[1] بَدِدُرَمْࢽِࢽْ کَلْمَ، کَلْمَدْ اللَّهَ رُوکُّو، کَلْمَدْ اللَّه کْلَࢽْجُدْمَ؞
[2] بَدِدُرَمْࢽِࢽْ اللَّهَ رُوکُّو کَسَرْغَ؞
[3] أَوِسُو تِیٜلَࢽْ أَلَکْتْࢽَ؞ ثُرُو أَوُو أَلَکْتْࢽَ سَمَّیٜࢽْ، تِیٜࢽْ غْࢽِیَ، أَوُو أَلَکْتْࢽَ ࢻَلْمَ بَوُو؞
[4] تِلَࢽْ رُو کْرْغَ، رُودْ تِمَ ࢽُرْ کَمْبٜ وُو؞
[5] ࢽُرْدْ ثُرُو دُوُیٜࢽْ یِیلْجِ، أَمَّ دُوُدْ تِیَ ثْمُواْࢽِّ؞
[6] کَمْ لَا اللَّه ثُࢽُودْࢽَ مبٜجِ، ثُࢽْجُ یَحْیـَى؞
[7] تِدْ شٜدَرُو کَدِیُو؞ أَمْ سَمَّ تِیٜلَࢽْ کَسَثَّرُو، ࢽُرْدَ شٜدَجُورُو کَدِیُو؞
[8] تِ کْلَࢽْجُ غْࢽِ ࢽُرْدْ وُو، أَمَّ ࢽُرْدَ شٜدَجُورُو کَدِیُو؞
[9] ࢽُرْ أَدْ تِمَ ࢽُرْ جِرٜىٰ وُو، دُࢽِیَرُو إِسٜ أَمْ سَمَّا وَسِّمَدْ؞
[10] تِدْ دُࢽِیَلَࢽْ دُوُوࢽْ، دُࢽِیَدْ یٜ تِیٜلَࢽْ أَلَکْتْࢽَ یَیٜ، دُࢽِیَدْ تِیَ ࢽُوجْࢽِّ؞
[11] ࢽَ جَمَࢽْجُیٜرُو کَدِیُو، أَمَّ جَمَࢽْجُ تِیَ ثَمُواْࢽِّ؞
[12] أَمَّ أَمْ دُوُوࢽْ تِیَ ثَمُویٜ ثُࢽْجُ کَسَثَّࢽَمَسُودْرُو کْࢽْدُوُو تَدَوَ اللَّهیٜرُو وَلْدُیٜ کَیْࢽُو؞
[13] تَیِدْ بُیٜࢽْ غْࢽِ، بِ کْرَوُو تِییٜࢽْ غْࢽِ، بِ کْرَوُو کَمْبٜࢽْ غْࢽِ، اللَّهیٜࢽْ کَتَمْبْرَ؞
[14] کَلْمَدْ کَمْبُو وَلْجٜ دَوُࢽْدٜࢽْ ࢽَࢻْکٜࢽُو؞ تِ جَوْرُو سٜرَّ یٜ، جِرٜیَ یٜ؞ کُورُو دَرَجَࢽْجُوَ رُیْیٜࢽَ، دَرَجَ دُوُوࢽْ دَرَجَ تَدَ تِلُو لُوکْ ࢽَ بَوَیٜࢽْ إِسْࢽَیٜدْ غَیْ؞
[15] یَحْیـَى تِیَ شٜدَجٜ کُواْ سَࢻْثٜ: «تِمَ کَمْ کْلَࢽْجُࢽْ وُیٜ: ‹کَمْ ࢽغَوُوࢽِࢽْ إِسِدْ وُوَ کُوسْࢽَ، وُࢽْ بُرْوُوࢽُّو تِ مبٜجِ ࢽَࢽْغَرُو،› وُلّْکّْࢽَدْ؞»
[16] بَرْغَ دْࢻْتُوُࢽْجُ دَمَ بَوُودْرُو أَࢽْدِ سَمَّ سٜرْ ثِࢽْجُ بَوُو کِوَࢽْدِیٜ؞
