[1] دَجِ عِیسَى ࢻُوُرَوَࢽْجُرُو کْلَ سَوِسُو تْمَ کُولْجَࢽِّلَࢽْ مُودُوَ ثَدُویٜࢽْ مِسَلْ أَدَ کِدُّو؞
[2] تَیِرُو: «بْلَ لَاࢽْ أَلْکَلِ لَا اللَّه یٜیَ رِجْࢽِّ، کَمْ یٜیَ ࢽَࢽْغُجْࢽِّ مبٜجِ؞
[3] کُورُو ثُرُو بْلَ أَدْیٜࢽْ کَمُ کوَ ࢻَثّْغْࢽَا لَا یٜ مبٜجِ؞ کُلُّمْ ࢽَ أَلْکَلِدْیٜرُو إِسٜ تِیَ لُواْجٜ: ‹وُرُو شَرَ کْلَ کْلَدُوࢽِیٜࢽْ سْدّٜ!› ثْࢽِ؞
[4] تُسّْࢽَ سُوࢽْجُ ثْمُواْࢽِّ، أَمَّ ࢽغَوُو أَدْیٜࢽْ أَلْکَلِدْ کَرْوُࢽْجُࢽْ: ‹اللَّه یٜیَ رِکّْࢽِ، کَمْ یٜیَ ࢽَࢽْغُࢽْکّْࢽِ یَیٜ،
[5] کَمُ أَدْ کُلُّمْ وُوَ سُوُولْسْࢽَ ࢽَࢽْغَرُو، تِرُو شَرَ یِدّْکِّ، بَرٜ کْࢽْدٜ ࢽغْوُࢽْجُدْࢽْ کَرْوُࢽِ تْغْمْبُو جَدْࢽِّرُو!› یٜࢽُو؞»
[6] دَجِ کْمَدْیٜ: «أَوُو أَلْکَلِ جِرٜࢽَمْبُمَ أَدْ وُلْجْࢽَدَ ࢻَࢽُّواْ!
[7] تُو، اللَّه ࢽدَ، أَمْ کْرٜجْࢽَ بُࢽٜیَ کَوْسُوَرُو تِرُو سُوࢽْجَ ثَدِّدْرُو شَرَ کْلَ کْلَدُووَࢽْجَیٜࢽْ ثْدِّوَوُو وَ؟ رَ، کَوُ کَدَرُو تُسّْࢽَ دُوُوࢽْ، تَیِیَ بَࢽَجِیے؟
[8] ࢽَیِرُو وُلْࢽْجَغَکِّ، دُوَمَࢽْ شَرَࢽْجَ کَمْجِ؞ أَدْ یَیٜ سَ تَدَ کَمْبٜدْ دُࢽِیَرُو وَلْدٜ إِسِیَ، کُورُو یَیٜ کَمْبْرْسٜ دُࢽِیَلَࢽْ ثُوَࢽْدِ وَ؟»
[9] دَجِ عِیسَى أَمْ تَیِ کْلَࢽْجَا جِرٜوُرُو ࢽغُوجَࢽٜ أَمْ غَدٜیَ رُجَࢽَرُو مِسَلْ أَدَ کِدُّو:
[10] «أَمْ یِࢽْدِ مُودُوَ دِیُورُو ࢻَدُو اللَّهیٜرُو لٜجَࢽٜ کَسَرْغَوُو؞ کَمْ ࢻَلْدْ ࢻَرِسَ، ࢻَلْدْ یٜ أَکِّ مُواْمَ؞
[11] ࢻَرِسَدْ ثِجٜ دَجٜ کَرْوُࢽْجُࢽْ مُودُوَ ثْدٜ: ‹اللَّه، وُ أَمْ غَدٜیَ غَدٜ ࢽَࢽْغَرُو وُسٜࢽْجْکّْࢽَ؞ وُ بَرْوُ غْࢽِ، دِوِ دِیُومَ غْࢽِ، کْࢽْجْࢽَمَ غْࢽِ، بِ أَکِّ مُواْمَ أَدْ غَیْ غْࢽِ؞
[12] وُدْ ثُرُو مَوُیٜࢽْ یِࢽْدِرُو أَسٜمْ دِکِّ، کُورُو أَوُو ࢻَࢽْدْکّْࢽَ ࢽغَࢽْ ࢻَلْ ثُرُو مٜوُیٜࢽْ سَدَارُو یِکِّ،› یٜࢽُو؞
