[1] مَوُیٜ یِمْ بُرْوُویٜیَ سُوَ لْࢻْ کَمُوَدْ کَوُدِیَ کْࢽْدَوُوَ دَبَّرْجَࢽَدَ ࢽغُوجَࢽٜ کَوْرِدْرُو لٜىٰرَࢽِّیَ،
[2] کَوْ کُرَدْ ثِ کَوْرِیٜدْࢽْ تْمْبَلَّدَ ࢽَیٜىٰرَ؞
[3] کَسَرْغَاࢽِّیَ، کَمِࢽْ کْمَ عِیسَیٜدَ ثَوَࢽْدْࢽِّ؞
[4] کْلَ أَدْیٜࢽْ حَࢽْغَلْࢽْجَ ثِجْࢽَ دُوُوࢽْ، کُوࢽغوَ یِࢽْدِ کَجْمُ یِیلْجِیَ غْرٜࢽْجَࢽْ دَادَ تَیِرُو ࢻْلٜیَادَرَ؞
[5] کَرْوُࢽْجَ کَمْدٜ کْلَ ثِدِیَرُو کٜسَکّْرَࢽِّیَ، کُوࢽغوَوَدْیٜ تَیِرُو: «أَوِ ࢽَࢽْغَرُو کَمْ رُووَ ثُرُو أَمْ سَࢽُࢽَیٜࢽْ مَࢽُوِدْ؟
[6] تِ ࢽَ أَدْࢽْ بَوُو، ثِجْࢽَ! أَوُو عِیسَى سَ تِ ثِدِ غَلِلٜىٰࢽْ ࢽَیِرُو وُلْࢽْجَاࢽَدَ تَࢽْغُواْ:
[7] ‹اللَّه کَدَرْجْࢽَ، تَدَ کَمْبٜدَ مُکُّو بِوُمَسُویٜرُو ثَسَکّٜ کْسْکَرُو جَجَغَࢽٜ ثٜىٰسِ، کُورُو کَوُ یَکُّوَ رُووَرُو وَلْجٜ ثِجِ؞›»
[8] دَجِ مَࢽَࢽْجُدَ تَکّٜرَ؞
[9] کَوْرِدْࢽْ وَلَّدَرَࢽِّیَ، أَوُو أَࢽِ سَمَّا مٜوُࢽْ تِلُوࢽْدَ ࢻُوُرَوَ غَدٜسُودَرُو وُلْیٜىٰرَ؞
[10] کَمُوَ أَوُو أَࢽِیَ کْࢽْغَیَمْبَدْرُو وُلْجَاࢽَدْ تَیِمَ مَرْیَمْ مَغْدَلَا یَࢽَّا مَرْیَمْ یَ یَعْࢼُوبَیٜیَ کَمُوَ غَدٜسُووَ وُو؞
[11] أَمَّ مَࢽَࢽْجَدَ کْلَ بَوُووَرُو ࢽغُوجَࢽٜ تَیِیَ ࢽجَسَرَیْرُو وَیٜرَ؞
[12] أَدْ یَیٜ بِتُرُسْ ثِجٜ ثْغَسٜ کَوْرِدْرُو لٜىٰࢽُو؞ ࢽغُجٜ لُوتْکٜىٰࢽِّیَ، بَتَّ لِࢽّٜ غْࢽِیَ، أَوِمَ غَدٜ ثُرُࢽِّ؞ دَجِ أَوُو وَکَّجْࢽَدَ جَوْرُو أَجَࢻْثٜ ࢻَدُورُو وَلَّدَࢽْ؞
[13] یِمْ أَدْمَࢽْ ࢻُوُرَوَࢽْجُیٜ یِࢽْدِࢽْجَ ثِجَࢽٜ بْلَ لَا إِمَوُسْ ثَࢽِ کِلُومٜتْرْ مٜوُࢽْ یِࢽْدِࢽْ غَیْ جٜرُجَلٜمْلَࢽْ دْغَࢽَدْرُو لٜجَیْ دُوُوࢽْ،