[17] وَدَدْ ࢽَوِ مُوسَیٜࢽْ کَدِیُو، أَمَّ سٜرَّ جِرٜیَدْ عِیسَى أَلْمَسِیوُیٜࢽْ کَدِرَ؞
[18] وُࢽْدُمَ ࢽغَلْتٜ اللَّهَ ثُرُࢽَ بَوُو، أَمَّ تَدَ تِلُو لُوکْ، تِدْ اللَّه یٜ، ࢽَ بَوَیٜࢽْ دْغَࢽَمَ یٜ، تِمَ اللَّهدَ أَࢽْدِرُو إِسَࢽُوسَا؞
[19] سَ یَوْدِیَ جٜرُجَلٜمْࢽِࢽْ ࢽَ یَحْیـَیٜرُو رِمَࢽَّا لٜوِیَآ تِ وُࢽْدُرُو کُورُورُو ثَࢽُودْࢽَدْࢽْ، أَکُّو شٜدَ ࢽَوِ یَحْیـَیٜدْ؞
[20] أَࢽْغْرْجْࢽِّࢽْ ࢻٜدٜرُو وُلْجٜ تَیِرُو: «وُ غْࢽِ أَلْمَسِیوُدْ وُو!» یٜࢽُو؞
[21] دَجِ تِرُو: «ࢽِ وُࢽْدُ غْلٜ؟ ࢽِمَ وَ ࢽَوِ إِلْیَ وُو؟» ثَࢽٜ تِیَ کٜوُورُو؞ تَیِرُو: «أَعَ، وُ غْࢽِ،» یٜࢽُو؞ تِرُو: «ࢽِ ࢽَوِدْ وَ؟» یٜرَࢽِّیَ، تَیِرُو: «أَعَ،» یٜࢽُو؞
[22] دَجِ تِرُو: «تُو، ࢽِ وُࢽْدُ غْلٜ؟ جَاوُ أَمْ أَࢽْدِیَ سَࢽُودْࢽَدْرُو یَدِیُورُو، أَوِ غْلٜ کْلَࢽْمْلَࢽْ وُلّْمِ؟» ثَࢽٜ کٜوُورُو؞
[23] یَحْیـَیٜ تَیِرُو: «وُمَ ‹کَمْ کَرَاࢽْ کُواْ سَࢻْثٜ: جَوَلْ کْمَࢽْدٜىٰ ثْکُّو دٜوُو! ثْࢽِ،› ࢽَوِ إِشَیَ وُلْجْࢽَدْ غَیْ،» یٜࢽُو؞
[24] ثُرُو کْوُ ࢻَرِسَوَیٜ یٜࢽْ أَمْ لَآ ثَࢽُودْࢽَ؞
[25] تَیِیٜ یَحْیـَرُو: «ࢽِ أَلْمَسِیوُ غْࢽِ، ࢽَوِ إِلْیَ یٜ غْࢽِ، ࢽَوِدْ یٜ غْࢽِ، أَوِرُو غْلٜ أَمْبُو کَسَلَ یِدّْمِ؟» ثَࢽٜ تِیَ کٜوُورُو؞
[26] تَیِرُو: «وُدْ إِࢽْغِلَࢽْ أَمْبُو کَسَلَ کِدّْکُّو، أَمَّ دَوُࢽْدُوࢽْ کَمْ لَا دَادَ ࢽُوࢽُوِّ مبٜجِ،
[27] تِدْ کَمْ جٜ سُࢽُوࢽْجُیٜ وُیْدُمَ تِکّْࢽِ ࢽغَوُوࢽِࢽْ إِسِ،» یٜࢽُو؞
[28] أَوُو أَࢽِ بْلَ بَیْتَࢽِ ثِ بْرْمْ جُورْدَࢽِیٜ تُودْࢽْ ࢽَ دُوُوࢽْ یَحْیـَى أَمْبُو کَسَلَ ثْدِّدْࢽْ وَکَّیٜرَ؞
[29] وَجْࢽَࢽْجُوَ ࢽَوِ یَحْیـَى ࢽَࢽْجُرُو عِیسَى کْࢽْدٜ ثْدِ کِرُࢽِّیَ، تِیٜ: «أَکُّو تَمَ اللَّهیٜ بِوُ دُࢽِیَیٜ ࢽغُوجِمَدْ!
