[1] تِیُوࢻَلَسْ، اللَّه ࢽغْوُرُو! أَمْࢽْدٜ ࢽغْوُ غْرْغَمْ کْلَ لَمَرَّ دَوُࢽْدٜࢽْ وَکَّجَࢽَ أَࢽِیٜࢽْ رُوُدُرُو ࢽغْسَّࢽَ،
[2] جِرِ أَمْ دُوُوࢽْ تْࢽْ بَدِدُرَمْࢽِࢽْ أَوُو أَࢽِیَ سِمْࢽْجَࢽْ ثَرُࢽَا مَࢽَ اللَّهیٜ سَتُّوُمَسُورُو وَلْجَࢽَادْ أَࢽْدِرُو إِسَࢽُوسَاࢽَدْ غَیْ؞
[3] بَرْغَࢽْمِّࢽْ، تْࢽْ بَدِدُرَمْࢽْجَࢽْ أَوُو أَࢽِ سَمَّا غَکّٜ حَࢽْغَلَّیٜࢽْ کُوکُورْکّٜ ࢻَکّْࢽَ ࢽَࢽْغَرُو، وُ یٜ تَیِیَ سَوِࢽْکّٜ ࢽِرُو کِتَوُلَࢽْ رُوُࢽْجْغْکِّ یٜکُّو؞
[4] ࢽغَیْࢽِࢽْ أَوُووَ ࢽِرُو ࢽجَسَکّْرَࢽَ سَمَّا تَبَّتُّو ࢽُوࢽْمِ؞
[5] جَمَࢽْ مَیْ حِرُدُسْ لَرْدُ یَحُدِیَیٜ ثُࢽُودِدْࢽْ، رِمَࢽْ لَا مبٜجِ کْوُ رِمَࢽَّ أَبِیَیٜࢽْ کْرْغَ، ثُࢽْجُ جَکَرِیَّ؞ کَمُࢽْجُ یٜ کَدُوُ ࢽَوِ هَـٰرُوࢽَیٜ، ثُࢽْجُ أَلِسَبَتُ؞
[6] تَیِ یِࢽْدِسُو ࢽَ اللَّهیٜࢽْ جِرٜوُ، وَدَ کْمَࢽْدٜىٰ سَمَّا تَلْدُ بَوُورُو جَاࢽَ؞
[7] تَدَ ثَوَࢽْدْࢽِّ، أَلِسَبَتُ رَکْثٜ ثَمْبِوَوُو ࢽَࢽْغَرُو، کُورُو تَیِ یِࢽْدِ کَوُ ࢽغْوُ جَوُࢽَ؞
[8] کْوُ أَبِیَیٜ سَࢽْجَ دِرِجٜ کِدْࢽِّیَ، جَکَرِیَّ یٜ کِدَࢽْجُ ࢽَࢽْرِمَࢽّٜ ࢻُوُ اللَّهیٜࢽْ بَدِیٜࢽُو؞
[9] کْلَ أَدَ رِمَࢽَّیٜدْࢽْ کَمْࢽْجَ ࢻَلْ ࢻَدُو اللَّهیٜ ࢽَ دَرَجَارُو ࢽغَوُو کَاجِ ثَکُّورُو وَلَوَلَ ثَدٜ جَکَرِیَّا کْرٜىٰرَ؞
[10] سَ کَاجِ ࢽجَکُّویٜࢽْ جَمَ سَمَّ بَلْبَلَّدْࢽْ ثَࢻْتَࢽَ مُودُوَ ثَدِ دُوُوࢽْ،
[11] مَلَیْیَ کْمَࢽْدٜىٰ لَا کْمْبُورَمْ کَاجِ ࢽجَکُّورَمْبٜࢽْ دَادَ تِرُو ࢻْلٜیَادَ؞
[12] جَکَرِیَّ تِیَ کِرُࢽِّیَ، حَࢽْغَلْࢽْجُ جَدٜ کَرْوُࢽْجُ ࢻْتْ کَمْغَدَ؞
[13] أَمَّ مَلَیْیَدْیٜ تِرُو: «جَکَرِیَّ، بَرٜ رِࢽْمِّ، اللَّه مُودُوَࢽْمْ ثْمُواْࢽَ؞ کَمُࢽْمْ أَلِسَبَتُ ࢽِرُو تَدَ کُوࢽغوَ ࢽجْکَّمْبِ، تِرُو ثُ یَحْیـَى یَکّٜ؞