[14] کْلَ أَوُو وَکَّجَࢽَ أَࢽِ سَمَّیٜࢽْ جَࢽْدٜ بَدِیٜرَ؞
[15] جَࢽْدٜجَࢽٜ غَسِࢻْثَیْ دُوُوࢽْ، عِیسَى کْلَࢽْجُ کَرْࢽْجٜ تَیِیَ رُوکُّو لٜىٰرَ؞
[16] أَمَّ سِمْࢽْجَࢽْ تِیَ ثَرُࢽَمَ، تِ وُࢽْدُرُو أَسُدُرُو دَࢻْکَادَ؞
[17] عِیسَیٜ تَیِرُو: «کْلَ أَوِیٜࢽْ جَوَلَّࢽْ جَࢽْدٜࢽُوِدْ؟» ثْࢽٜ تَیِیَ کِوُورْࢽِّیَ، کَرْوُ کُتُّوَ غْمْ دَیٜرَ؞
[18] ࢻَلْࢽْجَ ثُࢽْجُ کْلٜیُوࢻَسْ تِرُو: «ثُرُو کُسُوتُّووَ جٜرُجَلٜمْبٜ سَمَّیٜࢽْ ࢽِ تِلُوࢽْمْ أَوُو کَوُ أَࢽِࢽْ وَکَّجْࢽَدَ ࢽُوࢽْمِّ وُو؟» یٜࢽُو؞
[19] تَیِرُو: «أَوِ غْلٜ وَکَّجُو؟» یٜࢽِّیَ، تِرُو: «أَوُو عِیسَى کَمْ ࢽَجَرَتّٜرُو وَکَّجْغْࢽَدْ! تِ ࢽَوِ کُرَ ࢻُوُ اللَّهَ جَمَ سَمَّایٜࢽْ أَوُو ثْدِیَ مَࢽَجِیَ سَمَّ کْࢽْدُوُووَ دُوُوࢽْ،
[20] وُرَوَࢽْدٜ رِمَࢽَّیٜیَ أَمْوُرَوَࢽْدٜیَ وُواْمْ کَرْمُویٜ تِرُو غْࢽَجَارُو تِیَ سْرْثَّغَࢽٜ کْسْکَرُو جَیٜىٰرَ؞
[21] أَمَّ تِمَ کَمْ دُوُوࢽْ جَمَ إِسْرَاءِیلَیٜیَ مٜرُجِمَدْ وُورُو تْمَࢽِیٜࢽَ؞ أَکُّو أَوُو أَࢽِ وَکَّجَࢽَدْ کُ کَوُ یَکُّ؞
[22] کُورُو کَمُوَ لَا ثُرُوࢽْدٜࢽْ لَوَرْ أَجَبَّ أَࢽْدِرُو سَکُّدْࢽَ؞ کُ سُوَ لْࢻْ کَوْرِدْرُو لٜىٰرَࢽِّیَ،
[23] کَمِࢽّجُدَ ثَوَࢽْدْࢽِّ؞ دَجِ وَلْدَࢽٜ إِسَࢽٜ أَࢽْدِرُو مَلَیْیَوَ تَیِرُو ࢽَدْࢽْ ࢻْلٜدَغَࢽٜ تِ رُوࢽْجُوَ ثَࢽٜ وُلْسٜىٰرَ؞
[24] أَدْغَیْمَ أَمْࢽْدٜ لَا یٜ کَوْرِدْرُو لٜىٰرَࢽِّیَ، کَمُوَدْ وُلْجَࢽَدْ غَیْ، أَوُو سَمَّا کَلْکَلُّو ࢽَیٜىٰرَ، أَمَّ تِدَ ثَرُࢽِّ!»
