[1] Sábado p'unchay pasaruqtintaqmi, Magdala llaqtayoq Mariaqa, Jakoboq mamitan Mariapiwan, Salomepiwan Jesuspa ayanta hawimunankupaq q'apashaq hawinakunata rantimurqanku.
[2] Semana qallariy p'unchaymi karqan. Hinan chay warmikunaqa, tutallamanta, inti lloqsiramuqtin hina, aya p'ampana t'oqota rirqanku.
[3] Hinan paykunapura ninakurqanku: —¿Pitaq aya p'ampana t'oqo punkupi rumitari tanqapuwasunchis? nispanku.
[4] Chay rumiq sinchi hatun kasqanraykun, chaytaqa nirqanku. Ichaqa, qhawariqtinkutaq, rumiqa tanqasqaña kasqanta rikurqanku.
[5] Aya p'ampana t'oqoman haykuspankutaq, paña ladopi huk waynata tiyashaqta rikurqanku. Chay waynaqa, pampakama yuraq p'achawan p'acharusqan kasharqan. Hinan warmikunaqa, mancharikurqanku.
[6] Paytaqmi ichaqa, warmikunata nirqan: —Ama mancharikuychischu. Chakatasqanku Nazaret llaqtayoq Jesusta maskhashasqaykichisqa, manan kaypiñachu kashan. ¡Kawsarimpunñan! Maymanchus churasqankuta qhawaykuychis.
[7] Ichaqa rispaykichis, yachachisqankunaman, hinallataq Pedroman nimuychis. Payqa qankunaq ñawpaqeykichistan Galilea probinsiaman rishan. Hinan nisqanman hina, chaypiña Jesustaqa rikumunkichis
[8] Warmikunataqmi khatatatasharqanku, hinallataq yuyayninkupi sinchi mana kabesqa kasharqanku. Chaymi, aya p'ampana t'oqomanta lloqsispa ayqekurqanku. Manchakusqankuraykun, mana pimanpas imatapas nirqankuchu.
[9] Jesusqa, semana qallariy p'unchaypin tutallamanta kawsarimpurqan. Chay kawsarimpusqan qhepatataqmi, ñawpaqtaqa Magdala llaqtayoq Mariaman rikhurirqan. Paymantan, Jesusqa qanchis supaykunata qarqosqa karqan.
[10] Mariataqmi, pikunachus Jesuswan kasqaku karqan, paykunaman rispa willamurqan. Paykunaqa, llakisqa, hinallataq waqaspan kasharqanku.
[11] Mariaqa nisqan karqan: ‘Kawsashanmi. Ñoqa kikiytaqmi rikumuni,’ nispan. Chay nisqanta uyarispankutaqmi, paykunaqa mana kreerqankuchu.
[12] Chaymantataqmi, kampoman rishasqanku ñanpi paykunamanta iskayman, huk niraq rich'ayniyoq Jesusqa rikhurirqan.
[13] Paykunaqa kutispankun, wakinninkuman willamurqanku. Hinan paykunatapas manallataq kreerqankuchu.
[14] Chay qhepatataq, chunka hukniyoq yachachisqankunaman Jesusqa rikhurirqan. Paykunaqa, mesaman k'iraykuspan kasharqanku. Hinan mana iñisqankurayku, hinallataq rumi-sonqo kasqankurayku, paykunata phiñarikurqan. Paykunaqa, Jesuspa kawsarimpusqanta rikuqkunatan mana kreerqankuchu.
[15] Hinan paykunata nirqan: —Kay pachantinman rispaykichis, allin willakuyta llapan Diospa kamasqan runakunaman willamuychis.
[16] Pipas iñiqqa, hinallataq bautisasqa kaqqa, qespisqan kanqa. Mana iñiqtaqmi ichaqa, huchachasqa kanqa.
[17] Kay señalkunatataqmi, iñiqkunaqa ruwanqaku: Sutiypin supaykunata qarqonqaku. Hinallataq mosoq rimaykunatapas rimanqaku.
[18] Mach'aqwaykunatan hap'inqaku. Hinallataq, sichus benenota ukyanqaku chaypas, manapunin imananqapaschu. Onqosqakunaq patanmanmi makinkuta churanqaku. Hinan onqosqakunaqa, qhali kapunqaku, nispa.
[19] Señorqa, paykunata rimaykusqan qhepatataq, hanaq pacha wichaypi chaskisqa karqan. Hinan, Diospa paña ladonpi tiyaykurqan.
[20] Lloqsispankutaqmi, yachachisqankunaqa tukuy cheqaskunapi willamurqanku. Señortaqmi paykunata yanaparqan. Ruwasqanku señalkunataqmi willasqanku simita cheqaqcharqan. Ahinapuni kachun.