[14] تِرَمْࢽِࢽْ جَوْرُو کَرْوُࢽْمْ کْجِجِ، کُورُو تَمْبُوࢽْجُدْیٜ أَمْ کَدَ یٜ کْجِ ࢻَࢽْجَیْ؞
[15] تِ ࢽَ کْمَࢽْدٜىٰࢽْ کَمْ دَرَجَارُو وَلْجِ؞ بَرٜ دِبٜࢽْ بِ مبَلْ ࢻِمَا ثَࢽِّ، کَوُ تَمْبِمَرُو رُحُ اللَّهیٜ تِلَࢽْ دْغَیْ؞
[16] کَدُوُ إِسْرَاءِیلَیٜ کَدَا جَوَلْ اللَّه کْمَࢽْجَیٜرُو کَلَکْثِیے؞
[17] تِدْ رُووَ کْࢽْدُوُووَ ࢽَوِ إِلْیَیٜلَࢽْ کْمَدَ بُرْوُوجٜ إِسٜ بَوَسُووَ تَدَوَࢽْجَسُووَ سُولُوجِ، أَمْ أَࢽْسِیَ اللَّهیٜ یٜ حَࢽْغَلْ جِرٜوُیٜرُو کَلَکْثِیے؞ أَدْغَیْمَ کْمَدْرُو جَمَا دَبَّرْجِیے،» یٜࢽُو؞
[18] أَمَّ جَکَرِیَّیٜ مَلَیْیَدْرُو: «أَوِیَوِࢽْ مَࢽَ أَدَ جِرٜرُو ࢽُوکِّ؟ أَکُّو وُ کِیَرِࢽْکّْࢽَ، کَمُࢽِ یٜ کْمُرْجُوجْࢽَدْ،» یٜࢽُو؞
[19] دَجِ مَلَیْیَدْیٜ تِرُو: «وُمَ جِبْرِیلَّ ࢻُوُ اللَّهیٜࢽْ دَدُمَدْ وُو؞ تِمَ وُوَ ࢽَࢽْمْبُو لَوَرْ کْجِ أَدَ ࢽجُکُّدْکُّورُو سُࢽُودُو؞
[20] أَمَّ مَࢽَࢽِ یَسَرَمِّدْ، حَرْ أَوُو أَࢽِ وَکَّجَیْدْرُو، مْدْکْ ࢽَمّْمٜ مَࢽَ دِمْبَوُورُو وَلّْمِ؞ أَوُو وُلْࢽْجْغْکّْࢽَ أَدْ سَࢽْجُ ثْدِیَ، تَبَّتُّو وَکَّجِ؞»
[21] جَمَ جَکَرِیَّا غُرٜجَیْ ࢽغَیْ دُوُوࢽْ، ࢽَ دَرَجَادْࢽْ جَوْرُو تُسّْࢽَدَ أَجَࢻْکٜرَ؞
[22] کِلُوُࢽِّیَ، مَࢽَ تَیِرُو ࢽجْدُّو تِرُو تِیٜرُو؞ جَمَدْ أَوُو أَجَبَّ لَا ࢽَ دَرَجَالَࢽْ تِرُو ࢻْلٜدْغْࢽَرُو أَسُیٜرَ؞ مُوَمُوَࢽْ غْࢽِیَ، تَیِرُو رَکْثٜ مَࢽَجِیوَوُو، مْدْکْ ࢽَࢻْکٜࢽُو؞
[23] کِدَ ࢽَࢽْرِمَࢽّٜ سَࢽْجُ کٜرْࢽِّیَ، ࢻَدُورُو وَلَّدَ؞
[24] ࢽغَوُو کَوُ أَࢽِیٜࢽْ کَمُࢽْجُ أَلِسَبَتُ ثُرُو ࢽغُویٜࢽُو؞ کْࢽْدَوُ أُوُرُو کُوُلٜرُو کْلَࢽْجُ ثَکّٜ کَرْوُࢽْجُࢽْ:
[25] «أَکُّو سٜرْ کْمَࢽْدٜ سْدّْࢽَ؞ کَوُ أَࢽِࢽْ کَࢽْجِمَرِࢽْجُ وُرُو ࢻْلٜسِیٜ دَوُ أَمْبٜࢽْ ࢽَࢽْغُࢽِ ثُتُّلُوُࢽَ،» یٜࢽُو؞
[26] أَلِسَبَتُ ثُرُو ࢽغُوجْࢽَیٜ کْࢽْدَوُ أَرَکُّوَ اللَّه مَلَیْیَ جِبْرِیلَّا بْلَ ࢽَجَرَتْ ثَࢽِ ثِدِ غَلِلٜىٰدْرُو ثُࢽُودٜ
[27] ࢽَ ࢻٜرُو کْلَیَکُّ لَا تْمَجِࢽْجُ کَدُوُ مَیْ دَاوُدَیٜ لَا ثُࢽْجُ یُوسُࢻُیٜرُو لٜىٰࢽُو؞ ࢻٜرُودْ ثُࢽْجُ مَرْیَمْ؞
[28] مَلَیْیَدْ ࢽَ مَرْیَمْبٜرُو إِسٜ تِرُو: «وُسٜ، ࢽِ کْمَࢽْدٜ جَوْرُو بَرْغَ دْمْࢽْجْغْࢽَمَدْ! کْمَدْ ࢽِیَ رُوکُّو،» یٜࢽُو؞
[29] مَرْیَمْبٜ حَࢽْغَلْࢽْجُ کْلَ لٜوَ أَدْیٜࢽْ جَوْرُو ثِجٜ أَوِ مَاࢽَࢽْجُرُو کْلَࢽْجُ ثُوُورِ دُوُوࢽْ،
[30] مَلَیْیَدْیٜ تِرُو: «مَرْیَمْ، بَرٜ رِࢽْمِّ، اللَّه ࢽِرُو بَرْغَ دْمْࢽْجْغْࢽَ؞
[31] أَکُّو ثُرُو ࢽغُوࢽْمٜ تَدَ کُوࢽغوَ یَمْبْمِ، تِرُو ثُ عِیسَى یَکّٜ؞
[32] تِ کَمْ دَرَجَارُو وَلْجٜ تِیَ تَدَ مَیْ سَمٜمَیٜلَࢽْ بُواْجَیْ؞ اللَّه کْمَࢽْدٜ تِرُو کْرْمَیْ کَارِࢽْجُ مَیْ دَاوُدَیٜدَ ثِ؞
[33] أَدْغَیْمَ جَمَ یَعْࢼُوبَیٜیَ حَرْ أَبَدَرُو ثُࢽُودِ، کْرْمَیْࢽْجُ یٜ تْمَّرُو ثٜرِوَوُو؞»
[34] دَجِ مَرْیَمْبٜ مَلَیْیَدْرُو: «أَوِیَوِࢽْ أَتّْ یُوجِ، وُ ࢽغَلْتٜمَ کوَ ࢽُوکّْࢽِدْ؟» ثْࢽٜ تِیَ کِوُورُو؞
[35] مَلَیْیَدْیٜ تِرُو: «رُحُ اللَّهیٜ کْلَࢽْمْبُو جْࢻْثِیٜ کْࢽْدُوُو مَیْ سَمٜمَیٜ ࢽِیَ ࢻُوࢻُووْ غَیْرُو جَࢽّجِ؞ أَدْ ࢽَࢽْغَرُو تَدَ تَیِرْ ࢽِلَࢽْ تَمْبِدَ تَدَ اللَّهیٜلَࢽْ بُواْجَیْ؞
[36] أَکُّو کْرَمِࢽْمْ أَلِسَبَتُ یٜ ࢽَࢽْکْمُرْجُوࢽْجُࢽْ ثُرُو ࢽغُوجْࢽَ؞ کَمُ رَکْثٜ ثَمْبِوَوُو ثَࢽِدْ، کْرْمَ ثُرُوࢽْجُ کْࢽْدَوُ أَرَکُّیٜیَ؞
[37] ࢽُوࢽٜ، أَوِمَ اللَّهرُو تِیٜرِ بَوُو!»