[25] دَجِ عِیسَیٜ تَیِرُو: «أَمْ حَࢽْغَلْ بَوُووَ! کُوَ یَیٜ أَوُو ࢽَوِیَسُو وُلْࢽْجَاࢽَدَ ࢽجَسَرَیْرُو وَࢽُوَّ؞
[26] اللَّه کَدَرْجْࢽَ، تِ أَلْمَسِیوُدْ بُوࢽٜ أَدَ ثَࢽٜ دُوُوࢽْ دَرَجَ ࢽَ اللَّهیٜࢽْ ثُوَࢽْدِوَوُو وَ؟» یٜࢽُو؞
[27] دَجِ أَتَّوْرَ ࢽَوِ مُوسَیٜࢽْ تَمِیَ حَرْ کِتَوُوَ ࢽَوِیَیٜ غَدٜدْرُو کُدٜرُو أَوُو کْلَࢽْجُࢽْ کِتَوُ سَمَّࢽْ رُوُوَدَدَ تَیِرُو ࢻِسَرْیٜىٰࢽُو؞
[28] بْلَ لٜجَیْدَ کَرْࢽْغٜرَࢽِّیَ، عِیسَى ࢻُوُرُو کُوجِ غَیْرُو کِدُو؞
[29] أَمَّ تِیَ لُواْجَࢽٜ: «مَرْࢽٜ، أَࢽْدِیَ رُوکُّو جْمِّیُو! کْࢽْغَلْ ࢽجُکُّرُو ثْدِ، دُࢽِیَ لْمْدُ مَجِ،» یٜرَࢽِّیَ، ࢽغَیٜ تَیِیَ رُوکُّو جْࢻْکٜرَ؞
[30] مَسْࢽَ دِیُورُو ࢽَࢻْکٜرَࢽِّیَ، بُرُودِ ࢽغُوجٜ اللَّهرُو أَرْدِجٜ ࢻْسَکْثٜ تَیِرُو کَیْࢽُو؞
[31] دَجِ کْلَࢽْجَ ࢻْرْمْدٜ تِیَ أَسُیٜرَ، أَمَّ تَیِرُو ࢻَتْکٜىٰࢽُو؞
[32] کَتّٜࢽْجَࢽْ: «کْلَ جَوَلّٜࢽْ مَࢽَ سَدّٜ کِتَوُ اللَّهیٜ ࢻِسَرْسَغَیْ دُوُوࢽْ، کَرْوُࢽْدٜ تَیْ دَجٜ کْجِجْࢽِّ وَ؟» یٜرَ؞
[33] سَدْمَࢽْ ثِجَࢽٜ جٜرُجَلٜمْبُو وَلْدَࢽٜ کْࢽْغَیَمْبَ مٜوُࢽْ تِلُوࢽْدَ أَمَࢽْجَ غَدٜیَ ثَࢻْتَࢽَ ࢽَیٜىٰرَࢽِّیَ،
[34] جَمَیٜ تَیِرُو: «جِرٜمَرُو کْمَدْ کَرْمُولَࢽْ ثِجْࢽَ، حَرْ سِمَࢽُّو ࢻْلٜدْغْࢽَ!» یٜرَ؞
[35] دَجِ تَیِ یِࢽْدِدْ یٜ أَوُو کْلَ جَوَلّٜࢽْ وَکَّجْࢽَا جِرِ بُرُودِ ࢻْسَکْثٜ دَغَرْجْࢽَلَࢽْ تِیَ أَسُجَࢽَادَ وُلْیٜىٰرَ؞
[36] ࢻُوُرَوَدْ کْلَ أَوُو أَࢽِیٜࢽْ جَࢽْدٜ ثَدِ ࢽغَیْ دُوُوࢽْ، عِیسَى کْلَࢽْجُ دَوُࢽْجَࢽْ دَجٜ تَیِرُو: «سَلَمْ أَلٜیْکُمْ!» یٜࢽُو؞
[37] کَیْمٜ کَمْ ࢽُࢽَیٜ لَا ثَرُو ثَࢽٜ کَرْوُࢽْجَ ࢻْتْ کَمْغَدَ؞
[38] أَمَّ عِیسَیٜ تَیِرُو: «أَوِرُو حَࢽْغَلْࢽْدُو ثِجْࢽَدْ؟ أَوِ ࢽَࢽْغَرُو کْلَ وُیٜࢽْ دَࢽْغُوِ؟
