin kay runaqa chanin runa kasqa! nispa.
[48] Chayta qhawanankupaq huñukamuq llapan runakunataq, chay hina kasqanta rikuspanku, qhasqonkuta takakuspa kutipurqanku.
[49] Ichaqa llapan reqsiqninkuna, hinallataq Galileamantapacha qatikamuq warmikunapas, chay imaymanakunata qhawaspankun karullapi kasharqanku.
[50] Chayllamanmi José sutiyoq huk runaqa chaypi kasharqan. Payqa Konsilio Sanedrinpi miembromanta hukninmi karqan. Hinallataq allin runa, chanin runa iman karqan.
[51] Payqa, manan Konsilio Sanedrinpa rimanakusqanku, nillataq imakunachus ruwanankupaq yuyaykuqmasinkuchu karqan. Joseqa, judío runakunaq llaqtan Arimateamanta, hinallataq Diospa qhapaq suyunta suyakuqmi karqan.
[52] Paymi Pilatoman asuykuspa, Jesuspa kuerponta mañarqan.
[53] Krusmanta uraykuchispantaq, ancha balorniyoq sabanawan k'uyuykurqan. Hinan qaqa-qaqapi t'oqosqa aya p'ampana t'oqoman churarqan. Chay aya p'ampana t'oqopiqa manan pitapas churasqakuraqchu karqan.
[54] Sábado p'unchay qallarinanpaq wakichikuy p'unchaymi karqan.
[55] Galileamantapacha Jesuswan hamuq warmikunapas qatikuspanku, aya p'ampana t'oqota rikumurqanku. Hinan imaynatachus kuerponta churamusqankutapas rikumullarqankutaq.
[56] Hinaqtinmi chay warmikunaqa kutipuspanku, q'apashaq t'ikakunatawan q'apashaq hawinakunatawan, ima wakichikurqanku. Kamachikuyninkuman hinataq sábado p'unchaypi samarqanku.