[1] سَ أَدْࢽْ أَمْ لَا ࢽَ عِیسَیٜرُو إِسَࢽٜ لَوَرْ أَمْ ثِدِ غَلِلٜىٰ بُ ࢻِدَ ثَدِ دُوُوࢽْ، غُومْࢽَ بِلَتُسْ ثَکّٜ تَیِیَ ثٜىٰسْࢽَیٜدَ تِرُو کٜکُّدُو؞
[2] عِیسَیٜ تَیِرُو: «غَلِلٜوُ أَࢽِ بُوࢽٜ ࢽغَیْ ثَسَࢽَ ࢽَࢽْغَرُو، غَلِلٜوُ غَدٜ سَمَّا بِوُࢽِࢽْ کُوجَࢽَرُو تْمَࢽُوَّ وَ؟
[3] أَعَ، ࢽَیِرُو وُلْࢽْجَغَکِّ؞ أَدْ یَیٜ، تُوَ دِوَّوُووَ، ࢽَیِ سَمَّ یٜ ࢽُوِ؞
[4] رَ، أَمْ مٜوُࢽْ وُسْکُࢽْ سُورُو کُرُوُ لَکَّ سِلُووَمْبٜ وُرْدٜ کْلَࢽْجَرُو ثُکُّرٜ سَࢽُࢽَدْ، أَمْ غَدٜ جٜرُجَلٜمْࢽِࢽْ دَسَاࢽَدَ بِوُࢽِࢽْ کُوجَࢽَرُو تْمَࢽُوَّ وَ؟
[5] أَعَ، ࢽَیِرُو وُلْࢽْجَغَکِّ؞ أَدْ یَیٜ، تُوَ دِوَّوُووَ، ࢽَیِ سَمَّ یٜ ࢽُوِ؞»
[6] دَجِ عِیسَى تَیِرُو مِسَلْ أَدَ ثْدّٜ: «کَمْ لَا ثُرُو جْرْوُࢽْجُ إِࢽَبّٜࢽْ یَ تَرْمُیٜ کُوکْثْࢽَ دُوُوࢽْ، تَدَ مَدَرُو کَدِࢽِّیَ، ثُوَࢽْدْࢽِّ؞
[7] دَجِ جْرْوُ ࢽجَتُّومَدْرُو: ‹أَکُّو کُ کْرْوُ یَکُّ کْسْکَ أَدْࢽْ تَدَ مَدَرُو إِسْکِّیَ، أَوِمَ ࢻَࢽْدْکِّوَوُودْ؞ ثَلّٜ تِیَ! أَوِرُو بُووُرُو ࢽَ ثْمُویِ؟›
[8] أَمَّ جْرْوُ ࢽجَتُّومَدْیٜ تِرُو: ‹بَࢽِ ࢽغِمْبَ، کَسَدّٜ کْمْࢽٜ أَدْ تِیَ کُولّٜ، ࢻْرْدُࢽْجُ تَمّْکُّو مُرِ ࢻِغْکُّو؞
[9] بَرِمِࢽَّ تَدَ کٜکُّووَ، ࢽغْلَ؞ بَوُووَ، ثَلّْمِ،›» یٜࢽُو؞
[10] یِمْ تُسْتُیٜیَ لَا عِیسَى دَࢽْدَلْࢽِࢽْ جَمَا أَلَمْجِ دُوُوࢽْ،
[11] کَمُ لَا ࢽَدْࢽْ مبٜجِ، کَرُوَ تِیَ لٜجٜ مَسْکِࢽُّو ثْدْࢽَ کْرْوُ مٜوُࢽْ وُسْکُࢽُّو ࢽغُوَدَ رَکْثٜ ثْکُّو دَجِوَوُو؞
[12] عِیسَى تِیَ کِرُࢽِّیَ، بُواْجٜ تِرُو: «یَ، ࢽَࢽْمَسْکِࢽّْمْبَ ࢻَیْدُوَّ!» یٜࢽُو؞
[13] تِرُو مُکُّوࢽْجُ غْࢽَیٜىٰࢽِّیَمَ، کَمُدْ ثِجٜ ثْکُّو دَجٜ اللَّهَ جَجَکْتُ بَدِیٜࢽُو؞