[30] تِمَ کَمْ کْلَࢽْجُࢽْ وُیٜ: ‹کَمْ ࢽغَوُوࢽِࢽْ إِسِدْ وُوَ کُوسْࢽَ، وُࢽْ بُرْوُوࢽُّو تِ مبٜجِ ࢽَࢽْغَرُو،› وُلّْکّْࢽَدْ؞
[31] وُ کْلَࢽِ تِیَ ࢽُوکّْࢽِ، أَمَّ إِࢽْغِلَࢽْ أَمْبُو کَسَلَ ࢽجْدُّورُو کَدِکُّو، تِ جَمَ إِسْرَاءِیلَیٜرُو ࢻْلٜدُوُورُو؞»
[32] یَحْیـَى شٜدَجٜ: «رُحُ اللَّهیٜ أَلَمَ بُلَّمْ غَیْ سَمٜلَࢽْ جْࢻْثٜ کْلَࢽْجُࢽْ ࢽَࢻْثِ کِرُکُّو؞
[33] وُ کْلَࢽِ تِیَ ࢽُوکّْࢽِ، أَمَّ اللَّه وُوَ إِࢽْغِلَࢽْ أَمْبُو کَسَلَ یِدّْکُّورُو سُࢽُودْࢽَدْیٜ وُرُو: ‹رُحُدْ سَمٜلَࢽْ جْࢻْثٜ کْلَ کَمْ لَایٜࢽْ ࢽَࢻْثِ رُمِ؞ تِدْ رُحُ اللَّهیٜࢽْ أَمْبُو کَسَلَ ثْدِّ،› ثْࢽَّ؞
[34] وُ کْلَࢽِ رُکّْࢽَ یٜ، شٜدَࢽْکّْࢽَ یٜ، تِمَ تَدَ اللَّهیٜدْ وُو!» یٜࢽُو؞
[35] وَجْࢽَࢽْجُوَ ࢽَوِ یَحْیـَى ࢻُوُرَوَࢽْجُیٜ یِࢽْدِیَ رُوکُّو ࢽَدْࢽْ دَجَࢽَ دُوُوࢽْ،
[36] یَحْیـَى عِیسَى کُوجِ کِرُࢽِّیَ، تِیٜ: «أَکُّو تَمَ اللَّهیٜ!» یٜࢽُو؞
[37] ࢻُوُرَوَ یِࢽْدِدْ مَࢽَ أَدَ ࢻَࢽْجَࢽٜ عِیسَىٰ غٜیَ؞
[38] عِیسَى سُوُورْدٜ تِیَ جَغَیْ کِرُࢽِّیَ، تَیِرُو: «أَوِ مَࢽُوِ؟» ثْࢽٜ کِوُورُو؞ تِرُو: «رَبِّ، ࢽدَرَࢽْ کْرْغَمْ؟» ثَࢽٜ تِیَ کٜوُورُو؞ مَاࢽَ رَبِّیٜدْ سَیِࢽَّ؞
[39] عِیسَیٜ تَیِرُو: «أَرُواْ رُیْوُو!» ثْࢽٜ لٜجَࢽٜ ࢽَ دْغَࢽَدَ ثَرُࢽٜ ࢽَدْࢽْ تِیَ رُوکُّو دَبْدُیٜرَ؞ سَدْ یٜ سَ دٜوُ کَجِرِیٜ غَیْ؞
[40] تَیِ یِࢽْدِ مَࢽَ یَحْیـَیٜدَ ࢻَࢽْجَࢽٜ عِیسَىٰ جَاࢽَدْیٜ ࢻَلْࢽْجَیٜ ثُࢽْجُ أَࢽْدَرَوُسْ، یَاࢽَ سِمَࢽْ بِتُرُسّٜ؞
[41] بُرْوُوࢽْ لٜجٜ یَاࢽَࢽْجُ سِمَࢽَّ مَجٜ تِرُو: «أَلْمَسِیوُدَ ࢻَࢽْدِیٜࢽَ!» یٜࢽُو؞ مَاࢽَ أَلْمَسِیوُیٜدْ کَمْ تِرُو کْرِسْتِ ثَࢽِ؞