[13] أَمَّ تِ أَکِّ مُواْمَدْ، ࢽغَوُولَࢽْ دَادَ کْلَمَ سَࢻْثْࢽِّࢽْ ࢽغَࢽْجِࢽْجُ بَکْثِیَرُو: ‹اللَّه، وُ بِوُمَ، وُوَ ࢽجُࢽُوسْࢽٜ!› یٜࢽُو؞
[14] ࢽَیِرُو وُلْࢽْجَغَکِّ، ࢻَرِسَدَ غْࢽِ، أَکِّ مُواْمَدَ اللَّه جِرٜمَرُو ࢽغُوجُو؞ ࢽُوࢽُواْ، وُࢽْدُ دُوُوࢽْ کْلَࢽْجُوَ جَجَکْثْࢽَمَدْ، تِیَ أَوِمَرُو ࢽغُوجَیْوَوُو؞ کُورُو کَمْ دُوُوࢽْ کْلَࢽْجُوَ أَوِمَرُو ࢽغُوجْࢽِّمَدْ، تِیَ جَجَکْثَیْ،» یٜࢽُو؞
[15] أَمْ لَا عِیسَى یَلَّࢽْجَ سَࢽَࢽَا مُکُّوࢽْ لٜجُورُو ࢽَࢽْجُرُو ثَوُدِ دُوُوࢽْ، ࢻُوُرَوَدْ أَدَ کٜرُࢽِّیَ، أَمْدَ وُسَیٜرَ؞
[16] أَمَّ عِیسَى یَلَّ سَࢽَࢽَدَ بُواْجٜ ࢻُوُرَوَࢽْجُرُو: «یَلَّدَ کُولُّواْ ࢽَࢽِرُو إِسَ، بَرٜ تَیِرُو دَࢻْکْوِّ! ࢽُودُو بَرْغَا اللَّهیٜدْ أَمْ تَیِ غَیْیٜ ࢽُوَࢽْجَ، دِیٜ!
[17] جِرٜمَرُو ࢽَیِرُو وُلْࢽْجَغَکِّ، وُࢽْدُ دُوُوࢽْ تَدَاࢽَ غَیْ ࢽُودُو بَرْغَا اللَّهیٜدَ کَسَثّْࢽِّدْ تْمَّرُو ࢽغَیِوَوُو!» یٜࢽُو؞
[18] کَمْ کُرَ لَایٜ عِیسَرُو: «مَلْمْ ࢽغْلَمَ، أَوِ دِکّٜ رُو سَوِسُویٜ ࢻَࢽْدْکِّ؟» ثْࢽٜ تِیَ کِوُورُو؞
[19] عِیسَیٜ تِرُو: «أَوِرُو وُوَ ࢽغْلَمَࢽْ بُواْسْمِ؟ اللَّه غْࢽِیَ، وُࢽْدُمَ ࢽغْلَ بَوُو؞
[20] وَدَوَدَ ࢽُوࢽْمَّ: بَرٜ کْࢽْجْࢽَ دِمِّ، بَرٜ رُو کَمْبٜ تُلُوُمِّ، بَرٜ ࢽَمْبَرْوُ دِمِّ، بَرٜ شٜدَکَمْبُ دِمِّ، بَوَࢽْمْبَ یَࢽْمْبَرُو دَرَجَ یٜ!» یٜࢽُو؞
[21] کَمْدْیٜ: «تْࢽْ غَࢽَࢽِلَࢽْ وَدَ أَࢽِ سَمَّا غَکّْࢽَ،» یٜࢽُو؞
[22] عِیسَى أَدَ ࢻَࢽْغٜࢽِّیَ، تِرُو: «کُورُو یَیٜ أَوُو ࢻَلْ ࢽِیَ مَوْࢽْجْࢽَ؞ کْࢽْدَࢽْمْ سَمَّا لَدٜ تَلَاوَرُو دَغَرْغْࢽٜ، أَرْسِیے سَمٜلَࢽْ ࢻَࢽْدْمِ؞ دَجِ أَرٜ وُوَ سْغَیْ!» یٜࢽُو؞
[23] کَمْدْ أَدَ ࢻَࢽْغٜࢽِّیَ، تِ جَوْرُو غَرِوُ ࢽَࢽْغَرُو کَرْوُکُتَّ تِیَ تَیْ دَجٜ کِدَ؞
[24] عِیسَى کَرْوُکُتَّࢽْجُدَ کِرُࢽِّیَ، تِیٜ: «غَرِوُیٜ ࢽُودُو بَرْغَا اللَّهیٜرُو ࢽغَوُوࢽْجُ جَوْرُو جَوْ، دِیٜ!