[14] أَمَّ عِیسَى یِمْ تُسْتُیٜیَ کَمُدَ إِسَࢽْغَجْغْࢽَ ࢽَࢽْغَرُو، کُرَ دَࢽْدَلْدْیٜ غْرْغَجٜ جَمَرُو: «ثُرُو مَوُیٜࢽْ کَوُ أَرَکُّ کِدَیٜ کَمْبُو أَمَرْدْغْࢽَ؞ یِمْ تُسْتُیٜیَ غْࢽِ، یِمْ أَࢽِمَا أَرُواْ إِسَࢽْغَࢽْجَا!» یٜࢽُو؞
[15] کْمَیٜ تِرُو کَلَکْثِیٜ: «مْࢽَࢻْکَّ، وُࢽْدُࢽْدُو یَیٜ یِمْ تُسْتُیٜیَ دَلُوࢽْجُ بِ کُورُوࢽْجُ وُیْجٜ ثَدٜ ثَتِّ، غْࢽَ؟
[16] تُو، کَمُ أَدْ، کَدُوُ ࢽَوِ إِبْرَاهِیمْبٜ دُوُوࢽْ إِوُلِیسْ کْرْوُ مٜوُࢽْ وُسْکُࢽُّو تِیَ ثِکّٜرْࢽَدْ ࢽدَ؟ یِمْ تُسْتُیٜیَ تِیَ وُیْدُ وُرُو وَجِمْسْغْࢽِّ وَ؟» یٜࢽُو؞
[17] أَدَ وُلْیٜࢽِّیَ، وَدُوُࢽْجُ سَمَّا ࢽَࢽْغُ کِدَ، أَمَّ جَمَ غَدٜ سَمَّ أَوُو أَجَبَّ أَجَبَّ ثْدِدْیٜ کْجِ ࢻَࢽْجَیْ؞
[18] دَجِ عِیسَیٜ: «ࢽُودُو بَرْغَا اللَّهیٜدْ، أَوِ ثَمُࢽُوࢽْجُ وُو؟ أَوِرُو تِیَ رَتَّلْغْکِّ؟
[19] أَلَمَࢽْجُدْ کَسُࢽِ مُتَرّٜ کَمْ لَا ࢽغُوجٜ جْرْوُࢽْجُلَࢽْ ࢻِجٜ رِجٜ کْسْکَ کُرَرُو وَلْجٜ، حَرْ ࢽغُدُوسُو دْلَمْبَࢽْجُࢽْ ࢻَࢽّجَ ثَدَࢽْدْࢽَدْ غَیْ،» یٜࢽُو؞
[20] کُورُو عِیسَى وَلْدٜ تَیِرُو: «أَوِرُو ࢽُودُو بَرْغَا اللَّهیٜدَ رَتَّلْغْکِّ؟
[21] أَلَمَࢽْجُدْ یِسْ کَمُ لَا ࢽغُوجٜ رُࢽْغُو أَلْغَمَیٜ جَا یَکُّوَ کْلْجٜ دِجٜ، حَرْ ࢻُمْ ࢻُجْࢽَدْ غَیْ،» یٜࢽُو؞
[22] عِیسَى جَوَلْ جٜرُجَلٜمْبٜ جْغَیْیَلَࢽْ بْلَ کُرَࢽْ غَࢽَࢽْسُولَࢽْ جَمَدَ أَلَمْجِ ࢽغَیْ دُوُوࢽْ،
[23] کَمْ لَایٜ تِرُو: «کْمَ، أَمْ غَࢽَمَ وَ ࢽجْکَّوُو ثَوَࢽْدِ؟» ثْࢽٜ تِیَ کِوُورُو؞ عِیسَیٜ جَمَرُو:
[24] «ثِࢽَّ جْکَّدْیٜࢽْ جْکْتْࢽُواْ ࢽغَوُواْ، ࢽَیِرُو وُلْࢽْجَغَکِّ، أَمْ کَدَ ࢽغَوُورُو مَجَیْ، أَمَّ رَکْثَیْوَوُو؞
[25] ࢻَࢽُّواْ، سَ کْمَ ࢻَدُویٜ ثِجٜ ثِࢽَّدَ کْرْࢻْ جَکْثِیَ، ࢽَیِ دٜیَࢽْ دَادَدْ ثِࢽَّ بَࢽْغُوٜ: ‹کْمَ، کَسَغَࢽٜ!› ࢽُوِ، أَمَّ تِیٜ: ‹ࢽَیِیَ ࢽُوࢽْجَکّْࢽِ ࢽدَرَࢽْ کَدِوْمَرُو،› ثْࢽِ؞