[38] مَرْیَمْبٜ: «وُ کَࢽْجِ کْمَࢽْدٜىٰ؞ کْلَ مَࢽَࢽْمْبٜࢽْ وَکَّجُو!» یٜࢽُو؞ دَجِ مَلَیْیَدْ تِیَ کُولْجٜ سَࢻْکَدَࢽْ؞
[39] یِمْ أَࢽِࢽْ مَرْیَمْ ثِجٜ دُوَدُوَࢽْ بْلَ ثِدِ یَحُدَیٜ ثُرُو کَوْوَ کُرَ کُرَیٜࢽْ دْغَࢽَ لَارُو لٜجٜ
[40] ࢻَدُو جَکَرِیَّیٜرُو ࢽغَیٜ أَلِسَبَتُرُو سَلَمْغٜىٰࢽُو؞
[41] أَلِسَبَتُ سَلَمْدُوُࢽْجُدَ ࢻَࢽْغٜࢽِّیَ، تَدَ ثُرُوࢽْجُیٜدْ مُوجِ کِدُو؞ رُحُ اللَّهیٜ أَلِسَبَتُرُو جْࢻْثِیٜ
[42] کُواْ دُࢽُووَرُو سَࢻْثٜ: «ثُرُو کَمُوَیٜࢽْ ࢽِمَ بَرْغَا وُو، تَدَ ثُرُوࢽْمْبٜدْ یٜ بَرْغَا!
[43] کُورُو أَوِرُو غْلٜ کْمَࢽْدٜ وُرُو سٜرْ سْدّٜ، حَرْ یَ کْمَࢽِیٜ ࢽَࢽِرُو إِسِدْ؟
[44] أَکُّو سَلَمْدُوُࢽْمْدَ ࢻَࢽْغٜکّْࢽِیَ، تَدَ ثُرُوࢽِیٜدْ کَرْوُکْجِرُو مُوجِ کِدُو؞
[45] أَوُو کْمَࢽْدٜ ࢽِرُو وُلْࢽْجْغْࢽَدْ وَکَّجِرُو مْرْسَࢽْمَّدْ، بَرْغَࢽْمْ!» یٜࢽُو؞
[46] دَجِ مَرْیَمْبٜ: «کَرْوُࢽِ کْمَࢽْدٜیَ جَجَکْثِ،
[47] رُوࢽِ اللَّه ࢽجْکَّیِمَࢽِلَࢽْ کْجِ ࢻَࢽْجِ؞
[48] وُ کَࢽْجِࢽْجُدَ ثُرُو ࢽَࢽْتَلَاࢽِیٜࢽْ سُرُࢽٜ ࢽغُرْࢽُوسْࢽَ؞ ࢽَ أَدْࢽْ ࢻُوُࢽْ أَمْ جَمَࢽْ سَمَّیٜ وُوَ بَرْغَالَࢽْ بُواْسَیْ،
[49] مَیْ کْࢽْدُوُومَ سٜرْ کُرَ وُرُو سْدّْࢽَ ࢽَࢽْغَرُو؞ ثُࢽْجُ دَرَجَا؞
[50] «جَمَࢽْ کُرٜىٰࢽْ تَیْ جَمَࢽْ ࢽغُسُورُو کَࢽْجِمَرِࢽْجُ أَمْ تِیَ رِجَࢽَرُو ࢻْلٜجِیے؞
[51] کْمَࢽْدٜ مُکُّوࢽْجُࢽْ کْرْمَیْ ࢻْلٜجٜ، أَمْ کَرْوُࢽْجَࢽْ رُوکُرَا تَرْجْࢽَ؞
[52] مَیْیَسُو کْرْمَیْلَࢽْ ثْسَیٜ سْلْجٜ، تَلَاوَسُو یٜیَ دَرَجَارُو ثْدْࢽَ؞