[42] دَجِ سِمَࢽَّ ࢽَ عِیسَیٜرُو کِوُدُو؞ عِیسَى تِیَ کِرُࢽِّیَ، تِرُو: «ࢽِمَ سِمَࢽْ تَدَ یَحْیـَیٜ، ࢽَ أَدْࢽْ ࢻُوُࢽْ ࢽِیَ کٜࢻَسْلَࢽْ بُواْࢽْجَیْ،» یٜࢽُو؞ مَاࢽَ کٜࢻَسّٜدْ بِتُرُسْ؞
[43] وَجْࢽَࢽْجُوَ عِیسَى ثِدِ غَلِلٜىٰرُو لٜدُرُو ࢽِیَ ࢽغُویٜࢽُو؞ ࢻِلِبُسَّ کِوَࢽْدْࢽِّیَ، تِرُو: «وُوَ سْغَیْ!» یٜࢽُو؞
[44] ࢻِلِبُسْدْ کَمْ بَیْتْسَیْدَیٜ بْلَ أَࢽْدَرَوُسَّ بِتُرُسَّیٜ؞
[45] دَجِ ࢻِلِبُسْ یٜ لٜجٜ ࢽَتَࢽِیٜلَّ مَجٜ تِرُو: «کَمْ دُوُوࢽْ کْلَࢽْجُࢽْ ࢽَوِ مُوسَى ثُرُو أَتَّوْرَیٜࢽْ رُوُجٜ ࢽَوِیَ کِتَوُلَࢽْ رُوُجَࢽَدَ ࢻَࢽْدِیٜࢽَ! تِدْ عِیسَى کَمْ ࢽَجَرَتّٜ، تَدَ یُوسُࢻُیٜ،» یٜࢽُو؞
[46] ࢽَتَࢽِیٜلّٜ تِرُو: «أَ! ࢽَجَرَتْلَࢽْ أَوُو لَا ࢽغْلَ ثُلُوِ وَ؟» یٜࢽِّیَ، ࢻِلِبُسّٜ: «أَرٜ رُیْ!» یٜࢽُو؞
[47] عِیسَى ࢽَتَࢽِیٜلْ ࢽَࢽْجُرُو کْࢽْدٜ ثْدِ کِرُࢽِّیَ، کْلَࢽْجُࢽْ مَࢽَجٜ: «أَکُّو إِسْرَاءِیلَمَ جِرٜىٰ، تِلَࢽْ أَوُو جِرٜࢽَمْبُیٜ بَوُو!» یٜࢽُو؞
[48] ࢽَتَࢽِیٜلّٜ تِرُو: «ࢽدَیِࢽْ وُوَ ࢽُوسٜمْ؟» ثْࢽٜ تِیَ کِوُورُو؞ عِیسَیٜ تِرُو: «کَوُ ࢻِلِبُسْ ࢽِیَ بُواْࢽْجِمَرُو، ࢽِ ثِدِیَ تَرْمُیٜࢽْ دُوُوࢽْ، ࢽجُرُکّْࢽَ،» یٜࢽُو؞
[49] دَجِ ࢽَتَࢽِیٜلّٜ تِرُو: «سَیِࢽَّ، ࢽِمَ تَدَ اللَّهیٜدْ وُو! ࢽِمَ مَیْ إِسْرَاءِیلَوُیٜدْ وُو!» یٜࢽُو؞
[50] عِیسَیٜ تِرُو: «ثِدِیَ یَ تَرْمُیٜࢽْ ࢽجُرُکّْࢽَ ࢽِرُو وُلْࢽْجْغْکّْࢽَدْرُو وَ وُوَ کَسَࢽْسٜمْ؟ أَوُو أَࢽِیَ کُوجَࢽَ رُمِ،» یٜࢽُو؞
[51] دَجِ عِیسَیٜ: «جِرٜمَرُو ࢽَیِرُو وُلْࢽْجَغَکِّ، سَمٜ کَادَ مَلَیْیَوَ اللَّهیٜ کْلَ تَدَ کَمْبٜدْیٜࢽْ تَثَّیْ یٜ، جْࢻْثَیْ یٜ رُوِ،» یٜࢽُو؞