[39] أَکُّو مُکُّوࢽِیَ سِࢽِیَ رُیْوُو، وُ کْلَࢽِمَ! لٜسْࢽُواْ رُیْوُو، کَیْمٜلَࢽْ سِلَّا دَا بَوُو، أَمَّ وُ تَکّْࢽَرُو رُوِ،» یٜࢽُو؞
[40] أَدَ وُلْیٜࢽِّیَ، مُکُّوࢽْجُوَ سِࢽْجُوَ تَیِرُو ࢻْلٜیٜىٰࢽُو؞
[41] دَجِ کَرْوُࢽْجَ تَیْ دَجٜ کْجِجْࢽَ یَیٜ، أَجَࢻْثَࢽٜ تِیَ مْرْسَجَࢽِّدْ، عِیسَیٜ: «ࢽَ أَدْࢽْ أَوُو لَا کْمْبُویٜ مبٜجِ وَ؟» ثْࢽٜ تَیِیَ کِوُورُو؞
[42] ࢽجَࢽْغُو بُࢽِ وَرْغَدَیٜ تِرُو کٜکُّدْرَࢽِّیَ،
[43] ثْمُویٜ ࢻُوُࢽْجَࢽْ غِغْرُو؞
[44] دَجِ عِیسَیٜ تَیِرُو: «أَکُّو مَࢽَࢽِ سَ دَوُࢽْدُوࢽْ دْغَکّْࢽَدْࢽْ ࢽَیِرُو وُلْࢽْجَغَکّْࢽَدْ: ‹اللَّه کَدَرْجْࢽَ، أَوُووَ دُوُوࢽْ کْلَࢽِࢽْ ثُرُو أَتَّوْرَ ࢽَوِ مُوسَیٜیَ کِتَوُوَ ࢽَوِیَیٜیَ جَوُرَایٜࢽْ رُوُوَدَدْ سَیْ وَکَّجَیْیَ،›» یٜࢽُو؞
[45] دَجِ عِیسَى کْلَࢽْجَ ࢻْرْمْجٜ کِتَوُوَدَ تَیِرُو بَیِࢽْدُوُ بَدِیٜࢽُو؞
[46] تَیِرُو: «أَکُّو أَوُو کِتَوُلَࢽْ رُوُوَدَدْ: ‹أَلْمَسِیوُدْ بُوࢽٜ ثَیْ، کَوُ یَکُّوَ کَرْمُولَࢽْ ثِجِ،
[47] کُورُو جٜرُجَلٜمْࢽِࢽْ تَمِیَ حَرْ جَمَ دُࢽِیَیٜ سَمَّرُو کُدٜرُو ثُࢽْجُلَࢽْ کَوُرِ تُوَ دِیُووَ غَوَرَ ࢻَࢽْدُووَیٜدَ وُلْجَغَیْ؞›
[48] ࢽَیِمَ شٜدَوُ أَوُو أَࢽِیٜ وُو؞
[49] وُدْ أَوُو بَوَࢽِ وَدُ ࢽغُوجٜ ࢽَیِرُو ࢽجَدِ ثْࢽَّدَ جُوَࢽْجَغَکِّ؞ ࢽَیِ یٜ بْرْࢽِ أَدْࢽْ ࢽَمُّواْ دُوُوࢽْ، حَرْ سَمٜلَࢽْ کْࢽْدُوُو ࢽَیِرُو جْمْࢽْجَغَیْرُو،» یٜࢽُو؞
[50] دَجِ عِیسَى تَیِیَ بْرْࢽِدْࢽْ ثُتُّلُوٜ کَرْࢽْ بْلَ بَیْتَࢽِیٜرُو کِوُدْࢽِّیَ، مُکُّوࢽْجُ یِࢽْدِ سَࢻْثٜ تَیِرُو بَرْغَ دْࢻْکٜىٰࢽُو؞
[51] تَیِرُو بَرْغَ دْࢻْثِیے ࢽغَیْ دُوُوࢽْ، ࢽَࢽْجَ کُولْجٜ تِیَ سَمٜرُو کٜسَدُو؞
[52] تِرُو أَمْبْتْکٜىٰرَࢽِّیَ، کَرْوُکْجِ دَمَ بَوُووَ جٜرُجَلٜمْبُو وَلَّدَرَ؞
[53] أَدْغَیْمَ کُلُّمْ ࢻَدُو اللَّهیٜࢽْ کْمَࢽْدٜیَ ثُوࢽْغُورِ کَسَرْغَ؞