[53] أَمْ کْࢽَࢽْجَاسُووَ أَوُو ࢽغْلَࢽْ أَمْبَجٜ، غَرِوُوَسُو یٜیَ مُکُّو دٜیَ دُجْࢽَ؞
[54] کْمَࢽْدٜ کَࢽْجِمَرِࢽْجُ ࢻْلٜدُ کُولْجْࢽِّ، کَࢽْجِࢽْجُ إِسْرَاءِيلَا بَࢽَجْغْࢽَ،
[55] أَمْوُرَوَࢽْدٜ ࢽَوِ إِبْرَاهِیمْبَ کَدُوُࢽْجُوَرُو حَرْ أَبَدَرُو وُلْجْغْࢽَدْ غَیْ؞»
[56] مَرْیَمْ ࢻَدُو أَلِسَبَتُیٜࢽْ کْࢽْدَوُ یَکُّ غَیْرُو ࢽَࢻْکٜࢽِّیَ، ࢻَࢽّجُرُو وَلَّدَ؞
[57] أَلِسَبَتُ سَࢽْجُ ࢽجَمْبُویٜ کِدْࢽِّیَ، تَدَ کُوࢽغوَ کٜمْبُو؞
[58] أَمْ ࢻَࢽّجُیٜیَ کْمَسْکِیَࢽْجُوَ سٜرْ کُرَ کْمَࢽْدٜ تِرُو ثْدّْࢽَدَ ࢻَࢽْجَࢽٜ کَرْوُکْجِࢽْجَ تِرُو ࢻْلٜیٜىٰرَ؞
[59] کَوُ وُسْکُوَ جَمَ کَجَࢽْجُرُو کَدِرَࢽِّیَ، تِرُو ثُ بَوَࢽْجُ جَکَرِیَّیٜ ࢽجَکُّو مَیٜرَ،
[60] أَمَّ یَࢽْجُیٜ: «أَعَ، تِیَ یَحْیـَلَࢽْ بُواْجَیْ،» یٜࢽُو؞
[61] تَیِیٜ تِرُو: «وُࢽْدُمَ ثُرُو کْرَمِیَࢽْمْبٜࢽْ ثُ أَدَ بَوُو!» یٜرَ؞
[62] دَجِ مُوَمُوَࢽْ بَوَࢽْجُرُو ثُ ࢻِ تَدَدْرُو ثَکِّیَ ثْرَوُورُو کٜوُورُو؞
[63] جَکَرِیَّ أَلُّو ثُوُورٜ تِلَࢽْ «ثُࢽْجُ یَحْیـَى» رُوُیٜࢽُو، کُورُو تَیِ سَمَّ أَجَࢻْکٜرَ؞
[64] سَدْمَࢽْ جَکَرِیَّ ثِ یٜ ثُوَࢽْدٜ، تْلَمْࢽْجُ یٜ وُیْدٜ، اللَّهَ ثُࢽْغُورِیَرُو مَࢽَ بَدِیٜࢽُو؞
[65] دَجِ کْمَسْکِیَࢽْجَ سَمَّ رِیٜرَ، کُورُو لَوَرْ أَدْ ثِدِࢽْجَ یَحُدِیَیٜ کَوْوَ کُرَ کُرَا سَمَّرُو تَتَرْغَادَ؞
[66] جَمَ أَدَ ࢻَࢽْجَࢽَ سَمَّ کَرْوُࢽْجَࢽْ رُوجَࢽَ، أَمَࢽْجَرُو: «تَدَاࢽَ أَدْ، أَوِرُو غْلٜ وَلْجِ؟» ثَࢽِ؞ ࢻَغَتُّو مُکُّو کْمَࢽْدٜىٰدْ تِلَࢽْ کْرْغَ؞