[25] غَرِوُیٜ ࢽُودُو بَرْغَا اللَّهیٜرُو ࢽغَوُوࢽْجُدْرُو کَرِمُویٜ ثُوُرِ رِوُرَیٜࢽْ کُودُࢽْجُمَ بُدُ وُو!» یٜࢽُو؞
[26] أَمْ أَدَ ࢻَࢽْجَࢽَدْیٜ تِرُو: «أَسْشَ! أَدْغَیْیَ، وُࢽْدُ غْلٜ ࢽجْکَّوُو ثُوَࢽْدِ؟» یٜرَ؞
[27] عِیسَیٜ: «أَوُو کَمْبُو یُوجِوَوُودْ اللَّهرُو یُوجِ!» یٜࢽُو؞
[28] دَجِ بِتُرُسّٜ تِرُو: «أَکُّوࢽْدٜ أَوِࢽْدٜسُو کُولِّیٜ ࢽِیَ ࢽجْغَیْیٜࢽَ،» یٜࢽِّیَ،
[29] عِیسَیٜ: «جِرٜمَرُو ࢽَیِرُو وُلْࢽْجَغَکِّ، وُࢽْدُمَ ࢽُودُو بَرْغَا اللَّهیٜ ࢽَࢽْغَرُو ࢻَدُو، بِ کَمُ، بِ یَاࢽَ، بِ بَوَ، بِ یَ، بِ یَلَّ کُولْجْࢽَدْ،
[30] دُࢽِیَ أَدْمَࢽْ أَوُو کُولْجْࢽَدْمَا ࢽغْوُرُو کُوجْࢽَ ثُوَࢽْدِوَوُودْمَ بَوُو؞ کُورُو لٜیْرَ وَکَّجِیَ، رُو سَوِسُویٜ یٜ ثُوَࢽْدِ،» یٜࢽُو؞
[31] عِیسَى مٜوُࢽْ یِࢽْدِࢽْدَ سْغْرِرُو ثُتُّلُوٜ تَیِرُو: «ࢻَࢽُّواْ، جٜرُجَلٜمْبُو لٜࢽِیٜ، کُورُو أَوُو ࢽَوِیَسُو کْلَ تَدَ کَمْبٜدْیٜࢽْ رُوُجَࢽَ سَمَّ وَکَّجِ؞
[32] أَمْ تِیَ ثَدَࢽٜ مُکُّو کْرْدِیَیٜرُو ثَسَکّٜ، تَیِ یٜ تِیَ رُجَࢽٜ رَرَجَࢽٜ تِرُو لَلَّرِ تْوَجَغَࢽٜ
[33] کِرْوُولَࢽْ جَجَرْجَࢽٜ رُورُو ثٜىٰسِ؞ کُورُو کَوُ یَکُّوَ رُووَرُو وَلْجٜ ثِجِ،» یٜࢽُو؞
[34] أَمَّ ࢻُوُرَوَدْ أَوِمَ أَسُجَࢽِّ؞ مَاࢽَࢽْجُ تَیِرُو غْرَآدَ ࢽَࢽْغَرُو، أَوُو وُلْجْࢽَدَ ࢽُوجَࢽِّ؞
[35] عِیسَى بْلَ جٜرِکُویٜ کَرْࢽْغٜࢽِّیَ، کَمْبُ لَا ثِ جَوَلّٜࢽْ ࢽَࢻْکَدَ لُواْ ثْدِ مبٜجِ؞
[36] جَمَ کُوجَیْرُو ࢻَࢽْغٜࢽِّیَ، أَوِ وَکَّجُورُو کِوُورُو؞
[37] تِرُو: «عِیسَى کَمْ ࢽَجَرَتّٜ کُودُ ثْدِ،» یٜرَ؞
[38] دَجِ کُواْ سَࢻْثٜ: «عِیسَى تَدَ مَیْ دَاوُدَیٜ، وُوَ ࢽجُࢽُوسْࢽٜ!» یٜࢽُو؞
[39] أَمْ ࢻُوُ غْرْجَࢽَ لٜجَیْدْ تِرُو جَکَّدٜ مْدْکْ ࢽَࢻْثُو یٜرَ، أَمَّ ثَیٜیَ کُوجْࢽَرُو کُواْ سَࢻْثٜ: «تَدَ مَیْ دَاوُدَیٜ، وُوَ ࢽجُࢽُوسْࢽٜ!» یٜࢽُو؞
[40] دَجِ عِیسَى دَجٜ تِیَ ࢽَࢽْجُرُو ثَوُدُو یٜࢽُو؞ کٜوُدْࢽِّیَ، تِرُو:
[41] «أَوِ ࢽِرُو ࢽجْدّْکِّیَ، رَامْ؟» ثْࢽٜ تِیَ کِوُورُو؞ تِیٜ: «کْمَ، سِمْ ࢻَࢽْدْکِّیَ، رَاکُّو!» یٜࢽُو؞
[42] دَجِ عِیسَیٜ تِرُو: «سِمْ ࢻَࢽْدٜ! کَمْبْرْسٜࢽْمْ ࢽَࢽْغَرُو ࢽَࢽْلٜوَ ࢻَࢽْدْمَّ،» یٜࢽُو؞
[43] سَدْمَࢽْ سِمْ ثُوَࢽْدٜ اللَّهَ ثُࢽْغُورِیَرُو عِیسَىٰ غِیَ؞ جَمَ سَمَّ أَدَ کٜرُࢽِّیَ، تَیِ یٜ اللَّهَ جَجَکْتُ بَدِیٜرَ؞