[26] دَجِ ࢽَیِ یٜ: ‹أَ! ࢽِیَ کَلُّو بُیْیٜࢽَ یٜ، یَیْیٜࢽَ یٜ، کُورُو ࢻَرْسَمْࢽْدٜسُولَࢽْ جَمَا أَلَمّْمَّ، دِیٜ!› ࢽُوِ،
[27] أَمَّ تِیٜ: ‹ࢽَیِیَ ࢽُوࢽْجَکّْࢽِ ࢽدَرَࢽْ کَدِوْمَرُو؞ وُࢽْ کُرُوُࢽُّو لٜࢽُواْ، ࢽَیِ دِوِ دِیُومَسُو!› ثْࢽٜ کَلَࢽّجَغَیْ؞
[28] «ࢽَدْࢽْ سُو یٜ تْدِ، شٜرِ یٜ ࢽَلْدِ، سَ أَدْࢽْ ࢽَوِ إِبْرَاهِیمْبَ ࢽَوِ إِسْحَٰࢼُوَ ࢽَوِ یَعْࢼُوبَا ࢽَوِیَ غَدٜ سَمَّا ࢽُودُو بَرْغَا اللَّهیٜࢽْ رُوِ، أَمَّ ࢽَیِ کْلَࢽْدُودَ دٜیَرُو غْمْࢽْجَغَیْ؞
[29] أَمْ لَا أَدِࢽَّمْبَ ࢻْدٜیَ یَلَا أَࢽْمْبَلَࢽْ إِسَࢽٜ تَیِ یٜ ࢽُودُو بَرْغَا اللَّهیٜࢽْ مَسْࢽَ دِیُورُو ࢽَࢻْثَیْ؞
[30] أَدْغَیْمَ أَمْ لَا دَرْیٜىٰدْ بُرْوُویٜرُو وَلْجَیْ، کُورُو لَا بُرْوُویٜدْ یٜ دَرْیٜىٰرُو وَلْجَیْ،» یٜࢽُو؞
[31] سَ أَدْࢽْ ࢻَرِسَوَ لَا ࢽَ عِیسَیٜرُو إِسَࢽٜ تِرُو: «لٜࢽٜ، ࢽَ أَدَ کُولّٜ! مَیْ حِرُدُسْ ࢽِیَ ࢽجٜجُورُو مَࢽْجِ،» یٜرَ؞
[32] عِیسَیٜ تَیِرُو: «لٜࢽُواْ، دْلَ جَمْبَمَدْرُو: ‹أَکُّو کُوَ بَرِیَ سٜدَࢽَّ دُکِّ، أَمْ یٜیَ إِسَࢽْغَغْکِّ، کَوُ یَکُّوَ کِدَࢽِدَ تُمُوغْکِّ،› وُلْغْࢽُواْ؞
[33] ࢻَغَتُّو کُوَ بَرِیَ وَارٜیَ جَوَلْࢽِ غَکِّ؞ جٜرُجَلٜمْلَࢽْ غْࢽِیَ، ࢽَ غَدٜࢽْ ࢽَوِ ࢻِمَا ثٜىٰسِوَوُو،» یٜࢽُو؞
[34] کُورُو عِیسَى وَلْدٜ: «جٜرُجَلٜمْ، جٜرُجَلٜمْ، ࢽَیِ دُوُوࢽْ ࢽَوِیَدَ رُورُو یٜجُوٜ أَمْ جُوَࢽْجَاࢽَدْرُو دُوࢽْغُرْ کَوْیٜ غْغْࢻْکْوٜ سَࢽُیْدْ! أَلَمَ کُوُیْ تَدَوَࢽْجُ ࢻٜࢻٜدُووَࢽْجُࢽْ جَکْثِدْ غَیْ، ࢽغْوُرُو ࢽَیِیَ ࢽَࢽِࢽْ ثَࢻْتُرُو رَاکّْࢽَ، أَمَّ وَیٜوْ؞
[35] أَکُّو ࢻَࢽّدُو دٜ سُلْ کُولْࢽْجَاࢽَ؞ ࢽَیِرُو وُلْࢽْجَغَکِّ، وُوَ سُرُوَّوُو، حَرْ ࢽَیِیٜ: ‹بَرْغَا تِ ثُ کْمَࢽْدٜىٰࢽْ إِسِمَدْ!› وُلُّوِرُو؞»