[67] دَجِ رُحُ اللَّهیٜ جَکَرِیَّرُو جْࢻْثِیٜ ࢽَوِࢽَوِ ثْدٜ:
[68] «اللَّه کْمَ إِسْرَاءِیلَوُیٜدَ یُࢽْغُورِیُو! ࢽغُوُ جَمَࢽْجُیٜرُو ࢽغَیٜ تَیِیَ مٜرُجْࢽَ،
[69] أَࢽْدِرُو ثُرُو کَدُوُ کَࢽْجِࢽْجُ مَیْ دَاوُدَیٜࢽْ ࢽجْکَّیِمَ کْࢽْدُوُووَ غَلَسَاࢽَ؞
[70] کْمَࢽْدٜ کُرٜࢽْ ثِ ࢽَوِیَࢽْجُ کْرٜجْࢽَیٜࢽْ وُلْجْࢽَدْ غَیْ،
[71] مُکُّو کْلَدُووَࢽْدٜیَ وَدُوُࢽْدٜ سَمَّایٜࢽْ سَمُویٜ
[72] أَمَࢽّجُ بَرْغَا کُولْجْࢽِّلَࢽْ أَمْوُرَوَࢽْدٜرُو کَࢽْجِمَرِࢽْجُ ࢻْلٜجِیے؞
[73] أَکُّو کَࢽْسِ دُوُوࢽْ بَوَࢽْدٜ ࢽَوِ إِبْرَاهِیمْبُو جْبُّࢽَدْ:
[74] مُکُّو کْلَدُووَࢽْدٜىٰࢽْ أَࢽْدِیَ سَمُویِیَ، أَࢽْدِ یٜ رِدُ بَوُووَرُو رَࢽْغِیٜ تِیَ غَیْیٜ
[75] ࢻُوُࢽْجُࢽْ ࢽَࢽْمُمِࢽَّ ࢽَࢽْجِرٜیَلَࢽْ کَوُࢽْدٜ سَمَّࢽْ تِرُو أَمْبْتْکْیْیٜ؞
[76] «ࢽِ یٜ، تَدَࢽِ، ࢽِیَ ࢽَوِ مَیْ سَمٜمَیٜࢽْ بُواْࢽْجَیْ؞ کْمَدْࢽْ ࢻُوُࢽُّو لٜࢽْمٜ تِرُو جَوَلْ دَبَّرْغْمِ،
[77] جَمَࢽْجُرُو بِوُࢽْجَ غَوُرْدُیٜࢽْ ࢽجْکَّوُودَ إِسَࢽُوغْمِ؞
[78] اللَّه کْمَࢽْدٜ کَࢽْجِمَرِمَ یٜ، سٜرْمَ یٜ ࢽَࢽْغَرُو، ثَکّٜ ࢽُرْ کُدُومَ ࢽَࢽْدٜرُو سَمٜلَࢽْ إِسٜ
[79] أَمْ دُوُوَ کَوْدِ کَرْمُویٜیَلَࢽْ دَسَاࢽَدَ وَسِّ، کُورُو أَࢽْدِرُو جَوَلْ ࢽَࢽْلٜوَیٜدَ ࢻْلٜسَغَیْ؞»
[80] أَدْغَیْمَ تَدَدْ وُرَجِ یٜ، رُحُ اللَّهیٜࢽْ دُࢽُووَجِ یٜ، حَرْ یِمْ جَمَ إِسْرَاءِیلَیٜرُو ࢻْلٜدْغْࢽَدْرُو کَرَاࢽْ کْرْغَ؞